Lik 18

Masal ta kur̰aar̰ati ma caɗaawa ka parlanti

1Gaa Iisa beneyyiyyooca payya masal teete oko jobookeetee ku maa ga gaariyyo kadar gu enewwu Mella diiman, gu zeneeco aɗiy kalla ɗa. 2Gaa beneyyiyyoo gaa: «Lekka aatti geegar kaƴi aɗe, miiɗi ma ay caɗaawa ka parlanti. Gata pa ɓayakka ɗa Mella o gi tapakkiya ɗa ma ka giimo o ga leewa latta maa ga aŋka ka. 3Gii lekkiɗo kulla aatti geegar kaaka, kur̰aar̰a ma asee kulla meene gi gasaɗɗiya gii beneyɗee gee: “Ban̰n̰u, caaɗani ɗe cur parlane, lekka gimu ma dowwaw ɗa.” 4Gaa domoɗɗe paaɗe maa ga pocowɗo, gaa mooyiɗe soopa ma galbanti ka gaa: “Ay seene appe na ɓayakka ɗa Mella o gi tapakkino ɗa ma ka giimo o na leewa latta maa na aŋka ka, 5innasoopa, mileŋ gi daate teete koddoyyiyaw pile, na caɗaayooca cur parlanco teete ku maa gi duwiyyaw ƴa paaɗe na nambiɗo.”» 6Gaa Miltine kee Iisa beneyyiɗe payya gaa: «Giyyoŋga ƴa beneyti oko caɗaawa ka parlanti ma leewa ɗa gaari ma butulco! 7A ku leewe kuu walaŋ ga Mella mogay ɗa gimtee maa ga aparre ma ereccee paato o aandoŋ e? Gata domokka ɗa, gaa moogiɗiy. 8Na beneyyatoŋ ƴa: Gata mogay koɗok. A gaa Runti Gimi pa ase asa, ga akka gassa giimi kiɗaati ma dowwiy galbigeeco oko gata e?»

Masal ta Pariziyennice ma sokooka ka miiri

9Gaa Iisa beneyyiyyooca kulla masal teete oko giimi daare ma leewe goo gu ɗayaŋ unti Mellayi, o gu bakammiko ɗa gicco daare gaa: 10«Lekka miɗi seera ma kaate girti Mellayi ku maa gu deeɗo inna Mella. Ka kaƴi ƴa ay Pariziyennice, ka kaƴi pa ay min oko sokookee ku miiri. 11Gaa ku ma ay Pariziyennice ma warriti ka enewɗiya Mella ta kayaati ka gaa: “Mella Miltu, na leewam barkincum maa na alɗo ɗa aleŋ giimi daare ma ay marŋi o maa gu gaarco miɗɗa o ma on̰aa daacco gicco, e baŋ pa, aleŋ gimu keeke ma sokokka miiri. 12Naa samkayya seertiŋ doorati o lawwi paracco maa na gasakka na ɗedekkay durgee orro, gaa durgu ka kaƴi na biriyyamga.” 13A gimu ma sokokka miiri soopa waraɗɗe jeres o kayaati kulla ga aŋka ɗa ga cipilicca uwwa. Gaa bakamɗica soo galbanti o ga beneyya kiɗaati ka gaa: “Mella Miltu, ellu saamuwtu, naa ay gimu ma leewa zunubgee.”» 14Gaa Iisa beneyyiyyoo gaa: «Giyyoŋ ƴa! Na beneyyatoŋ: Gimu keeke yokaa girti ɗayaŋ unti Mellayi. A Pariziyennice kaaka soopa ga Mella lewki ɗa ɗayaŋ unti, asan ga kulla gimu aɗe ma cepellaca kayaati ga Mella koyaa, o ma koyaa ziiti pa ga Mella cepellaa.»

Iisa baarakkay miici

(Elloŋ Matiye 19.13-15, Mark 10.13-16)

15Guu giimi itiriyyee oko Iisa miici ku rootta goo ga gagiyoogu pittee kayyeeco ga baarikiɗiy. Maa gu jobookeetee Iisa soopa elliyya liyawco giimo kaaka, guu makkiyyo oko giimo. 16Gaa Iisa pa beneyyiyyoo oko miico gaa gu saapu katta. Gaa beneyyiyyoo oko jobookeetee gaa: «Duwaaniyo oko miico gu asiyyaw! Aɗaaniyo toɗɗa ɗa asan gi mulunniti Mellayi ay oko giimi ma ay aleŋ guta. 17Na beneyyatoŋca seene: Gimu ma oyaaca ɗa mulunniti Mellayi aleŋ miica ka rootta, akka un̰n̰a ɗa ta kaw mulunniti.»

