Luka 17

Mbaa naaitopong'oricho o nkurukoto o siaai

1Neitoki Yeso ajoki looiteng'eni lenyena, <<Meata hoo nchere ajo mepuonu mbaa naaitopong'oricho. Kake ooi siake ilo oaku ninye eing'uaa. 2Keikach teneenikini murt enye soit sapuk dapach oidong'ieki nkano, nenang'akini mpaso alang teneitopong'oo nabo ee kuna kunini#17:2 Kore kuna kunini naa nkera kunini anaa lolo ng'ejuko naa kunini to nkurukoto. metaasa ng'oki. 3#Mat 18:15Naaku naa errita ate.

<<Kore teneas lalache lino ng'oki, tukusakana aing'ode, naa teneirriidu tapaliki. 4Naa Tinikintarruoki ninye nkatitin sapa ta mparri, nechukunyie nitii nkatitin sapa kijoki, <Airriidua tapalikaaki!> Tapaliki ninye.>>

5Nejoki ꞉Lkipaareta Laitoriani, <<Toponiki iyioo nkurukoto!>> 6Nejoki ꞉Laitoriani, <<Tiniatata nkurukoto nawuana lantararai kini#17:6 Kore lantararai kini tene naa keasichere Luka lantararai le mastad. Kore ilo antararai naa keikini oleng, nemeatae to nkop ee Sampur., indimdim nijokiki ele reteti, <Mikitodotuni, nikiuni ta mpaso>, nening ntae.

7<<Amaa, ng'ae taa ntae oata laisiaayiani otur lchampa, tanaa loirrita nkerra, aa kore tenebau eing'uaa lchampa nejoki, <Wou tesieku towuana tama ndaa!>? 8Mara kejoki ninye, <Ntibirakaaki ndaa, nirretena, nikisiaai ana maidipa ndaa o ntoki namat. Naa kore tanaidip, ninya sii iyie, nimat ntoki?> 9Mara merrinyoki ꞉ninye ilo aisiaayiani nache, amu ketaasa natiakaki? 10Nejia sii itiuu ntae, kore payie indipdip aataas pooki natiakaki ntae nijoijo, <Ikira iyioo laisiaayiak lemeata tipat. Ikitaasa ake nayieuni payie ikias.> >>

Eichiunyie ꞉Yeso ltung'ana tomon oaata nkeeya ee lbolot

11Kore eimita Yeso nkoitiei alo Yerusalem, neimaa Samaria o Galilaya. 12Kore payie ejing nkang nabo, nenang'are ꞉lewa tomon oaata nkeeya ee lbolot, neitachoo tanalakua. 13Nebuak ninche oleng aajo, <<Ooi! Yeso, Lkitok, ng'urrie iyioo!>> 14#Lal 14:1–32Kore payie edol ninche nejoki, <<Enchom entoduaai ate taa laitainok la lasar!>> Kore epuoito, neidoso. 15Kore naa lobo lenche, kore payie edol ajo keichiwua, nechukunyie eisis Nkai to ltoilo sapuk. 16Neirrabalakino nkop tekue nkejek e Yeso, arrinyoki nache. Kore ninye, naa loo Samaria. 17Newoliki ꞉Yeso ajoki, <<Amaa, eitu duo eichiunyieki lolo pukura tomon meidosoto? Koree naa lkulie saal? 18Aaku meatae hooyia lobo lenche ochukunyie duaake aisis Nkai, mara ake ele tung'ani apeny le likae orere?>> 19Nejoki ninye, <<Inyuo chomo, /ikinchiunyie naa nkurukoto ino.>>

Lotunoto e Nkerai e ltung'ani

(Matayo 24:23–28,37–41)

20Kore mparri nabo neipar ninye ꞉Lparisayo nkata nalotu nkitoria e Nkai. Nejoki, <<Melotu nkitoria e Nkai te nkitodolunoto nalio, 21namara naji, <Ng'ura, ketii ene>, tanaa <Idie>, amu kore nkitoria e Nkai naa atua ntae etii.>>

22Nejoki looiteng'eni lenyena, <<Kore naa kenya kelotu ng'amata ning'uarrng'uar payie idoldol mparri nabo e Nkerai e ltung'ani, nimidoldol. 23Naa kejokini kenya ntae, <Ketii idie!> anaa <Ketii ene!> Eminyuototo aapuo, nimirukurukorere ninche. 24Amu kore ana netiu nkiwuang'ata naitoong mbat pooki e loing'ang'e, naa nejia kenya etiu lotunoto e Nkerai e ltung'ani ta mparri enye. 25Kake meata aajo metum mion kitok tekue, neany ꞉ltung'ana le ana kuarie ninye. 26#Ng'as 6:5–8Naa kore ana netiu apake tee mperot e Noa, naa nejia sii etiu tee mperot e Nkerai e ltung'ani. 27#Ng'as 7:6–24Kenyaita apake ltung'ana ndaa, nematicho, neyemicho, neyemi, ana metabau inia parri natijing'a Noa atua sapina. Nelotu nkare sapuk, nemut ltung'ana pooki. 28#Ng'as 18:20—19:25Nejia sii apa etiu too mperot e Lot, kenyaita apake ltung'ana ndaa nematicho, neinyiang'icho, nemiricho, neunicho, necheticho. 29Kake kore mparri naipung Lot aing'uaa Sodom, nebukunyie nkima ee soito ooilu te chumata, nemut ltung'ana pooki. 30Naa nejia etiu kenya ta mparri naibalunyieki Nkerai e ltung'ani. 31#Mat 24:17,18; Mrk 13:15,16Kore kenya te inia parri lotii nkeper e nkaji, medou aya masaa enyena naatii atua! Nejia sii etiu lotii lchampa, merrinyo siedi aya ntoki! 32#Ng'as 19:26Entaparru nkitok e Lot! 33#Mat 10:39, 16:25; Mrk 8:35; Luka 9:24; Yoa 12:25Kore loyieu neirrita nkichui enye, naa keiminie, naa kore loiminie, neirrita. 34Kajoki ntae, kore te inia kuarie kenya, kore ltung'ana oare ooperi to rruat nabo, naa keyae#17:34 Kore ana kitanyanyukoto naitayia ꞉Yeso tene naa keipirita mparri e lotunoto enye. Kore ta Matayo 24:31 ana metabaki 42 naa keitodol ajo kepuonu lmalaikani aaya ltung'ana ogeluno neti Yeso, neing'uari lkulie. Keyieu Yeso nikira ltung'ana ooterretenete. Todua sii Ltesalonike lekue 4:13, Marko 13:27. lobo neing'uari likae. 35Netii ntomonok are naaidong'ito nkano tenebo, naa keyae nabo neing'uari nkae.>>#17:35 Keponiki lkulie kigerot 17:36. 37Neipar ꞉looiteng'eni lenyena aajoki, <<Laitoriani, taaji?>>

Nejoki, <<Kore neti lpopok, naa inie eiturrurrokino sakerin.>>

Currently Selected:

Luka 17: saq

Highlight

Copy