Yoana 21
21
Eipung'oka ꞉Yeso looiteng'eni sapa
1Kore tesiedi, neigil Yeso aipung'oki lbata loo looiteng'eni lenyena ta Mpaso e Tiberias. Naa nchi apa eikuna payie eitodolu koon: 2Kore Simon Petero o Tomas oitokini aajo Lmaoi o Nataniel oing'uaa Kana e Galilaya o layiok le Sebedayo o lkulikae oare loo looiteng'eni le Yeso, naa ketii apa ng'oji nebo. 3#Luka 5:5Nejoki ꞉Simon Petero lolo kulie, <<Kalo nanu aibung sinkirri.>> Nejo ninche, <<Ikipuo tenebo o iyie.>> Neipung ninche aapuo nedir meli, kake eitu hoo eibung toki inia kuarie. 4Kore naikenyunyie, neitache Yeso te nchepata e nkare, kake eitu eyielou looiteng'eni aajo Yeso ilo. 5Neipar Yeso ninche ajoki, <<Nkera ainien, meitoki hoo imbung'a?>> Newoliki aajoki, <<Meitoki.>> 6#Luka 5:6Nejoki ninche, <<Entanang'aki lgiitani libung'ieng'ie sinkirri mbata e tetene e meli, naa imbung'bung sinkirri.>> Nenang'aa ninche lolo lgiitani, neiput sinkirri metaa merekure eidim aateyietu tankaraki nkirochi.
7Kore ilo oiteng'eni oacham ꞉Yeso nejoki Petero, <<Laitoriani dei ilo!>> Kore payie ening ꞉Simon Petero ajo Laitoriani ilo, nerreten nanka enye e oriong naitayia duo easicho, neng'orokino atua nkare. 8Kake kore lolo ooiteng'eni lkulikae naa melakuaniki apa ninche nchepata e mpaso, matejo riot 100 ake. Nepuo te meli, eyietita lolo giitani lenche ebore sinkirri. 9Kore payie elang'aki nchepata e lkokun nedou, nedol lpul otii sinkirri, nedol aitoki mukate. 10Nejoki ꞉Yeso ninche, <<Eyautu lkuti sinkirri limbung'a taata.>>
11Neiliepaki ꞉Simon Petero lkokun, neyietu lolo giitani ayau nchepata e mpaso. Kore lolo giitani naa kebore sinkirri sapuki oara 153. Kore abaki ebore aaikonyi, naa eitu eng'urro. 12Nejoki ꞉Yeso ninche, <<Wootu entam ndaa nibolielie nkutukie.>> Nemeatae lobo too looiteng'eni oitieu aipara ajoki <<Ng'ae dei ira iyie?>> tankaraki nateyieloutua aajo Laitoriani. 13Nelo Yeso, nerrapu mukate neicho ninche, neitoki aiko nejia sinkirri.
14Naa nkata e uni ana, naipung'oka ꞉Yeso looiteng'eni lenyena eidipaki aaitipiu taatua lootuata.
Eipoto aitoki ꞉Yeso Petero
15Kore payie eidip aatam ndaa, neikonyi ꞉Yeso aitalam Simon Petero lkulikae#21:15 Indim atisipu ana te lkereri le 20. neipar ajoki, <<Simon layieni le Yoana, ikicham nanu aitalang nchaman naacham lkulie?>>#21:15 Kore ikicham nanu aitalang nchaman naacham lkulie? naa keidimi sii aatejo ikicham alang nicham kuldo? tanaa ikicham alang kunda? Newoliki ajoki, <<Ee, Laitoriani, iyielo iyie ajo kaacham.>> Nejoki ꞉Yeso, <<Ng'ura naa lkuoo lainien lekerra.>> 16Neigil Yeso nkata e are ajoki, <<Simon layieni le Yoana, ikicham nanu?>> Newoliki ajoki, <<Ee, Laitoriani, iyielo iyie ajo kaacham.>> Nejoki ꞉Yeso, <<Irrita naa nkerra ainien.>> 17Neitoki ajoki nkata e uni, <<Simon layieni le Yoana, ikicham nanu?>>
Nenyamalu Petero oleng tankaraki naipara ꞉Yeso nkata e uni ajoki, <<Ikicham nanu?>> Newoliki ninye ajoki, <<Laitoriani, iyielo iyie ntoki pooki, iyielo iyie ajo kaacham!>> Nejoki ꞉Yeso, <<Ng'ura naa nkerra ainien. 18Kaajoki iyie sipata nadede, kore apa ira lelerie naaku irreten ake nanka nilo ng'oji niyieu, kake kore payie iarrarru, nirruaaya nkaik inono nikirretenaki likae nanka nikirik ng'oji nimiyieu nilo.>> 19Ketiaka ꞉Yeso Petero ana aitodolu mpukunoto e lkiye oye Petero pee eibalunyie nkitoo e Nkai. Kore payie eidip atejo inia, nejoki, <<Irukurukoreeki nanu!>>
Yeso o ilo oiteng'eni oacham
20 #
Yoa 13:25
Neiwuatuwuata Petero nedol ilo oiteng'eni oacham ꞉Yeso, eirukurukore ninche. Kore ilo oiteng'eni, ninye apa oirichakino lgoo le Yeso enyeita ndaa, naa ninye sii oipara Yeso ajoki, <<Laitoriani, ng'ae dei ilo likilikoo iyie?>> 21Kore payie edol ꞉Petero, neipar Yeso ajoki, <<Laitoriani, oo dei ele?>> 22Newoliki Yeso ajoki, <<Amaa tanaa kayieu nanu payie ewuon ninye eichu ana matuchukunyie, nyo imparunyie iyie? Irukurukoreeki iyie nanu!>>
23Kore tankaraki inia, nebulaa taatua lalachera rerei lemesipa ojo kore ilo oiteng'eni naa meye. Kake eitu ejoki ꞉Yeso Petero meye ilo oiteng'eni, kake ketiaka, <<Amaa tanaa kayieu nanu payie ewuon ninye eichu ana matuchukunyie, nyo imparunyie iyie?>>
24Kore kuna baa, naa ilo oiteng'eni otilimua, naa ninye sii oigero. Nikiyielo aajo kore limunoto enye naa kedede.
Mbaa kumo naataasa Yeso
25Keatae nkulie baa kumo naataasa Yeso, naa tanaa meatae hoo nabo nemeigeri, anata meatae mpaach naichaa nenia bukuii to nkop pooki.
Currently Selected:
Yoana 21: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy
