Lik 11

Iisa garaayo inniti Mellayi oko jobookeetee

(Elloŋ Matiye 6.9-13)

1Gaa meene kaƴi, ga Iisa enewɗiya Mella were kaƴi aɗe. Maa ga gaamicca inniti, gaa kaƴi min oko jobookeetee inniyya gaa: «Miltini gaarani ɗe inno oko Mellayi aleŋ ta Yaaya ma batasayya giimi ma gaariyo oko jobookeetee.» 2Gaa Iisa tiiliyyoo gaa: «Maa kuu enaa Mella, ku beneyyoŋ kuu#11.2 Inno teete pa ay gita kayti ɗa ka maa gu jobookeetee Iisa deeɗo enewwo. Innasoopa ga gaariyo botol kaa ku maa gu dewɗo enewwo inaawi daare kulla.:

“Tattini,

gu giimi paracco ibinu kadar ga kii kaycum ka ay Mella,

gii mulunnicum asiɗo.

3Berewwaniica tiyawtini kulla meene.

4Saamiyaniigu zunubgeetini,

asan ga nii kulla saamayyayo oko giimi paracco ma leewani miɗɗa.

Aɗaani duwa ɗa ni galɗo sekelkilti.”»

Masal ta gaari ku inniti Mellayi

(Elloŋ Matiye 7.7-11)

5Gaa Iisa beneyyiyyoo payya gaa: «Aleŋ gaa kaƴi min aattoŋ lekka lanjine, gaa kaatiɗe ga deeɗiya gassa girti ma ɗaɗɗakkiti aandoŋŋi, gaa beneyyiyyee gaa: “Lanjintu, biraw ɗe ɗaane mappa subba, 6asan ga lanjintu ma torgowwe paale gaa suubiɗe girtu o ya maatiki maa na biryee na lekka ɗa.” 7Gaa lanjinti kaaka tiiliyyee min ɗakko giiri gaa: “Duwaw ƴa, anno diigiya ɗa! Biití burgo tagisenta paaɗe, o ni ooƴe paaɗe ma rontaw, kaaka pa na gederra ɗa na waciɗo na biriyyam.” Oko mooyitoŋ ka, ga lanjinti kaaka gederra aɗɗe ga tiiliyyee goŋŋa? 8Na beneyyatoŋ: Caŋ ga lanjinti ma aaye ɗakko giiri kaaka wace ɗa ga biriyyee mappa saanane maa ga alɗo lanjinti, ga wacakka aɗe ga biriyyee latta maa ga aŋka asan ga koddoyyiyee. 9Ay ɗakko appe na beneyɗitoŋ naa: Enewwoŋ, gaa Mella birittoŋ! Deyekkoŋ, kuu gasaɗɗo min oko Mellayi! Kokokkoŋ biití burgutti, gaa Mella iyyittoŋ, 10asan ga kulla gimu aɗe ma enaa, ga Mella beree, o ma deyekka, gasakka min oko Mellayi, o ma kokokka, ga Mella eyee biití burgo.

11«Aleŋ kuŋ appe gaa kaƴi min aattoŋ lekka miica, gaa runti inniya gaa ga biree buusu, ga beree aɗɗe barwu? 12E baŋ pa gaa inniya gaa ga biree ɗeese ga beree aɗɗe irinde? 13A gaa kuŋ ka kulla ma gidaani ɗa ibina ku berewɗiyo lawwi ku samaane oko rontoŋ, ga Tattine ma aaye samaani, gata ka gidaani ƴiila payya pa, beraaca Ruuhanti oko giimi ku ma enaa.»

Iisa o tattuwco awaaradgeyyo

(Elloŋ Matiye 12.22-30, Mark 3.20-27)

14Gaa meene kaƴi, ga Iisa peteɗɗiya aarinne ma toɗokkiyee beneyyi oko gimu kaƴi aɗe. Maa ga pittiyyeega pa, gaa diiliɗe ga beneyɗo. Guu giimi ku maani kotti ajjibiɗe ta tirta. 15Guu daare soopa beneyɗo goo: «Ay tattuwco awaaradgeyyo kee Belzebul#11.15 Belzebul pa ma ay tattuwco awaaradgeyyo gu kolaa kulla goo Seetanne. ma berewwiyee gudirane ga peteɗɗiy awaaradgee.» 16Daare pa mileŋ gu aŋka cokkiti gu inniya goo: «Leeni ƴa latta ka ajjibiti ma garaani kadar ga Mella n̰akammum.» 17A mileŋ ga Iisa pa ibinca mooyico, ga tiiliyoo gaa: «Mulunne, guu melleeti nekerkití beenannico, gi mulunnico taata galaa, guu gerrati suubiɗo guu ku siƴƴa jirriyyoo oko ku rootta. 18A Seetanne appe pa kulla, gaa nekerra ma ziiti ka, gi mulunniti deewa pe gee me? Naa pa beneyyitoŋga keeke, asan ku beneyya kuu ga Belzebul ka ma berewwiyaw gudirane na peteɗɗo awaaradgee. 19A gaa naata petekka awaaradgee ma gudiranti Belzebul, gu gittoŋ pa petekka ma gudiranti we? Ay ɗakko appe gu gittoŋ saa kulla asittoŋ yooka goo ku ay kaatiynigee. 20Naata petekka awaaradgee ma gudiranti Mellayi. Keeke pa, garaa kadar gi mulunniti Mellayi sartoŋ paaɗe. 21Wikinne maa gaa gimu ka amma ma jolleetee tarakka girti, ga lekekka ɗa ma esay lawtee. 22A gaa gimu ka amma ƴiila min oko gata kaaka soopa, asiya geema bookati, gaa gederriyyee, ga cawakkeegu jolleetee kotti maa ga dowɗica galbanti. Gaa sokkiɗiy lawtee paracco, ga eddiɗiy oko gittee. 23Ma aaye ɗa ma naata, aŋkino ɗa, o ma tapakka ɗa giimi mulunniti Mellayi aleŋ tanni, tecellay.»

Yookiti aarinni

(Elloŋ Matiye 12.43-45)

24Gaa Iisa beneyɗo missa gaa: «Wikinne maa gaa aarinne oome min oko gimi, ga kataa ga deeɗo araariya kiɗaayee ku aƴinta karɗam karɗam ku maa ga deeɗo diyya were ka nambiti. Gaa gasse ɗa pa, ga beneyya ma galbanti ka gaa: “Na yokaa girtu ka heeta kee aɗe maa na oomiɗe.” 25Gaa yooke pa, ga akkiya gassa gaa sawakke patal patal o ga kakkaɓɓe samaane, 26gaa kaatiɗo ga deeɗo diyya pe awaaradgee daare paysara maa gu gaarco miɗɗa ƴiila min oko gata. Guu asiɗo un̰n̰a gu nuntiɗo. Ay kaaka appe gi nuntiti gimu kaaka maa gu suubiyee pa, deeɗo saa pe miɗɗa ƴiila min oko ta heeta.»

27Maa ga Iisa beneyɗo kaaka goŋŋa, gii daate kaƴi aɗe beneyyiyyee min aacco giimi ku maani kotti gee: «Baarikenta ay daate ma iccum aaɗi o gi waƴƴum!» 28Gaa Iisa tiilitti gaa: «Baarikenta soo ay giimi ma geewaa beneyti Mellayi o gu bakamma talta!»

