Lik 13

Meelo ta gaari ku miɗɗa

1Gaa oko wikinne kaaka, gu giimi minnaw asiyye beneyya oko Iisa ma gaarco giimi ku kiɗa ta Galilee maa ga guberner kee Pilat beneyye gaa gu deyyiy. Guu deeɗiy dee wikinne maa gu soƴowɗo saɗikaŋgee oko Mellayi. Guu baarco amsiɗe ma ku gaaruwi maa gu deewe. 2Gaa Iisa tiiliyyoo gaa: «Oko kantoŋ ka, ku leewe kuu walaŋ gu giimi ku Galilee kotti ma matte ma muutu kaaka, ay giimi ma leewa zunubgee ƴiila min oko giimi paracco ku Galilee e? 3Kaw, na beneyyatoŋ, zunubgeeco ƴiilay ɗa ku gicco. A innasoopa, kuu meeliy ɗa gaartoŋ ku miɗɗa kooko, ga kuŋ kulla parattoŋ akka matta aɗe aleŋ giimi ku Galilee kotti. 4Na beneyyatoŋ payya: Ku lekka kabarre kadar ga ger ka siƴƴa ka hellane ta Silowe galiyoo oko giimi ku orro o poppoɗi koo ga deeɗiy. A gaa oko kantoŋ ka, ku leewe kuu gu negekke ƴiila min oko giimi paracco ku Zerizalem e? 5Kaw, na beneyyatoŋ kadar gu negekke ɗa ƴiila. A innasoopa, kuu meeliy ɗa gaartoŋ ku miɗɗa kooko, ga kuŋ kulla parattoŋ akka matta aɗe aleŋ guta.»

Masal ta boo ma waa ɗa

6Gaa Iisa jeppiyyooca masal teete gaa: «Gimu kaƴi aɗe lekka jineene. Aattí jineeniti pa, lekka boo tumenta. Gaa asiɗe gaa ga akka jaawa ronti, gaa alɗe gassa ɗa soopa. 7Gaa beneyyiyyee oko lubaaka ma lobokkaca jineene taata gaa: “Ellu ƴa! Lekka ƴilaakee subba maa na asawɗo jaawico ronti, naa alɗo gasakka ɗa. Daɗɗica maaƴi! Seƴee pe gonek ka kiɗa?” 8Gaa ma lobokkaca jineene pa tiiliyyee gaa: “Tattuwtu, duwaati ƴa payya ƴila teete, na caarittiica balti na kadiricca, naa asitti kalla diyarre, 9goŋŋa naa walaŋ pe gi akka wee sokkotta, gii weero ɗa pa, kii beneyyiɗo ka pe na daɗɗicca.”»

Iisa rayyaddaca daate ma meene ta nambiti

10Gaa meene kaƴi ta nambiti, ga Iisa garkayɗiy giimi girco Yawudigeyyo ka giraaniti. 11Gii lekkiɗo iŋaa daate ma deegeyye. Gita pa lekka ƴilaakee orro o poppoɗi maa ga aarinne godolɗica raɗɗa gi alɗo gederra ɗa gi paan̰iɗo. 12Gaa maa ga Iisa ellicca, gaa kollicca gaa gi asee katta. Maa gi asiyyee, gaa beneyyitti gaa: «Daate, ka rayyide min gudilte teete.» 13Gaa gagittiigu pittee, gaa kaytiŋ ka gi paan̰iɗe. Gii diiliɗe gi logoɗɗiya Mella. 14Gaa tattuwe ka ger ka giraaniti kaaka boŋsiyye ta tirta oko Iisa asan ga rayyide gima ma meene ta nambiti. Gaa beneyyiyyoo oko giimi ku maani kotti gaa: «Lekka meeni bizgiƴi ku lubbi. Kaaka pa ku asawwoŋ gu rayyaɗɗitoŋ oko meeni kotti, ay ma meene ta nambiti ɗa.» 15Gaa Miltine kee Iisa pa tiiliyyee gaa: «Kuŋ ay giimi ma beneyya ma beneetoŋ ka, ka galbigeetoŋ pa kayti. Kulla kaƴi ɗa aɗe min aattoŋ eperra koydanti e baŋ ga ɗurkulti min saayani gaa kaatikki pilaawi ma meene ta nambiti e? 16A daate teete pa ma ay ta balti Biraayim maa ga Seetanne deegeyye gi alɗo onnenta ma paraayi ƴilaakee orro o poppoɗi, aŋka ɗa aɗe na rayyidicca min paraytí ma meene ta nambiti e?» 17Maa ga Iisa tiiliyyee goŋŋa, guu ma aŋkiya ɗa kanti kotti gi jaaliyyoo. Guu giimi ku maani soopa parhinɗe oko gaari paracco ku samaane ta kaw maa ga Iisa leewa.

