Lik 10

Iisa n̰akammay jobookeetee ku orooruwee paysara o seera

(Elloŋ Matiye 9.37-38, 10.5-15, 11.20-24)

1Maa gu gaari kooko ƴiiliɗe, gaa Miltine kee Iisa apirɗe payya orooruwee paysara o seera jobookee daare. Gaa n̰ammiɗiy seera seera ku maa gu ommiyyee gu kaatiɗo gawaagargee paracco o wereeriyee paracco maa ga gata saa ma kayaati kataayo. 2Gaa beneyyiyyoo gaa: «Giimi ay aleŋ gaan tatta maa gu kortee neewe paaɗe, lubaakee ma seɗekkaa pa paalta ka. Kaaka pa ku lollikoŋga Mella, Milti seɗɗiti ga n̰aamiɗo lubaakee ma seɗekkee#10.2 Seɗɗo teete maa ga Iisa beneyya gaarti ay giimi ku dunuuniti ma katta giyyiti beneyti Mellayi. Lubaakee pa ay palaynigee maa ga Mella n̰akamme guu deeɗiya tasaa beneyti.. 3Aɗoŋ, na n̰amakkatoŋ aleŋ ronco tameyyo aacco ɓiliwɓiliwnigeyyo. 4Aɗoŋ icca ɗa gurus o karaatalgee o n̰uura ku magaawi, o ku aɗoŋ waraɗɗa ɗa bottollo ku salamɗo giimi. 5Ger maa ku on̰ee kaaka, ku salammoŋgu ƴa omma melleetee giiri kuu: “Gi aapiya dee ma kuŋ.” 6Gaa lekka iŋaa gimu ma deyekkayo oko giimo nunto ta aapiyati, gi aapiyatoŋ taata nowottee. A gaa lekka ɗa soopa gi yokaatoŋ. 7Guu joobittoŋ, ku nuntoŋ saa ger kaaka kaa, adoŋ parakka ɗa. Teewoŋ o ku ar̰awwoŋ maa gu beraatoŋ ka, asan ga ay tirta appe ga lubaaka gassicca hagganti ta lubbi. 8Kulla geegar aɗe maa kuu kaate ku deeɗe un̰n̰a, guu joobittoŋ, ku teewoŋ lawwi maa gu beraatoŋ ka. 9A giimi ku geegar kaaka ma parayya ku rayyaddoŋgu o ku beneyyaniyo kuu: “Mulunniti Mellayi asittoŋ katta.” 10A kulla geegar aɗe soopa maa kuu un̰n̰e guu giimi poociɗe joobitoŋ, ku aɗoŋ were maa gu giimi temeɗɗo kuu beneyyiyyoo oko giimi kotti kuu: 11“Ya buruntulle ka geegartoŋ ma kokkoŋŋini asintini kulla ni kokokkatoŋga#10.11 Kokko ta buruntulli pa, garaa kadar ga gimu cimmica kayaati minnancum, gaa Mella pe asiyyam caaɗa parlane suura., o ku leyyoŋ soopa samaane kabarre kadar gi mulunniti Mellayi aseero katta.” 12Na beneyyatoŋ: Oko meene ta parlanti, gu giimi ku geegar kaaka ga Mella akkiyooga zilla bogorti ƴiila min oko ta giimi ku geegar ka Sodom#10.12 Giimi ku geegar ka Sodom pa nowotte wikinniti Biraayim. Mella bittiy giimi ku Sodom asan gi miɗɗaco kaawe. Elloŋ Diilo ta Lawwi Paracco 19.24-28..

13«Diigane ocokkitoŋ kuŋ giimi ku geegar ka Korazim o kuŋ ka Betsayda! Gaari ku ajjibiti koo maa na leetoŋ gawaagargeetoŋ, naa alɗiy liyaw geegar ka Tir o ka Sidon#10.13 Geegar ka Tir o ka Sidon aaye renta min kiɗa ta Isirayel. Oko mooyico Yawudigeyyo pa, gu giimi ku gawaagargee kooko gidaani ɗa ta kaw., ga koɗokka saa gu giimi ku gidaani ɗa kotti ƴemekka kaɗiŋgee ku haziniyti gu issiɗo guu nuntiɗo bitti ku maa gu gaariɗo kadar gu meeliy gaarco ku miɗɗa. 14Ay ɗakko appe ga oko meene ta parlanti ga kuŋ giimi ku geegar ka Korazim o ka Betsayda ga Mella asittoŋga zilla bogorti ƴiila min oko ta giimi ku geegar ka Tir o ka Sidon! 15A kuŋ giimi ku geegar ka Kaparnawom pa, ku leewe kuu walaŋ ga Mella on̰aatoŋ uwwa namma ya samaani e? Kaw, gata beraatoŋ soo namma ya oolati.» 16Gaa Iisa beneyyiyyoo payya oko jobookeetee gaa: «Gimu ma geewa beneytoŋ geewa kulla beneytu, o ma pocaatoŋ pocaano, o ma pocaano pocaa kulla gata ma n̰akamminoo.»

