Luka 22

Loseg oarieki Yeso

(Matayo 26:1–5,14–16; Marko 14:1–2,10–11; Yoana 11:45–53)

1 # Nai 12:1–27 Nenyiku ntasim ee mukateni nemeisiichieki naa ninye eitokini aajo Pasaka#22:1 Kore Pasaka naa latim onyei nkata nabo ta lari aaparrunyie apa naidurra payie eing'uari nkop ee Misiri. Ng'urai Naidurra 12:1–28.. 2Neyiaya ꞉lkutuaa laa laitainok la lasar o laiteng'enak loo nkitanapat nkoitiei naarie Yeso metua, amu keurie aajo nyo eidim ltung'ana neas.

3Nejing ꞉Chitani Yudas oji Isikariot, oara lobo loo loochi tomon o oare. 4Neinyuototo alo neirorie lkutuaa laa laitainok la lasar o lkutuaa loo sikarini le nkaji e Nkai, neiko tenepik Yeso nkaik enche. 5Neng'ida ninche, nening'ore payie eicho ropiyiani. 6Nechamaa ꞉ninye, neyiaya mpaach naichoorie ninye, nkata nemetii atua lturrur.

Ndaa e Pasaka

(Matayo 26:17–30; Marko 14:12–26)

7Nebau naa mparri ee mukateni nemeisiichieki nayiere neyieng'i lkuo leker le Pasaka.#Nai 12:1–4,21–27 8Neirruaaya ꞉Yeso Petero o Yoana ajoki, <<Enchom, entibiraki iyioo ndaa e Pasaka payie ikinya.>> 9Neipar aajoki, <<Taaji iyieu nikintibir?>> 10Nejoki ꞉Yeso, <<Kore ake nijing'ieng'ie lkerenket, naa kenang'are ntae lpayian onapita loket le nkare. Enjipai ninye o nkaji najing. 11Nijokiki lopeny nkaji, <Ikimpar ꞉Laiteng'enani ajoki, aji etii nkaji ee lomon nanyayie ndaa e Pasaka o looiteng'eni lainien?> 12Naa keitodol ntae nkaji kitok e keper naitibira atua. Entibiraki naa iyioo ndaa te inie!>> 13Nepuo, netum mbaa pooki etiu ana natiaka ꞉Yeso. Neitibir ninche ndaa e Pasaka.

14Kore naa payie ebau nkata, newuon Yeso te misa anya ndaa o lkipaareta lenyena. 15Nejoki ninche, <<Katong'uarra oleng ayieu nanya ndaa e Pasaka tenebo o ntae ewuon eitu aaitami sina. 16Amu kajoki ntae, manya hoo aitoki ndaa e Pasaka ana meitabari inia nalotu te nkitoria e Nkai.>> 17Nerrapu lkikompe, nerrinyoki Nkai nache nejo, <<Entang'amai naa ele kikompe, ning'arng'ar maate. 18Amu kajoki ntae, kore ang'asu taata mamat aitoki naichuo naing'uaa lng'anayio lo lmusabibu ana metabau nkitoria e Nkai.>> 19Nerrapu mukate nerrinyoki Nkai nache, negil neicho ninche ejo, <<Sesen lai ele oitaini tankaraki ntae, entaas ana payie kiparrunyienyie nanu.>> 20#Yer 31:31–34Kore eidipa aatam ndaa, neitoki aiko nejia lkikompe ejo, <<Kore ele kikompe naa lning'o ng'ejuk lo lodo lai oibukori tankaraki ntae. 21#SNk 41:9Kake kore naa nkaina e ilo laaichooyo nanu, naa ketii ana misa tenebo o nanai. 22Amu kore Nkerai e ltung'ani naa kelo ana nategelakaki apake, kake oi siake ꞉ilo tung'ani ooichoyo ninye!>> 23Neng'asu ninche aaipara maate aajo ng'ae sa taatua ninche oas inia bae.

Ng'ae oisul too pooki?

