Yoana 18

Eibung'a ꞉sikarini Yeso

(Matayo 26:47–56; Marko 14:43–50; Luka 22:47–53)

1Kore payie eidip Yeso atoomono, neipung tenebo o looiteng'eni lenyena alang sere e Kidiron. Kore te ilo kokun, netii apa lchampa obo otijing'a ninye tenebo o looiteng'eni lenyena. 2Kore Yudas, ilo otilikoyie ninye meibung'i, naa keyielo inie ng'oji, amu ketumo chiaake Yeso tenebo o looiteng'eni lenyena teinie. 3Nelo naa ꞉Yudas ilo lchampa, erikito lturrur loo sikarini loo Rroman o laretok loo laitainok kutuaa la lasar o loo Lparisayo, eata lkilang'ilang'eta o ltaii o masaa e larrabal. 4Naa kore eyielo ꞉Yeso ntoki pooki nayieu ninche neitaas ninye, neipung'oki, neipar ajoki, <<Ng'ae dei iyieitata?>> 5Newoliki aajoki, <<Yeso le Nasaret.>> Nejoki Yeso, <<Nanu ilo.>> Kore Yudas olikoo ninye meibung'i, neitache tenebo o sikarini. 6Kore payie ejo Yeso, <<Nanu ilo>>, nerrinyo tesiedi nenang nkop arriaa. 7Neitoki Yeso aipar ninche ajoki, <<Ng'ae dei iyieitata?>> Nejo, <<Yeso le Nasaret.>> 8Newoliki ꞉Yeso ajoki, <<Katilika ntae ajoki nanu dei ilo. Naa tanaa nanu iyieitata, enchoo naa kulo lewa laairukurukore epuo.>> 9Ketaase apa ana payie ebaya laduo rereii otejo, <<Kore to lolo likinchoo naa eitu hoo eimin lobo.>>

10Nechutu ꞉Simon Petero lalem oata duaake, neoch laisiaayiani la laitainoni kitok la lasar oji nkarna Malkus nedung'oo nkiok e tetene. 11#Mat 26:39; Mrk 14:36; Luka 22:42Nejoki ꞉Yeso Petero, <<Tirrinyoki lalem lino nchachur! Ijo iyie maimaa nanu sina otegelua Papa lai maimai?#18:11 Kore maimaa nanu sina otegelua Papa lai maimai? naa kejo Yoana mamat nanu lkukompe laaichoo ꞉Papa lai?>>

Etirikoki Yeso netii laitainoni kitok la lasar

12Neibung laaduo sikarini loo Rroman tenebo o lkitok lenche o lolo aretok loo larikok loo Lyiaudi Yeso neen. 13Neng'as aaya ninye netii Anas, laa ninye pakiteng le Kayapas, ilo oara laitainoni kitok la lasar te ilo ari, 14#Yoa 11:49,50naa ninye apa otuutaka laitoriak loo Lyiaudi ajoki, naikach teneye ltung'ani obo anang ltung'ana.

Etimika ꞉Petero Yeso

(Matayo 26:69–70; Marko 14:66–68; Luka 22:55–57)

15Neirukurukore ꞉Petero Yeso tenebo o likae oiteng'eni. Kore ilo oiteng'eni, naa keyielore oleng ilo aitainoni kitok la lasar, tankaraki inia payie eirukurukore ninye Yeso metabaki atua boo e nkaji nageluno e ilo aitainoni kitok la lasar. 16Kake neitache Petero to nkutuk e ltim. Kore laduo likae ooiteng'eni oyielore laitainoni kitok la lasar, nelo airorie ntito naibokito ltung'ana to nkutuk e ltim, neriku Petero atua boo. 17Nejoki ꞉inia tito Petero, <<Mara mira ake iyie lobo loo looiteng'eni le elde tung'ani?>> Newoliki ꞉Petero ajoki, <<Mara.>>

18Kore apa laisiaayiak o larripok, naa keinuaa nkima, neigeru pooki aaij tankaraki keirobi nkop teinia kata. Neitache sii ꞉Petero teinie, tenebo o ninche aij nkima.

Eiparichiere ꞉Anas Yeso

(Matayo 26:59–66; Marko 14:55–64; Luka 22:66–71)

19Neiparichiere ꞉laitainoni kitok la lasar Yeso mbaa naaipirita looiteng'eni lenyena o nkiteng'ena enye. 20Newoliki ꞉Yeso ajoki, <<Kairorie chiaake nanu nkop ening'ito pooki ng'ae. Kore tee Sinagogini o ta nkaji e Nkai, inie netumore Lyiaudi pooki naa kaiteng'enichie nkata pooki. Eitu aikata ajo nanu mbae too nkurrat. 21Aanyo naa payie kimparicherere nanu? Mparichiere ltung'ana laatining'o airo amu keyielo mbaa natejo.>>

22Kore payie eidip ꞉Yeso atejo nejia, neoch ꞉laretoni obo la laitainoni kitok la lasar oitache tankalo ninye seder nejoki, <<Nejia inko tiniwoliki laitainoni kitok la lasar?>> 23Newoliki ꞉Yeso ajoki, <<Tanaa keatae mbae torno natejo, tilimu sipata enye. Kake kore tanaa sipata airoro, aanyo payie kioch seder?>> 24Neirruaaya ꞉Anas Yeso eena nkaik meawae netii Kayapas, laitainoni kitok la lasar.

