Luka 20

Aa kitoria etaasichere Yeso?

(Matayo 21:23–27; Marko 11:27–33)

1Kore mparri nabo eiteng'enita ltung'ana nelikoo Lomon Supati ta nkaji e Nkai, nepuonu lkutuaa laa laitainok la lasar o laiteng'enak loo nkitanapat tenebo o lpayiani, 2neiparichiere aajoki, <<Tiliki naa iyioo ajo taa kitoria iasita kuna baa, tanaa ng'ae likinchoo ana kitoria?>> 3Newoliki ajoki, <<Kaipar sii nanu ntae nkipara nabo. Entilikaaki ja, 4amaa nkipatisare e Yoana, chumata apa eing'uaa ana ltung'ana?>> 5Neipara maate ejokino, <<Kore tinikijo, <Chumata eing'uaa>, naa kejoki iyioo, <Oo payie eitu irukuruk ninye?> 6Naa tinikijo, <Ltung'ana eing'uaa>, nenang iyioo kulo tung'ana pooki aar too soito#20:6 Kore naipirita aar too soito naa kore apa tenear ltung'ana le Isirael ltung'ani, naa kenang ꞉pooki ng'ae ninye too soito ana metua., amu keata sipata aajo, kore Yoana naa loiboni le Nkai.>> 7Newoliki aajoki, mikiyielo neing'uaa. 8Nejoki naa ꞉Yeso ninche, <<Namaliki abaki nanu ntae ajo, taa kitoria aas kuna baa.>>

Nkitanyanyukoto ee laturok lo lchampa lo lmusabibu

(Matayo 21:33–46; Marko 12:1–12)

9 # Isa 5:1 Neng'asu Yeso aliki ltung'ana ana kitanyanyukoto: <<Etuuno apa ltung'ani obo lchampa lo lmusabibu#20:9 Kore lmusabibu naa lcheni oti nkop e Isirael, oata lng'anayio oitainyieki naichuo., neing'uaki laturok metaasa siaai, nechamaa lolo aturok aajo keicho ninye orati ee lng'anayio, nelo aing'uaa inia kop ta ng'amata naado. 10Kore payie ebau nkata nadung'ieki lmusabibu, nereu laisiaayiani lenye netii laturok payie eicho orati ee lng'anayio la lchampa lo lmusabibu. Kake neidong lolo aturok ninye, nemiraa taa nkaik naarok. 11Neitoki areu likae aisiaayiani, kake kore sii aitoki ilo, neidong ꞉ninche, neitam anyit, nemiraa taa nkaik naarok. 12Neitoki areu le okuni, nepik ninye lbae, nenang'aki aulo. 13Nejo naa lopeny lchampa lo lmusabibu, <Kaa aas? Kareu naa nkerai ai nacham, kebaki neanyit ninye.> 14Kake kore payie edol laturok ninye, nejokino maate, <Ele taa lajung'oni. Matar ninye payie eaku njung'ore naang!> 15Nenang'aki ninye aulo e lchampa, near metua.

<<Amaa sa, kaa eitaas ꞉lopeny lchampa ninche? 16Kelotu, naa kemut lolo aturok, kore ilo champa loo lmusabibu neicho lkulie.>> Kore payie ening ltung'ana inia nejo, <<Taba! Ooi measai ana!>> 17#SNk 118:22Neing'or ninche nejoki, <<Nyo naa kipirte ele rerei oigero ojo,

<Kore soit oatanya lachetak,

ninye oataa soit le tipat oirichiu nkaji?#20:17 Soit ele oata tipat ta nkaji, aa ninye ewuenie nkaji pooki. Sinkolio le Nkai 118:22.>

18<<Kore pooki ng'ae orriaakino nkeper e ilo soit, negiligila aorooro, naa kore ilo tung'ani osulakino neikaskas.>> 19Kore laiteng'enak loo nkitanapat o lkutuaa laa laitainok la lasar, neyiaya aibung ninye inia kata tankaraki keyielo aajo, kore ana kitanyanyukoto naa ninche eipirita. Kake neuriei ltung'ana.

Nkipara naipirita laare e kodi

(Matayo 22:15–22; Marko 12:13–17)

20Neleen ꞉ninche Yeso, nereu laikitalak ooitaakinete keisupati, payie etum aaibung'ie ninye lomon oojo, nepiki nkaik e lkitok o nkitoria enye. 21Neipar ninye ꞉laikitalak aajoki, <<Laiteng'enani ikiyielo aajo kore iyie naa iro ninteng'enicho sipat, nemeata ltung'ani ligelaa kake inteng'enicho nkoitiei e Nkai taa naadede. 22Amaa, keichiaakino tinikintaki Kaisari kodi ana meichiaakino?>> 23Kake kore amu keteyielo loseg lenche nejoki, 24<<Entoduaaki dinari. Nkomom o lkigerot le ng'ae ootii?>> Nejoki ꞉ninche, <<Ne Kaisari.>> 25Nejoki, <<Enchoo naa Kaisari ne Kaisari, ninchocho Nkai ne Nkai.>> 26Nelau ꞉ninche naaibung'ie tele rerei otejo tekue ltung'ana, neing'asia to olet enye nejo tau aagira.

Nkipara naipirita mpiunoto

(Matayo 22:23–33; Marko 12:18–27)

27 # Asat 23:8 Nepuonu lkulie Sadukayo oojo meatae mpiunoto, neipar Yeso 28#Nkit 25:5aajoki, <<Laiteng'enani, keigeroka apa iyioo Musa ajoki, <Kore teneye ltung'ani oata mparratut meata nkera, neichori inia oiliai meyema lalache lpayian lenye, payie eiiki ilo alache lenye oitienye nkera.> 29Naa keatae apa lalachera sapa. Kore naa lekue, neyemicho, neye meata nkera. 30-31Neyem le oare inia oiliai. Neitoki le okuni ayem ana metabaki le sapa. Neye pukura sapa aiko nejia, meata nkera. 32Kore tesiedi, neye sii inia parratut. 33Naa amaa kenya te mpiunoto, keaku inia parratut ne ng'ae? Amu keyema ninye lolo payiani pukura sapa!>>

34Nejoki Yeso ninche, <<Kore ltung'ana le ana ng'amata, keyemicho neyemi. 35Kake kore lolo ooikenakaki aajo keichiaakino netum ta ng'amata nalotu mpiunoto ee lootuata, naa meyemi, nemeyemicho. 36Nemeye aitoki, amu ketuwuanai kenya ana lmalaikani. Kore ninche, naa nkera e Nkai amu ketipiutua too lootuata. 37#Nai 3:6Kake keitodolua abaki Musa too Lkigerot Sinyat ooipirita suur napejori ajo keitipiuni lootuata, teinie payie eiger Laitoriani ajo, <Nkai e Abraam, o Nkai e Isaka o Nkai e Yakobo.> 38Naa mera ninye Nkai ee lootuata, kake Nkai ee looichu, amu te ninye eichu pooki.>> 39Newoliki ninye ꞉lbata laa laiteng'enak loo nkitanapat aajoki, <<Laiteng'enani, itowolo aitibiraki!>> 40Neurieii aitoki Eiparichiere.

Kera Kristo Layieni le Daudi?

(Matayo 22:41–46; Marko 12:35–37)

41Nejoki ꞉Yeso ninche, <<Aanyo peejo ltung'ana, kore Kristo#20:41 Kore Kristo keidimi sii aitoki aatejo Mesia. naa Layieni le Daudi? 42#SNk 110:1Amu ketejo Daudi koon to mbuku ee Sinkoliotin le Nkai,

<Kore Laitoriani naa ketiaka Laitoriani lai,

<<Towuana ta mbata ai e tetene,

43ana maichoo lmang'ati linono

ndacha murto.>> >

44<<Naa keipot ninye ꞉Daudi ajo <Laitoriani.> Aji naa eiko ninye teneaku layieni lenye?>>

Errita ate taa laiteng'enak loo nkitanapat

(Matayo 23:1–36; Marko 12:38–40)

45Kore ening'ito ltung'ana pooki, nejoki ꞉Yeso looiteng'eni lenyena, 46<<Errita ate taa laiteng'enak loo nkitanapat. Kore ninche naa kecham aaisaba eichopito nankan naadoo, necham teneirorokini tee neemirichiereki. Necham sii aatewuenie kue too lorikan supati le Sinagogi o too lorikan lekue laa latimi, 47nemut ntokitin taa nkajijik ee nkoilia. Neitoodor nkomono eitaakino, naa kore ninche kedung'okini nkiguana torno oleng.>>

Currently Selected:

Luka 20: saq

Highlight

Copy