Yoana 19

Etudung'okaki Yeso nkiguana payie echei

1Kore te inia kata, neya ꞉Pilato Yeso neichooyo meidong'i. 2Neitibir sikarini nkopiyia ee lkuku nepik nkue enye, neichopoki nkila mugie e oriong. 3Nenyikaki ninye nejoki, <<Oi siake iyie! Tibiko ntoricho, Lkinkii loo Lyiaudi!>> Neitejo seder mag. 4Neitoki Pilato apuku nejoki larikok loo Lyiaudi, <<Eng'ura! Kaitupuku taata ninye ayau ene payie iyielouu aajo eitu atum mbae nadung'okinyie ninye nkiguana.>> 5Nepuku Yeso eichopito nkopiyia ee lkuku o nkila mugie e oriong. Nejoki ꞉Pilato ninche, <<Leilo naa ltung'ani!>> 6Kore payie edol ꞉laitainok kutuaa la lasar o laretok lenche Yeso, nebuak aajo, <<Techo ninye! Techo ninye to lmusalaba!>> Nejoki ꞉Pilato, <<Ewaita ntae ninye enteche to lmusalaba, amu eitu atum mbae nadung'okinyie nkiguana.>> 7Newoliki larikok loo Lyiaudi aajoki, <<Ikiata iyioo nkitanapat, naa kore ana najo nenia kitanapat, keichiaakino payie eye amu /keitaa koon Nkerai e Nkai.>>

8Kore payie ening ꞉Pilato inia, neguretu oleng. 9Nechukokino lgilata le nkaji oitorichere oji Praitoria, neyauni Yeso neipar ajoki, <<Kaji ing'uaa iyie?>> Kake eitu eng'amaa ꞉Yeso. 10Nejoki ꞉Pilato, <<Meata nikijoki nanu? Miyielo ajo kaata nanu nkitoria naalakunyie o naacheyie?>> 11Nejoki ꞉Yeso, <<Miata iyie nkitoo nikintoreyie nanu, mara ake inia nikinchoo Nkai#19:11 Kore mara ake inia nikinchoo Nkai naa kejo Yoana mara ake inia nikinchooki te keper.. Naaku kore ilo ltung'ani laatipika nkaik inono, ninye oata ng'oki alang iyie.>> 12Kore payie ening ꞉Pilato inia, nenyok ayiaya nkoitiei nalakunyie Yeso, kake nebuak larikok loo Lyiaudi aajo, <<Kore payie ipalaa ele tung'ani naaku mira iyie lchore le Kaisari. Naa kore pooki ng'ae oitaa koon lkinkii naaku Kaisari erare!>> 13Kore payie ening ꞉Pilato ilo rerei, neipung'unyie Yeso boo, newuon to lorika la laiguanani to ng'oji neji Lketiketi le Soit, oji to nkutuk ee Lburania Gabata. 14Kore inia kata naa matejo saai 12 e siran, mparri nanapae payie eikienyu eaku Sabato e uki e ntasim e Pasaka. Nejoki ꞉Pilato larikok loo Lyiaudi, <<Leilo Lkinkii linchi!>>

15Nebuak aajo, <<Iwa tara! Iwa tara! Techo ninye!>> Neipar ꞉Pilato ninche ajoki, <<Lkinkii linchi ache?>> Newoliki Laitainok kutuaa la lasar aajoki, <<Mikiata iyioo likae kinkii mara ake Kaisari!>> 16Neichooyo ꞉Pilato ninye metechei ana nayieu ninche.

Etechoki Yeso

(Matayo 27:32–44; Marko 1:21–32; Luka 23:26–43)

Neyae Yeso, 17naa kore enapita ninye koon lmusalaba lenye, neipung te lkerenket alo ng'oji neji mborbor e Nkue, aa taa Golgota to nkutuk ee Lburania. 18Neche ninye to lmusalaba teinie o lkulie tung'ana oare, etii likae nkaina enye e tetene netii likae ne kidienye. Kore Yeso, netii terichet ninche. 19Neitanapicho Pilato meeigeri lkigerot nepetokini lmusalaba. Kore lolo kigerot oigeroki naa kejo <<yeso le nasaret, lkinkii loo lyiaudi.>> 20Neisom Lyiaudi kumo inia naigero amu kore ng'oji netecheyieki Yeso naa kenyikita lkerenket, neigeroki to nkutuk ee Lburania o nee Rroman o nee Lgirriki. 21Nejoki ꞉Laitainok kutuaa la lasar loo Lyiaudi Pilato, <<Minger ajo, <Lkinkii loo Lyiaudi> kake ngero ajo, <Kejo ele tung'ani kara Lkinkii loo Lyiaudi.> >> 22Newoliki ꞉Pilato ajoki, <<Kore inia naigero, kewuon ake eigero etiu nejia.>>

23Kore payie eidip sikarini aateche Yeso, neya nankan enyena e oriong, neor nkatitin ong'uan, metaa meatae lemeata ng'urroti tee ninche. Neitoki aaya nanka enye e atua, naa kore inia anka nemetii lkererin loo ripat, kake nabo ake ang'asu te keper meipung'o. 24#SNk 22:18Nejokino sikarini, <<Miking'ur ana anka, kake matunuk nkuko payie kiyielou aajo ng'ae oya.>> Neasai ana payie ebaya Lkigerot oojo,

<<Etooro ninche nankan ainien,

nenuk nkuko aayielou loya nkila ai.>>

Kore sikarini naa inia etaasa, 25kore ng'otonye o anache ng'otonye o nkitok e Kilopas naji Maria o Maria Magadalena neitachoo tankalo lmusalaba le Yeso. 26Kore payie edol ꞉Yeso ng'otonye o ilo oiteng'eni oacham eitache teinie, nejoki ng'otonye, <<Yieyio, leilo layieni lino!>> 27Neitoki ajoki ilo oiteng'eni, <<Neinia ng'utunyi!>> Kore ang'asu inia kata nerik ꞉ilo oiteng'eni ng'oto Yeso nkang enye.

Lkiye le Yeso

(Matayo 27:45–56; Marko 15:33–41; Luka 23:44–49)

28 # SNk 69:21, 22:15 Kore payie eidipai inia, eyielo Yeso ajo eidipate mbaa pooki, nejo ana payie ebaya Lkigerot, <<Kaata nkure!>>

29Neatae apa loket ouno teinie obore naichuo naisiicho, nemug ninche mputaput te inia aicho metoboreyia, neremoki sempei e lcheni oji hisop, neiliepie aapik nkutuk enye. 30Kore payie eichamcham ꞉Yeso inia aichuo nejo, <<Eidipe!>> Neirrig nkue enye, neichooyo nkichui enye.

Eipokoki ꞉Yeso ntoop te mpere

31Kore apa inia parri, naa mparri nanapae tankaraki Sabato. Naa kore inia Sabato, naa Sabato apa naata tipat oleng. Naaku inia payie echomo larikok loo Lyiaudi netii Pilato aomon meichoo metigila nkejek ee ltung'ana ootechoki, neitai too lmusalabani amu meyieu apa Lyiaudi neing'uari seseni eika to lmusalaba ta mparri e Sabato. 32Nepuo sikarini negil nkejek ee lolo ltung'ana oare ootechoki tenebo o Yeso, ang'asunyie lobo kore payie eidip neitoki likae. 33Kake kore payie epuonu netii Yeso, nedol aajo etundung'ie tau, naaku eitu egil nkejek enyena. 34Neipok ꞉sikarii obo Yeso ntoop te mpere, nepuku nabokata lodo o nkare. 35Kore ltung'ani otoduaa inia, netilimua sipata enye payie itumtum airuko. Naa kore inia sipata natilimua ninye naa kedede, neyielo ninye ajo ndedei eiro. 36#Nai 12:46; Nki 9:12; SNk 34:20Kore kuna baa naa ketaasate payie ebaya Lkigerot oojo, <<Meatae hoo loito lenye obo ogili.>> 37#Sak 12:10; Mbo 1:7Nejo sii aitoki Lkigerot ta nkae ng'oji, <<Keing'or ltung'ana ilo oipoko te mpere.>>

Etunukayieki Yeso

(Matayo 27:57–61; Marko 15:42–47; Luka 23:50–56)

38Keatae apa ltung'ani oji Yosep oing'uaa lkerenket oji Arimataya. Kore apa ninye naa kera loiteng'eni le Yeso taatua nkop, tankaraki naurie larikok loo Lyiaudi. Kore payie eich kuna baa, nelo aomon Pilato sesen le Yeso. Nechamaa ꞉Pilato inia, nelo Yosep aya ilo sesen. 39#Yoa 3:1,2Kore sii aitoki Nikodemo, lapa taa ochomo adol Yeso kuarie, nelotu eata lkeek oorropili, aa naing'urre e mir echula o sukuroi, oyelieki echi seseni loo ltung'ana ootuata payie mesioki aang'uai. Kore nkirochi ee kulo keek pooki naa matejo lkiloii osom. 40Neya lolo tung'ana pukura are sesen le Yeso, neirin taa nankan naapuyiapui, aairinaa tenebo o lolo keek oorropili, ana neiko chiaake Lyiaudi tenenukaa ltung'ana. 41Kore apa inie netecheyieki Yeso, naa ketii lchampa otii nkurarei ng'ejuk neitu aikata eiteperieki ltung'ani. 42Kore amu mparri apa inia nanapa Lyiaudi tankaraki Sabato, netaaniki inia kurarei inie netecheyieki Yeso, neroyie aapik Yeso inie.

Currently Selected:

Yoana 19: saq

Highlight

Copy