Luka 18

Nkitanyanyukoto e nkoiliai nagol kue

1Kore mparri nabo, neliki ꞉Yeso ninche nkitanyanyukoto ajoki keiririkino payie eomon nkata pooki, nemeinauru. 2Nejoki, <<Kore apa te lkerenket obo, naa keatae ladung'oni le nkiguana, lemeurie Nkai, nemeiken abaki ltung'ana. 3Naa kore aitoki te ilo kerenket, neatae nkoiliai nalotu mparri pooki neti ninye aichiraki ajoki, <Timituaki siake tele mang'antita lai, nikincho inia naaichiaakino nanu.> 4-5Neany ta nkata naado. Kake neitoki ajo ta ltau lenye, <Kore abaki maurie Nkai, namaikenu sii ltung'ani, kake kore amu kaainaurie ana oiliai, kaicho inia naaichiaakino ninye, paa maaitoki aitipipi tana lotunoto enye.> >> 6Nejoki ꞉Laitoriani, <<Entining nejoito ilo adung'oni torno le nkiguana. 7Oo sa Nkai! Meicho sipat lgelunot lenyena, ooichiraki kuarie o parkiji? Mara meimalimalie reto tee ninche? 8Kajoki ntae, kesioki aicho ninche sipat. Kake, amaa tenelotu Nkerai e ltung'ani, keirrachu sa nkurukoto to nkop?>>

Nkitanyanyukoto e lparisayoi o laitalakunoni le kodi

9Neliki aitoki Yeso ana kitanyanyukoto lkulie tung'ana oiken ate aajo kera loosipat, nemen lkulikae. Nejoki, 10<<Echomo apa ltung'ana oare, aailiepaki nkaji e Nkai aaomon. Kore lobo naa Lparisayoi, nera likae laitalakunoni le kodi. 11Neitache Lparisayoi aomon Nkai makoon ajo nchi, <Nkai, kaarrinyoki nache amu matuwuana ana lkulikae tung'ana, ooisimicho, lemeata sipat, oaas loloito, anaa sii ootuwuana ele aitalakunoni le kodi. 12Kaen nkutuk nkatitin are to uki nabo, naitai motua e tomon ai to pooki natum.> 13Kake kore laitalakunoni le kodi, neitache elakua. Nemeapu abaki nkonyek enyena aing'or chumata, kake neoch koon lgoo ajo, <Nkai, ng'urrieeki nanu amu kara ltung'ani loo ng'ok!> 14#Mat 23:12; Luka 14:11Kajoki ntae, kore ele aitalakunoni le kodi naa ketodoyie alo nkaji enye eikenakaki sipat tekue Nkai, kake nemeikenakini laduo Lparisayoi. Amu kore pooki ng'ae oiliepie koon neitodouni, naa kore loitodou koon neiliepieki.>>

Etamayiana ꞉Yeso nkera kunini

(Matayo 19:13–15; Marko 10:13–16)

15Neyaki sii ꞉ltung'ana Yeso nkera kunini meiteleki nkaik. Naa kore payie edol ꞉looiteng'eni lenyena ana, nekusakan aaing'ode ninche. 16Kake neipotu ꞉Yeso ninche meotu netii nejoki, <<Enchoo nkera meotu natii! Emimbooyo, amu kore nkitoria e Nkai naa noo ltung'ana ootuwuana nkera. 17Kedede kajoki ntae, kore lemeng'amaa nkitoria e Nkai tana nkerai kini, naa mejing katukul.>>

Yeso o ltung'ani parakuoni

(Matayo 19:16–30; Marko 10:17–31)