Iisa pooca liyaw ta gaari ku ajjibiti

(Elloŋ Matiye 12.38-42)

29Mileŋ gu giimi ku maani kotti pa ma kadarriya Iisa gayaa ta ƴiila, ga beneyyiyoo gaa: «Giimi ku haŋka kooko gu gaarco miɗɗa. Guta enaa latta ka ajjibiti ma garaa kadar ga ay Mella ma n̰akamminoo. Mella soopa oyaa ɗa ga gaariyyo ya latta kaƴi, illa ga garaayo latta ma deyyee oko nabiinice Yuunus. 30Aleŋ ta Yuunus tee aɗe maa ga deeɗe latta ka ajjibiti ma garaayo oko giimi ku geegar ka Niniiwa kadar ga ay Mella ma n̰akammiya, ga Runti Gimi kulla deewa latta ka ajjibiti ma garaayo oko giimi ku haŋka kooko kadar ga ay Mella ma n̰akammiya. 31Oko meene ta parlanti gi sultanniŋga ma hikimiyya watuunití kiɗa ta Isirayel akka waca ma giimi ku haŋka kooko, gii asiɗiy luumiya, asan ga tippa gi aseero min kiɗaayee ku arro ku maa gi asiɗiy giyya beneyyiŋgeetee sultan Suleman ma unenta ma ibino ta gaaro#11.31 Elloŋ 1 Salaataŋgee 10.1-13.. A iŋee pa ga lekka pe ma tatta ƴiila min oko Suleman. 32Meene ta parlanti, gu giimi ku geegar ka Niniiwa akka waca ma giimi ku haŋka kooko, guu asiɗiy luumiya giimi ku haŋka kooko, asan gu giimi ku Niniiwa meeliy gaarco ku miɗɗa maa ga Yuunus taasiyyooga beneyti Mellayi. A iŋee pa ga lekka pe ma tatta ƴiila min oko Yuunus!»

Iɗi ay aleŋ lampa ka zii

(Elloŋ Matiye 5.15, 6.22-23, Mark 4.21)

33Gaa Iisa gaayiɗe payya beneyyi gaa: «Lekka ɗa gimu ma zegaa lampa gaa kiiliyya e baŋ pa ga zobokkee daakuwayyi, gata gagakkaa soo uwwa ku maa gu giimi ma on̰aa giiri elelɗica bahaarane. 34Iɗiicam ay aleŋ lampa ka ziicum. Guu iɗiicam ay aapiya ga ziicum paratti pacenta, a guu iɗiicam raɗakkam soopa ga ziicum paratti aaye aatti namtuwwi. 35Kaaka pa ki pakarru ku maa gi bahaarane maa ki lekka ziicum alɗo batta ɗa. 36Gaa ziicum paratti pacakke, ga alɗo lekka ɗa ya nussanti ma aaye namtuwwi, ga beraa paratti racal, aleŋ maa gaa lampa pacakkamga were racal ma bahaaranti.»

Iisa loomoyyay Pariziyennigee o aalimnigee

(Elloŋ Matiye 23.1-36)

37Maa ga Iisa gaamiyya beneyti kaaka, gaa Pariziyennice kaƴi kolliyya gaa gu addo tee girti. Gaa Iisa kaatiɗe. Gaa nuntiɗe ga tewɗo. 38Gaa Iisa teeɗe, innasoopa ga apile ɗa aleŋ apilo ta aadanco. Gaa Pariziyennice kaaka ajjibiɗe maa ga elliyya Iisa ga teero goŋŋa. 39Gaa Miltine kee Iisa beneyyiyyee gaa: «A kuŋ Pariziyennigee, ku ay aleŋ giimi ma apallay kuraakeeco o taasiŋgeeco min taricco ka, aɗicco pa riddenta. Kuŋ apallay zeneetoŋ, a galbigeetoŋ soopa unenta ma aŋko ta maasiti o ma gaari daare ku miɗɗa. 40Kuŋ ibina ɗa ya maatiki! Mella ma leewiya zii maa ke ella, ay gata ɗa aɗe kulla ma leewica galbanti gimi e? 41Kaaka pa, ku soporraniyoogu galbigeetoŋ oko giimi ku saamo. Goŋŋa gu lawtoŋ paracco deewa samaane unti Mellayi.

