Yoana 17

Etoomono ꞉Yeso Nkai Papa

1Kore payie eidip Yeso atejo ana, neapu nkonyek aing'or keper nejo, <<Papa, etabawua nkata! Iliepunyie Nkerai ino, payie eitodolu ꞉Nkerai ino nkitoo ino, 2ana ninchoo ninye meitoria ltung'ana pooki, payie etum aichoo lolo pooki linchoo nkichon nemeiting. 3Naa ana nkichon nemeiting nchere payie kiyielou ltung'ana, iyie Nkai nabo ake nadede, neyielou Yeso Kristo ilo lirriwua. 4Kaitodolua nkitoo ino to nkop, te nkidipata e siaai likinchoo mataasa. 5Papa, kore naa taata, iliepieki teinie nitii, te inia kitoo apake naata tenebo o iyie ewuon meatae nkop. 6Kaiteyielo lolo likinchoo to nkop nkarna ino. Kore ninche naa linono apa, nikinchoo ninche, neibung'a rerei lino. 7Kore taata keteyieloutua ninche aajo kore ntoki pooki nikinchoo naa iyie eing'uaa. 8Kore rereii likinchoo, naa kaichoo nanu ninche, neng'amaa, neyielou katukul aajo iyie aing'uaa neiruk sii aajo iyie likirriwua. 9Kaamonoki ninche, mara taa nkop aomonoki, kake lolo likinchoo amu linono. 10Kore pooki ainien naa ninono, naa kore pooki inono naa nainien, naa katum nanu rrepeta tee ninche. 11Merekure awuon tana kop, kake ewuon ake etii ninche nkop, naa kalotuta nitii. Papa Sinyati, tirripo ninche taatua nkarna ino, inia arna nikinchoo, payie etum ninche aataa nabo ana payie kira iyioo nabo. 12#SNk 41:9; Yoa 13:18Kore apa ewuon atii nanu tenebo o ninche natirripo ninche taatua nkarna ino, inia arna nikinchoo. Katirripo ninche, nemeatae hoo lobo oimina mara ake ilo tung'ani ogelakino nkiminata, payie ebaya lkigerot. 13Kalotuta naa taata nitii, kake kajo kuna baa ewuon atii nkop payie etum ninche ng'ida ai nabore. 14Kaichoo ninche rerei lino, neibayie ꞉nkop ninche tankaraki namara lena nkop, ana namara nanu lena nkop. 15Kore naamonito, naa mara payie intai ninche aitung'aa nkop, kake payie irrip te ilo torno. 16Mara ninche lena kop ana namara sii nanu lena kop. 17Ntisinya ninche te ndedei, rerei lino ndedei. 18Kore ana nikirriwua nanu nkop, airruaayie sii nanu ninche nkop. 19Kaitai koon aaku lasar sinyati anang ninche, payie eitisinyi sii ninche te ndedei.

Etoomonaka ꞉Yeso ltung'ana pooki ooiruk ninye

20-21<<Mara taa kulo aapeny aomonoki, kake kaamonoki sii naboicho e lolo pooki laairuk tankaraki lkilikuai lenche. Papa, kore ana niti iyie atua nanu nati sii nanu atua iyie, kaamon metaa sii ninche nabo o iyioo, payie etum nkop airuko ajo iyie likirriwua. 22Aichoo ninche nkitoo apa nikinchoo, payie eaku nabo ana payie kira iyioo nabo, 23ati nanu atua ninche nitii iyie atua nanu, payie eaku ninche katukul nabo, netum nkop ateyielo ajo ikirriwua, nitachama ninche ana nikitachama nanu.

24<<Papa, kayieu paa kore lolo likinchoo neaku tenebo o nanu to ng'oji natii, payie edol nkitoo ai, inia kitoo nikinchoo tankaraki nikitachama ewuon eng'or nkitainoto e nkop. 25Papa loosipat, kore abaki mikiyielo iyie nkop, kaayielo nanu, neyielo sii kulo aajo ikirriwua. 26Kaiteyielo ninche nkarna ino, naa kaitoki ake alo kue aiteyielo, paa kore nchaman nikitachama, newuon taatua ninche, nawoun sii nanu taatua ninche.>>

Currently Selected:

Yoana 17: saq

Highlight

Copy