Yaaya 19

1Gaa Pilat yookiɗe ɗakko wikirti ka mulunniti, gaa beneyyiyyoo oko asaakargeyyo gaa gu baamiya Iisa gu r̰occiyya ma morgooye. 2Guu paariɗe jiɗimo ta ejjemmo, guu issiyyeeca kayaati, o gu issiyee kulla kaɗubunne binta aleŋ ta sultanni. 3Guu asawɗe katta gu noƴoɗɗe gaari goo: «Iŋŋe sultanco Yawudigeyyo!» Guu ɗacaɗɗiya.

4Gaa Pilat oomiɗe payya min wikirti ka mulunniti, gaa deeɗiyo beneyya oko Yawudigeyyo gaa: «Giyyoŋ! Na deeɗitoŋga cimma Iisa renta min wikirtu ka mulunniti asan ku leeɗo kabarre kadar na gassiyee ɗa er̰n̰e maa na n̰aamiyya muuti.» 5Gaa Iisa oomiɗe renta ma jiɗimiti ta ejjemmo tee kayaati, o ma kaɗubunniti ta binta tun̰ tee maa gu esekkiyee. Gaa Pilat beneyyiyyoo gaa: «Ay gata appe keeke!» 6Gaa maa gu taattuweeco soƴoowee ku saɗikaŋgeyyo o taraakee elliyya, guu waciɗe hawwanti goo: «Paapiya kuruwayi! Paapiya kuruwayi!» Gaa Pilat tiiliyyoo gaa: «Aɗoŋ ga kuŋ saa deeɗiya paapa. Naa gassiyee ɗa er̰n̰e ku maa na n̰aamiyya muuti.» 7Guu taattuweeco Yawudigeyyo tiiliyyee goo: «Ni lekke hukumnigee#19.7 Hukumnigee kooko ma goo ga gimu ma n̰elekka Mella illa ay diyawti, aaye Kitamniti Mellayi. Elloŋ Soƴoowee ku Saɗikaŋgeyyo 24.16.. A hukumnigeetini kotti pa illa ga mataa, asan ga beneyye gaa ga ay Runti Mellayi.»

8Gaa oko beneyco kaaka ga Pilat ɓayɗe ta ƴiila payya. 9Gaa un̰n̰iɗe wikirti ka mulunniti ma giiti Iisa, gaa inniyya gaa: «Ki ay ka taŋaa?» Gaa Iisa pa alɗiyee tiila ɗa. 10Gaa Pilat leeɗiyee gaa: «Ki telaw ɗa e? Ki lekka ɗa kabarre kadar na lekka gudirane maa na uttiyyam e baŋ pa na paapiɗum kuruwayi e?» 11Gaa Iisa tiiliyyee gaa: «Ki lekka ɗa ya gudirane kaƴi bala min oko maa ga Mella berewwiyam teete. Ay ɗakko appe na lewɗo naa ga gimu ma askino wikircum gi miɗɗati yaata ƴiila min oko tancum.»

Pilat beraa Iisa gu deeɗiya paapa

12Gaa min oko beneyyi kaaka, ga Pilat deyeɗɗo pe botol ku maa ga cappiyyee. Guu taattuweeco Yawudigeyyo soopa hawwayɗo kanco missa, o gu beneyya goo: «Kii cappiyee, ki ay lanjinti ɗa oko tattuwe ka tatta ka Rooma kee Seezar. Gimu maa gaa beneyye pa gaa ga ay sultan, deewa kasiiminti Seezar.» 13Gaa maa ga Pilat giyyiyya beneyco kaaka, gaa cimmiyya Iisa renta, gaa Pilat asiɗe nunta wikirti ka caaɗiti parlanti maa gu kolaa goo doorane ta geewenta ma dambee, ma beneyco Ebireenigeyyo pa, gu kolaa goo Gabatta. 14Gaa ma meene ta hassiltí laalane ta Pakti#19.14 Ay oko wikinne kaaka appe, guu Yawudigee diiliɗe gu daɓasayɗo tamee ku saɗikanti., ma gidaane ka gaayilti, gaa Pilat beneyyiyyoo oko Yawudigeyyo gaa: «Ay gata appe keeke ga sultantoŋ!»

15Guu waciɗe hawwanti goo: «Deyya! Deyya! Paapiya kuruwayi!» Gaa Pilat soopa leeɗiyoo gaa: «Ku aŋka ga sultantoŋ na paapiyya kuruwayi e?» Guu taattuweeco soƴoowee ku saɗikaŋgeyyo tiiliyyee goo: «Nii, ga sultantini ay Seezar ka.» 16Gaa Pilat oyyicca innico taattuweeco Yawudigeyyo, gaa biriyyooga Iisa oko asaakargee ku Rooma gu deeɗiya paapa.

