Amos 5
5
1Clywch y gair hwn a ddygaf yn farwnad amdanoch, Dŷ Israel,
2Cwympodd y wyry Israel,
Ni chyfyd mwy;
Gadawyd hi ar ei llawr,
Nid oes a’i cyfyd.
3Canys fel hyn y dywed fy Arglwydd Iafe,
“Y ddinas a aeth allan yn fil
Cant a fydd iddi yn weddill;
A’r hon a aeth allan yn gant
Deg a fydd iddi yn weddill i Dŷ Israel.”
4Canys fel hyn y dywed Iafe wrth Dŷ Israel,
“Ceisiwch fi a byw fyddwch,
5Ac na cheisiwch Fethel,
Na ddeuwch i Gilgal chwaith,
Ac nac ewch drosodd i Feerseba,
Canys diau yr â Gilgal yn gaethglud,
A Bethel a fydd yn anwiredd.”
6Ceisiwch Iafe, a byw fyddwch,
Rhag iddo ruthro fel tân, Dŷ Ioseff,
Ac ysu fel na bo ddiffoddydd i Fethel —
7Chwi sy’n troi barn yn wermod,
A bwrw cyfiawnder i’r ddaear.
8Gwneuthurwr Pleiades ac Orion,
Ac y sy’n troi tywyllwch dudew yn fore,
A thywyllu dydd yn nos;
Ac y sy’n galw ar ddyfroedd y môr,
A’u tywallt ar wyneb y ddaear,
Iafe yw ei enw.
9Yr hwn sy’n fflachio difrod ar y cryf,
Ac yn dwyn#5:9 Ac yn dwyn Felly LXX; Heb. A daw difrod ar y gaer.
10Casânt a geryddo yn y porth,
A ffieiddiant a lefaro wir.
11Am hynny, oherwydd mathru ohonoch y gwan,
A mynnu grawn yn anrheg ganddo,
Adeiladasoch dai o gerrig nadd,
Ond ni chewch drigo ynddynt;
Planasoch winllannoedd dymunol,
Ond ni chewch yfed eu gwin.
12Canys gwybûm mai aml eich troseddau,
A lluosog eich pechodau —
Chwi sy’n blino’r cyfiawn,
Yn derbyn llygrwobr,
A throi heibio’r tlodion yn y porth.
13Am hynny y bydd y cyfiawn yn ddistaw yr amser hwnnw,
Canys amser drwg yw.
14Ceisiwch dda, ac nid drwg,
Fel y boch fyw,
Ac y bo felly Iafe, Duw lluoedd, gyda chwi,
Megis y dywedwch.
15Casewch ddrwg a cherwch dda,
A sefydlwch farn yn y porth;
Ysgatfydd y trugarha Iafe, Duw lluoedd,
Wrth weddill Ioseff.
16Am hynny fel hyn y dywed Iafe, Duw lluoedd, fy Arglwydd,
“Ym mhob maes y bydd alaeth,
Ac yn yr holl heolydd dywedant Och! Och!
A galwant yr aradwr i alar,
Ac am alaeth gan y rhai a fedr alarnad.
17Ac yn yr holl winllannoedd y bydd alaeth,
Canys tramwyaf drwy dy ganol.”
Medd Iafe.
18A! y rhai sy’n chwennych dydd Iafe,
Pa les fydd dydd Iafe i chwi?
Tywyllwch yw hwnnw ac nid goleuni.
19Megis pe ffoai un rhag llew,
Ac arth yn ei gyfarfod;
Neu ddyfod i’r tŷ a phwyso ’i law ar y pared,
A sarff yn ei frathu.
20Onid tywyllwch yw dydd Iafe, ac nid goleuni?
Ie, dudew ac heb lewych arno.
21“Caseais, dirmygais eich pererindodau,
Ac nid ymhyfrydaf yn eich cymanfaoedd;
22Canys pan offrymoch imi boeth-offrymau
A’ch bwyd-offrymau, ni byddaf fodlon,
Ac ar hedd-offrwm eich pasgedigion nid edrychaf.
23Bwrw ymaith oddiwrthyf sŵn dy gerddi,
Am na wrandawaf ar beroriaeth dy nablau,
24Eithr treigled barn fel dwfr,
A chyfiawnder fel nant ddihysbydd.
25A ddygasoch imi aberthau ac offrwm
Yn yr anialwch ddeugain mlynedd, Dŷ Israel?
26Am i chwi gludo Siccwth eich brenin,
A Chiwn eich seren-dduw,
Eich delwau, y rhai a wnaethoch i chwi,
27Mi a’ch caethgludaf chwi tu hwnt i Ddamascus.”
Medd Iafe, Duw lluoedd yw ei enw.
Currently Selected:
Amos 5: CUG
Highlight
Share
Copy
Want to have your highlights saved across all your devices? Sign up or sign in
© Urdd y Graddedigion, Prifysgol Cymru 1945
© Guild of Graduates, University of Wales 1945
