Lik 8

Daati ma jobokkaa Iisa

1Gaa min oko kaaka, ga Iisa katawɗo geegar ma geegar o darre ma darre ga tasawɗica kabarre ta daana ta mulunniti Mellayi. Ma ezekkiya pa, ay jobookeetee ku orro o seera, 2o daati minnaw maa ga pittiyoogu awaaradgeeco o maa ga rayyide min oko paraayiŋgeeco. Minnanco daati kotti pa, gi lekka Mariyam ma asaa min Magdala maa ga Iisa pittitiigu awaaradgee paysara, 3o Zaan daatti Suuza, ma ay tattuwe ka girti sultan Erod, o daate kaƴi maa gu kolaa goo Sizan, o daati daare ma gayaa Iisa ma jobookeetee ma biraw ta lawwo.

Masal ta soƴooka ka busino

(Elloŋ Matiye 13.1-9, Mark 4.1-9)

4Gaa min kulla geegar aɗe gu giimi maani ta kaw asiyyee timma oko Iisa gu asiyya kadira. Gaa gemmiyyooca masal teete gaa: 5«Lekka gimu kaƴi aɗe ma oome soƴƴiti busino. Gaa maa ga soƴoɗɗo kaaka gu busuntee daare suubiɗe biiti butuuli. Guu giimi waariyyoo o ɗiiɗi berre gu teeɗiy. 6Daare pa suube were ma lekka termel o kiɗaati percem percem ka. Guta kotti pa omme gu aaƴiɗe saa koɗokka ka asan ga dettuwe maani ɗa. 7Daare pa suube were ma lekka tetteesigee ma lekka ejjemmi. Guu tetteesigee maaɗiɗe sawa ma guta, guu siiƴiɗiy. 8Daare soopa suube kiɗa ta samaane. Guu ommiɗe ta catata. Guu maaɗiɗe, guu cimmiɗe ganaadalgee. Kulla gandulle aɗe weero miici orooruwee orro.» Gaa Iisa beneyyiyyoo payya ma raɗɗa gaa: «Maa gaa lekka deyya ku giyyiti, ga giyyu samaane!»

Ayme ga Iisa beneyɗo ma masalnigee

(Elloŋ Matiye 13.10-17, Mark 4.10-12)

9Maa gu jobookeetee Iisa giyyicca masalti teete, guu inniyya goo: «Masalcum teete garaa ini me?» 10Gaa Iisa tiiliyyoo gaa: «Oko kuŋ ɗee ga Mella gaaritoŋca paaɗe seene ta kiilenta ta gaarti mulunniti. A giimi ku maani soopa, na garaayo ma masalnigee ka ku maa

“Gu elelɗo, innasoopa gu ella ɗa samaane,

o gu gewɗo, innasoopa gu ebennaa ɗa aatti beneyyi#8.10 Elloŋ Esaya 6.9..”»

Iisa garaayooga butultí masal ta soƴooka ka busino

(Elloŋ Matiye 13.18-23, Mark 4.13-20)

11Gaa Iisa beneyyiyyoo gaa: «Keeke ay beneyti oko masal teete: Busini ay beneyti Mellayi. 12Busini ma suube biiti butuuli pa, saabayye aleŋ giimi ma geewaa beneyti Mellayi, gaa Seetanne asiɗo ga asiyyooga cimma maaƴi min galbigeeco ku maa ga toɗɗiyyo gu alɗo amanna ɗa, guu alɗo dee ɗa najjiyenta. 13Busini ma suube were ma lekka termel, o kiɗaati percem percem kaa pa, saabayye aleŋ giimi ma geewaa beneyti Mellayi guu oyyiya saa ma parhane, innasoopa ga beneyyi kaaka nowotta ɗa galbigeeco. Guta bakammaa wikinne paalta ka. Guu gasse gaari ku suura ma cokokkay pa, gu otokkati oko amannico daana ka. 14Busini ma suube were ma lekka tetteesigee ma lekka ejjemmi pa, saabayye aleŋ giimi ma geewaa beneyti Mellayi, guu moyoowi ku lawwi ku dunuuniti o ayaawi ka dunuuniti o ƴekko ta daanuwe ka dunuuniti pa bittiyyooca amannico taata, ay ɗakko appe ga beneyyi kaaka alɗiyo waa ɗa miici ma neewe. 15Busini daare pa ma suube kiɗa ta samaane saabayye aleŋ giimi ma geewaa beneyti Mellayi o gu oyaa ma galbane ta purta o ta gidaani. Guu dommoyɗiya galbigeeco namma ga weeɗiyo miici ku samaane, guu deeɗo baatiynigee.»

