Yoana 15

Yeso lmusabibu odede

1<<Kara nanu lmusabibu odede, naa Papa oitacheki ilo champa lo lmusabibu. 2Kore lng'asula pooki lai lemejing ꞉lng'anayio, nedung'oo aiturraa. Naa kore lng'asula ojing lng'anayio, neng'ur aitibir payie etum lng'anayio kumo aatijing. 3Indipa apa aataa supati tankaraki rerei latiaka ntae. 4Entewueni taatua nanu, nawuon sii nanu taatua ntae. Kore ana nemeidim lng'asula atumo lng'anayio ewuon apeny, naa mindimdim sii ntae aatum lng'anayio tinimikitii atua nanu.

5<<Nanu lmusabibu nirara ntae lng'asul. Kore pooki ng'ae owuon taatua nanu, nawuon nanu taatua ninye, netum ninye lng'anayio kumo. Kore tanaa mitii tenebo o nanu, naa meitoki indimdim aataas. 6Kore pooki ng'ae lemewuon taatua nanu, netuwuana lng'asula onang'ari metoyio. Kore lng'asul ootuwuana lolo naa keiturruri nenang'akini nkima, nepejori. 7Kore tiniwuenini taatua nanu newuon rerei lai taatua ntae, naaku kore ntoki pooki niyieuu, entoomonu neichori ntae. 8Kore tinitumtum lng'anayio kumo niakuku looiteng'eni lainien, netum Papa lai nkisisa. 9Kore ana naatachama nanu Papa, nejia sii etiu nchaman ai taa ntae. Entewueni naa taatua nchaman ai. 10Tanaa imbung'bung nkitanapat ainien, niwuenini taatua nchaman ai, ana payie aaibung'a nanu nkitanapat e Papa, nawuenita taatua nchaman enye.

11<<Katilika nanu ntae ana payie ewuon ng'ida ai taatua ntae, neboreii inia ng'ida niatata. 12#Yoa 13:34, 15:17; 1Yoa 3:23; 2Yoa 1:5Ana nkitanapata ai, nchere entachamata ana natachama nanu ntae. 13Meatae nchaman nalang no ltung'ani oitai nkichui enye, tankaraki sotuatin lenyena. 14Kore tiniasias naitanapa ntae, naaku irara sotuatin lainien. 15Merokure ajo ntae laisiaayiak, amu kore laisiaayiani naa meyielo neasita lkitok lenye. Kake katejo ntae sotuatin amu kore ntoki pooki natining'o ta Papa naa katilika apa ntae. 16Mara ntae likitegelutua nanu kake nanu otegelua ntae, naitoki aicho ntae nkitoo nipoyieyie aaiunyie lng'anayio. Kore lng'anayio liiu naa lng'anayio oobikoo, payie eicho ntae Papa ntoki pooki niomonunu ta nkarna ai. 17Kore nkitanapata ai taa ntae naa ana: entachamata.

Keiba nkop looiteng'eni le Yeso

18<<Kore tanaa keiba ntae nkop, entaparru aajo nanu apa eibayie tekue. 19Tanaa le nkop irara, anata echam ntae, eji atuwuana lenyena irara. Kake mirara lenyena amu kategelua ntae tana kop. Inia dei payie eiba ntae nkop. 20#Mat 10:24; Luka 6:40; Yoa 13:16Entaparru laduo rerei latiaka ntae nchere, <Meikitok laisiaayiani alang lkitok lenye.> Kore tanaa kaaitamaki nanu sina, keitami sii ntae. Naa tanaa keibung'a rerei lai, keibung sii rerei linchi. 21Kake keitaas ninche ntae nenia pooki tankaraki nirara lainien, amu meyielo ꞉ninche ilo laairriwua. 22Kore teneitu alotu airorie ninche, anata meata naipari to ng'oki. Kake meata taata napaacharie ng'oki enche. 23Kore laaiba nanu, keiba abaki Papa. 24Kore tanaa eitu aas taatua ninche nenia asat neitu hoo aikata eas likae tung'ani, anata meata naipari ninche to ng'oki. Kake ketodua taata ninche kuna asat e nking'asia naaibai nanu, neibai sii Papa. 25#SNk 35:19, 69:4Kore eyia, ketaase inia payie ebaya inia naigero too Lkigerot sinyat lirukurukorere ajo, <Kaaibaitie nanu ninche pecheu.>

26<<Kore payie elotu ilo Aretoni lairruu ꞉nanu eing'uaa netii Papa, aa taa Ltau le ndedei oing'uaa Papa, nelikoo sipata naaipirita nanu. 27Kore sii ntae nintaii limunoto e sipata naaipirita nanu, amu itii apake tenebo o nanu ta ng'asunoto.

Currently Selected:

Yoana 15: saq

Highlight

Copy