Lik 14

Iisa rayyadda gimu ma parayya

1Gii ma meene ta nambiti, ga gimu kaƴi ma ay min oko taattuweeco Pariziyennigeyyo kolowɗiya Iisa girti ku maa gu deeɗo tee. Guu giimi ma aaye iŋaa kotti elelɗiya samaane Iisa. 2Gaa lekkiɗo gimu kaƴi ma parayya ga ziiti osoɗɗe ma aaye unti Iisa. 3Gaa Iisa inniɗiy aalimnigee ku Kitamniti Muusa o Pariziyennigee gaa: «Hukumnigeetine oyowwine e, e gu oyowwine ɗa rayyido ta gimi ma meene ta nambiti?» 4Guta pa ƴapee ka. Gaa Iisa baamiyya gimu kaaka ma parayya. Gaa rayyidiyya, gaa beneyyiyyee gaa ga addo girti. 5Gaa Iisa beneyyiyyoo payya gaa: «Gaa gimu min aattoŋ lekka miica e baŋ ga koydane ma gale beeni ma meene ta nambiti, ku leewaa kuu me? Ku cemekka ɗa aɗe koɗokka ka saa e?» 6Guu alɗe gederra ɗa gu tiiliyyee oko beneyti keeke.

Apiro ta wereeriyee ku nuntiti laalanti

7Gaa Iisa pakarriyyo oko giimi maa gu kolowwiy baŋ gu aparray goo me wereeriyee ku nuntiti ku samaane. Ay kaaka appe ga beneyyiyyooca paracco masal teete gaa: 8«Gaa gimu kollum tiyaawi, ki addo nunta ɗa were ka samaane, walaŋ pe gaa gimu keeke ma kolowwum, kolee gimu ka karmiyenta ƴiila min oko kii. 9Gaa gimu ma kolowwitoŋ sertoŋ deeɗam beneyya gaa: “Cappeega were keeke oko giicum”, ki deeɗo nunta jaalenta were ka sulaayi. 10Gaa gimu kolowwum, ki addo nunta soo were ka sulaayi, goŋŋa gaa gimu ma kolowwum aseero, ga akkam beneyya gaa: “Lanjintu, asu omma were ka samaane.” Goŋŋa gi deewam karaamane unco giimi kotti paracco ma akka tee. 11A gata pa gimu ma cepellaca kayaati, ga Mella koyaa, o ma koyaa ziiti pa, ga Mella cepellaa.»

Wasaaniti Iisa oko miltí laalanti

12Gaa Iisa beneyyiyyee pe pa oko gimu kaaka ma kolowwiya gaa: «Kii beraa oko giimo tiyaw ta patti e baŋ gi ta aandoŋŋi ki addo kolla ɗa lanjigeecam e baŋ gu seneecam, addo kolla ɗa gimcam e baŋ gu bakeecam ma ay ayaawee, asan gu guta kulla ma meene akkum kolla oko tiyawco. Ay ma goŋŋa appe gu yookiyyamga Lattaacum maa ki biryoo. 13Kii kolaa giimi tiyaawi meene ta laalanti, ki kollu soo giimi ku saamo, o ma ay ruŋguygee o ma ay mugilee o ma ay koor̰ee. 14Goŋŋa ki akka dee baarikenta asan gu guta kotti gederra ɗa gu yookiyyamga latta maa ki biryoo. Gaa Mella pa asiyyamga yooka wikinne maa guu giimi ku ɗayaŋ unti ase naɗa min muuti.»

Masal ta giimi maa gu kolowwiy tiyaawi

(Elloŋ Matiye 22.1-10)

