Yoana 16

1<<Katilika nanu ntae ana payie mirriaa. 2Kemirari ntae aaipung'ie tee Sinagogini, naa kelotu nkata naa kore lolo oar ntae entuata, teneas nejia nejo Nkai eisiaita. 3Kore lolo tung'ana naa keas nejia amu meyielo Papa, namaayielo sii nanu. 4Kake katilika ntae kuna baa, paa tenebau inia kata niparrurru aajo katilika ntae. Neitu aliki ntae ta ng'asunoto, tankaraki ewuon apa atii tenebo o ntae.

Siaai e Ltau Sinyati

5<<Kaloito taata netii ilo lairriwua, nemeatae lobo linchi laaipar ajoki, <Kaji iloito?> 6Kake kore naa taata amu katilika ntae, naaku keisinanio ltauja linchi oleng. 7Naa kaliki ntae ndedei nchere, keikach taa ntae tanalo nanu, amu tanamalo naaku melotu Laretoni nitii. Kake tanalo, nairriuu meeu nitii. 8Naa kore tenelotu neibalakinyie nkop ajo nyo ng'oki naa nyo sipata e Nkai o ndung'oto e nkiguana enye. 9Keibalakinyie ajo kore ng'oki naa maairuk nanu ꞉ltung'ana, 10neibalunyie sii aitoki ajo sipata e Nkai payie alo netii Papa nimikintokiki aadol. 11Neibalakinyie sii ndung'oto e nkiguana nchere kore loitore ana kop, neidipaki aatudung'oki nkiguana torno.

12<<Ewuon aata mbaa kumo nayieu naliki ntae, kake mindimarere taata. 13Kake kore tenelotu Ltau le ndedei nerikoki ntae ndedei pooki, amu melimu ninye mbaa enyena makoon. Kore ake pooki naning, nelimu, neliki sii ntae mbaa naawuon epuonu. 14Kaailiepunyie ꞉ninye nanu, amu mbaa ainien eng'amaa neibalakinyie ntae. 15Kore pooki naata ꞉Papa naa nainien, naaku inia payie atejo keng'amaa Ltau Sinyati nenia baa ainien, neibalakinyie ntae.

Keibelekenya sina loo looiteng'eni aaku ng'ida

16<<Kore te nkini kata mikintokiki aadol, kake kore aitoki te nkini nkata nikintokiki aadol.>>

17Neipara lbata loo looiteng'eni lenyena aajokino, <<Nyo dei ana najokita iyioo, <Kore te nkini kata mikintokiki aadol, kake kore aitoki te nkini kata nikintokiki aadol> o ana sii najo <Kaloito netii Papa>?>> 18Neitoki aipara aajokino <<Nyo dei ejoito <te nkini kata>? Mikiyielo hoo nejoito!>> 19Kore amu keyielo Yeso ntoki nayieu ninche neiparu, nejoki, <<Amaa, ana bae dei imparara ntae natejo, <Kore te nkini kata mikintokiki aadol, kake kore aitoki te nkini kata nikintokiki aadol>? 20Kajoki ntae sipata nadede, inchirchir aayeku nintokiki aaisinanio kake keng'ida nkop. Isinanionio, kake keibelekenya sina linchi aaku ng'ida. 21Kore tenesaisai ntomononi, naaku keata mion tankaraki natabawua nkata enye, kake kore payie ejing aji, nerikino naduo mion, neng'ida tankaraki natabawua nkerai nkop. 22Nchi naa abaki itiuu ntae, isinaniono taata kake kaitoki adol ntae, neng'ida ltauja linchi. Kore inia ng'ida nitumutum, meatae looru ntae. 23Kore te inia parri, mikintokiki aomon toki. Kajoki ntae sipata nadede, kore ntoki pooki niomonmon Papa ta nkarna ai, neicho ntae. 24Kore o taata meatae ntoki nitoomonutua ta nkarna ai. Entoomonu, naa ing'amaa payie etum ng'ida inchi atoboreyia.

Ketimira ꞉Yeso nkop

25<<Katilika ntae kuna baa te rereii ooisudoro. Kake kelotu nkata namaitoki airorie ntae aiko nejia, kake kaliki ntae mbaa naaipirita ꞉Papa aipidaki. 26Kore te inia parri naa iomonunu ta nkarna ai. Majoito taa, nanu oomonoki ntae taa Papa, 27amu Papa koon oacham ntae, tankaraki nikitachama nanu, nikiruko sii ajo Nkai aing'uaa. 28Papa apa aing'uaa nanu, nayewuo nkop. Naa kore aitoki taata, kaing'uarita nkop aloito netii Papa.>>

29Nejoki ꞉looiteng'eni lenyena, <<Irorita taa taata aipidaki, merekure irorita too lomon ooisudoro! 30Kore taata, ikiteyieloutua aajo iyielo iyie mbaa pooki, nemeata tipat payie kimparichiereki. Kore tankaraki inia, ikiruko aajo Nkai ing'uaa.>> 31Newoliki ꞉Yeso ninche ajoki, <<Taata irukuruk? 32Kelotu nkata, netabawua dei pii, naa kesachari ntae pooki, metaa meatae lemeim ng'oji enye, naaiung'uari ake aa nanu apeny. Kake mara nanu apeny amu ketii Papa tenebo o nanu. 33Katilika ntae kuna baa payie iatata seriani taatua nanu. Iatata sina to nkop, kake entogolo nkochua amu katimira nanu nkop!>>

Currently Selected:

Yoana 16: saq

Highlight

Copy