(Matayo 20:25–28; Marko 10:42–45)

24 # Mat 18:1; Mrk 9:34; Luka 9:46 Nepukoki naa ninche ꞉nchankar ejo ng'ae obaki nera lkitok tee ninche pooki. 25Nejoki ꞉Yeso ninche, <<Kore lkinkii loo lochon naa keitore ltung'ana lenche, naa kore loaata nkitoria tee ninche nejo ate laretok. 26#Mat 23:11; Mrk 9:35#Mat 20:25–27; Mrk 10:42–44Kake metiu nejia taa ntae, enchoo metaa kore lkitok neaku lkini, neaku ꞉larikoni laisiaayiani. 27#Yoa 13:12–15Ng'ae naa oara kitok? Ilo owuon te misa, anaa loisiaaicho? Mara ilo owuon te misa? Kake kore nanu, naa katii atua ntae ana loisiaaicho.

28<<Ntae naa likitoboitiere nanu tee ntemat ainien. 29Naa kaicho sii nanu ntae nkitoria, ana naaichoo ꞉Papa lai, 30#Mat 19:28metaa kore te misa ai, taatua Nkitoria ai, nitumtum aatadaata nimatichocho. Niwuenini too lorikan le nkitoo, inguanarere lolo mareita tomon o oare le Isirael.

Etilimua ꞉Yeso ajo kemiki ꞉Simon Petero

(Matayo 26:31–35; Marko 14:27–31; Yoana 13:36–38)

31<<Simon! Simon! Todua amu, ketoomonua Chitani ntae payie eipirpir ana nkano, 32kake kaatoomonoka nanu iyie, payie meichunye nkurukoto ino. Naa kore payie iwuatuwuata kenya, ntogolo naa lalachera linono.>> 33Nejoki, <<Laitoriani, katumuta paalo abaki tanaa jila maateeni, naari o iyie.>> 34Nejoki ꞉Yeso ninye, <<Petero, kaajoki meiru hoo lkoko anapar, ewuon eitu kimiki iyie nkatitin uni ajo mikiyielo.>>

Etiaka ꞉Yeso looiteng'eni lenyena meterretenata

35 # Mat 10:9,10; Mrk 6:8,9; Luka 9:3, 10:4 Nejoki ninche, <<Amaa apa payie areu ntae miatata mbene ee ropiyiani, anaa lbene, anaa namuka, keatae ntoki natong'orika ntae?>> Nejo, <<Meatae!>> 36Nejoki ninche, <<Kake kore taata, kore loata mbene ee ropiyiani nchoo meawa, neas sii nejia loata lbene. Kore lemeata lalem, nemir lkila lenye ainyiang'unyie. 37#Isa 53:12Amu kajoki ntae, kore kulo kigerot ooigeroki naa meatae ajo meitabari ta nanu. Lolo oojo, <Eikenakini ninye tenebo o ltorrok.> Amu kore naaipirita nanu, naa keitabari.>> 38Nejo ninche, <<Laitoriani ng'ura, ketii ene lalema oare.>> Nejoki ninche, <<Keitiemu.>>#22:38 Kore Nejoki ninche, <<Keitiemu>> keidimi aaibelekenya aajo Nejoki ninche, <<Keidipe.>>

Etoomono ꞉Yeso to Lowua loo Lng'erriyio

(Matayo 26:36–46; Marko 14:32–42)

39Neipung Yeso alo Lowua loo Lng'erriyio ana neiko chiaake, neirukurukore ꞉looiteng'eni lenyena. 40Kore payie ebaki ninye inie, nejoki ninche, <<Entoomon payie mijing'jing atua ntemat.>> 41Nelo nkiti rioto alam ninche,#22:41 Kore Nelo nkiti rioto alam ninche naa kejo Luka Nelo alam ninche nebana nang'aroto e soit. negil kung aomon 42nejo, <<Papa, tanaa yieuna ino, tooruaaki ele sina,#22:42 Kore tooruaaki ele sina kejo Luka ele kikompe. namara yieunoto ai, kake metaasai yieunoto ino!>> 43Neipung'oki ꞉lmalaika eing'uaa chumata aitogol ninye. 44Naa kore amu kewuon eata mion kitok, neomon oleng. Kore nkinyinyiret enye netuwuanai ana lodo eitong adoki nkop. 45Kore payie elo netii looiteng'eni lenyena eing'uaa nkomono, neirrachu eilurate tankaraki keata ldukuman. 46Nejoki, <<Aanyo payie ilurara? Enyuoto, entoomon payie mijing'jing atua ntemat.>>

Eibung'aki Yeso

(Matayo 26:47–58; Marko 14:43–50,53–54a; Yoana 18:3–15)