Yookico jobookee ku orooruwee paysara o seera

17Guu jobookeetee ku orooruwee paysara o seera koo yookiɗe o gu parhinenta ta tirta. Guu beneyyiyyee oko Iisa goo: «Miltini, ya awaaradgee kulla jobokkaa kantini nii makakkayo ma semeecam!» 18Gaa Iisa tiiliyyoo gaa: «Na elliya Seetanne maa ga galawɗo hew min samaani aleŋ eln̰o! 19Giyyoŋ ƴa, naa birtoŋ gudirane maa ku warawɗiyo oko barweyyo o oko irindiŋgeyyo, o gudirane maa ku nosorɗití oko gudirane parattí ta kasiiminti Mellayi kee, o ga lekka ɗa ya maatiki ma gederra ga asittoŋ lee miɗɗa. 20Innasoopa ku aɗoŋ parhina ɗa oko maa gu awaaradgee joboɗɗiya kantoŋ, parhinoŋ soo oko maa gu semeetoŋ alɗo kitipiyenta gonek samaani.»

Iisa parhanna

(Elloŋ Matiye 11.25-27, 13.16-17)

21Gaa oko wikinne kaaka saa gi Ruuhanti Mellayi uniyya Iisa ma parhane, gaa parhinɗe ta kaw. Gaa beneyyiɗe gaa: «Baaba, kii ma ay Milti samaani o ka kiɗaati, na logokkam asan gu gaari kooko maa ki kiiliyoogu oko giimi ma ibina gaari o maa gu kayyeeco ecekka, ki gaariyoogu oko ku rootta ta kaw. Ay seene Baaba, asan ga keeke deyyam daanam ga deeɗo goŋŋa.» 22Gaa Iisa beneyyiyyoo oko giimi ma aaye iŋaa gaa: «Gaari paracco ga Tattu damawgu. Lekka ɗa gimu ma ebennano naa Runti Mellayi, illa ay Mella Baaba, o ga lekka ɗa gimu ma ebenna Mella Baaba, illa ay naa Runti. A naa Runti Mellayi pa aŋka na gaariyyooga Mella Baaba oko giimi daare, gu ibiniyya kulla.» 23Gaa Iisa ribiliyyoo pe pa oko jobookeetee kayco ka, gaa beneyyiyyoo gaa: «Baarikenta ay giimi ma ellay gaari kooko maa ku ella. 24Na beneyyatoŋ: Nabiinigee maani o salaataŋgee maani aŋke gu elliyya maa ku ella, gaa oko wikinnico kaaka gu alɗiya ella ɗa soopa, o gu aŋke gu giyyiyya, guu alɗiya giyya ɗa.»

Masal ta gimu ka gidaani ka Samaari

25Meene kaƴi, ga aalimne ka Kitamniti Muusa inniya Iisa asan ga aŋka ga cokkiyya ma ibino ta beneyti Mellayi. Gaa waciɗe ga inniyya pe gaa: «Garaawa, na lee pe naa me ku maa na gassicca hayaatane ma gakamma ɗa ta kaw?»

26Gaa Iisa beneyyiyyee gaa: «Mella beneyye gaa me hukumnigee ku Kitamniti Muusa? Beneyti Kitamniti maa ki garkayye garam ini me?» 27Gaa aalimne tiiliyyee gaa: «Mella beneyye Kitamniti gaa “Ƴekkiya Mella Milcum ma galbancum parattí, ma ruuhancum parattí, ma gudirancum parattí, o ma mooyicum parattí, o ki ƴekkiya giicum aleŋ maa ki ƴekkiyya ziicum#10.27 Elloŋ Ɗillico Hukumnigeyyo 6.4-5 o Soƴoowee ku Saɗikaŋgeyyo 19.18..”» 28Gaa Iisa tiiliyyee gaa: «Ay seene appe ga beneycum. Kii leyya keeke ki gasakkaca hayaatane ma gakamma ɗa ta kaw.» 29Aalimne pa aŋka ga cimmicca kayaati min oko beneyyi keeke. Ay ɗakko appe ga inniyya Iisa gaa: «Giitu pa ay we?»