42«Diigane ocokkitoŋ, kuŋ Pariziyennigee! Kuŋ ma beraa oko Mellayi durgu kaƴi min oko durgee ku orro ku tappitoŋ daare maa ku jakaa aleŋ naana o lawwi daare ku rootta ma nobokka daana maa ku amassa tiyaawi maa ku leewa jineenigeyyo. A innasoo gi nunto ta ɗayaŋ unti Mellayi, o ƴekkiti ku merekkiy sulaayi. Ay kooko appe ampane kee maa ku dee leewo bala rawtico oko ku daare. 43Diigane ocokkitoŋ kuŋ Pariziyennigee asan ku ƴekka nunto wereeriyee ku omma gerraco Yawudigeyyo ku giraaniti o ku ƴekka gu giimi salamɗitoŋ ma karaamane wereeriyee maa gu giimi temeɗɗo. 44Diigane ocokkitoŋ kuŋ Pariziyennigee asan ku saabayye aleŋ kayyee maa gu teneɗɗe giimi ma lekka ɗa gaaro, guu giimi tan̰awɗiyo o gu lekka ɗa kabarre.»

45Maa ga Iisa beneyɗo kaaka goŋŋa pa, ga kaƴi min oko aalimnigee ku Kitamniti Muusa beneyyiyee gaa: «Garaawa, maa ki beneyɗo goŋŋa ki n̰ilni nii kulla!» 46Gaa Iisa tiiliyyee gaa: «Diigane ocokkitoŋ kulla kuŋ aalimnigee ku Kitamniti Muusa, asan ku garaayooga botol ka ibaadati oko giimo o ku gayee gaari maani oko beneyti Mellayi kee ka Kitamniti Muusa ga dewɗiyo suura oko giimo, o ga kuŋ saa kulla gayay ɗa ya paalta ka kulla jobbiti botol kaaka. 47Diigane ocokkitoŋ, asan ku gekay samaane mooniŋgeeco nabiinigee maa gu kookuweetoŋ deero. 48Ma keeke pa ku gaare saa purta kadar ku oyee ma gaarco kookuweetoŋ guta ma deero nabiinigee, kuŋ pa gekay kayyeeco. 49Ay ɗakko appe ga Mella ma ibiniy gaari paracco beneyyiɗe gaa: “Naa n̰akammayo nabiinigee o n̰amaakee. Daare min aacco ƴa gu akkiy dee, daare pa gu akkiy diigiya.” 50Ma kaaka pa, ga Mella asiyo caaɗa parlane oko giimi ku haŋka kooko oko diyawco ta nabiinigee paracco maa gu deero min diilití dunuuniti, 51min diyawti Abel#11.51 Elloŋ Diilo ta Lawwi Paracco 4.8. namma ya diyawti Zakariya, gata maa gu deero girti Mellayi beenanne were ka sooƴiti saɗikaŋgeyyo o were ma duwenta oko Mellayi#11.51 Zakariya pa, ay kaƴi min oko nabiinigeeco giimi ku Isirayel. Gata pa luumiyiy gimtee mileŋ gu poocica aabido ta tirta tee ta Mellayi guu soƴowɗo saɗikaŋgee oko zorro. Ay kaaka appe ga sultan ka Isirayel n̰aamiɗe giimi gu deeɗiya dee ɗakko girti Mellayi. Elloŋ 2 Jeppico Gaarco Salaataŋgeyyo 24.20-21.. Haa, na beneyyatoŋ kadar gu giimi ku haŋka kooko ga Mella akkiyo caaɗa parlane oko diyaawico kooko paracco. 52Diigane ocokkitoŋ kuŋ aalimnigee ku Kitamniti Muusa, asan ku icciya kile ka iyyiti biití burgo ta ibinti gaari maa ga Mella beneyye. Kuŋ ɗe kulla on̰aa ɗa, a giimi ma aŋka un̰n̰o pa kulla, ku toɗokkayo.»

53Maa ga Iisa oomiɗe min girti Pariziyennice kee, guu aalimnigee ku Kitamniti Muusa ma gicco Pariziyennigee boŋsiyyee ta kaw. Guu melewɗiki ta tirta ma gaari pay pay. 54Guta pa ɗebekkiya ku maa gu gassiyyee er̰n̰e ma beneyti kaaka.

Currently Selected:

Lik 11: mmy

Highlight

Copy