Luka 21

Nkichoorot e nkoiliai

(Marko 12:41–44)

1Kore payie eapu Yeso nkonyek, nedol lgarsisi epik nkichoorot enche atua sanduku loo nkichoorot. 2Nedol ꞉Yeso nkoiliai nabo aitarani, epikita sintii oare 3nejo, <<Kesipa kajoki ntae, kore ana oiliai aitarani, naa keitayia ntoki kitok alang pooki. 4Amu, kore kulo pooki naa keitaitua nkichoorot taatua parakuoicho enche. Kake kore ana oiliai aitarani, naa keitayia taatua menai enye ntoki pooki naichiwue ninye.>>

Etilimua Yeso arata e nkaji e Nkai

(Matayo 24:1–14; Marko 13:1–13)

5Kore eimakita lkulikae neikunaki nkikodoto e nkaji e Nkai too soito supati, o too nkichorunot naitakaki Nkai nejoki ꞉Yeso, 6<<Kore kuna tokitin pooki nidolitata, kepuonu kenya mperot nemeitokini aata soit oitelekino likae lemedotori.>> 7Neipar aajoki, <<Laiteng'enani naaku anu easai kuna baa? Naa nyo sa nkitodolunoto naitodolu ajo ketinyikua ng'amata naasai?>> 8Nejoki ninche, <<Entodol payie meitopong'ori ntae. Amu kepuonu lkumo ta nkarna ai aajo, <Nanu ilo>, naa, <Ketinyikua nkata.> Emirukurukore ninche!

9<<Naa kore tinining'ning mbaa naipirita larrabali o long'olng'oli emiurieicho. Amu meatae aajo measai kuna baa tekue, kake mesieku nkiting'oto e nkop.>> 10Nejoki aitoki ninche inia kata, <<Keinyuototo locho arare likae ocho, nera nkitoria o nkae nkitoria. 11Naa kepuonu nkikirikirot sapuki nkop, naa kore too lubot pooki e nkop nelotu lameii o nkeyaitin torrok. Nepuonu sii mbaa naaituriaicho o nkitodolunot kutuaa naing'uaa chumata.

12<<Kake kore eitu easai kuna baa pooki, naa keibung'i ntae neitami ntae sina. Neibung'i sii ntae aaya Sinagogini o jilai, neyae ntae tekue lkinkii o laitoriak tankaraki nkarna ai. 13Neaku inia ng'amata nimbalielie limunot inchi. 14#Luka 12:11,12Kake emidung taa ltauja linchi, aajo aji inkoko tinimititu ate. 15Amu kaicho nanu ntae rerei liwolielie o ng'eno, paa meata abaki lobo loo lolo oarare ntae oidim aibooi ntae, tanaa oitooliki ntae. 16Naa kore ntoiwuo inchi o lalachera linchi o lmarei linchi o sotuatin linchi, neichooyo ntae, neri lkulikae taatua ntae. 17Naa keibai ntae ltung'ana pooki tankaraki nkarna ai, 18kake meimin hoo ntae lpapita obo le nkue. 19Kore te ng'iriata inchi naa itumtum nkichon nemeiting.

Etilimua Yeso arata e Yerusalem

(Matayo 24:15–21; Marko 13:14–19)

20<<Kake kore naa tinidoldol Yerusalem emanita ꞉njorin, niyielouu inia kata aajo etinyikua nkata e mutata enye. 21Kore inia kata, lootii atua nkop e Yudea, enchoo meisigaki lowuan, kore lootii atua ilo kerenket, neipung aing'uaa, naa kore lootii soro nemejing'u. 22#Osea 9:7Amu kore kenya nenia perot, naa keiteme ꞉Nkai ltung'ana tankaraki ng'ok enche, payie ebaya mbaa pooki naaigeroki. 23Oi siake nenia naatunutete o naaitanakicho tee nenia perot! Amu keatae kenya sina kitok to nkop, naa ketum ngoro e Nkai kitok ltung'ana oaamanya inia kop. 24Kore lolo tung'ana naa kemuti ta lalem, neibung'i, neyae atua lochon. Naa kore Yerusalem near ꞉loreren aaidach, ana meichunye ng'amat ee loreren.

Lotunoto e Nkerai e ltung'ani

(Matayo 24:29–31; Marko 13:24–27)

25 # Isa 13:10; Ese 32:7; Yoel 2:31; Mbo 6:12,13 <<Kore kenya, naa keatae nkitodolunot ta ndama o ta lapa o taa lakir. Kore sii lochon le nkop, naa ketum sinaitin neiputukuny tankaraki nkukurrukurroto o ng'olng'ol e mpaso. 26Neiterriaa ltung'ana to lputukuny o ngureticho ee mbaa naapukoki nkop, amu keikirikiro ngolon ee ntokitin naatii loing'ang'e. 27#Dan 7:13; Mbo 1:7Naa kore inia kata, nedoluni Nkerai e ltung'ani elotu taatua nkidis to ngolon o nkitoo kitok. 28Kore teneng'asu nenia baa aapuku, enting'idata, nintachoo, niapupu nkuechi inchi, amu ketinyikua lakunoto inchi.>>

Nkiteng'ena naipirita lng'aboli

(Matayo 24:32–35; Marko 13:28–31)

29Neliki ꞉Yeso ninche nkitanyanyukoto ajoki, <<Eng'ura lng'aboli o lkeek pooki. 30Laa kore ake payie eyuk, niyielouu nidoldol maate aajo, etinyikua ng'amata e lari. 31Naaku naa, kore tinidoldol sii ntae kuna baa easai, enteyielo aajo nkitoria e Nkai. 32Kedede kajoki ntae, meichunye naa ltung'ana le ana pukunoto eitu easai kuna baa. 33Kore keper o nkop naa keichunye, kake meichunye rereii lainien. 34Errita ate payie meirraaya ntae luboi o merai o irran e nkichon, metaa kore inia parri nalotu, nemeirrachu ntae aluam mintekiki. 35Amu kelotu too ltung'ana pooki oaamanya nkop pooki. 36Entirripicho nkata pooki, iomonmon, payie indimdim aatapachere nana pooki naapuku, nidimdim aaitacho tekue Nkerai e ltung'ani.>>

37 # Luka 19:47 Kore parkiji, neiteng'enicho Yeso ta nkaji e Nkai, nelo kuarie awuon to lowua oji Lowua loo Lng'erriyio. 38Kore ta siran, nerrekunye ltung'ana pooki, aapuonu neti ninye aainining ta nkaji e Nkai.

Currently Selected:

Luka 21: saq

Highlight

Copy