30Gaa Iisa gemmiyyeeca masal teete gaa: «Miiɗi kaƴi aɗe asaa min geegar ka Zerizalem, gaa katawɗo geegar ka Zerikko. Guu marŋi caaɗikkiki gu tammiya gu deeriyya ta salak aleŋ maatenta, guu icciyyeegu lawtee paracco namma ya kaɗiŋgeetee, guu uttiyyee gu ƴiiliɗe pe kanco. 31Gaa lekkiɗo gimu, maa ga lubbiti ay sooƴo ka saɗikaŋgeyyo girti Mellayi ma ƴelaa ma botol kaaka, gaa elliyya gimu kee maa gu tamanne. Gaa paaliɗe ma saripti butuuli ga ƴiiliɗe. 32Gaa lekkiɗo payya lubaaka kaƴi, ka girti Mellayi ma ay ka balco Leebi. Gata kulla aɗe ma iŋaa, gaa maa ga sarɗe were kaaka, ga elliyya gimu maa gu tamanne kee. Gaa paaliɗe kulla ma saripti butuuli ga ƴiiliɗe kanti. 33Gaa lekkiɗo pe soopa gimu min kiɗa ta Samaari#10.33 Giimi ku Samaari ma Yawudigee pa aŋka ɗa zeneeco. Gaa ma kaaka aɗe, ga maa ga Samaaritennice elliyya gimu maa gu tamme, gaa elliɗe saamuwti. ma torgowwe, gaa ƴelewɗo ma iŋaakite. Maa ga asiyya gassa gimu maa gu tamanne kee, gaa elliɗe saamuwti. 34Gaa asiɗe saripti, gaa sawwiyyeegu mottittee ma sewen o ma mirmi ku mor̰mor̰oskeyyo ma ay aleŋ dawaane, gaa arɗiyyeegu ma n̰aŋgitatti. Gaa un̰n̰iyya ɗurkulti, gaa kaatikkiki ger ka turaayo. Iŋaa pa, ga deyya kaaliya payya. 35Guu walɗe paaɗe iŋaakite. Gaa ta sokkoŋta, ga gimu ka Samaari cimmiɗe tammayigee seera. Gaa biriyyeegu oko milti ger ka turaayo kaaka. Gaa beneyyiyyee gaa: “Ban̰n̰u kaaliyya gimu ma awarre keeke. Guu tammayigee kooko koyye pa, ga maa ki gayaa kotti na akkamgu pilka naa yooke.”»

36Maa ga Iisa gaamicca masalti teete, gaa inniyya pe aalimne gaa: «A gaa oko kancum ka, ga ay ŋawwa min oko giimi ku subba kooko ma ay giiti oko gimu maa gu marŋi tamanne?» 37Gaa aalimne tiiliyyee gaa: «Ma ay giiti ay ma elle saamuwti.» Gaa Iisa pa leeɗiyee gaa: «Kii kulla addo lee pe aleŋ keeke aɗe.»

Iisa aaye girco Marsa ma suttí tee Mariyam

38Gaa min iŋaa ga Iisa ma jobookeetee ƴiiliɗe, guu un̰n̰iɗe darre kaƴi aɗe. Iŋaa pa lekka daate kaƴi maa gu semeeti goo Marsa ma joobiya girco. 39Gii lekkiɗo suttí maa gu semeeti goo Mariyam. Gita pa nowotte saripti Miltine kee Iisa gi gewɗiya beneyti maa ga garaa. 40Marsa pa ga lubbi ka tuuno sorowwica ta tirta. Gii asiɗe saripti Iisa, gii beneyyiyyee gee: «Miltini, lattaatí suttu maa gi dowɗiyaw kaytu ka na loboɗɗiya lubbi paratti ka tuuno keeke tapakkum ɗa e? Beneyyati ɗe gi gaayinno!» 41Gaa Miltine tiilitti gaa: «Marsa, Marsa, ka karrayye o ka moyaa pe oko gaari maani. 42A gata soopa latta kaƴi ka ma ay kee ka baamiti aaye iŋee. Gita Mariyam apire latta ka samaane ƴiila, o ga lekka ɗa gimu ma iccittiiga.»

Currently Selected:

Lik 10: mmy

Highlight

Copy