Asaakargee papaa Iisa kuruwayi

(Elloŋ Matiye 27.32-44, Mark 15.21-32, Lik 23.26-43)

17Gaa Iisa goyyiyya kuruwati maa gu deeɗiya paapa ga gata milco saa. Guu oomiɗe min geegarri, guu jeepiɗe ta were kaƴi aɗe maa gu kolaa goo ‘Gugur̰uti Kayaati’#19.17 Jappe taata gu kolaaca goo Gugur̰uti Kayaati, asan gi saabayye gugur̰u ka kayaati gimi.. Ma beneyco Ebireenigeyyo pa, goo Golgota. 18Ay iŋaa appe gu asaakargee paapiyya Iisa kuruwayi. Guu paapiɗe kulla giimi seera saripti. Kaƴi ma kuruwati nussane ka tiyaawati, o kaƴi ma kuruwati nussane ka n̰ugilati. Iisa pa aaye ɗaɗɗakko ma kuruwati.

19Gaa Pilat kitipiyɗe oko ettu ka sacenta ɓeterter gaa: Iisa ka Nazaret, Sultanco Yawudigeyyo. Guu atiyya kayaati kuruwa maa gu papawɗiya Iisa. 20Were maa gu paapiyya kaaka pa, aaye katta ka min geegar ka Zerizalem. Guu Yawudigee maani garkayɗica pe kitipiyo taata. Guta pa ketepeyye ma beneyyiŋgee ku subba kooko: ma ka Ebireenigeyyo, o ma ka Roomennigeyyo, o ma ka Gireknigeyyo. 21Guu taattuweeco soƴoowee ku saɗikaŋgeyyo beneyyiyyee oko Pilat goo: «Ayme ki kitipiyɗe kuruwayi kii: Sultanco Yawudigeyyo? Kitipiyu soo kii ga beneyye gaa ga ay sultanco Yawudigeyyo.» 22Gaa tiiliyyoo gaa: «Maa na kitipiye keeke, na kitipiyya ka.»

23Maa gu asaakargee paapiyya Iisa pa, gu icciy kaɗiŋgeetee guu ɗeddiɗiy durgee pooɗi, kulla askar kaƴi aɗe ecekka durgu kaƴi, o gu icciya kulla kaɗiyyiti. Gata pa ƴimmenta ɗa, ɗoosenta min uwwa ya kiɗaati. 24Guu boodiɗe goo: «Anneega erra ɗa, leene soo jollo jollo, ku maa ke ibinɗo baŋ ga galee oko we.» Ay goŋŋa appe ga beneyti Kitamniti Mellayi asiɗo butulti. Gita pa beneyye gee: «Eddiy kaɗiŋgeetaw, o gu leelo jollo jollo baŋ ga durup galee oko we ga icciyya kaɗiyyitu#19.24 Elloŋ Soom 22.19..» Ay keeke appe ay latta maa gu asaakargee leelo.

25Saripti kuruwa maa gu papawɗiya Iisa pa, gi yaati tee Mariyam ma suttí, o daatti Keleyopas maa goo Mariyam, o Mariyam ta Magdala waraɗɗe katta. 26Gaa Iisa ellicca yaati, gaa elliyya jobookati maa ga ƴekka#19.26 Were keeke pa maa ga Yaaya beneyya ma gaartee jobooka maa ga Iisa ƴekka, gaa beneyya ma gaari ku kayaati saa., gaa aaye sariptí yaati, gaa beneyyitti gaa: «Iya, keeke ay runte.» 27Gaa beneyyiyyee oko jobookati gaa: «Teete ay yaacum.» Ay min oko wikinne kaaka appe ga jobookati paricca yaati Iisa ma gata.

Muutti Iisa

(Elloŋ Matiye 27.45-56, Mark 15.33-41, Lik 23.44-49)

28Maa ga keeke deeɗe, gaa Iisa leeɗe kabarre kadar gu gaari gaame paaɗe. Gaa ku maa ga beneyyi ka kitipiyenta Kitamniti Mellayi asiɗo butulti pa, ga beneyye gaa: «Ibini daano#19.28 Elloŋ Soom 69.22..» 29Were kaaka pa, gu ɗepee ɓargutum unenta ma mirmi ku saɗamta. Guu asaakargee icciɗe latta kaƴi aɗe ma ay aleŋ n̰iriye, guu deeɗiya luƴƴa aacco mirmi kotti, guu isiriyya linƴe maa gu caɗee min ettu maa gu kolaa goo izoop, guu n̰aamiyyeega biiti Iisa. 30Gaa maa ga miƴirɗe, gaa beneyyiɗe gaa: «Gaari paracco ase butulco!» Gaa zawwicca kayaati, gaa jootiɗe.

31Gita pa meene taata ay jimiine, meene ta hassiltí meene ta nambiti. Ay ɗakko appe gu taattuweeco Yawudigeyyo alɗo aŋka ɗa gu zeneeco giimi ku mattenta nuntiɗo paapenta kuruwanigeyyo#19.31 Ma meene ta nambiti, gi Kitamniti Muusa toɗokkiyo gee gu aɗaayo dowwa ɗa oko giimi ku paapenta gu walaɗɗo paapenta. Elloŋ Ɗillico Hukumnigeyyo 21. 22, 23.. Meene ta nambiti taata pa, ay meene ta laalane ta Pakti. Oko guta pa, gi ay meene maa gu bakammikiti ta kaw. Guu deeɗiya inna Pilat goo ga ɗimmayoogu asinco gu mattiɗo koɗok, gaa keƴiɗiy#19.31 Ɗimmo ta asinco taata pa, toɗokkayo naaso, guu mattiɗo saa pe koɗokka ka.. 32Guu asaakargee deeɗeegu ɗimma asintee oko gimu ka kaƴi maa gu paape saripti Iisa, guu deeɗeegu ɗimma kulla koo ku giiti. 33Gaa maa gu asiyyee oko Iisa, guu elliyya kadar ga maate paaɗe. Ay ɗakko appe gu alɗeegu ɗimma ɗa kuntee. 34Gaa kaƴi min oko asaakargeyyo, waaciyya saripti ma jollo. Guu baara o ammi oomiɗe. 35Gimu ma gemmiy gaari kooko pa, ga beneyti ay seene asan ga elliy saa ma iɗiitee. Gata lekka kabarre kadar ga beneyti ay seene, asan ga ma beneyti kaaka, ga kuŋ kulla amanniɗo. 36Gaari kooko pa aseero ku maa ga beneyti Kitamniti Mellayi asiɗo butulti. Gita pa beneyye gee: «Ya assiti kaƴi gu ɗekemma ɗa#19.36 Elloŋ Oomiti min Masir 12.46 o Soom 34.21..» 37Gita beneyye kulla gee: «Akka ribila gu elelɗiya gata kee maa gu waace#19.37 Elloŋ Zakariya 12.10..»

Yuusup o Nikodem esekkaa ziiti Iisa aattí mooniti

(Elloŋ Matiye 27.57-61, Mark 15.42-47, Lik 23.50-56)

38Maa gu gaari kooko ƴiiliɗe, gaa Yuusup ka geegar ka Arimatee kaatiɗe ga deeɗiya inna Pilat gaa ga bireega ziiti Iisa ga deeɗiya issa mooniti. Yuusup pa, ay jobookati Iisa aɗe ma ƴaapo ka, asan ga ɓayakka taattuweeco Yawudigeyyo. Maa ga Pilat oyyiyee, guu kaatiɗe ga deeɗiya beera. 39Miiɗi maa gu semeetee goo Nikodem kee ma deyya gassa Iisa meene kaƴi ma aandoŋ kulla kaate ma Yuusup, o ga golomme itir maa gu leewe ma appo amsenta ma sewen maa gu kolaa goo alowe. Suuruwti pa ay orooruwee subba kilo. 40Guu serco gu icciyya ziiti Iisa gu kappiniyya o gu kokkiƴiyee itir gata kee aleŋ ta aadaŋgeeco Yawudigeyyo. 41Katta min were maa gu paapiyya Iisa kaaka pa, lekka jineene. Ay iŋaa appe maa gi lekkiɗo moone ta Yawudigeyyo marawta maa gu esekkiti ɗa missa gimu kaytiŋ#19.41 Miltí mooniti pa, ay Yuusup ka Arimatee. Elloŋ Matiye 27.60.. 42A mileŋ gi meene taata ay meenco Yawudigeyyo maa gu hassalɗica meene ta nambiti o gi moone kulla aaye katta ka pa, ay ɗakko appe ga Yuusup ma giiti Nikodem deeɗiya issa ziiti Iisa aattí moone taata. Guu ubiyya biití ma gur̰bu.

Currently Selected:

Yaaya 19: mmy

Highlight

Copy