47Kore ewuon eirorita Yeso, nelotu lturrur loo ltung'ana. Nelotu lochi oiteng'eni oji Yudas, oara lobo loo loochi ooiteng'eni tomon o oare erikito ninche nenyikaki Yeso negus. 48Nejoki ꞉Yeso ninye, <<Yudas, ilikoo dei Nkerai e ltung'ani to ngusoto?>> 49Kore payie edol ꞉lolo ooboitiere ninye inia nalo aasai nejo, <<Laitoriani, Ikiar ꞉iyioo ninche ta lalem?>> 50Neoch ꞉lobo lenche, laisiaayiani la laitainoni kitok la lasar, nedung'oo nkiok enye e tetene. 51Kake newoliki ꞉Yeso ajoki, <<Entung'ai ana!>> Neiseyie nkiok ilo aisiaayiani, neichiunyie ninye. 52Nejoki ꞉Yeso lolo lkutuaa laa laitainok la lasar o lkutuaa ooitacheki nkaji e Nkai o lpayiani ootuo ayiaya ninye, <<Amaa, iotuo iatata lalema o runkun ana loopuonu aaibung laisimani? 53#Luka 19:47, 21:37Kore mperot pooki naa katii apa nkaji e Nkai tenebo o ntae, neitu kiseyieyie. Kake kore taata, naa nkata inchi o nkitoria e naimin.>> 54Neibung Yeso, nerik neya nkaji e laitainoni kitok la lasar. Neirukurukore ꞉Petero elakuaniki.

Etimika ꞉Petero Yeso

(Matayo 26:69–75; Marko 14:54b, 14:66–72; Yoana 18:15–18,25–27)

55Kore payie eidip ltung'ana aainuaa nkima te nkiji e boo, netowuana tenebo, newuon sii Petero tenebo o ninche. 56Kore nkaisiaayiani nabo, nedol Petero ewuon tankalo nkima. Neing'or asipu nejo, <<Kore sii ele tung'ani naa keboitiere apa ninye.>> 57Nemiki ajo, <<Natomononi! Mayielo ninye!>> 58Kore te nkiti kata, neitoki likae tung'ani adol ninye nejoki, <<Kore sii iyie ira lobo lenche!>>

Nejoki ꞉Petero, <<Ai! Lolee, mara!>> 59Kore aitoki eicha nkata nabaki saa nabo, neitirrichaki ꞉likae tung'ani ajoki, <<Kedede, ketii sii apa ele tenebo o ninye, amu kera sii ninye loo Lgalilaya.>> 60Nejoki ꞉Petero, <<Lolee, mayielo nanu nijoito!>> Kore ake inia kata ewuon eirorita, neiru lkoko. 61Neiwuatuwuata ꞉Laitoriani, neing'or Petero. Neparru Petero ilo rerei otiaka apa ꞉Laitoriani, <<Kore anapar ewuon eitu eiru lkoko, ikimiki nkatitin uni.>> 62Neipung aulo, neichir te mion.

Eikordodoki neidong'i Yeso

(Matayo 26:67–68; Marko 14:65)

63Kore ꞉lolo tung'ana oorripito Yeso, neikordod ninye eidong'ito. 64Neisiap ninye nkonyek neipar aajoki, <<Mbonu ajo ng'ae likitoocho?>> 65Nedek sii ninye too ldeketa kumo.

Yeso tekue lkiama

(Matayo 26:59–66; Marko 14:55–64; Yoana 18:19–24)

66Kore payie eikienyu, netumo lkiama laa lpayiani o lkutuaa laa laitainok la lasar o laiteng'enak loo nkitanapat, neyau ninye atua nkiguana enche. 67Nejoki, <<Tanaa ira iyie Kristo#22:67 Kore Kristo keidimi aatejo Mesia. Ng'ura sii Luka 9:20., tiliki iyioo!>>

Nejoki ninche, <<Kore tanaliki ntae, naa mikirukuruk hoo nanu. 68Naa kore sii tanaiparichiere ntae, nimikiwolikiki hoo nanu. 69Kake kore ang'asu taata, keaku kewuon Nkerai e ltung'ani ta nkaina e tetene e ngolon e Nkai.>> 70Nejo pooki, <<Neaku, iyie Nkerai e Nkai?>>

Nejoki, <<Ijoitoto ntae, kara.>> 71Nejo ꞉ninche, <<Aa sipata nkae nikintoki ayiaya? Kitining'okita ate to nkutuk enye.>>

Currently Selected:

Luka 22: saq

Highlight

Copy