Luka 19

Yeso o Sakayo

1Nejing Yeso Yeriko, neidachaa eloito. 2Netii apa ltung'ani oji nkarna Sakayo. Kore ninye naa lkitok laa laitalakunok le kodi, nera sii parakuoni. 3Naa keyieita apa ninye mpaach, nadolie Yeso payie eyielou ajo ng'ae ninye, kake kore tankaraki lturrur nera ninye dorrop, nelakino. 4Nekuet alo tekue, nedir lng'aboli payie etum atoduaa Yeso, amu kelotu aimu inie. 5Kore payie ebaki Yeso inie ng'oji, neimariri nejoki, <<Sakayo, tesieku todou amu kore anapar naa meata ajo malo awuon ta nkaji ino!>> 6Nesieku ninye adou, neitoomon Yeso te ng'ida. 7Kore payie edol pooki ana, neing'unyung'uny aajo, <<Echomo aaku lomoni lo ltung'ani loo ng'ok.>> 8Neinyuototo Sakayo, nejoki Laitoriani, <<Laitoriani, tining'o naa ana! Kaor ntokitin ainien aitiris, naicho laisinak. Naa kore tanaa katoorua ltung'ani ntoki enye to nkoitiei alani, karrinyoki nkatitin ong'uan.>> 9Nejo ꞉Yeso, <<Kore ana parri naa eyewuo njeunoto ana aji! Tankaraki kore sii ninye naa kera nkerai e Abraam.#19:9 Kore Yeso naa keipoto Sakayo ajo nkerai e Abraam, amu kera apa Abraam menye lairukok oodede. Kore Sakayo naa ketoduaki ajo kera sii ninye lairukoni odede. 10#Mat 18:11Amu kore Nkerai e ltung'ani, naa keyewuo ayiaya neitejeu looimina.>>

Nkitanyanyukoto ee ropiyiani

(Matayo 25:14–30)

11Kore einining'ito ꞉ltung'ana nenia baa, neitoki Yeso aliki nkitanyanyukoto amu ketinyikaka ninye Yerusalem. Naa tankaraki kejo sii ninche ketinyikua payie elotu nkitoria e Nkai nabokata. 12Nejoki, <<Echomo apa ltung'ani oje le nkang natumieki lkinkii nkop nalakua, meitaae lkinkii pee echukunye.#19:12 Kore tee Lyiaudi, tenera menye ltung'ani larikoni, naa inia kata apeny eidim layieni lenye ataa. 13Neipot laisiaayiak tomon lenyena, meata leitu eicho enata nabo ee ropiyiani. Nejoki, <Entimiricho, ninyang'icherere kuna ropiyiani ana matuchukunyie.> 14Kake kore apa ltung'ana le nkop enche naa keiba ninye. Nereu ꞉ninche lpayiani meewaita lkilikuai aaijiparie ejo, <Mikiyieu neitore iyioo ele tung'ani.> 15Kore payie echukunye etumo nkitoria, nejo meipoti lolo aisiaayiak ooichoo apa ropiyiani, meteyielo dikir natumie nenia ropiyiani. 16Kore laisiaayiani lekue nelotu nejoki, <Lkitok lai! Etoponunye enata ee ropiyiani nikinchoo nkatitin tomon.> 17Nejoki ilo kitok, <Intibira taa, laisiaayiani supat! Naa kore amu itaa loisiligai abaki te nkini nemeiput ndap, taa lkitok loo lkerenketi tomon.> 18Nelotu sii le oare nejoki, <Lkitok lai! Etoponunye enata ee ropiyiani nikinchoo nkatitin imiet.> 19Nejoki ilo, <Ntoria sii iyie lkerenketi imiet!> 20Neitoki likae alotu nejoki, <Lkitok lai! Nana enata e ropiyiani nikinchoo, naiteng'ela apa ta nanka. 21Amu kore tankaraki ira ltung'ani ogol mpukunoto, kaaurie! Iya iyie ropiyiani neitu inteng'el, nidung sii lchampai leitu iun.> 22Nejoki ninye, <Kore taa iyie, ele aisiaayiani torno! Kaaiguanare te rerei le nkutuk ino, amu kiteyielo apa ajo ltung'ani ogol mpukunoto ara, naya ropiyiani neitu aiteng'el, nadung lchampai leitu aun. 23Naa aanyo payie eitu ipik ropiyiani ainien netumie dikir, metaa kore tanalotu natum tenebo o dikir enche?> 24Nejoki ltung'ana oonyikita, <Entooru ninye inia enata ee ropiyiani, ninchocho elde oata enat tomon ee ropiyiani.> 25Nejoki ꞉ninche, <Lkitok lang, keata dei ninye nkulie enat tomon ee ropiyiani.> 26#Mat 13:12; Mrk 4:25; Luka 8:18Nejoki, <Kajoki ntae kore pooki oata ntoki neichori, kake kore ilo lemeata, neoruni abaki naata. 27#Mat 25:14–30Kake kore lolo mang'ati lainien lemeyieu naitore eyautu ene, niarrar tekue nanu metuata.> >>

