Yoana 20

Etipiwua Yeso aing'uaa lootuata

(Matayo 28:1–8; Marko 16:1–8; Luka 24:1–12)

1Kore payie enyiku siran e Jumapili, ewuon emismis, nelo Maria Magadalena nkurarei, nedol ajo eiwuang'ieki soit to nkutuk e inia kurarei. 2Nekuet alo nebaki netii Simon Petero o ilo likae oiteng'eni, oacham ꞉Yeso, nejoki, <<Ewaki sesen la Laitoriani to nkurarei, nimikiyielo ng'oji netipikaki!>>

3Neipung ꞉Petero o ilo likae oiteng'eni aapuo nkurarei. 4Nekuet pukura oare, kake neilany ꞉ilo likae ooiteng'eni Petero, neng'as nkurarei. 5Neirrigo airumurum, nedol lolo kijat laa nankan naapuyiapui naairinieki sesen, kake eitu ejing ninye. 6Kore ake inia kata nebau Simon Petero, nejing atua nkurarei, nedol lolo kijat laa nankan naairinieki sesen eperi teinie, 7o nanka nairinakino apa nkue e Yeso. Kore inia anka e nkue nemechulare lolo kijat laa nankan naairinieki sesen, kake keper ake to ng'oji enye. 8Kore likae oiteng'eni, otabaka duo tekue nkurarei, nejing sii ninye atua nedol nenia ankan, neiruk ajo ketipiwua Yeso. 9Kore apake metabaki inia kata, ewuon ake eitu ening'u Lkigerot oojo meata nchere payie mepiu aing'uaa lootuata. 10Nerrinyo looiteng'eni aapuo inie newuenie.

Eipung'oka ꞉Yeso Maria Magadalena

(Matayo 28:9,10; Marko 16:9–11)

11Kake neitache Maria to nkutuk e nkurarei eichirita. Kore ake ewuon eichirita, neirrigo airumurum nkurarei, 12nedol lmalaikani oare ooichopito nkilani naaibor, ewueni to ng'oji neperie apa sesen le Yeso, ewuon lobo to ng'oji neing'orita apa nkue, newuon likae to ng'oji neing'orita nkejek. 13Neipar aajoki, <<Natomononi, nyo nikinyia?>> Newoliki ajoki, <<Ewaki Laitoriani lai to nkurarei, namayielo ng'oji netipikaki!>>

14Kore payie ejo nejia, neiwuatuwuata nedol Yeso eitache teinie, kake eitu eyielou ajo Yeso ilo. 15Neipar ꞉Yeso ajoki, <<Natomononi, nyo nikinyia? Ng'ae dei iyieita?>> Kore amu kejo ninye laisiaayiani lo lchampa, newoliki ajoki, <<Lokitok, tanaa iyie owa ninye, nikiliki nitipika payie alo aya.>> 16Nejoki ꞉Yeso ninye, <<Maria!>>

Neiwuatiwuatakino nejoki to nkutuk ee Lburania, <<Rraboni!>> Kore inia naa laiteng'enani to nkutuk ee Lburania. 17Nejoki ꞉Yeso, <<Mikintoki aibung, amu ewuon eitu aailiep alo netii Papa. Kake chomo netii lalachera lainien nijoki, <Kailiepita alo netii Papa lai naa Papa linchi, netii Nkai ai naa Nkai inchi.> >>

18Nelo Maria Magadalena, netii looiteng'eni le Yeso nejoki, <<Atoduaa nanu Laitoriani!>> Neitoki anyaki mbaa pooki natiaka ꞉Laitoriani.

Eipung'oka ꞉Yeso Looiteng'eni lenyena

(Matayo 28:16–20; Marko 16:14–18; Luka 24:36–49)

19Kore inia parri Jumapili teipa, naa keikeno inia aji naaiturrurrore looiteng'eni, tankaraki naurie larikok loo Lyiaudi. Nelotu Yeso neitache te nkiji enche nejoki, <<Metaa seriani tenebo o ntae!>> 20Kore payie eidip atejo ana, neitodol ninche nkaik o ntoop enye. Neng'ida looiteng'eni payie edol Laitoriani. 21Neitoki ꞉Yeso ajoki ninche, <<Metaa seriani tenebo o ntae! Kore ana naairriwua nanu Papa, kairruaaya sii nanu ntae.>> 22Kore payie ejo nejia, neyang'aki ninche nejoki, <<Entang'amai Nkiyeng'et Sinyati. 23#Mat 16:19, 18:18Kore ltung'ana lipalikiki ng'ok enche, nepalikini, naa kore ltung'ana limipalikiki, naaku mepalikino.>>

Eirorie ꞉Yeso Tomas

24Kore Tomas, ilo oji aitoki Lmaoi, oara lobo loo looiteng'eni 12, nemetii apa ninye tenebo o looiteng'eni teinia kata payie elotu Yeso. 25Nejoki ninye ꞉lolo lkulie ooiteng'eni, <<Ikitoduaa iyioo Laitoriani!>>

Nejoki ꞉Tomas ninche, <<Kore teneitu adol remot e lchumai taa nkaik enyena nairriki lkumojinoo lai, nairriki sii nkaina ai ntoop nateremoki, maairuk aikata.>>

26Kore payie eichunye uki nabo neitoki looiteng'eni aatumo tenebo taatua inia aji, netii sii Tomas tenebo o ninche. Kore eikeno inia aji, neipung'oki ꞉Yeso ninche nejoki, <<Metaa seriani tenebo o ntae!>> 27Nejoki ꞉Yeso Tomas, <<Rruu lkumojino lino rriki ene, ning'or nkaik ainien. Nintoki airruu nkaina ino, nirriki ntoop ai. Mintoki aata lng'ach, kake iruko.>> 28Newoliki ꞉Tomas ajoki, <<Ira Laitoriani lai, nira Nkai ai!>> 29Nejoki ꞉Yeso ninye, <<Kore tankaraki nikitoduaa, naa inia payie iruko iyie, kake emayiana lolo oiruk abaki eitu aadol!>>

Kipirte naigerieki ana buku

30Ketii mbaa kumo e nking'asia naaitodolu nkitoo e Yeso, naataasa edolita looiteng'eni lenyena, neitu eigeri tana buku. 31Kake keigeroki kuna payie itumtum aairuko aajo kore Yeso naa ilo Aitejeunoni oaanyutae oji Kristo, nera Nkerai e Nkai. Naa kore ta nkarna enye, niatata nkichon nemeiting tinirukuruk inia.

Currently Selected:

Yoana 20: saq

Highlight

Copy