Məfaʼə 12
12
Ndzaŋ pə́ nə Ńgɛn nə́ nə́ Mbiə á mə Tsaŋkə̂ nə́ Nkyeetə Pɔ́ pə́ Yeso
1Nə́ ndɛd zɨ́d zə́ əfo Ɛlɔdə a nə ńchwáakə á mə tsaŋkə̂ nə́ nkyeetə pɔ́ pə́ Yeso. 2A nə́ ńgɛd pə jwítə a Jɛmsə á pə́ nə́ mɔ́mɛ́ Jɔn nə́ ŋwíŋ ntsoolə. 3Ndzaŋə a nə ńdjɨ́ nə́ ńgə́ anu zɨ́d zəənə́ a pɔŋ Pəjusə lə́ ńtíʼ ńgɛd pə́ kə́ ńgwaamə̂ a Pita. A nə ńgɛlə̂ anu zɨ́d zɨ lə́ nə́ ndɛd páʼ pɔ́ pə́ Islɛl pə́ nə ńchî nə́ á mə́mə akɔŋtə ndzáʼkə. 4Ndzaŋ pə́ nə ńgwam nə́ Pita lə́, əfo a ghɛd pə́ ńnéŋə yə́ á nkáʼə atsáŋə, ńtíʼ ńgɛd ńgə́ əkwɛlə ngaŋə́maʼə́ntso pɛ́n nəkwa pə́ tə́ ńnáŋə yə́. Akwɛlə atsəmə lə́ nə ńchî ngaŋə́maʼə́ntso zɛ́n nəkwa wə́. Ɛlɔdə á kə loonə̂ lə́ mə́ sáʼ nə́ əsáʼ yə́ á əshîsaŋə əghâ páʼ alě akɔŋtə ndzáʼkə á laŋ nə́. 5Pə́ tíʼ ńdɔʼkə̂ Pita a nkáʼə atsáŋə, lə́ ngaŋə́zoŋə́ndzəm Yeso ə́ pə̂ ńtə́ ńchaʼtə́sê nə́ ntɨ́ əghɔ́b ətsəm ńté yə́.
Pə́ Fógə Pita á Nkáʼə Atsáŋə
6Tsɔʼə nətúʼə alě páʼ mbi yǐ nə́ ə́fóg Ɛlɔd a ghɛd pə fógə a yi əsáʼ əsáʼ əyí lə́, Pita a tə́ ńdê á tətɨ pəsoye pɛ́n pɛ̌, pə́ kwúlə yí nə́ məŋkɛd mə́ atəənə́ mɛ́n mə́ mbɛ̌. Ngaŋə́pyáabə əliʼ pó tə́ ḿbyáb ntsǒnkáʼə atsáŋ wɨ́d wə̂. 7Tsɔʼə əghâ yi əwɨ́ Ntseŋndɛ̂ Mmaʼmbîə a ghabkə̂ ńtə́əmə aliʼ wɨ́d wə́, nkyaʼ tíʼ ŋ́ŋwaʼə̂ á mə́m ndɛ̂ atsáŋə. Ntseŋndɛ̂sê wə́ a tíʼ ńchiʼə̂ a Pita atûəmbeʼtə ə́sóŋ nə́ yí ńgə́, “Lǒo əsê nə́ mətəənə,” məŋkɛd mə́ atəənə́ mə́ á mbô Pita mə́ kyakə̂ ńgwukə̂ á ndəsê. 8Ntseŋndɛ̂sê wə̂ a tíʼ ə́sóŋə á mbô yí ńgə́, “Wê atsəʼə́ azô pópə ngwub əzô.” Pita a faʼ ə́lɨ́d, Ntseŋndɛ̂ wə́ a pɨ ńkə́ ə́sóŋə á mbô yí ńgə́, “Wáatə sooko əgho, ńgyǐ pɔ̌ ghɛnə̂.” 