Masal ta ettu ka tatta maa gu busuntee rootta ka

(Elloŋ Matiye 13.31-32, Mark 4.30-32)

18Gaa Iisa beneyyiɗe payya gaa: «Mulunniti Mellayi saabayye ini me? Na gederra pe na massilicca ma ini me? 19Gita saabayye aleŋ busunti tappa ta jineeniti maa goo mutar. Maa gaa gimu icce ga luwɗe jineeniti, gaa ommiɗe, gaa maaɗiɗe ga deeɗe ettu tatta namma gu ɗiiɗi panaɗɗiy gerraco linƴaƴƴitee.»

Masal ta muɗigi

(Elloŋ Matiye 13.33)

20Gaa Iisa gaayiɗe payya gaa: «Mulunniti Mellayi na masallaca payya ma ini me? 21Gita saabayye aleŋ muɗugu ka paalta maa gi daate icce, gii eeɗiyya ma bitta maani ma deewa orooruwee seera kooro. Gaa ma paaltuwti kaaka aɗe ga cipilɗiy bitta ku maani kotti paracco.»

Biití burgo ta n̰aaɗi

(Elloŋ Matiye 7.13-14,21-23, 25.10-12)

22Gaa Iisa tapaɗɗiy gawaagargee o diyargee, ga garkayɗiy giimi o ga kataa ta Zerizalem. 23Gaa gimu kaƴi inniyya gaa: «Miltu, giimi paalta ka deewa najjiyenta e?» Gaa Iisa tiiliyyoo gaa: 24«Na beneyyatoŋ: Dekerroŋ ku un̰n̰iɗo ma biití burgo ta n̰aaɗi, asan gu giimi maani akka diyya un̰n̰o, guu alɗo gederra ɗa. 25A gaa milti giiri ase waca pa, ga agisicca biití burgo ma kile, kuu alɗo renta, ku akka tamma biití burgutti o ku beneyyee parattoŋ kuu: “Miltini iyyani ɗe!” Gaa gata pa tiilittoŋ gaa: “Na ibintoŋ ɗa baŋ ku asaa min taŋaa!” 26Gaa kuŋ asiyyee tiila kuu: “Nii teero o ni aar̰e ma kii, o ki gaare beneyti Mellayi wereeriyeetini ku timmiti.” 27Gaa gata pa asittoŋ tiila payya gaa: “Na ibina ɗa baŋ ku asaa min taŋaa. Saapoŋ maaƴi min oko naa ga kuŋ parattoŋ ma leewa ɗa ka ɗayaŋ.” 28Iŋaa pa ku akka erca o ku akkiy ayamma saantoŋ, asan ku akkiya ella Biraayim o Isaaka o Yakub o nabiinigee paracco mulunniti Mellayi, kuŋ soopa gu dawakkatoŋ renta. 29Giimi ma ay Yawudigee ɗa akka asa min ta jarilti o min ta culumti o min ta muŋsanni o min ta watuuni, guu asiɗo nunta tiyaawi mulunniti Mellayi. 30Min oko giimi ku haŋka kooko pa, gu daare ma ay ku sulaayi akka dee ku omma, o daare ma ay ku omma haŋka akka dee ku sulaayi.»

Iisa mataa geegar ka Zerizalem

(Elloŋ Matiye 23.37-39)

31Gaa oko wikinne kaaka, gu Pariziyennigee minnaw deeɗiyee beneyya oko Iisa goo: «Ƴiilu maaƴi min iŋee, asan ga sultan Erod aŋka diyawcum!» 32Gaa Iisa tiiliyyoo gaa: «Anne beneyya oko tawaalu kaaka ma ay aleŋ gooyagooya kuu ga meente o sokkoŋ na petekka awaaradgee min oko giimo, o na rayyadday ma parayya. Meene ma daa ta subba pa na gakamma lubbitu. 33Aŋka soopa na icciyya butultu meente o sokkoŋ o sokkoŋ kaƴi asan gi wagee ɗa ga nabiinice gu deeɗiya renta min geegar ka Zerizalem.»

34«Hayyii, kuŋ giimi ku Zerizalem! Hayyii, kuŋ giimi ku Zerizalem, kuŋ ma deeway nabiinigee o ku deeway ma dawwo ta dambeyyo giimi maa ga Mella n̰amakkatoŋ! Diiman na aŋke na timmittoŋ sariptu aleŋ kukkira ma gomokkay ronti enderti, gaa kuŋ soopa alɗe aŋka ɗa. 35Haŋka pa, ga Mella capakkatoŋga ta kaw girtoŋ. Na beneyyatoŋ ƴa: Ku akkino ella ɗa payya namma ya meene maa ku asiɗo beneyya kuu: “Baarikenta ay gata ma asaa ma semeetee Mella Miltine#13.35 Elloŋ Soom 118.26.!”»

Currently Selected:

Lik 13: mmy

Highlight

Copy