Lik 15

Masal ta tamaw ma masile guu gassiyya

(Elloŋ Matiye 18.12-14)

1Meene kaƴi, gu sokookee ku miiri ma gicco daare ma leewa zunubgee aseero paracco gu asiyya kadira Iisa ku maa gu giyiyya beneyti. 2Guu Pariziyennigee ma gicco aalimnigee ku Kitamniti Muusa ŋor̰omr̰omɗo aacco o gu beneyya goo: «Gimu keeke jobay daana giimi ma leewa zunubgee o ga teewa ma guta.»

3Gaa Iisa gemmiyyooca masal teete gaa: 4«Gaa gimu min aattoŋ lekka orooruwee orro tamee gaa kaƴi masilɗe, ga otokkayo ɗa aɗe oko ku orooruwee parnakaƴi o parnakaƴi were ka tawwiti gaa kaatiɗo ga deeɗiya diyya ma masile namma ga gassiyya e? 5Gaa gassiya pa, gii deeɗee daanee. Gaa goyyiya golliltee, 6gaa yookiɗo girti. Gaa yooke girti pa, ga kolay lanjigeetee o bakeetee, gaa beneyyiyyoo gaa: “Asoŋ parhina ma naa, asan na gassiya tamawtu kee ma masile.”» 7Gaa Iisa beneyyiɗe payya gaa: «Naa pa beneyyatoŋ naa: Gaa gimu ma leewa zunubgee kaƴi ka meeliy gaartee ku miɗɗa, gu paracco ma aaye samaani parhanna ta kaw min oko giimi ku orooruwee parnakaƴi o parnakaƴi ma melewwiy paaɗe gaarco ku miɗɗa, guu deeɗe ɗayaŋ unti Mellayi.»

Masal ta tammaye ta poddani ma masile guu gassicca

8Gaa Iisa beneyɗiyo payya ma masal gaa: «Giyyoŋ payya: Gii daate kaƴi lekka tammayigee orro ku poddani, gii tammaye ta kaƴi masilɗe, gi osaa ɗa aɗe okko, gii sawwiyya ger, gii diyyicca ma kertin̰o, namma gi gassicca e? 9Wikinne maa gii gassica pa, gi kolay lanjigeeti o bakeeti, gii beneyyiyyoo gee: “Asoŋ parhina ma naa, asan na gassica tammaytu ta poddani maa na misile.”» 10Gaa Iisa beneyyiɗe payya gaa: «Naa pa beneyyatoŋ naa: Ay goŋŋa appe, gaa gimu ma leewa zunubgee kaƴi ka meeliy gaartee ku miɗɗa, gu malaykatnigeetee Mellayi parhanna.»

Masal ta baaba ma saamayya

11Gaa Iisa gaayiyyooca payya masal teete gaa: «Miiɗi kaƴi aɗe lekka miici seera. 12Gaa ka rootta beneyyiyyee oko tatti gaa: “Baaba, birawca appe haggantu ta malli.” Gaa tacco ɗeddiyooga malliti. 13Gaa meeni minnaw omma ga runti ka rootta giɗikkii malliti paratti maa ga tacco biryee, gaa kaatiɗe darre kaƴi arro ma gurusti kaaka. Gaa iŋaa ga naayikkiki gurusti paratti, gii nuntiti ɗeeɗe pe miɗɗa gonek ka. 14Maa ga niŋgiyya gurusti paratti maa ga lekka, gaa saamuwe un̰n̰iyyee, gii maya asiɗe darre taata. 15Gaa kaatiɗe pe lubbi oko miiɗi kaƴi aɗe ka darre taata. Miiɗi kaaka pa n̰aamiya gaanti tawwiti kinzirnigeyyo#15.15 Milti kinzirnigeyyo keeke ay Yawudince ɗa. Lubbi kaaka pa ay ka jaaliti oko Yawudigeyyo, asan gu hukumnigeetee toɗokkiyo tiyaw ta kinzirnigeyyo.. 16Maa gi maya deeɗiya, gaa aŋkiɗo pe aymo ta dokkirco kinzirnigeyyo kaaka maa gu ayamma. Gaa alɗo lekka ɗa gimu ma beree. 17Gaa nuntiɗe ga moyowɗo gaa: “Lubaakeetee tattu paracco teewa gu ayawɗo, gaa iŋee ga naata matawɗo maya. 18Na yokaa na deeɗiya gassa tattu naa deeɗe beneyya naa: Baaba, na leelo zunubgee oko Mellayi o oko kiita. 19Aɗikinoo lee ɗa payya aleŋ runcum. Leekino pe aleŋ lubaakacum ka.”

20«Gaa waciɗe, ga yokowɗo paaɗe girti tatti. Maa ga alɗo missa arro min giiri, gaa tatti elliyya, gaa elliɗe saamuwti, gaa gaɗɗiɗe joobiti, gaa deeɗiya googa. 21Gaa runti beneyyiyyee gaa: “Baaba, na leelo zunubgee oko Mellayi o oko kiita. Aɗikinoo lee ɗa payya aleŋ runcum.” 22Gaa tatti soopa beneyyiyyoo oko lubaakeetee gaa: “Koɗok, askini kaɗiyyu ka samaane ƴiila, ku issinneega. Issenee kaatumne o n̰uura. 23Askikini koydane ka niirenta. Deeyoŋga kee teeɗine o ke leene laalane, 24asan ga runtu keeke maa naa walaŋ ga maate aseero ma aapiya. Gata masile, naa gassiyya.” Guu diilicca laalane.

25«Oko wikinne kaaka pa, ga runti ka tatta katee maaƴi. Maa ga yokowɗo ga saraɗɗo katta giiri, gaa gewɗo paano o waaro aatti giiri. 26Gaa kolliɗe kaƴi min oko lubaakeetee tatti. Gaa inniyya gaa: “Ay ini me ma deero giiri?” 27Gata pa tiiliyee gaa: “Ay sincum ma aseero min darre ta arro, gaa taccum deeɗiya koydane ka niirenta, asan ga sincum aseero ma aapiya.” 28Gaa runti ka tatta unɗe ma bogor o ga pooce un̰n̰o giiri. Gaa tatti oomiɗe ga malmalɗiya gaa: “Un̰n̰u giiri.” 29Gaa gata pa tiiliyyee oko tatti gaa: “Ellu ƴa, baaba, min tippa na lobokkam aleŋ lubaakacum o na poociya ɗa kaytiŋ kancum maa ki beneyyaw kii na leyya. Soopa oko naa ki biryaw ɗa kaytiŋ miƴƴu ka kulla maa na leeɗo laalane ma lanjigeetaw. 30Gaa maa ga runcum keeke ma niŋgiy lawcam daato asiɗe ki deeɗeega koydane ka niirenta.” 31Gaa tatti pa tiiliyyee gaa: “Runtu, kiita aaye aɗe goŋŋa diiman ma naata o lawwi paracco ma ay kunni ay kuncam. 32Innasoopa, ga aŋka aɗe ke leeɗo laalane, o ke parhinɗo, asan ga sincum maa naa walaŋ ga maate aseero ma aapiya. Gata masile, naa gassiyya.”»

Currently Selected:

Lik 15: mmy

Highlight

Copy