9Pita tíʼ ńdzoŋə̂ yí pó yí fɛ́lə á mə́m ndɛ̂ atsáŋ wə̂, a pə́ ńkě jî ńgə́ anu páʼ ntseŋndɛ̂sê wə̂ a faʼ nə́ lə́, lə́ chigə anu pô. A nə ńkwaŋə̂ ají ńgə́ yə́ lê lə́ ndzəəmə atəəmə́tə́əmə. 10Pó laŋə̂ aliʼ páʼ ntsɛɛmbi ngaŋə́maʼə́ntso pó nə ńtɨ́ nə́ ə́wə́ ńtə́ ḿbyáabə, ńkə́ ḿbɨ́ ḿbə́ nə́ ndzoŋkə aliʼ páʼ pətsə́ ngaŋə́maʼə́ntso pó nə ńtɨ́ nə́ ə́wə́. Ńtíʼ ńtə́ ńdwegtə̂ ńkoʼə̂ á ntsǒnkáʼə atəənə́ páʼ ə́ kwú nə́ á mə́m tə́kɔʼ tɔ́ŋə. Ntsǒnkáʼ ə́ ŋáʼnə á mbô pó á ngǎ yí, pó tíʼ fɛ́lə apeŋ ńkwúnə á alaŋə́ yitsə̌, ndzaŋ pó nə ńtə́ ńnyinə̂ ńtsóolə alaŋə́ lə́, ntseŋndɛ̂sê wə̂ á ghabkə̂ ḿbéŋə yə́ əmə́g Pita.
11Pita a tíʼ ńjîə anu páʼ á laŋ nə́ á mbɨ yí ńtíʼ ə́sóŋ ńgə́, “Əghâ nə́ maŋ jɨ́ ńgə́ lə́ ndə̌ŋdəŋ ńgə́ Mmaʼmbîə a túmə ntseŋndɛ̂ əyǐ ńgə́ a yǐ ə́fógə mə á mə́m mbô mə́ Ɛlɔdə ńkə́ ḿbɨ́ ə́fógə mə á mə́m mənu mətsəm páʼ pɨ pə́ Islɛl pó nə ńkwaŋ nə́ ńgə́ Ɛlɔdə a yǐ ghɛd nə́ maŋə.”
12Əghâ ándó Pita a nə ńjî nə́ anu jɨ lə́ ńtíʼ ńgɛnə̂ á ndɛ̂ Mɛɛlə páʼə a pə́ nə́ mǎpə Jɔn páʼə əlɛ́n əyí yitsə̌ nə ḿbə́ nə́ Mag lə́. Pɨ pipə nɨ́ nə́ pó nə ńkyeetə̂ ə́wɨ́ ńtə́ ńchaʼtə́sê. 13Pita a póʼtə ntsǒndɛ̂ á apeŋə́. Ngaŋəfaʼ yi məngyě á ndɛ̂ páʼ pə́ nə̈ fóŋ nə́ nə́ Looda a yǐəə mə́ ŋáʼ nə́ ntsǒndɛ̂. 14Mɔ̂ məngyě wə́ leŋ ngye Pita, mbɨ əjǐ pɔŋ lɛ tə á kə ḿbəənə̂ yí tsɔʼə tə ghə́ á ŋáʼ ntsǒndɛ̂, ńtíʼ fiʼtə̂ ńgə́ Pita a tə́əmə ntsǒndɛ̂.
15Lə́ pó sóŋ nə́ yí ńgə́, “Gho tə́ ḿbɛ́ɛlə!” A pə́ ńkə́ ə́fyáalə tsɔʼə fyád nə́ ńgə́ lə́ ndə̌ŋdəŋə́. Pó tíʼ ə́sóŋ ńgə́, “Lə́ ntseŋndɛ̂ əyǐə.”
