Məfaʼə 11

Ndzaŋ Pita kə Fiʼtə̂ nə́ Anuə á kə Laŋ nə́ á Ndɛ̂ Kɔneliɔs á Mbô Nkyeetə Pɔ́ pə́ Yeso á Jɛlusalɛmə

1Məntú mə́ Yeso pó pətsə́ ngaŋə́zoŋə́ndzəm Yeso á mə́m aláʼ Judya tsɔʼə ətsəm pó zóʼ ńgə́ pətəjǐsê pó kə́ ḿbímə atséebə Əsê. 2Ndzaŋə ándó Pita a nə ńkɔ́ʼ nə́ ńgɛnə̂ á Jɛlusalɛm lə́, pəənə ándó pó kə lɔ nə́ ńgə́ pə́ póʼ pətəjǐsê pó kə tə́ néŋ filə atû Pita, ə́sóŋə ńgə́: 3“Lə́ nə ńgɛlə̂ akə̂ pɨ ghɛnə̂ á nəghéenə á ndɛ̂ pətəjǐsê pə́ kě nə́ ághɔ́b póʼ pô ńjî məjî pɨ po?”

4Pita a chwáakə á mə́ fiʼtə̂ ághɔ́b nə́ anuə atsəm ndzaŋ á kə laŋ nə́. 5A sóŋ ńgə́, “Maŋ nə ńchîə á mə́mə aláʼə Joppa ńtə́ ńchaʼtə́sê ńdê ndzəəmə atəəmə́tɨ́ ńdzə́ənə ajûtsə́ ándó mɛ́ apagə atsəʼə́ á lǒo nəpó ńtə́ ńtsóolə pə́ wam nə́ məlá mɛ́n nəkwa, á tsó ńtɨ́ ḿbáatə mə. 6Maŋ pyádnə ńdɔg ndɛd ńnáŋ mə́m əjǐ ńjɨ́ ntê məna mətsəmə, məna mə́ akɔb pópə mimə́ nchîndɛ̂, məna mə́ kə́ŋ nə́ ńdzoŋ ḿbá pəsə́ŋ pə́ zag nə́ atǐə. 7Maŋ tíʼ ńdzóʼ ngye yitsə̌ ə́ sóŋ nə́ maŋ ńgə́, Pita, lǒo əsê ńjwítə ńkɔ́lə.”

8Maŋ pə́ ńkǐə mə ə́sóŋ ńgə́! “Ajúmə féŋ nə́ kɨ ńkě ŋwaʼ pô á kě ntso maŋ kə̂ láʼə kwúnə pô. 9Ngye zə́ kə́ ḿbɨ ńtséebə á nəpó ngǎ yitsə̌ ə́sóŋ ńgə́, Kɔ gho fóŋə ajûtsə́ Əsê á ghɛd nə́ á ŋwaʼ ńgə́ zə́ələ́ á féŋə. 10Anu zəənə́ á kə laŋ lə́ ngǎ teelə́, ajúmə atsəmə á pɨ ńkɔ́ʼ ńgɛnə̂ zə́ələ́ á nəpóolə.” 11Tsɔʼə əghâ yi ə́wɨ́ mbyâŋnə teelə́ pə́ kə tú nə́ á mbô maŋ pó lǒo aláʼə Sisalya ńgyǐ ńkwúnə á ndɛ̂ pəg nə́ ńchî nə́ ə́wə́. 12Ajwǐəsê á sóŋə á mbô maŋ ńgə́ maŋ ghɛn pə̌gpo tsɔʼə tə ghə́ atûə mə á koʼlə̂. Pəlim pə́ pɛ́n ntogə́ pó kə lǒo nə́ Joppa lə́ pó zoŋə̂ mə pə̌gpo ghɛn tə ńkwúnə ndɛ̂ ŋwu yi wə́, 13a fiʼtə̂ áwə́g ndzaŋ a kə zɨ́ nə́ ntseŋndɛ̂sê a tə́əmə á mə́m ndɛ̂ yə́, ńtíʼ ə́sóŋ nə́ yi ńgə́, “Túmə ŋwu tsə́ á Joppa á ghɛn ə́fóŋə a ŋwu páʼ məlɛ́n mí mə́ pə́ nə́ Saamun Pita lə́. 14A yǐ tséebə atséebə Əsê á mbô gho, ə́ laŋ ə́lɨ́d Əsê a chwádkə a gho, ńdzoŋ ḿbeg ngwud əzo wə́. 15Tsɔʼə ándó maŋ pěʼ nə́ ńchwáakə á mə́ tsáb nə́ lə́, Ajwǐəsê a tsóolə a mbɨ pó tsɔʼə ndzaŋ a nə ńtsó nə́ a mbɨ pɛnə̂ á nəchwaakənə́ lə́. 16Lə́ maŋ tíʼ ńkwúmtə anu páʼ Mmaʼmbîə a nə sóŋ nə́ á mbô pɛn ńgə́, Jɔnə a nə fɛ̂ lə́ nkǐə á mbô pəənə, lə́ pə́ yǐ fɛ̂ á wɨ́ lə́ nə́ nkǐə Ajwǐəsê. 17A lánə ńchígə́ ŋ́ŋwaʼ ńgə́, məfɛ̂nə Əsê a kə fɛ̂ nə́ á mbô pətəjǐsê lə́ tsɔʼə məfɛ̂nə páʼ a kə fɛ̂ nə́ á mbô pɛn nə́ ndɛd páʼ pɛn kə néŋ nə́ məntɨ́ mɛn nə́ Mmaʼmbî Yeso Klisto. Maŋ tíʼ ḿbə́ lə́ əwə á mə́ sóŋ nə́ ńgə́ kɔ Əsê á ghɛlə̂ anuə ajíə.”

18Ndzaŋə ándó pó nə ńdzóʼ nə́ atsáb zɨ lə́, ńkě nə́ anu yitsə̌ pɨ chî mbɔʼ pó sóŋ pô, pó tíʼ fɛ̂ nəgháʼə á mbô Əsê ə́sóŋ ńgə́: “Lə́ pə́ ńgə́ Əsê a kə́ fɛ̂ əseenə á mbô pətəjǐsê ńgə́ pó kwúblə məntɨ́ mɔ́b ńkə́ ńjî nchîntɨ páʼ zɨ́d mɛdnə̂ nə́ ngǎ mɔʼə́.”

Nkyeetə Pɔ́ pə́ Yeso á Antiokə

19Pɨ pó kə shamnə̂ ńté ńgə́ pə́ kə tə́ ńtsaŋkə̂ ághɔ́b nə́ ndɛlə́ ándó pə́ kə jwítə nə́ Stifən lə́, pó kə ghɛnkə̂ nə́ ətú mbîə ándó Fonisya, Sayiplus mbɨ ḿbə́ nə́ Antiok ńnáŋkə nkɨ yi əshîʼnə wɨ́ tsɔʼə á mbô Pəjusə. 20Lə́, á mə́m pó mbyâŋnə yitsə́ kə chî wɨ́ páʼ pó kə lǒ nə́ Sayiplus pó Sayileen, ndzaŋ pó kə ghɛn nə́ Antiok lə́ ńnáŋkə nkɨ yi əshîʼnə wə́ á mbô Pətəjǐsê, ə́fiʼtə̂ ághɔ́b nə́ anu ńté Mmaʼmbî Yeso. 21Mətɨ mə́ Əsê mə́ nə ńchîə a mbɨ pó, ńgɛd pɨ pipə nɨ́ nə́ pó néŋ ntɨ́ əghɔ́b nə́ Əsê ńtíʼ ńdzoŋə̂ Mmaʼmbîə.

22Nkɨ ńté anu zɨ́d zɨ ə́ nə ńnyi tə ńkwúnə á mbô nkyeetə pɔ́ pə́ Yeso á Jɛlusalɛm, pó tíʼ ńtúmə Banabas ńgə́ a ghɛnə̂ Antiok. 23Əghâ ándó páʼ Banabas a nə́ ńkwú nə́ Antiok ńjɨ́ ndzaŋ Əsê kə fɛ̂ nə́ afoʼə á mbô pó lə́, á nə ńkɔŋtə̂ ńtə́gtə ághɔ́b pətsəm ə́sóŋ ńgə́ pó tə́gə atûə azɔ́b nə́ anǔəsê ńkə́ ńdzoŋ ndzəm Mmaʼmbî nə́ ntɨ́ əghɔ́b ətsəmə. 24Banabasə a nə ḿbə́ lə́ ŋwu yí əshîʼnə, ńdwɛ́nkə nə́ Ajwǐəsê mbɨ ńtúg mbimə́, pɨ pipə nɨ́ nə́ pó kə néŋ ntɨ́ əghɔ́b nə́ Mmaʼmbî ńtíʼ ńdzoŋə̂ yə́.

25Banabasə a tíʼ ńgɛnə̂ á Tasusə á mə́ náŋ nə́ Sɔlə. 26Ndzaŋə a nə ńdzɨ́ nə́ yí lə́, ńdɔg a yí ńgyǐ nə́ yə́ á Antiokə. Á mə́m táʼ ngoʼ pó Banabasə tíʼ ńtsɛntə̂ pópə nkyeetə pɔ́ pə́ Yesö, ńdzéʼkə pɨ pipə nɨ́ nə́. Lə́ nə́ ḿbə́ Antiok páʼ pə́ nə́ ḿbeg nə́ ńchúʼə mə́ fóŋ nə́ ngaŋə́zoŋə́ndzəm Yeso nə́ Pɔ́ pə́ Yeso.

27Nə ndɛd zɨ məntúmə́sê mətsə́ mə́ fɛ́lə á Jɛlusalɛm ńtsó ńgɛnə̂ Antiok. 28Ńdaŋ nə́ mətɨ mə́ Ajwǐəsê táʼ ŋwu əghɔb yitsə̌ páʼ pə́ nə fóŋ nə́ nə́ Agabus, a tíʼ ńdǒo ndəsê Ajwǐəsê á sóŋ nə́ yí ńgə́ á ə́sóŋ nə́ ŋwu ntsəm ńgə́ tə́kɔʼ njiə á yǐ kwúnə á mə́m mbî ntsəmə. (Anu zəənə́ á kə lɔgə̂ aliʼ lə́ nə́ ndɛd páʼ Klodiɔsə a nə ḿbə́ nə́ əfo əláʼ Lom ətsəmə). 29Ngaŋə́zoŋə́ndzəm Yeso pímnə ńgə́ ŋwu ntsəmə a yǐ fɛ̂ ajúmə atsəm páʼ mbɔʼ á fɛ̂ pə́ lɔg ńkwá pəlim pɔ́b ə́wɨ́ páʼ pó chî nə́ á Judya. 30Ndzaŋə ándó pó nə faʼ nə́ ə́lɨ́d lə́, ńtíʼ ńtú nkáb yi ə́wə́ á mbô Pɔl pó Banabasə ńgə́ pó ghɛn ə́fɛ̂ á mbô mətû mə́ nkyeetə pɔ́ pə́ Yeso á Judya.

Currently Selected:

Məfaʼə 11: azo

Highlight

Copy