Lik 17

Zunubgee o saamiyo

(Elloŋ Matiye 18.5-7,21-22, Mark 9.42)

1Gaa Iisa beneyyiyyoo oko jobookeetee gaa: «Akka lekekka aɗe goŋŋa diiman gaari ma esekkay giimi zunubgeyyo. A gimu ma ay milco gaari kotti ma esekkay giimi zunubgeyyo soopa, ay gata maa gi diigane ocokkaa. 2Gimu aleŋ kaaka gi samaanee ƴiila gu onniyyee ur̰uuti itira yaata, guu uwwiyya baharriti ga deesiɗo, min maa gi parlanti Mellayi baagiyya oko gaartee maa ga issiyya zunubgeyyo gimu kaƴi min oko giimi ma ay aleŋ miici ku rootta kooko ma dowwiy galbigeeco oko naa. 3Pakarratini oko nuntitoŋ.

«Gaa giicum niŋgiyam ki yookiya min oko miɗɗati taata. Gaa meeliy gaartee kotti pa gaa saamiyiyyam, ki saamiyee. 4Gaa meenti ka ga niŋgiyam kulla paysaratiŋ, gaa kulla niŋgiti aɗe ga asawɗam ga beneyɗam gaa ga meeliy gaartee ku miɗɗa maa ga leewam gaa saamayɗam, ga kiita pa kulla saamayyee.»

Liyaw ta gaari ku ajjibiti ma amanno

(Elloŋ Matiye 17.20)

5Guu n̰amaakeetee Miltine beneyyiyyee goo: «Gaayaniica amannitini gi deeɗo yaata.» 6Gaa gata pa tiiliyyoo gaa: «Gii amannitoŋ rommata aleŋ ronti gandirati ka kulla, ku gederra ku beneyyiyyee oko ettu ka taatta keeke kuu: “Bitu maaƴi min iŋee, kii deeɗo ata baharriti.” Kuu beneyye goŋŋa, ga betekka ga deeɗo ata baharriti.»

Jobookee ay lubaakee ka

7Gaa Iisa beneyyiyyoo payya gaa: «Iccine ƴa masal aleŋ gaa kaƴi min aattoŋ lekka lubaaka ma gawannee e baŋ ga tawakkee, gaa yokowɗo min maaƴi, ga tattuwti beneyye aɗɗe gaa: “Asu koɗok ki asiɗo tee”? 8Kaw. Beneyyee soo gaa: “Leyyaw tiyaw, kii magiɗiy kaɗiŋgeecam ku maa ki lubbiyyaw wikinne maa na tewɗo o maa na ar̰awɗo. Naa gaame pa tiyaw o aar̰o, gaa kii pa teeɗo ka pe o ki ar̰aa.” 9Gata leewee ɗa barkinti oko lubbi maa ga kapakkiyee asan ga lubaaka leyya lubbi maa ga beneyyiyee ka. 10A oko kuŋ kulla, gi goŋŋa appe: Kuu leyya latta paratti maa ga Mella beneyyitoŋ, ku leyyoŋ kuu: “Nii ay lubaakee ka. Ni leelo lubbi maa ki kapakkini ka.”»

Iisa rayyadda majaddimnigee orro

11Mileŋ ga Iisa ecekkiya botol ga katawɗo geegar ka Zerizalem, ga ƴiile ma botol ma petaaca kiɗa ta Samaari ma Galilee. 12Gata ƴa garribe ga un̰n̰iɗo daare kaƴi aɗe, guu majaddimnigee orro aanayɗiya gu asawɗe. Guu warriɗe arro paalta. 13Guu cayyakɗo goo: «Tattuwtini kee Iisa, ellu ɗe saamuwtini.» 14Gaa Iisa elelɗiy, gaa tiiliyyoo gaa: «Aɗoŋ ku deeɗiy gaara zeneetoŋ oko soƴoowee ku saɗikaŋgeyyo.» Gaa oko wikinne maa gu katawɗo kaaka saa, gu rayyidiɗe gu deeɗe samaane unti Mellayi. 15Gaa maa gu elliɗe kadar gu rayyide pa, ga kaƴi min aacco yooke wikirti Iisa o ga logokka Mella ma raɗɗa. 16Gaa asiɗe darsa unti Iisa ga weeciyya unti kiɗaati, gaa leeɗiyee barkinti. Gimu kaaka pa ay min kiɗa ta Samaari. 17Gaa Iisa pa beneyyiɗe pe gaa: «Majaddimnigee kooko orracco ɗa aɗe rayyide gu deeɗe samaane unti Mellayi e? A ku parnakaƴi pa ay ŋa? 18Bala min oko gimu keeke ma ay maaƴu, ga lekka ɗa payya ma mooye ga yookiɗe ga asiyya loga Mella e?» 19Gaa Iisa beneyyiyyee oko maaƴu kaaka gaa: «Mileŋ ki dowwica galbancum oko naa, ki rayyide. Wacu, addo!»

