Lik 9

Iisa n̰amakkay n̰amaakeetee ku orro o seera

(Elloŋ Matiye 10.1-15, Mark 6.7-13)

1Meene kaƴi, ga Iisa timmiy jobookeetee ku orro o seera. Gaa biriyyoo gudirane o botol ku maa gu peteɗɗiy awaaradgee paracco min giimo, o ku maa gu rayyaɗɗiy giimi min oko paraayiŋgeyyo. 2Gaa n̰aamiɗiy gu deeɗiy taasa gaari ku mulunniti Mellayi, o gu deeɗiy rayyaddo giimi min paraayiŋgeyyo. 3Gaa beneyyiyyoo gaa: «Aɗoŋ icca ɗa ya maatiki ka turguwwi: bala gu gombolli o bala gu karaatalgee, o bala gi tiyaw o bala ga gurus, o ga kulla kaƴi aɗe addo icca ɗa kaɗiyyu ka magaawi. 4Kulla darre aɗe maa kuu kaate, ga ger maa gu joobittoŋ kaaka, ku nuntoŋ pe iŋaa aɗe namma ya wikinne maa ku ƴiiliɗo. 5Kulla were aɗe maa kuu kaate guu giimi pocowɗo joobitoŋ, ku oomoŋ min oko geegar kaaka o ku kokkoŋga buruntulle ka asintoŋ#9.5 Kokko ta buruntulli pa, garaa kadar ga gimu cimmica kayaati minnancum, gaa Mella pe asiyyam caaɗa parlane suura., kuu cappinnee oko geegar kaaka. Goŋŋa ku garaayo kadar gu leelo miɗɗa.» 6Guu kaatiɗe. Guu tan̰awɗo darre ma daare. Gaa were paratti gu tasawɗica kabarre ta daana o gu rayyadday giimi ma parayya.

Erod geeway gaartee Iisa

(Elloŋ Matiye 14.1-2, Mark 6.14-16)

7Gaa Erod ma hekemeyyica kiɗa ta Galilee giyyikko gaartee Iisa kooko paracco ma deero. Guu kakawɗeeca kayaati, asan gu giimi daare ƴa beneyya ma gaartee Iisa goo ga ay Yaaya ma batasayya giimi ma naɗe min muuti. 8Daare pa goo ga ay nabiinice Eliyas ma oome, o daare payya pa goo ga ay kaƴi min oko nabiinigee ku tippa ma matakke ma naɗe min muuti. 9Gaa Erod soopa beneyyiɗe gaa: «Yaaya ɗe, ay naa saa ma beneyye gu reepiyyeeca kayaati. A gimu kaaka maa na geewa gu giimi beneyya gaartee maani maani pa, ay we?» Gaa deyeɗɗo botol maa ga elliyya.

Iisa beraa tiyaw oko alpaŋgee beeƴa gimu

(Elloŋ Matiye 14.13-21, Mark 6.30-44, Yaaya 6.1-14)

10Guu n̰amaakeetee Iisa koo maa ga n̰aame yookiɗe. Guu asiyyeegu jeppa gaari paracco maa gu leelo. Gaa Iisa tirriyikkiko kayco ka min oko giimi ku maani, renta paalta min geegar ka Betsayda. 11Maa gu giimi ku maani giyyiɗe kadar ga Iisa ma jobookeetee kaate, guu jobbiɗiy. Maa gu deeɗiy gassa, gaa Iisa joobiɗiy daana. Gaa beneyyiyyoo ma gaari ku mulunniti Mellayi, o giimi ma parayya, guu aŋkiɗo rayyido kulla ga rayyidiy. 12A mileŋ gi paato pa katta galaawi, gu n̰amaakeetee ku orro o seera asiyee saripti, guu beneyyiyyee goo: «Beneyyayo oko giimi ku maani kooko gu tacilɗo diyargeyyo o helelgeeco giimi ma beree kayni ku maa gu deeɗo gassa were ka nuntiti o maatiki ka tiyaawi, asan ke aaye kayni were ma lekka ɗa gimu.» 13Gaa Iisa soopa tiiliyyoo oko n̰amaakeetee gaa: «Kuŋ saa biraaniyo tiyaw.» Guu guta pa beneyyiyyee goo: «Ni lekka mappa beeƴa ka o buusi seera. E ki aŋka ni deeɗiyo giɗa lawwi ku tiyaawi oko giimi ku maani kooko?» 14Miɗi ma aaye aacco giimi kotti pa deewa latta ka alpaŋgee beeƴa. Gaa Iisa beneyyiyyoo oko jobookeetee gaa: «Nuntoŋgu kiɗaati giimi orooruwee beeƴa, beeƴa.» 15Guu leeɗiya aleŋ maa ga Iisa beneyyiyoo. Guu nuntiɗiy giimi paracco. 16Gaa Iisa icciyya mappa ka beeƴa gata o buusi ku seera. Gaa cukilɗe ta uwwa samaani, gaa leeɗiyee barkinti oko Mellayi oko mappayyi o buuso. Gaa erriɗiy, gaa biriyyoogu oko jobookeetee ku maa gu ɗeddiyyoogu oko giimi ku maani kotti. 17Gaa paracco gu teeɗe gu ayyiɗe. Guu kollee ma mare gu bulɗiy, guu onniɗe laŋgee orro o seera.

Piyer beneyya kadar ga Iisa ay Masi

(Elloŋ Matiye 16.13-20, Mark 8.27-30)

18Gaa meene kaƴi ga Iisa kaatiɗe were ma lekka ɗa gimu ga enewɗiya Mella, a innasoo gu jobookeetee kulla aaye ma gata. Gaa inniɗiy gaa: «Oko gooco giimo soo, goo na ay we?» 19Guu jobookeetee tiiliyyee goo: «Giimi daare ɗe goo ki ay Yaaya ma batasayya giimi, o daare pa goo ki ay nabiinice Eliyas o daare payya pa goo ki ay kaƴi ma naɗe min oko nabiinigee ku tippa.» 20Gaa inniɗiy payya gaa: «A kuŋ pa oko kantoŋ ka kuu na ay we?» Gaa Piyer tiiliyyee gaa: «Kii ay Masi gata appe maa ga Mella aparre.» 21Gaa Iisa uwwiyyoo atarre gaa gu addo beneyya ɗa ya oko gimu kaƴi kulla kadar ga ay Masi.

Iisa tasaa muutti o naɗawti

(Elloŋ Matiye 16.21, Mark 8.31)

22Gaa Iisa beneyyiyyoo oko jobookeetee gaa: «Aŋka ga Runti Gimi diigiyɗo maani, guu ajaawaŋgeeco Yawudigeyyo o taattuweeco soƴoowee ku saɗikaŋgeyyo o aalimnigee ku Kitamniti Muusa asiyya pooca. Guu asiyya dee. Gaa oko meene ma daa ta subba pa ga naɗiɗo min muuti.»

Jobbiti Iisa

(Elloŋ Matiye 16.24-28, Mark 8.34–9.1)

23Gaa Iisa beneyyiyyoo oko giimi kotti paracco gaa: «Gaa gimu aŋka ga jobbinno, ga meelu mooyo ta gaari ku kayaati ka, o ga ecekkiya kuruwati kulla meene#9.23 Icco ta kuruwayi pa, garaa oyyo ta diiganti o ta muuti aleŋ ta Iisa. , ga joboɗɗino. 24A gata pa, gimu ma aŋka ga najjiyicca hayaatanti, mesellaca. A gimu soopa ma mesellaca hayaatanti saanantu oko naa, akkica najjiya. 25Gaa gimu gassiyya ayaawi paratti ka dunuuniti, gii hayaatanti pa naŋgiɗo gii masilɗo, gi gayee pe ini me? 26Gaa gimu gi jalawwiyee ga jobbinno o ga beneyɗiy beneyyiŋgeetaw, ga Runti Gimi kulla akkeeca jaala, maa ga ase asa ma darjanti o ma tee ta Mella Tatti o ta malaykatnigeetee Mellayi. 27Na beneyyatoŋ ma seene: Min oko kuŋ keeke ma aaye iŋee, gu daare matakka ɗa namma gu asicca ella mulunniti Mellayi.»

Magawti ziiti Iisa kayaati dambi

(Elloŋ Matiye 17.1-8, Mark 9.2-8)

