Yaaya 18

Baamiti Iisa

(Elloŋ Matiye 26.47-56, Mark 14.43-50, Lik 22.47-53)

1Maa ga Iisa gaamicca inniti taata, gaa waciɗe ma jobookeetee gu kaatiɗe gu deeɗica tappa ƴiiro maa gu kolaa goo Sediron. Iŋaa pa lekka jineene. Gaa deeɗe un̰n̰a ma jobookeetee. 2Were kaaka pa, ga Yudas kee ma akkiya bira Iisa picco giimo ibinya samaane, asan ga Iisa ma jobookeetee kataa diiman ka iŋaa. 3Ay ɗakko appe ga Yudas ommiyyoo oko asaakargee ku Rooma o taraakee ku girti Mellayi maa gu taattuweeco soƴoowee ku saɗikaŋgeyyo o Pariziyennigee n̰akamme. Gaa kaatikkiko jineeniti o gu bamakke picco ayyayyi rootta maa gu osokke o lampiŋgee o seepigee.

4Iisa pa lekkiyo aɗe kabarre oko gaari ma asee. Gaa katawɗiyo. Gaa inniɗiy gaa: «Ku deyekka we?» 5Guta pa leyyee goo: «Ni deyekka Iisa ka geegar ka Nazaret.» Gata pa leyyo gaa: «Ay naa keeke appe.» Yudas pa kulla, ma beraayooga picco, aaye ma asaakargee kotti iŋaa aɗe. 6Gaa maa ga Iisa leeɗiyo gaa: «Ay naa keeke appe.» Kaaka pa gi asiyo ƴa gu dardirɗe sulaayi gu solliɗe. 7Gaa inniɗiy payya gaa: «Ku deyekka we?» Guu tiiliyyee goo: «Ni deyekka Iisa ka Nazaret.» 8Gaa Iisa beneyyiyyoo gaa: «Na leetoŋ appe naa ga ay naa. Mileŋ ga ay naa appe maa ku deyekka pa, ku duwaaniyo oko gittaw gu kaatiɗo.» 9Ay goŋŋa appe ga beneyti Iisa maa ga beneyye asiɗo butulti. Gata pa beneyye gaa: «Baaba, na misile ɗa ya kaƴi min oko giimi maa ki berewwiyaw#18.9 Elloŋ Yaaya 17.12..»

10Simo Piyer pa lekka seepane, gaa jooticca min girtí, gaa uppiyya lubaakati tattuwco oko taattuweeco soƴoowee ku saɗikaŋgeyyo, gaa reepiyyeeca diiti ta tiyaawa. Lubaaka kaaka pa gu semeetee goo Malkus. 11Gaa Iisa pa beneyyiyyee oko Piyer gaa: «Issica seepancum girtí. Ki leewe kii walaŋ na oyowwica ɗa diigane maa ga Mella Baaba oyee na diigiyɗo e?»

Asaakargee katawki Iisa wikirti Aan

(Elloŋ Matiye 26.57-58, Mark 14.53-54, Lik 22.54)

12Guu asaakargee ku Rooma ma tattuwco, o taraakee ku girti Mellayi maa gu taattuweeco Yawudigeyyo n̰akamme baamiyya Iisa, gu onniyya. 13Guu kaatikkiki ƴa omma wikirti Aan#18.13 Tippa ga Aan deero kulla tattuwe ka tatta ka saɗikaŋgeyyo. Oko ƴila taata soopa, ga ay Kayip. aydinti Kayip. Oko ƴila taata pa, ga Kayip ay gata appe ma ay tattuwco oko taattuweeco soƴoowee ku saɗikaŋgeyyo. 14Ay gata kaaka appe ma beneyyiyoo saa min omma oko taattuweeco Yawudigeyyo gaa gi samaane ga gimu kaƴi ka maatiɗo gaddanco oko giimi paracco#18.14 Elloŋ Yaaya 11.50..

Piyer melaa gaa ga ay jobookati Iisa ɗa

(Elloŋ Matiye 26.69-70, Mark 14.66-68, Lik 22.55-57)

15Gaa Simo Piyer ma jobooka kaƴi jobbiyya Iisa. Gata pa jobooka ka kaƴi kaaka, ga tattuwco oko taattuweeco soƴoowee ku saɗikaŋgeyyo ibinya aɗe. Ay ɗakko appe, ga un̰n̰iɗe ɗakko kaariti tattuwwi sawa ma Iisa. 16Piyer soopa, nunte renta ka biití burgutti. Gaa giiti ma un̰n̰e gata kaaka maa ga tattuwco oko taattuweeco soƴoowee ku saɗikaŋgeyyo ibinya, oomiɗe ga asicca inna taraaká ta biití burgutti, gii oyyiyee ga issiyya Piyer ɗakko. 17Gaa oko wikinne maa ga Piyer on̰owɗo kaaka pa, gi taraaká inniya gee: «Kii kulla ay min oko jobookeetee gimu keeke e?» Gaa gata pa tiilitti gaa: «Kaw! Naa ay min oko guta ɗa.» 18Guu lubaakee o taraakee zegewɗe pe okko gu ƴerewɗo, asan ga ussu detta. Gaa Piyer kulla kaatiɗe ma guta ga ƴerewɗo.