Etijing'a Yeso Yerusalem

(Matayo 21:1–11; Marko 11:1–11; Yoana 12:12–19)

28Kore payie eidip Yeso atejo ana, neituruk ailiep alo Yerusalem. 29Naa kore payie enyikaki Betepage o Betania nkalo lowua oji Lowua loo Lng'erriyio, neipaaya looiteng'eni lenyena oare, 30ajoki <<Enchom nkang natii idia bata, naa kore piijing'jing atua nitumtum lkurrarru oena leitu hoo aikata eirot ꞉ltung'ani. Entalaku niyauu ene! 31Naa kore teneipar ntae ltung'ani ajoki, <Aanyo payie ilakuku?> entejo nchi, <Laitoriani oyieu.> >> 32Nepuo lolo ooipaayieki, netum ake ana natiaka ninche. 33Kore elaku ninche ilo kurrarru, neipar ꞉loopeny aajoki, <<Aanyo payie ilakuku lkurrarru?>> 34Nejoki, <<Laitoriani oyieu.>> 35Nerikoki ꞉ninche Yeso, neiteleki nankan enche nkeper e lkurrarru, neitidir Yeso. 36Kore eloito, neisalaachaki ltung'ana nankan enche nkoitiei. 37Kore payie enyikaki neituto to Lowua loo Lng'erriyio, neng'asu lturrur pooki loo looiteng'eni aarrep Nkai te ng'ida, to ltoilo kitok tankaraki mbaa kumo e ngolon naatoduaa 38#SNk 118:26ejo,

<<Emayiana lkinkii, ilo olotu ta nkarna e Laitoriani!>>

<<Seriani te chumata o nkisisa te idie te keper!>>

39Kore lbata loo Lparisayo, ootii atua ilo turrur nejoki, <<Laiteng'enani, ng'odia tukusakana looiteng'eni linono!>> 40Newoliki ajoki, <<Kajoki ntae, kore tenegira ninche, nebuak soito aisis.>>

Eichiraka ꞉Yeso Yerusalem

41Kore naa payie enyikaki ꞉Yeso Yerusalem, nedol neichiraki 42ejo, <<Ooi siake, tanaa iteyielo abaki iyie anapar ntokitin nikiyaki seriani! Kake keisudoyieki taata too nkonyek inono. 43Amu kepuonu kenya mperot, naapuonunyie lmang'ati linono, nechet wuata ee nkeek, naa ikimuatu, nikipunyaki taa mbat pooki. 44Nikinang'ie nkop o nkera inono naatii atua, naa meing'uari hoo soit obo eitelikino likae, tankaraki eitu iyielou nkata niking'errunyie Nkai.>>

Eitisinya ꞉Yeso nkaji e Nkai

(Matayo 21:12–17; Marko 11:15–19; Yoana 2:13–22)

45Kore payie ejing ꞉Yeso nkaji e Nkai, neng'asu amiraa ltung'ana oomiricho 46#Isa 56:7; Yer 7:11nejo, <<Keigeroki aajo, <Kore nkaji ai naa nkaji e nkomono>, kake intaaita ntae nkapune ee lapurrok!>>

47 # Luka 21:37 Neiteng'enicho mperot pooki ta nkaji e Nkai. Kake, kore lkutuaa laa laitainok la lasar o laiteng'enak loo nkitanapat, o lkulie tung'ana kutuaa, neyiaya nkoitiei naarie ninye metua. 48Kake nelau ntoki naas, amu ketuuro ltung'ana nkiyiaa aainining ninye.

Currently Selected:

Luka 19: saq

Highlight

Copy