28Maa ga Iisa beneyyiɗe goŋŋa, gaa leeɗe latta ka meeni poppoɗi, gaa kaatikkiko ini Piyer o Yaaya o Zak, guu deeɗe kalpa dambi. Gaa Iisa inniyya Mella. 29Gaa wikinne maa ga enewɗiya kaaka, gaa wigisanti magiɗe, guu kaɗiŋgeetee deeɗe purta tal, purtuwe ma lekka ɗa giiti. 30Gaa kaytiŋ ka gu miɗi seera asiɗe gu beneyɗo ma gata. Guta pa ay ini Muusa ma giiti nabiinice Eliyas. 31Gii bahaarantí darjanti Mellayi beeriyyo waŋ. Guu beneyɗo ma Iisa ma gaartee ku oomiti min dunuuniti maa ga deeɗo lee geegar ka Zerizalem guu asiɗo butulco#9.31 Oomiti Iisa min dunuuniti pa moyaane oomico giimi ku Isirayel min lawwuwwi Masir. Iisa Masi pa beraa najjiyo ta yaata ƴiila min tanti Muusa asan ga najjayyane min zunubgeyyo o ga bereene hayaatane ma gakamma ɗa ta kaw. Oomiti teete pa ay diiganti o muuti Zerizalem o naɗawti, gaa kalpiɗe samaani.. 32Oko wikinne kaaka pa, gu ini Piyer ma gittee gu waani gederriyoo ta tirta, guu loŋgomɗo. Maa gu waanco padarriyyoo pa, guu elliyya Iisa ma bahaarantí darjanti o miɗi ku seera koo gu aaye ma gata. 33Gaa wikinne maa gu miɗi koo aŋkiɗo paaɗe pa kaato, gaa Piyer beneyyiyyee oko Iisa gaa: «Tattuwtini, daana ke nuntinne iŋee. Ni panakka zubiŋgee subba, kaƴi oko kii, o kaƴi oko Muusa, o kaƴi oko Eliyas.» Piyer pa, ga beneyti kaaka aasiya ka. 34Gaa wikinne maa ga Piyer beneyɗo kaaka missa, ga kaytiŋ ka gi n̰irɗe asiɗiy tagga. Maa gu elliɗe gi n̰irɗe taggiy guu jobookeetee Iisa kotti ɓayɗe. 35Guu giyyiɗe ur̰e kaƴi ma beneyya min aatti n̰irɗe taata gee: «Gata keeke ay Runtu, na apiriya. Geewoŋga beneyti!» 36Maa gi ur̰e taata gaamiyya beneytí, guu jobookeetee elliyya pe kayti ka gaa marakke ma guta. Gaa oko meeni kotti gu ƴaapikkiko ka gaari kooko, jeppiy ɗa ya oko gimi.

Iisa rayyadda miica maa ga aarinne deegeyye

(Elloŋ Matiye 17.14-18, Mark 9.14-27)

37Gaa maa ta sokkonta ga Iisa ma jobookeetee ku subba guta beeriɗe min dambi, guu giimi maani asiyyee. 38Gaa lekkiɗo aacco giimi ku maani kotti miiɗi ma cayyakka gaa: «Garaawa, ban̰n̰u, elliya ƴa runtu keeke, gata kayti ka, 39gaa lekkiɗo aarinne. Gaa kulla wikinne aɗe maa gaa aarinniti kaaka kalpiya pa, ga koɗokka saa ga cayyakka o ga yagaa ma raɗɗa o biiti okomma bor̰kom. Deegeyya ƴa omma raɗɗa namma ga uwwiyya keŋger̰eŋ aleŋ maatenta hatta gaa oomiɗo ka minnanti. 40Naa malmilɗiy jobookeecam naa gu pitteega, guu alɗe gederra ɗa soopa.» 41Gaa Iisa tiiliɗe gaa: «Kuŋ giimi ka haŋka keeke ɗe ku dowwiy ɗa galbigeetoŋ oko naa o ku ibina pe ka miɗɗa ka. Na nowotta pe ya minke ma kuŋ ku maa ku duwɗiy galbigeetoŋ oko naa? Na deeɗitoŋ soɓorro pe ya minke? Itirawga ƴa runcum iŋee.» 42Wikinne maa ga miica asawɗe oko Iisa pa, ga aarinne baagiya karap kiɗaati, gaa yaagiyya raɗɗa. Gaa Iisa makkiyyee oko aarinne kaaka gaa ga oomu, gaa oomiɗe. Maa ga rayyidiyya miica, gaa biriyyeega oko tatti. 43aGuu giimi kotti paracco ajjibiɗe ta tirta oko tattuwti Mellayi.

Iisa tasaa payya muutti

(Elloŋ Matiye 17.22-23, Mark 9.30-32)

43bMileŋ ga kulla kaƴi aɗe ajjabbe missa oko gaari maa ga Iisa leelo kotti, ga gata pa beneyyiyoo oko jobookeetee gaa: 44«Baamoŋga samaane beneytu keeke maa na beneyyatoŋ. Runti Gimi gu akkiya bira picco giimo.» 45Guu jobookeetee soopa alɗiya ibina ɗa beneyti keeke, deyyo ɗa purta. Ay ɗakko appe gu alɗiya ibina ɗa baŋ ga beneyyi keeke garaa ini me beneyta. Guu ɓayaɗɗo inniti ku maa ga passiyyooga.