Asawtí mulunniti Mellayi

(Elloŋ Matiye 24.23-28,37-41)

20Guu Pariziyennigee inniyya Iisa goo: «Mulunniti Mellayi asaa ya minke?» Gaa Iisa tiiliyyoo gaa: «Mulunniti Mellayi asaa ɗa pe aleŋ latta maa ku ellaa ma iɗiitoŋ. 21Gimu beneyya ɗa pe gaa: “Elloŋca ay gita aɗe teete” e baŋ pa “gaa ay gita aɗe taata.” A gata pa keeke ku leene kabarre kadar gi mulunniti Mellayi aaye paaɗe aattoŋ.»

22Gaa beneyyiyyoo pe pa oko jobookeetee gaa: «Wikinne akka asa maa ku asiɗo aŋka elliti oko Runti Gimi meene kaƴi ka kulla, innasoopa ku akkiya ella ɗa. 23Giimi akkitoŋ beneyya goo: “Elloŋga iŋaa” e baŋ pa goo: “Elloŋga iŋee!” A kuŋ soopa aɗoŋ kaata ɗa ma guta, o ku aɗoŋ gaɗɗa ɗa ku jobbiɗiy were maa gu katawɗo. 24A gita pa ay aleŋ maa gaa buŋ eln̰e kee aɗe gii bahaaranti icciɗe min iŋee ƴa gonek, gi meene ta asawti oko Runti Gimi min samaani kulla akka dee pe goŋŋa aɗe. 25Innasoopa, aŋka ƴa omma ga Runti Gimi diigiyɗo maani, guu giimi ku haŋka kooko pa poociyya. 26Meene ta asawti oko Runti Gimi kulla akka dee saa aasenta aleŋ gaari ma deero wikinniti Nowe. 27Oko wikinniti Nowe kaaka gu giimi teewa o gu ar̰aa o gu sokokka daati o gu beray ronco gu sokoɗɗiy namma ya meene maa ga Nowe un̰n̰iɗe markaba ta yaata. Guu ammi ku suura beeriɗe, guu teeɗiy giimi paracco#17.27 Elloŋ Diilo ta Lawwi Paracco 6–7.. 28Meene ta asawti oko Runti Gimi pa kulla akka dee payya aleŋ ta wikinniti Lot tee aɗe maa gu giimi tewɗo o gu ar̰aa o gu geɗekka lawwi o gu geɗekkiko lawco, o gu tomokka bizirre o gu gekaa gerra. 29Gaa meene maa ga Lot pa oomiɗe min Sodom, ga Mella n̰aawiyyoo oko giimi ku Sodom okko o kibiritte, gu battiɗe paracco#17.29 Elloŋ Diilo ta Lawwi Paracco 19.24-28.. 30Meene maa ga Runti Gimi asiɗo gaara ziiti kulla akka dee pe aleŋ taata aɗe.

31«Oko meene taata, gaa gimu nabakka renta, ga addo un̰n̰a ɗa ɗakko ga deeɗiy sokka lawtee, o gimu ma aaye maaƴi kulla ga addo yooka ɗa girti. 32Mooyoŋgu ƴa gaari ma asiti oko daatti Lot#17.32 Elloŋ Diilo ta Lawwi Paracco 19.26.. 33Gimu ma deyekka najjiytí hayaatanti mesellaca, a ma mesellaca soopa najjayyaca. 34Na beneyyatoŋ ƴa! Oko aandoŋ kee ka asawti Runti Gimi keeke aɗe, guu giimi seera oƴee daŋgili kaƴi ka, ga ka kaƴi ƴa gu ecekkaa o ka kaƴi pa gu merekkaa. 35A guu daati seera ayakka korƴo sawa, gi ta kaƴi ƴa gu ecekkaca o ta kaƴi pa gu merekkaca. 36A guu miɗi seera aaye gaan kaƴi, ga ka kaƴi ɗe gu ecekka o ka kaƴi pa marakka.» 37Guu jobookeetee Iisa inniyya goo: «Miltini, gaari kooko akka dee taŋaa?» Gaa Iisa pa tiiliyyoo gaa: «Were maa ga rimmane alɗo, ay kaaka appe kulla ay were maa gu unce bereɗɗo maani.»

Currently Selected:

Lik 17: mmy

Highlight

Copy