18Neipar ltung'ani obo kitok Yeso ajoki, <<Laiteng'enani supat, kaa aas payie ajung nkichon ee ntarasi?>> 19Nejoki ꞉Yeso, <<Aanyo payie kimpot ajo supat? Meatae hoo supat mara Nkai apeny. 20#Nai 20:14; Nkit 5:18, Nai 20:13; Nkit 5:17, Nai 20:15; Nkit 5:19, Nai 20:16; Nkit 5:20, Nai 20:12; Nkit 5:16Iyielo nkitanapat, <Miloloito, miar metua, mipurrucho, minteeniki likae sapare, ianyita papa lino o ng'utunyi.> >> 21Nejo, <<Kore kuna pooki naa kaibung'a ang'asu te keraicho ai.>> 22Kore payie ening Yeso ana nejoki, <<Ewuon king'oriki ntoki nabo! Timira ntoki pooki niata, nioriki laisinak, naa itum iyie parakuoicho te chumata. Nikilotu taa aairukurukore!>> 23Kake kore payie ening ana, neiputukuny oleng, amu kera apa parakuoni oleng. 24Kore payie edol Yeso ajo keiputukunyuo ilo parakuoni nejo, <<Kebaa sa egol njing'ata e nkitoria e Nkai ta lparakuoni! 25Amu elelek ta ntames teneim udoto e ltudu alang tenejing lparakuoni nkitoria e Nkai.>>

26Kore lootining'o nejo, <<Naa ng'ae sa oidim nejeu?>>

27Nejoki ꞉Yeso, <<Kore nemeidimai too ltung'ana naa keidimai ta Nkai.>>

28Nejoki ꞉Petero, <<Ng'ura ja, ikitung'aitie iyioo ntokitin ang pooki nikipuonu aairukurukore iyie.>> 29Nejoki ninche, <<Kedede kajoki ntae, meatae ltung'ani otung'ayie nkang enye, tanaa mparratut enye, tanaa lalachera o nkanachera, tanaa ntoiwuo, tanaa nkera, tankaraki nkitoria e Nkai, 30lemeng'amaa nkatitin kumo taatua ana ng'amata alang natung'ayie apa. Naa kore aitoki ta ng'amata nalotu, neng'amaa nkichon ee ntarasi.>>

Etilimua Yeso nkata e uni lkiye o mpiunoto enye

(Matayo 20:17–19; Marko 10:32–34)

31Neiwuang'ie ꞉Yeso loochi ooiteng'eni tomon o oare nejoki, <<Ikiliepita aapuo Yerusalem, naa kore naa mbaa pooki naaigero loibonok le Nkai, naaipirita Nkerai e ltung'ani naa keitabari. 32Amu kepiki ninye nkaik ee loreren, nesuji, nedeki, nenatakini nkamlak. 33Naa keidong ꞉ninche ninye te liche, near metua, kake kore ta mparri e uni, nepiu.>> 34Naa eitu eyielou ninche hoo toki too kuna baa. Amu keisudoyieki kipirte ee kuna baa tee ninche, neitu ening'u inia najoito ninye.

Eichiunyie ꞉Yeso lmodooni osaicho

(Matayo 20:29–34; Marko 10:46–52)

35Kore eloito Yeso anyikaki Yeriko, naa keatae apa ltung'ani modooni owuonita tabata nkoitiei asaicho. 36Kore payie ening ltung'ana kumo ooimita inie, neiparu ajo, <<Nyo dei inia?>> 37Nejokini, <<Yeso le Nasaret oimita ene.>> 38Nebuak ajo, <<Yeso, Layieni le Daudi, ng'erruaaki nanu!>> 39Naa kore lolo ooiturukuto tekue, nekusakan aaing'ode, nejoki metigirai, kake nebuak ninye oleng ajo, <<Yeso, Layieni le Daudi, ng'erruaaki.>> 40Neitache Yeso, neitanap ninche metiriku netii. Kore payie enyiku neipar ajoki, 41<<Nyo iyieu naaitaas?>>

Nejoki, <<Laitoriani, Kayieu nadolichoi.>> 42Nejoki ꞉Yeso ninye, <<Todolichoi! /Ikinchiunyie nkurukoto ino.>> 43Nedolichoi ninye nabokata, neirukurukore Yeso errep Nkai. Kore ltung'ana pooki ootoduaa inia, nerrep Nkai.

Currently Selected:

Luka 18: saq

Highlight

Copy