Masal ta lampayi

(Elloŋ Mark 4.21-25)

16Gaa Iisa beneyyiyyoo payya gaa: «Lekka ɗa gimu ma zegaa lampa gaa zubbiyyee ma daakuwa e baŋ ga esekkaa balco daŋgilo. Gata gagakkaca soo uwwa jeɗeŋ ku maa gu giimi ma on̰aa giiri elelɗica bahaarane. 17A guta pa, gaari paracco ku kiilenta haŋka akka dee dirn̰enta, gu giimi asiɗiy ella racal. A maa gu giimi ƴapawwikkikoo pa akka dee ibinenta. 18Beneyyi maa na beneyya, ku yerekkoŋga samaane, asan ga gimu ma ibinya aɗe beneyti Mellayi, ga Mella gayee payya ta ƴiila ibino. A gimu ma lekka ɗa soopa ibino ta beneyti Mellayi, ga Mella cemekkeeca ibinti ta paalta taata kulla maa ga lewɗe gaa ga ibina.»

Yaati Iisa o seneetee

(Elloŋ Matiye 12.46-50, Mark 3.31-35)

19Gii yaati Iisa ma seneetee asawɗiyee ku maa gu asiyya gassa. Guu alɗe gederra ɗa soopa gu sariyyee katta asan gu giimi maani. 20Guu giimi beneyyiyyee goo: «Yaacum o seneecam waraɗɗe renta gu aŋkiɗum.» 21Gaa Iisa pa tiiliyyoo gaa: «Giimi ma geewaa beneyti Mellayi o gu jobokkaa, ay guta appe ma ay yaatu o gu ay seneetaw.»

Iisa ƴapaa ussu ka baharriti

(Elloŋ Matiye 8.23-27, Mark 4.35-41)

22Gaa meene kaƴi ga Iisa kalapɗe markabati ma jobookeetee. Gaa beneyyiyyoo gaa: «Tappine ma ta nussantí baharriti katik.» Guu kaatiɗe. 23Gaa maa gu tapaɗɗo kaaka, ga Iisa ooƴiɗe waani. Gaa kaytiŋ ka gi ziiziyo diiliɗe gi azaɗɗo raɗɗa baharriti. Guu ammi diiliɗe gu onoɗɗica markaba, guu aŋkiɗo paaɗe tiyawco. 24Guu jobookeetee asiɗe saripti, guu miiniyya o gu kawwakka goo: «Tattuwtini, tattuwtini, ke matakka pe.» Gaa Iisa miiniɗe ga makkiyyee oko ussi o oko lokkomco ammo, guu warriɗe, gaa were ƴaapiɗe yil. 25Gaa Iisa beneyyiyyoo pe pa oko jobookeetee gaa: «Amannitoŋ ay ŋa pe?» Guta pa ga ɓayaw galawwiyoo o gu ajjabbe ta tirta. Guu beneyɗo aacco goo: «Gimu keeke ay me gimta? Elloŋ ƴa, ussu o ammi kulla ga makakkayo guu gewɗiya kanti!»

