Asat 1

Eichoo ꞉Yeso looiteng'eni lekutuk la Ltau Sinyati

1 # Luka 1:1–4 Kore to mbuku ai ekue, Teopilo, naa kaigero nanu mbaa pooki naataasa Yeso o naaiteng'eniche, 2ana metabau inia parri nailiepieki apa ninye aaya chumata, eidipa aitanapa Lkipaareta lenyena ta Ltau Sinyati. 3Kore eidipaki aaitama sina neri metua, neibalie koon too lolo kipaareta lenyena, eitodolu nkatitin kumo sipat nchere keichu. Ketaase ana taatua mperot 40 eipung'oki ninche, neliki mbaa naaipirita nkitoria e Nkai.

4 # Luka 24:49 Kore mparri nabo enyeita ninche ndaa, neicho ana kitanapata, <<Eming'uaa Yerusalem, kake entaanyu ilo lekutuk oitaka ntae Papa, ilo litining'o apa ta nanu. 5#Mat 3:11; Mrk 1:8; Luka 3:16; Yoa 1:33Amu kore apa Yoana naa keipatisa ntae ta nkare, kake kore too nkuti mperot naa keipatisi ntae ta Ltau Sinyati.>>

Eiliepieki Yeso aaya chumata

6Kore payie etumo lkipaareta o Yeso, neipar aajoki, <<Laitoriani, amaa, irrinyoki Isirael nkitoria taata?>> 7Nejoki ninche, <<Mara siaai linchi payie iyielouu ng'amat o mperot naategelua Papa te nkitoria enye. 8#Mat 28:19; Mrk 16:15; Luka 24:47,48Kake itumtum ngolon kenya tenelotu Ltau Sinyati atua ntae, nilimumu sipata ai te Yerusalem o to nkop pooki e Yudea o Samaria o neiting'ie nkop.>>

9 # Mrk 16:19; Luka 24:50,51 Kore payie eidip atejo kuna baa, neiliepieki aaya chumata edolita ninche, neisiapaa ꞉nkidis.

10Kore eapaa nkonyek aaimariri chumata eiliepita, nejo pang lewa oare ooichopito nankan naaibor neiitachoo tankalo ninche. 11Nejoki, <<Lolewa kulo le Galilaya, aanyo payie intachoo aing'or chumata? Kore ele Yeso, oiliepieki aitung'aa ntae aaya chumata, naa kechukunyie ana nitoduaa payie eiliep alo chumata.>>

Etijing'a Matias mpaach e Yudas Isikariot

12Nedoyio Lkipaareta aarrinyo aapuo Yerusalem eing'uaa lowua oji Loo Lng'erriyio, onyikita ilo kerenket matejo kilomita nabo. 13#Mat 10:2–4; Mrk 3:16–19; Luka 6:14–16Kore payie ejing ilo kerenket, neiliapaki lngilata le nkurupa owuenie chiaake ninche. Naa kulo tung'ana taa ootijing'a inie: Petero o Yoana o Yakobo o Andirea o Pilipo o Tomas o Batolomayo o Matayo o Yakobo layieni le Alpayo o Simon oji Silote o Yudas layieni le Yakobo. 14Naa ketumo ninche pooki nkata pooki aaomon tanaboicho tenebo o nkulie tomonok, netii sii Maria ng'otonye Yeso tenebo o ninche o lalachera le Yeso.

15Kore mparri nabo, neitache Petero taatua lalachera o nkanachera oaabaki ltung'ana ip nabo o tikitam, nejo, 16<<Lalachera o nkanachera, kore apa naa ketilimua Ltau Sinyat aimu Daudi mbaa naasai te ꞉Yudas ilo otiriko lolo oibung'a Yeso. Naa meata ajo meitabari kulo kigerot. 17Kera sii apa Yudas lkipaaret le Yeso, netaasa siaai tenebo o iyioo.>>

18 # Mat 27:3–8 Kore apa ninye naa keinyeng'ua lchampa too ropiyiani naatumo ta asata enye torno. Nenang nkop te ilo champa, nedanya nkocheke neibukori sorri. 19Neyielou ltung'ana pooki le Yerusalem ana, neng'amaki ilo champa nkarna naji to nkutuk enche Akeldama, nautu ajo Lchampa lo lodo.

20 # SNk 69:25, SNk 109:8 <<Keigeroki to mbuku ee Sinkoliotin le nkisisa e Nkai nchere,

<Metaa inie newuenie ninye mijoni,

nemeatae ltung'ani omany inie,>

<<neigero sii ajo,

21 # Mat 3:16; Mrk 1:9; Luka 3:21, Mrk 16:19; Luka 24:51 <<Naaku meata ajo megeluni lobo loo lolo lewa meawa mpaach enye, otii apake tenebo o iyioo nkata pooki kiata Laitoriani Yeso, 22ang'asu ta nkata apa naipatisicho ꞉Yoana, ana metabaki mparri apa nawaki Yeso aaitung'aa iyioo. Kore ilo tung'ani, naa keaku lobo olimu tenebo o iyioo sipata e mpiunoto e lkiye lenye.>>

23Neyau ꞉ninche ltung'ana oare, Yosep oitokini aajo Barsabas neji aitoki Yusuto, o likae oji Matias. 24Neomon aajo, <<Laitoriani, iyielo iyie ltau loo ltung'ana pooki, mbalakinyie iyioo ajo alo too kulo pukura oare itegelua, 25payie eya mpaach e siaai natung'ayie Yudas alo ng'oji torno neichiaakino ninye.>> 26Nenuk ꞉ninche nkuko, nerriakino Matias, neponikini ninye atua lolo kipaareta tomon o obo.

Currently Selected:

Asat 1: saq

Highlight

Copy