Asat Mbaa naaituruku
Mbaa naaituruku
Kore ana buku naa Luka oigero nera mbuku naijipunyie Lomon Supati ooigero tekue. Meyieloi ng'oji neigerieki, kake kore ng'asunoto enye neitodolu ajo, keigerokaki ltung'ani kitok oyanyiti oji Teopilo ana netiu Lomon Supati ooigero tekue. Kejo lbata loo ltung'ana nchere keigeroki matejo ta lari le 63 etiiwuaki Kristo, nejo lkulie keigeroki ta lari le 70 etiiwuaki Kristo.
Keng'asu ana buku to ng'oji neitabaka Luka Lomon Supati ooigero apa payie eiliep Yeso alo chumata. Neitodolu sii aitoki ana buku neikuna Lkipaareta le Yeso o lkulie ooiteng'eni payie ewueni te Yerusalem aanyu metabai ilo lekutuk apa oitaka ninche ꞉Yeso. Kore ta mparri nanyeitae ntasim e Pentekost, eima ake mperot tomon eidipa Yeso ailiepa chumata, nedoki ninche ꞉Ltau Sinyati neiput ngolon. Kore ang'asu inia kata, nebulu nkanisa asioki, ang'asu te Yerusalem nebaki Samaria o neiting'ie nkop. Indim aisoma naipirita ele lekutuk le Yeso te 1:8.
Kore mbata ekue e ana buku neipirita lkipaaret oji Petero o nkanisa e lkerenket le Yerusalem. Kore motua e saal nelo kue, neipirita Lkipaaret oji Paulo, neitodolu lotot enyena uni e likoroto ee Lomon Supati taatua nkop kitok ee Rroman, neitodolu sii aitoki lototo enye ana metabaki Rrom.
Kore tana buku nenyau Luka neikuna nkanisa payie eng'asu o neikuna payie ebulaa o mbaa natii nkop apa inia ng'amata. Kelimu sii aitoki Luka neiko apa lolo ooiruko Yeso tenewueni tenebo tanaboicho o te sina oitamaki. Neitoki sii alimu asat naaitodolu ngolon kitok e Ltau Sinyati taatua nkanisani o tee nkichoni ee ltung'ana ooiruko Yeso.
Currently Selected:
Asat Mbaa naaituruku: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy