Lik 12

Aɗoŋ beneyya ɗa ma bene ka

(Elloŋ Matiye 10.26-27)

1Oko wikinne kaaka gu giimi alpaŋgee alpaŋgee ase timma were kaaka maa ga Iisa alɗo, namma gu daare warawɗo asinco gicco. Gaa Iisa diiliɗe ga beneyyiyyoo ƴa omma oko jobookeetee gaa: «Warroŋ maaƴi min giraanico Pariziyennigeyyo. Giraanico pa ay aleŋ muɗugu ma cepellay bitta ku eeɗenta paracco. Guta pa beneyya ma beneeco ka, ka galbigeeco pa kayti. 2Lekka ɗa gaari ku kiilenta haŋka ma akka ooma ɗa purta o gu lekka ɗa gaari maa gu giimi ƴapawwiko ma akka dee ɗa ibinenta. 3Ay ɗakko appe ga beneyyi paratti maa ku gobokkiki kaa, gu giimi asiyya giyya saa purta, o paratti maa ku semsemkiki deyco gittoŋ aatti ger ka agisenta gu asikkiki hawwiya ta hanjir were paratti.»

Ay Mella ka ma ay ka ɓayaawi

(Elloŋ Matiye 10.28-31)

4Gaa Iisa beneyɗiyo payya oko jobookeetee gaa: «Kuŋ lanjigeetaw, na beneyyatoŋ naa ku aɗoŋ ɓayakka ɗa giimi, asan gu guta gederra gu dewɗo zii ka, ƴiila min oko keeke soopa gu gederra ɗa. 5Na gaaratoŋ ƴa, ma ay ka ɓayaawi ay Mella. Gata maa kuu ase matta kulla ga lekka gudirane maa ga deeɗitoŋ soƴƴa aattí okko ma batakka ɗa ta kaw. Haa! Na beneyyatoŋ ƴa, ay gata appe maa ku ɓaynee. 6Ten̰ten̰n̰i beeƴa gu geɗekkiko ɗa aɗe ma gurus paalta ka e? Gaa ma kaaka aɗe ga ya kaƴi min aacco ga Mella alɗikkiki rawatta ɗa. 7Ma ƴiila payya pa, ay gu laawa paracco ku kayyeetoŋ kulla ga Mella gemekkiy. A mileŋ ga kulla kaƴi min aattoŋ kaali ƴiila pa min oko ten̰ten̰n̰i ku maani, ku aɗoŋ ɓaya ɗa!»

Beneyyi ka oyyiti o ka poociti Iisa Masi

(Elloŋ Matiye 10.19-20,32-33, 12.32)

8Gaa Iisa beneyɗiyo missa gaa: «Na beneyyatoŋ kadar ga kulla gimu aɗe ma beneyya unco giimo gaa ga ay kanni, ga Runti Gimi kulla akka beneyya unco malaykatnigeetee Mellayi gaa ga ay kanti. 9Innasoopa ga gimu ma akkino pooca unco giimo, ga Runti Gimi kulla akkiya pooca unco malaykatnigeetee Mellayi. 10A gata pa, kulla gimu aɗe ma beneyya miɗɗa ma gaartee Runti Gimi ga Mella akkee saamiya. A ma n̰ilca Ruuhanti Mellayi soopa, ga akkee saamiya ɗa. 11Guu giimi katawkikitoŋ gu deeɗitoŋ caaɗa parlane aɗicco gerraco Yawudigeyyo ku giraaniti o unco taattuwee ku darriti o ku hakuumati, ku aɗoŋ karriya ɗa oko beneyyi maa ku deeɗo beneyya ku maa ku cimmiɗiy kayyeetoŋ. 12Oko wikinne kaaka saa, gi Ruuhanti Mellayi garaatoŋga maa ku deeɗo beneyya.»

Masal ta ayaawayyi

13Gaa gimu kaƴi, min aacco giimi ku maani kotti beneyyiyyee oko Iisa gaa: «Garaawa, beneyye ɗe oko sintu ga ɗeddinniiga artantini.» 14Gaa Iisa pa tiiliyyee gaa: «Lanjo, ay we ma gagakkino na tacawɗitoŋgu gaartoŋ e baŋ pa ga artantoŋ na ɗedeɗɗitoŋga?» 15Gaa beneyyiyyoo pe pa oko giimi kotti ma aaye iŋaa gaa: «Warroŋ maaƴi min kaarito ta lawwo, asan gi hayaatanti giimi ta seene asaa ɗa min oko lawtee maa ga lekka, caŋ ga dee ayaawa ta kaw kulla.»

16Gaa Iisa jeppiyyooca masal teete gaa: «Lekka gimu kaƴi aɗe ma ay ayaawa, guu gannatee weeɗiyee ta tirta. 17Gaa moyowɗo paaɗe gaa: “Na lee pe naa me? Asan na lekka ɗa were maa na dummiyɗiy kortaw paracco.” 18Gaa moyowɗo payya gaa: “Na leewa aleŋ keeke. Na yeyekkay urdiŋgeetaw ku heeta naa geewiɗo ma taatta ƴiila. Naa timmiɗiy iŋaa kortaw paracco o lawtaw daare kulla. 19Naa beneyyiɗo ma galbantu ka naa: Kii gimu nambu ƴaape, asan ki lekka appe lawwi ma tewkum ƴilaakee maani. Tee o ki aar̰u o ki parhinu.” 20Mella soopa leewee pe gaa: “Kii keeke ibina ɗa ta kaw gaari. Oko aandoŋ keeke aɗe saa na ecekkamca ruuhancum. Guu lawcam kooko paracco maa ki dommoyye oko kii ka pa baŋ gu akka dee pe ɗeɗe oko we?”» 21Gaa Iisa gaayiɗe payya gaa: «Ay keeke appe ma akkee asa oko gimu ma temekka ayaawi oko gata ka, gaa alɗo dommoyya ɗa ayaawi saripti Mellayi.»

Duwoŋgu galbigeetoŋ oko Mellayi

(Elloŋ Matiye 6.25-34)

22Gaa Iisa beneyyiyyoo pe pa oko jobookeetee gaa: «Ay kaaka appe, na beneyɗitoŋ naa ku aɗoŋ karriya ɗa oko tiyaw ma nowottikitoŋ e baŋ pa oko kaɗiŋgee ku issiti ku coogiti zeneetoŋ. 23A gita pa hayaatanti gimi ƴiilaca tiyawti, o ziiti gimi kulla ƴiilay kaɗiŋgeetee. 24Elloŋgu ɗe kuraaŋi, bala gu lowokka o bala gu seɗekka, o bala gu lekka wereeriyee ku dummiyti lawwo o bala gu lekka urdiŋgee, gaa Mella rabbayɗiy. A kuŋ pa, ƴiilay pe arro ɗiiɗi! 25Lekka aɗɗe kaƴi min aattoŋ ma gederra ma karriyti taata ga gaayiɗiy meenitee ma wikinne paalta ka kulla? 26A kuu gederra ɗa ku leeɗiya latta ka rootta keeke ka kulla, ayme ku karrayɗo oko gaari daare? 27Elloŋ ƴa buuyumtí tappati maɗaa gaa me? Gata lobokka ɗa o ga ɗosaa ɗa kaɗiŋgee, gaa ma kaaka aɗe, na beneyyatoŋ ƴa, sultan Suleman kulla ma ayaawuwti paratti, ga isse ɗa kaɗiŋgee ma samaane aleŋ kaƴi min oko buuyumtí tappa taata. 28A gii tappa ta kayni gonek ka ga Mella issiti buuyumu samaane goŋŋa, oko gita ma aaye meente ka, sokkoŋ pa gi aƴaa, guu sooƴicca okkati gi aggiɗo, ga oko kuŋ pa, ga Mella beraatoŋ ɗa pe isso ta kaɗiŋgee samaane ƴiila e? Kuŋ gi amannitoŋ paalta ka missa. 29Aɗoŋ moyaa ɗa maani ma gaari ku tiyawtoŋ o ku aar̰itoŋ o ku aɗoŋ karriya ɗa! 30Giimi ku dunuuniti ma aabadde ɗa Mella ay guta ma moyaa diiman diiman oko lawwi kooko paracco. Kuŋ soopa ga Mella Tattoŋ lekkiyo aɗe kabarre oko lawwi ma koyowwitoŋ. 31Kaaka pa, ku diyyoŋ ku un̰n̰iɗo mulunniti Mellayi, guu lawwi kooko pa kulla ga Mella asittoŋgu gaaya ka pe.»

Ayaawi ka uwwa samaani

(Elloŋ Matiye 6.19-21)

32Gaa Iisa beneyyiyyoo gaa: «Aɗoŋ ɓaya ɗa ga kuŋ ma ay hidibe ta rommata, asan ga Mella Tattoŋ gi deyyee daanee ga birittoŋca mulunne ku hikimiyɗo ma gata. 33Giɗikino lawtoŋ maa ku lekka, kuu biriyyooga gurus kaaka oko giimi ku saamo. Leyyoŋ ayaawi ma nagakka ɗa samaani o ga masalla ɗa ta kaw. Iŋaa pa, bala ga mariŋ gederra ga sariyyee o bala ga mecemece ar̰aa. 34A gata pa, were maa ga ayaawuwtoŋ alɗo, gu galbigeetoŋ kulla ku dowwiy pe iŋaakite aɗe.»

Masal ta nuntiti bala doriyo ta ooƴiti

(Elloŋ Matiye 24.45-51)

35Gaa Iisa beneyɗiyo payya gaa: «Issoŋgu kaɗiŋgeetoŋ ku lubbi o ku onnoŋgu abittoŋ o lampiŋgeetoŋ ku duwoŋgu zeegenta! 36Deyyoŋ aleŋ lubaakee ma ocokka yookiti tattuwco ma katee jiizanti, ku maa gu iyyiyyeeca koɗok biití burgo wikinne maa gaa ase kolla. 37Baarikenta ay lubaakee kotti maa ga tattuwco akkiy gassa oko yookiti guu aaye bala ooƴo. Na beneyyatoŋca seene: Gaa asiy gassa goŋŋa, ga ay gata pe ma onokkaca abuuti, gaa nuntiɗiy, gaa kulla kaƴi aɗe ga biryee tiyaw. 38Baarikenta ay lubaakee kotti maa gaa tattuwco yooke ma ɗaɗɗakkiti aandoŋŋi e baŋ pa ma gidaane ka walawti wiri, gaa asiɗiy gassa guu nowotte bala ooƴo.

39«Keeke pa ku lekke paaɗe kabarre, gaa milti giiri ibinca saha ta aandoŋ maa ga mariŋ asawɗo, ga nowotta nadirane ku maa ga alɗee duwa ɗa oko mariŋŋi ga noomiɗo buulu ga un̰n̰iɗo girti. 40Kuŋ kulla aɗoŋ doriya ɗa asan ku ibina ɗa baŋ ga wikinne ŋawwa maa ga Runti Gimi asiɗo asa.»

Masal ta lubaaka ka ɗayaŋ o ka ɗayaŋ ɗa

41Maa ga Iisa gaamicca masalti teete, gaa Piyer inniyya gaa: «Miltini masal teete ki beneyyiniica soo oko nii ka e, e ga oko giimi paracco?» 42Gaa Miltine kee Iisa tiiliyyee gaa: «A haŋka pa, ay lubaaka ŋawwa ma ay kee ka damannenta o ga ibina gaari? Ay gata appe maa ga tattuwti merekkeega lubbi maa ga deeɗiyo berewwo tiyaw oko lubaakeetee daare ku giiri wikinne maa guu aŋka. 43Baarikenta, ay lubaaka kaaka maa ga tattuwti akkiya gassa oko yookiti gaa leewaa lubbiti ma butulti. 44Na beneyyatoŋ ma seene: Lubaaka kaaka, ga tattuwti akkeegu amanna lawtee ku girti paracco. 45A gaa lubaaka kaaka soopa beneyya ma galbanti ka gaa: “Tattuwtu asaa ɗa koɗok”, ga delaa paaɗe ga tamanɗiy lubaakee daare ku miɗitta o ku daatta o ga teewa o ga ar̰aa o ga mowokka. 46Gaa tattuwti asiɗo yooka oko meene maa ga alɗiya ocokka ɗa o oko saha maa ga ibina ɗa. Gaa tattuwti asiyya diigiya raɗɗa aleŋ diiganco giimi ma damannenta ɗa. 47Lubaaka ma lekkiyo kabarre oko gaari maa ga tattuwti aŋka, gaa alɗiyee lee ɗa ya maatiki o ga leyya ɗa aleŋ maa ga tattuwti aŋka, ga gata kaaka gasakka tammo ta tirta. 48A lubaaka soopa ma niŋge latta maa ga lekkee ɗa kabarre gaa tattuwti alɗiya aŋka ɗa latta kaaka, gu tamannaa paalta ka. Gimu maa gu beree maani, gu ocokke minnanti maani kulla. A gimu maa gu amanniyee maani, gu enaa maa ga lewɗo payya ta ƴiila.»

Darawco giimo saananti Iisa

(Elloŋ Matiye 10.34-36)

49Gaa Iisa beneyɗo missa beneyyi gaa: «Na asee naa eterɗe okko iŋee kiɗaati o na aŋka gi zeegiɗo paaɗe. 50Na akka un̰n̰a diiganti aleŋ gimu maa gaa un̰n̰e ammo gu batisiyiyya, o ga ziitu kalawwino namma ya wikinne maa gu gaari kooko asiɗo gaama! 51Oko kantoŋ ka, kuu e na asee na eterɗitoŋ aapiya dunuuniti e? Kaw! Na beneyyatoŋ, na eterritoŋ soo daraw aattoŋ. 52A gata pa min haŋka, guu giimi beeƴa aatti girco, gu darakka. Ku subba deewa kasiimigeeco oko ku seera, o ku seera deewa kasiimigeeco oko ku subba. 53Baaba kaasammaa runti, o runti kaasammaa tatti. Iya kaasammaca runtí, o runtí kaasammaca yaatí. Aydine ta daatta kaasammaca daatti runtí, o daati runtí kulla kaasammaca aydintí.»

Ibino ta wikinnigeyyo

(Elloŋ Matiye 16.2-3, 5.25-26)

54Gaa Iisa beneyyiyyoo payya oko giimi ku maani kotti gaa: «Maa kuu elle gii n̰irɗe oome min ta culumti#12.54 Kiɗa ta Isirayel gu n̰irɗa ma n̰akaa ammi okomma min ta culumti., ku beneyya saa koɗokka ka kuu gu ammi n̰akaa, guu n̰aawiɗo. 55A kuu elle gaa ussu azakka min ta watuuni, ku beneyya kuu ga were koɗossa, gaa kuɗisiɗo. 56Kuŋ ay giimi ma beneyya ma beneetoŋ ka, ka galbigeetoŋ pa kayti. Ku gederra ku passalɗiy garaawi ku samaani o ku kiɗaati, a ayme ku alɗiy ebenna ɗa garaawi ma deewa oko wikinnitine keeke?

57«Ayme ku alɗiya passalla ɗa ga kuŋ melleeco, latta ma ay ka ɗayaŋ? 58Gaa gimu loomoyyum, kuu katawɗo sawa were ka caaɗiti parlanti, ki asarru ku taaciɗiy gaartoŋ butuuli wikinne maa ku alɗe sarakka ɗa missa, goneka kee, ga sarakkikum unti caɗaawa ka parlanti. Gata kaaka pa, beraam picco asaakargeyyo. Guu guta pa issiɗum daŋayi. 59Na beneyyam, min iŋaa ki okomma ɗa, namma ki pilkiyya ƴa omma tamanne paratti maa gu caɗawwiyam.»

Currently Selected:

Lik 12: mmy

Highlight

Copy