Einyiaaka ꞉Petero amiki Yeso

(Matayo 26:71–75; Marko 14:69–72; Luka 22:58–62)

25Kore eitache Simon Petero aijito nkima tanaduo ng'oji, neipari aajoki, <<Mara mira ake iyie lobo loo looiteng'eni le elde tung'ani?>> Kake nemiki ꞉Petero nejo, <<Mara.>>

26Kore laisiaayiani obo la laitainoni kitok la lasar oara le ntipat nabo o ltung'ani otudung'o ꞉Petero nkiok, neipar ajoki, <<Mara iyie atoduaa ta laduo champa iboitiere ninye?>> 27Neitoki Petero amiki nejo, <<Mara nanu.>> Kore ake inia kata neiru lkoko.

Ewaki Yeso meiguana ꞉Pilato

(Matayo 27:1–2,11–14; Marko 15:1–5; Luka 23:1–5)

28Kore ta siran, nerik ꞉larikok loo Lyiaudi Yeso aaipung'ie ta nkaji e Kayapas, neya lgilata le nkaji oji Praitoria nawuenie lkitok loo Rroman oji Pilato oitore nkop e Yudea. Kore larikok loo Lyiaudi neitu ejing atua inia aji, amu meyieu apa neitarruo ate metaa meichiaakino nenya ntasim e Pasaka. 29Neipung'oki ꞉Pilato nejoki, <<Kaa iatayieyie ele tung'ani?>> 30Newoliki aajoki, <<Kore teneitu eas ele tung'ani ntoki torno, anata mikiyau nitii iyie.>> 31Nejoki ꞉Pilato ninche, <<Ewata ntae ninye enguana maate, ana naichiaakino tee nkitanapat inchi.>> Newoliki aajoki, <<Meicho iyioo nkitoria ee Rroman, metaa ikiar ltung'ani metua.>> 32#Yoa 3:14, 12:32Ketaase ana paa kore lomon ootejo Yeso ooitodolu mpukunoto e lkiye lenye, nebaya.

33Nechuko Pilato ajing laduo gilata le nkaji oji Praitoria, neipot Yeso neipar ajoki, <<Iyie dei lkinkii loo Lyiaudi?>> 34Neng'amaa ꞉Yeso ajoki, <<Iyie makoon eing'uaa ana bae nimparu, tana lkulie likitilikita naaipirita nanu?>> 35Nejoki ꞉Pilato, <<Ijo dei iyie loo Lyiaudi ara nanu? Ltung'ana linchi ake o laitainok kutuaa la lasar likiyeutua natii nanu. Nyo itaasa iyie?>> 36Newoliki ꞉Yeso ajoki, <<Kore nkitoria ai naa mara ne ana kop. Kore tanaa ne ana kop nkitoria ai, anata aa kore laisiaayiak lainien nenya larrabal payie maayakini larikok loo Lyiaudi. Kake kore nkitoria ai naa mara ne ana kop.>> 37Neipar ꞉Pilato Yeso ajoki, <<Naaku lkinkii ira iyie?>> Newoliki ꞉Yeso ajoki, <<Iyie ojoito kara nanu lkinkii. Kaatiwuaki, nayewuo ana kop payie alimu sipata naipirita ndedei. Kore pooki ng'ae oara le ndedei naa kaaning nanu.>> 38Neipar ꞉Pilato ajoki, <<Nyo eji ndedei?>>

Etudung'okaki Yeso nkiguana e lkiye

(Matayo 27:15–31; Marko 15:6–20; Luka 23:13–25)

Kore payie eidip aiparu inia, neitoki aipung'oki larikok loo Lyiaudi nejoki, <<Eitu atum mbae nadung'okinyie ele tung'ani nkiguana. 39Kake kore chiaake netiu taa ntae, naa kalaaki ntae ltung'ani obo ta ng'amata e Pasaka, naaku iyieuu nalaaki ntae lkinkii loo Lyiaudi?>> 40Neitoki aabuak aajo, <<Mara ele tung'ani! Talaku Barabas!>> Kore apa Barabas naa ltung'ani oricho.

Currently Selected:

Yoana 18: saq

Highlight

Copy