16Lə́ Pita a ghɛn nə́ mbiə á mə́ póʼtə nə́ tə pó yǐ ńtíʼ ŋ́ŋáʼ ntsǒndɛ̂ ńdzə́ənə yí, á kɨʼnə̂ ághɔ́b lɛ tə tə. 17Pita a jíʼtə ághɔ́b nə́ apô ńgə́ pó naʼə̂. A tíʼ ə́fiʼtə̂ ághɔ́b ndzaŋ páʼ Mmaʼmbîə a kə fóg nə́ yə́ á nkáʼə atsáŋə. A tíʼ ə́sóŋə á mbô pó ńgə́ “Sóŋ nə́ á mbô Jɛmsə pó pətsə́ pəlim nə́ anu páʼ á laŋ nə́.” Á sóŋ lə́ ńtíʼ ḿmɛdtə̂ ághɔ́b ńgɛnə̂ yə́ aliʼə́ ndaʼə. 18Mbî ə́ fóg ngaŋə́maʼə́ntso páʼ pó nə náŋ nə́ yí pó chîə á mə́m mɛ́ ajwaʼlə, ńtíʼə ḿbítə məmbɨ mɔ́b ńgə́ lə́ kə laŋə̂ akə̂ ńdaŋ nə́ Pita? 19Ndzaŋə ándó Əfo Ɛlɔdə a nə náŋ nə́ Pita ńkě jɨ́ pó lə́, ńtɔʼnə̂ mənuə á mbô ngaŋə́pyáabə əliʼ zə́ ńtíʼ ə́sóŋ ńgə́ pə jwítə ághóobə́. Anu zəənə́ a kə laŋ lə́ Ɛlɔdə a mɛdtə̂ aláʼə Judya ńgɛnə̂ á Sisalya ńchî ə́wɨ́ nə́ ndɛd yitsə̌.
Ndzaŋ Ɛlɔdə a nə Kwû nə́
20Ɛlɔd a nə ńchígə́ ńdzáŋ ndě nə́ pɨ pə́ Tayile pó Sidɔnə, pó tíʼ ńtsɛntə̂ ńgɛnə̂ á mə́ jɨ́ nə́ yə́. Pó kə póʼmbô nə́ Bəlastusə, ŋwu páʼ á nə náŋ nə́ ntɔ́ʼ ńgə́ á kwáalə ághóobə́. Pó tíʼ ńgɛnə̂ á mbô Ɛlɔd ḿbóʼmbô ńgə́ pó po chî nə́ mbwɔ́dnə, ńté ńgə́ məjî mə́ aláʼ mɔ́b mə́ kə lǒo lə́ aláʼ Əfo Ɛlɔdə.
21A nə ḿbə́ alě yitsə̌ páʼ pə́ tsɔ́ʼ nə́, Ɛlɔdə wê atsəʼə́ nəfoonə ají ńnáanə aləŋənə́fɔ yí ńtíʼ ńtséebə á mbô pó. 22Pɨ pipə wɨ́ pó jwáglə məngye mɔ́b mə́ kɔ́ʼə atǐə, pó sóŋ ńgə́ “Lə́ ngye əsê lə́ kě yí ŋwu pô.” 23Tsɔʼə əghâ yi wɨ́ ntseŋndɛ̂ Mmaʼmbîə a póʼə yí ḿmaʼə̂, ńté ńgə́ a nə ńkě nəgháʼə á mbô Əsê fɛ̂ pô. Əkəgho kɔ́lə a yə́ a tíʼ ńkwûə.
24Lə́ atséebə Əsê á nə kwíŋ ńkə́ ńgɛn nə́ mbiə.
25Banabas pó Sɔl tíʼ fɛ́lə á Jɛlusalɛm əghâ pó nə məgtə̂ nə́ afaʼ azóobə́. Ńtíʼ ńdɔgə̂ Jɔn páʼ əlɛ́n yí yitsə̌ ə́ pə́ nə́ Mag lə́ pó po fɛ́lə.
Currently Selected:
Məfaʼə 12: azo
Highlight
Share
Copy
Want to have your highlights saved across all your devices? Sign up or sign in