15Maa gu giyyiɗiy beneyyiŋgeetee Iisa kooko, gaa kaƴi min oko giimi kotti ma nowotte gu tewɗo beneyyiyyee oko Iisa gaa: «Baarikenta ay gimu ma akka tee laalane ta mulunniti Mellayi.» 16Gaa Iisa tiiliyyee gaa: «Gimu kaƴi leelo laalane yaata, gaa kolliɗe giimi maani. 17Maa ga wikinne ka tiyaawi asiɗe, gaa n̰aamiyya lubaakati gaa ga aɗiy kolla giimi maa ga beneyyiyoo gu asiɗo paaɗe, asan gi tiyaw parattí gu leeca appe haŋka. 18Guu giimi kotti paracco maa ga kolee, ga kulla kee aɗe diiliɗe ga ɗamaɗɗo. Ka omma ƴa beneyye gaa: “Na geɗekke ka gaan, naa aŋkiɗo na deeɗiya ella, kaaka pa ga ban̰n̰u, ga saamiyaw.” 19Ka kaƴi pa beneyye gaa: “Na geɗekke koydigee orro, naa aŋkiɗo ƴa na deeɗiy cokka lubbi. Kaaka pa ga ban̰n̰u, ga saamiyaw.” 20A ka kaƴi payya pa gaa: “Naa ecekke ka daate, ay ɗakko appe na alɗo gederra ɗa kaato.” 21Gaa lubaaka kee maa gu n̰aame yookiɗe wikirti tattuwti. Gaa gemmiyyeegu tilaawico giimi kooko paracco. Gaa milti giiri boŋsiɗe, gaa beneyyiyyee oko lubaakati gaa: “Addo koɗok wereeriyee maa gu giimi temeɗɗo o bottolli ku geegarri, kii asikkiko iŋee giimi ku saamo, o ruŋguygee o koor̰ee o mugilee.” 22Gaa wikinne paalta omma, ga lubaaka kaaka yookiɗe, gaa asiyyee beneyya payya oko tattuwti gaa: “Na leyya maa ki beneyyiyaw o ga were marakke missa.” 23Gaa tattuwe kaaka beneyyiyyee oko lubaakati gaa: “Addo bottolli ma kataa ta kayni o ma baariyco terreppo, kii kuddiyiyo ma beneyyi oko giimi maa ki wagawko gu un̰n̰iɗo ku maa ga girtu deeɗo unenta. 24Na beneyyatoŋ: Min oko giimi ku omma ku kollenta koo ga lekka ɗa ya kaƴi ma akka tee tiyawtu.”»

Jobbo ta butulti Iisa raɗɗa

(Elloŋ Matiye 10.37-38)

25Meene kaƴi maa ga Iisa torgowɗo, guu giimi maani joboɗɗiya, gaa ribilɗe, ga beneyyiyyoo gaa: 26«Gaa gimu aŋka ga deeɗo jobookatu, aŋka ga ƴekkinno naa ƴiila min oko tatti o yaati, o daatti o rontee, o seneetee ku miɗɗita o ku daatta, o min oko hayaatanti saa kulla. Goneka kee ga deewa ɗa jobookatu. 27Gimu ma ecekka ɗa kuruwati#14.27 Icco ta kuruwayi pa garaa oyyo ta diiganti o ta muuti aleŋ ta Iisa. o ga jobokkano ɗa deewa ɗa jobookatu. 28A gata pa, gaa kaƴi min aattoŋ aŋka geewo ta ger ka talta o ga siƴƴa, ga nowotta ƴa omma ga gemmiɗo baŋ ga gurus minaw ma arakke, gaa elliɗo baŋ ga lekka aɗɗe gurus maani ma gakammeega lubbiti. 29Goneka kee gaa diile geewiti min kiɗaati, gaa alɗiya gaama ɗa girti ka talta o ga siƴƴa, gu giimi paracco ma akkiya ella lubbiti kaaka ma gakamme ɗa akkee noƴƴa pe gaari goo: 30“Elloŋ ƴa, gimu keeke diile geewo, gaa alɗe gederra ɗa soo ga gaamicca.”

31«E baŋ pa gaa sultan kaƴi deeɗikii booka giiti, ga nowotta ƴa omma ga mooyiɗo baŋ ga gederra aɗɗe ga deeɗikii booka ma miɗi orro alpaŋgee, kasiiminti katik ma asee ma miɗi orooruwee seera alpaŋgee. 32A gaa gederra ɗa pa, ga n̰akamme giimi oko sultan katik wikinne maa ga alɗo missa arro ku maa gu taaciɗo. 33Ay goŋŋa appe ga kuŋ kulla, gaa kaƴi min aattoŋ cappiyo ɗa oko gaartee maa ga lekka, ga gederra ɗa ga deeɗo jobookatu.»

Deeme ma gayee ɗa payya maatiki

(Elloŋ Matiye 5.13, Mark 9.50)

34Gaa Iisa beneyyiyyoo payya gaa: «Gata deeme ay maatiki ka daana. A aleŋ gaa belbeluwti oole appe pa, ku leewa pe kuu me maa ga deeɗo payya belbel? 35Gata daa ɗa payya samaane bala ga oko kiɗaati o bala ga diyarre, illa gu soƴaa maaƴi renta. Maa gaa lekka deyya ku giyyiti, ga giyyu samaane!»

Currently Selected:

Lik 14: mmy

Highlight

Copy