Iisa rayyadda gimu maa gu awaaradgee deegeyye

(Elloŋ Matiye 8.28-34, Mark 5.1-20)

26Gaa Iisa ma jobookeetee sarɗe kiɗa ta Geraasa ma aaye ma ta nussantí baharriti katik ma gaabalɗe ma kiɗa ta Galilee. 27Gaa maa ga Iisa beeriɗe min markabati, gaa gimu kaƴi aɗe min geegarri asiyya gassa. Gimu kaaka pa gu awaaradgee deegeyyiya. Gata domokke maa ga alɗe issa ɗa kaɗiŋgee. Gata pa nowotte ɗa giiri, innasoopa ga nowotte kayyeyyo ka. 28-29Aarinniti kaaka pa diiman ka ga wacakkee ga deegeyɗiya. Ay kaaka appe gu giimi onoɗɗeegu pittee o asintee ma janaazargee, gaa repeɗɗiy ka. Gaa aarinniti cemeɗɗiya kayni. Maa ga gimu kaaka elliyya Iisa, gaa cayyikiɗe, gaa galɗe asintee o ga cayyakka ma gudiranti parattí gaa: «Ki aŋkaw ini me Iisa, kii ma ay Runti Mella ka Uwwa ta kaw? Ban̰n̰u anno diigiya ɗa!» Gata pa beneyye goŋŋa asan ga Iisa beneyyiyee ƴa omma gaa ga oomu maaƴi. 30Gaa Iisa inniyya gimu kaaka gaa: «Semeecam goo we?» Gaa gata pa tiiliyyee gaa: «Semeetaw goo Goomane#8.30 Goomane pa ay giimi maani ma temekke..» Gata pa beneyye goŋŋa asan gu awaaradgee maani ma kalappiya. 31Guu awaaradgee ma kalappiya gimu kaaka malmiliyya Iisa goo: «Ban̰n̰u, anni pitta ɗa ni deeɗo solla beena ta siƴƴa ta kaw, were maa ga Mella deegeyɗini.» 32Wikirco kaaka pa, lekka hidibe yaata ta kinzirnigeyyo ma tawakka jappiti. Guu awaaradgee kotti malmiliyya Iisa goo ga oyyayo gu deeɗo un̰n̰a kinzirnigee kotti, gaa oyyiyo. 33Guu awaaradgee oomiɗe min oko gimu kaaka, guu deeɗe un̰n̰a kinzirnigeyyo. Gaa koɗok, gi hidibe taata zar̰agr̰igiɗe ridididi, gi deeɗe suuba baharriti, guu ammi teeɗica.

34Maa gu maggee ku hidibe taata elliɗiy gaari kotti ma deero, guu gaɗɗiɗe gu deeɗica taasa kabarre taata, gawaagargeyyo o oko giimi ma nowotte renta min gawaagargeyyo. 35Guu giimi oomiɗe ku maa gu deeɗiy ella gaari ma deero. Guu asiɗe saripti Iisa, guu asiyya gassa miiɗi kee maa gu awaaradgee okomme minnanti gaa nowotte unti Iisa. Gaa eseɗɗe kaɗiŋgee o ga rayyadde caŋ caŋ. Gaa ɓayaw galiyyoo. 36Guu giimi ma ellica rayyiditi gimu kaaka jeppiyyoo oko giimi ma asee baŋ ga Iisa pitteegu gaa me awaaradgee ma deegeyyiya. 37Guu giimi paracco ku kiɗa ta Geraasa ɓayɗe ta tirta. Guu malmiliyya Iisa goo ga ƴiilu min kiɗaaco. Gaa Iisa kalpiɗe markabati ku maa ga yookiɗo. 38Gaa miiɗi kee maa gu awaaradgeetee oome malmiliyya Iisa gaa ga duwe ga kaatiɗo ma gata. Iisa soopa n̰aamiya gaa: 39«Yooku wikirco gimcam ki deeɗiyoogu jeppa gaari paracco maa ga Mella leyyam.» Gaa miiɗi gata kaatiɗe ga deeɗiy ɓerɓira geegar paratti gaari kooko maa ga Iisa leyyee.