Ka tatta ƴiila ay we?

(Elloŋ Matiye 18.1-5, Mark 9.33-37)

46Guu jobookeetee Iisa icciɗe meela ku maa gu ibinɗo baŋ ga ay we min aacco ma tatta ƴiila. 47Iisa pa gata ibinca mooyico. Gaa baamiɗe miica rootta, gaa wirriyya saripti. 48Gaa beneyyiyyoo gaa: «Maa gaa joobe miica aleŋ keeke saanantu, jobowwino saa naa ma kayaatu, o ma jobowwino naa, jobowwiya kulla gata ma n̰akamminoo, asan ga ma rootta ƴiila min aattoŋ oko kuŋ keeke parattoŋ, ay gata appe ma ay ka tatta ƴiila.»

Ma pocowwitoŋ ɗa ay kantoŋ

(Elloŋ Mark 9.38-40)

49Gaa Yaaya beneyyiyyee oko Iisa gaa: «Tattuwtini, ni elle gimu kaƴi aɗe ma petekka awaaradgee ma semeecam. Nii aŋkiɗo ni toɗɗiyyee asan ga aaye ɗa ma keeta.» 50Gaa Iisa tiiliyyee gaa: «Anne toɗɗa ɗa, asan ga gimu ma pocowwitoŋ ɗa ay kantoŋ aɗe.»

Iisa o giimi ku Samaari

51Gaa wikinne maa ga Mella icciyya Iisa samaani garribiɗe. Ay kaaka appe ga Iisa aaniyɗe saa cur ta geegar ka Zerizalem. 52Gaa n̰aamiɗe palaynigee gu ommiɗo. Guu kaatiɗe, guu deeɗe un̰n̰a darre kaƴi ta kiɗa ta Samaari ku maa gu deeɗe hassila were ka suubiti. 53Guu giimi ku Samaari soopa poociɗe joobiti asan ga ƴelaa Zerizalem#9.53 Giimi ku Samaari pa, goo gi aabido ta Mellayi aaye dambu ka Samaari. A Yawudigee pa, goo ga Zerizalem. Ay ɗakko appe gu poociɗe joobiti.. 54Maa ga Iisa ma jobookeetee asiɗe, guu leeɗiyo kabarre oko gaari kooko. Gaa Zak ma giiti Yaaya beneyyiyyee goo: «Miltini, kii oyaa, ni enaa Mella ga beeriyyo okko min samaani gi iggiɗiy ta kayam kayam.» 55Gata pa ribiliyoo oko jobookeetee ku seera kotti, gaa makkiyyo. 56Gaa min iŋaa gu kaatiɗe darre kaƴi.

Giimi ma aŋka gu jobbiyya Iisa

(Elloŋ Matiye 8.19-22)

57Gaa butuuli maa gu katawɗo missa, ga gimu kaƴi asiyee beneyya oko Iisa gaa: «Na deeɗum jobokko were paratti maa ki katawɗo.» 58Gaa Iisa pa tiiliyyee gaa: «Gooyagooya lekka beddigee o ɗiiɗi lekka gerra. A Runti Gimi soopa lekka ɗa were maa ga ooƴiɗo ga nambiɗo.»

59A oko gimu kaƴi pa ga Iisa beneyyiyee gaa: «Jobbino!» Gata pa tiiliyyee gaa: «Miltu, oyyaw ɗe na kaatiɗo na deeɗiya tina ƴa omma tattu.» 60Gaa Iisa pa tiiliyyee gaa: «Duwayo oko giimi ma ay aleŋ kuu gu mattenta gu saayiɗiy gimco ma matakke! Kii pa addo ki deeɗica taasa kabarre ta mulunniti Mellayi.»

61Gaa gimu kaƴi payya pa beneyyiyee oko Iisa gaa: «Miltu, na deeɗum jobokko. Innasoopa ki oyyaw ƴa omma na deeɗiyo lee maraw oko gimtaw ku giiri.» 62Gaa Iisa pa tiiliyee gaa: «Gimu ma diile ga gawanɗo ma koydigee, gaa jegerɗo sulaayi, gata kaaka gayee ɗa maatiki oko lubbi ka gaari ku mulunniti Mellayi.»

Currently Selected:

Lik 9: mmy

Highlight

Copy