Ayaawa kaƴi enaa Iisa

(Elloŋ Matiye 19.16-30, Mark 10.17-31)

18Gaa tattuwco Yawudigeyyo kaƴi aɗe inniyya Iisa gaa: «Garaawa ka gidaani, na lee pe naa me ku maa na gassicca hayaatane ma gakamma ɗa ta kaw?» 19Gaa Iisa pa tiiliyyee gaa: «Ayme ki kolowɗino kii na gidaani? Lekka ɗa gimu ka gidaani, illa ay Mella kayti ka. 20Ki ibiniy paaɗe hukumnigee maa goo: “Ga miiɗi addo un̰n̰a ɗa oko daatti giiti o daate pa kulla gi addo issa ɗa mitti gattí. Addo dee ɗa gimu ma aaniyo. Addo maasa ɗa. Arki arɗa ɗa giicum ma borooli. Cipiliy semeetee taccum o ku yaacum#18.20 Elloŋ Oomiti min Masir 20.12-16..”» 21Gaa tattuwe kaaka beneyyiyyee oko Iisa gaa: «Hukumnigee kooko na jobokkiy min ɗibiluwtu.» 22Maa ga Iisa giyiyya beneyti kaaka, gaa beneyyiyyee gaa: «Koyowwiyam missa maatiki kaƴi: Addo ki deeɗiko giɗa lawcam paracco, kii eddiyyooga gurus kaaka oko giimi ku saamo. Goŋŋa, ga Mella beram ayaawi gonek samaani. Kii yookiɗo ki asinno jobba.» 23Maa ga giyyiya beneyti Iisa kaaka pa, gaa zorontiyɗe ta tirta, asan ga ay ayaawa ta kaw. 24Maa ga Iisa elliyya ga zorontiye pa, gaa beneyyiyyee gaa: «Ayaawee gi raɗɗayo ta tirta gu un̰n̰iɗo mulunniti Mellayi. 25Oko lukumi gi raɗɗee ta tirta ga ɗaamiɗo ma buuliti ƴibirri. Oko ayaawayyi soopa gi raɗɗee payya ƴiila ga un̰n̰iɗo mulunniti Mellayi.»

26Guu giimi kotti ma geewaa beneyti Iisa beneyyiyyee goo: «A gaa goŋŋa, ga ay we pe ma gederra ga deeɗo najjiyenta?» 27Gaa Iisa tiiliyyoo gaa: «Latta maa gu giimi gederree ɗa ta kaw, raɗɗee ɗa oko Mellayi.» 28Gaa Piyer beneyyiyyee oko Iisa gaa: «A nii keeke pa, ma cappiyoo oko lawtini paracco nii jobbiɗum?» 29Gaa Iisa tiiliyyoo gaa: «Na beneyyatoŋca seene: Gaa gimu cappiyee oko girti o oko daatti o oko seneetee o oko gayyeetee o oko rontee saanantí mulunniti Mellayi, 30ga gasakka oko dunuune ta haŋka teete maani ƴiila payya min oko maa ga cappiyoo. Gaa oko dunuune ma akka asa pa ga asiɗo gassa hayaatane ma gakamma ɗa ta kaw.»

Taasiti Iisa ma daa ta subbatiŋ ma ka muutti o ka naɗawti

(Elloŋ Matiye 20.17-19, Mark 10.32-34)

31Gaa Iisa kaatikko jobookeetee ku orro o seera jeres min oko giimi ku maani, gaa beneyyiyyoo gaa: «Giyyoŋ ƴa! Haŋka ke kataa geegar ka Zerizalem, iŋaa pa gu gaari paracco maa gu nabiinigee ketepeyye ma gaartee oko Runti Gimi deeɗo gaama. 32A gata pa Runti Gimi, gu deeɗiya bira oko giimi ma ay Yawudigee ɗa. Guta kotti pa deeɗee noƴƴa gaari o gu n̰elekkaa o gu pesekkee olo. 33Guu r̰occiyya, guu deeɗiya. Gaa oko meene ma daa ta subba pa ga naɗiɗo min muuti.» 34Guu jobookeetee soopa alɗiya ibina ɗa butulti beneyti keeke. Aatti beneyti Iisa deyyo kiilenta, guu alɗiya ibina ɗa baŋ ga beneyya ma ini me gaarta.

Iisa rayyadda koor̰ kaƴi

(Elloŋ Matiye 20.29-34, Mark 10.46-52)

35Gaa Iisa icciyya botol ga katawɗo geegar ka Zerikko. Maa gu garribiɗe, gaa lekkiɗo koor̰ kaƴi ma nowotte biiti butuuli ga ŋarayɗo. 36Maa ga giyyicca hawwanco giimi ku tuyyuk kotti ma ƴelaa, gaa inniɗe gaa: «Ay ini we kotti?» 37Guu giimi tiiliyyee goo: «Ay Iisa ka geegar ka Nazaret ma ƴelaa ma iŋaa.» 38Maa ga giyyiyya beneyco giimo kaaka, gaa cayyikiɗe gaa: «Iisa, Runti Dawud, ellu ɗe saamuwtu!» 39Guu giimi ma tan̰aa omma unti Iisa makaɗɗe goo ga ƴaapu. Gata pa cayyakka saa pe ta ƴiila gaa: «Kii Runti Dawud, ellu ɗe saamuwtu!» 40Gaa Iisa warriɗe. Gaa beneyyiyyoo oko giimi kotti ma jobokka gaa: «Itirnawga gimu kaaka.» Maa gu itiriyyeega saripti pa, gaa inniyya gaa: 41«Ki aŋka na leeɗam ini me?» Gaa gata pa tiiliyyee gaa: «Miltu, iyyino na elelɗo payya aleŋ tee ta heeta tee aɗe.» 42Gaa Iisa beneyyiyyee gaa: «Gu iɗiicam iyyu. Mileŋ ki dowwica galbancum oko naa, ki rayyide.» 43Gaa oko wikinne kaaka saa gu iɗiitee iyyiɗe ga elelɗo. Gaa jobbiyya Iisa o ga logiya Mella. Guu giimi ku maani kotti ma elliy gaari ma deero kooko, logiyya kulla Mella.

Currently Selected:

Lik 18: mmy

Highlight

Copy