Iisa rayyadda daate o ga naɗakkaca runti Zayrus

(Elloŋ Matiye 9.18-26, Mark 5.21-43)

40Gaa wikinne maa ga Iisa yookiɗe min ta nussantí baharriti katik, guu giimi ku maani joobiyya ma daana asan ga paracco gu ocokkiya. 41Gaa miiɗi kaƴi maa gu semeetee goo Zayrus asiɗe. Gata pa ay tattuwti girco Yawudigeyyo ka giraaniti. Gaa darsiɗe unti Iisa ga malmalɗiya gaa gu addo girti, 42asan gi runti parayya raɗɗa katta muuti. Gita pa ay runti ta kayti kaa o gu ƴilaakeeti orro o seera appe. Gaa Iisa waciɗe ga katawɗo girti Zayrus, guu giimi seƴewɗiya min nussaŋgeetee paracco.

43Gii lekkiɗo iŋaa daate ma deegeyye ƴilaakee orro o seera ma ello ta baaro. Gii gaamiɗiy lawti paracco dakaatargeyyo, gaa alɗo lekka ɗa ya gimu kaƴi ma gederre ga rayyidicca. 44Gii kaatiɗe ma ta taarti Iisa, gii eesicca balti kaɗiyyiti. Gaa oko wikinne kaaka saa gu baarti caaɗiɗe ta kaɗak. 45Gaa Iisa inniɗe gaa: «Ay we ma eesinoo?» Gaa kulla kaƴi aɗe melewɗo gaa ga ay gata ɗa. Gaa Piyer beneyyiyyee gaa: «Tattuwtu, ellu ƴa! Giimi ɗe ma kadarrum maani o gu seƴewwum min nussaŋgeecam paracco.» 46Gaa Iisa pa tiiliɗe gaa: «Lekka tara gimu ma eesino, asan na aawica gudirantu ma rayyadda giimi maa gi oomiɗe gi rayyidiɗe gimu.» 47Maa gi daate gita pa leeɗe kabarre kadar ga Iisa ibine kadar gi eesiya, gii kaatiɗe gi deeɗe gala unti Iisa o gi azarra ta cim cim. Gii jeppiyyooga kantí unco giimi paracco baŋ ga ayme gi eesiyya kaɗiyyiti Iisa o baŋ gi rayyide gee me ma haŋka keeke aɗe min ello ta baaro. 48Gaa Iisa beneyyiti gaa: «Runtú, mileŋ ka dowwica galbante oko naa, ka rayyide. Addo ma aapiya.»

49Iisa ƴa beneyya missa, gaa gimu kaƴi aɗe asiɗe min girti tattuwti girco Yawudigeyyo ka giraaniti kee, gaa asiyyee beneyya gaa: «Duwe paaɗe oko garaawayi. Runcum tara joote appe.» 50Maa ga Iisa pa giyyiyya beneyti gimu kaaka, gaa beneyyiyyee oko Zayrus gaa: «Gi kelemcum addo ooma ɗa. Duwca galbancum oko naa ka, gii runcum rayyidiɗo!»

51Maa ga sarɗe girti Zayrus, gaa alɗiyo oyya ɗa oko giimo gu un̰n̰iɗe ma gata illa ay Piyer o Yaaya o Zak o tattí o yaatí micaati ka. 52Guu giimi paracco erecɗo o gu laatayya saanane ka muuttí miicati. Gaa Iisa beneyyiyyoo gaa: «Aɗoŋ erca ɗa! Gita mica matee ɗa, oƴee ka.» 53Gaa oko beneyti kaaka, gu giimi noƴoɗɗe gaari, asan gu lekka kabarre kadar gi matee. 54Gaa Iisa pa baamicca mica min pittí, gaa beneyyitti ma raɗɗa gaa: «Runtu, wacu!» 55Gii ruuhantí yookitti. Gaa oko wikinne kaaka saa gi waciɗe parat. Gaa Iisa beneyyiyyoo gaa gu biraati tiyaw. 56Guu gayyeeti micaati ajjibiɗe ta tirta, gaa Iisa pa beneyyiyyoo gaa: «Gaari kooko ma deero ku aɗoŋgu beneyya ɗa ya oko gimu kaƴi!»

Currently Selected:

Lik 8: mmy

Highlight

Copy