Tattuwe ka tatta ma soƴaa saɗikaŋgee enaa Iisa

(Elloŋ Matiye 26.59-66, Mark 14.55-64, Lik 22.66-71)

19Gaa tattuwco oko taattuweeco soƴoowee ku saɗikaŋgeyyo diiliɗe ga enewɗiya Iisa ma gaarco jobookeetee o ma gaari maa ga garaa. 20Gaa Iisa tiiliyyee gaa: «Naa beneyya saa diiman purta unco giimi paracco o na gaariya beneyti Mellayi oko gerratine ku giraaniti o dooranti girti Mellayi kulla maa gu Yawudigee paracco temeɗɗo. Na beneyye ɗa kaytiŋ ma kiilo. 21A ayme ki enewɗino? Inniy giimi ma giyyinoo baŋ na beneyye naa me? Guta ibinya appe beneytu maa na beneyyiyoo.» 22Maa ga Iisa beneyyiɗe goŋŋa, gaa taraaka kaƴi ka girti Mellayi ma waraɗɗe saripti ɗaaciyya gaa beneyyiyyee gaa: «Ay oko tattuwco oko taattuweeco soƴoowee ku saɗikaŋgeyyo ɗa ki telee goŋŋa aɗe?» 23Gaa Iisa beneyyiyyee gaa: «Gaa beneytu keeke miɗɗa, ki gaarawga ƴa miɗɗuwti. A gaa samaane aɗe pa, ayme ki ɗacawɗino?» 24Gaa Aan n̰aamiyya Iisa ma onniti wikirti Kayip ma ay tattuwco oko taattuweeco soƴoowee ku saɗikaŋgeyyo.

Piyer melaa payya gaa ga ibinya ɗa Iisa

(Elloŋ Matiye 26.71-75, Mark 14.69-72, Lik 22.58-62)

25Oko wikinne kaaka pa, ga Simo Piyer nowotte kanti missa ga ƴerewɗo okko. Guu giimi daare inniyya goo: «Kii kulla ma seene ay kaƴi aɗe min oko jobookeetee Iisa e?» Gaa Piyer meeliɗe gaa: «Kaw, naa ay min oko jobookeetee ɗa.» 26Gaa kaƴi min aacco oko lubaakeetee tattuwco oko taattuweeco soƴoowee ku saɗikaŋgeyyo maa gi balco alɗo kaƴi ma lubaaka ka omma maa ga Piyer reepeeca diiti kee, beneyyiyyee oko Piyer gaa: «Ay kii ɗa aɗe maa na elle kee jineeniti ma Iisa e?» 27Gaa Piyer meeliɗe payya gaa: «Kaw, ay naata ɗa.» Gaa oko wikinne kaaka saa ga kokkor bookiɗe.

Iisa unti Pilat

(Elloŋ Matiye 27.1-2,11-14, Mark 15.1-5, Lik 23.1-5)

28Gaa ƴekker ka ta sossokonta, gu giimi ƴiilikkiki Iisa min wikirti Kayip, guu asaakargee kaatikkiki were ka mulunniti guberner maa gi hakuuma ta Rooma n̰akamme hikimiyti iŋaa kiɗa ta Yudee. Guu taattuweeco Yawudigeyyo soopa alɗe un̰n̰a ɗa ɗakko wikirti ka mulunniti ku maa gu alɗo dee ɗa naŋgenta unti Mellayi o ku maa gu gederriɗo gu deeɗo tee tiyaw ta laalane ta Pakti#18.28 Yawudigee on̰aa ɗa gerraco giimi ma ay Yawudigee ɗa, asan gu deewa miɗɗa unti Mellayi guu un̰n̰e.. 29Ay ɗakko appe ga guberner kee Pilat oomiyyoo renta min wikirti ka mulunniti, gaa asiɗiy inna gaa: «Ay me gaarta ku miɗɗa maa ga gimu keeke leelo?» 30Guta pa tiiliyee goo: «Gaa gimu keeke leewe ɗa miɗɗa, bala ni eterramga ɗe.» 31Gaa Pilat leeɗiyoo gaa: «Aɗikinii ku deeɗee caaɗa parlane ga kuŋ melleeco, aleŋ ta hukumnigeetoŋ.» Guu Yawudigee tiiliyyee goo: «Hakuuma ta Rooma oyaani ɗa ni deeɗo gimu.» 32Ay goŋŋa appe ga beneyti Iisa maa ga garee min omma, baŋ ga mutti akka dee gaa me, asiɗo butulti#18.32 Yawudigee moyaa ma ka diyawco giimo ma paapo etteyyo, aleŋ maa gu Roomennigee leewa. Elloŋ Yaaya 12.32-33 o Lubaakico N̰amaakeetee Iisa Masi 2.23..

33Gaa Pilat yookiɗe payya ɗakko wikirti ka mulunniti ga deeɗiya joora Iisa, gaa inniyya gaa: «Kii ay sultanco Yawudigeyyo e?» 34Gaa Iisa tiiliyyee gaa: «Ayme ki enewɗino goŋŋa? Beneyyi keeke okomma min oko kii ka e, e gu ay giimi daare ma beneyyiyam gaartaw?» 35Gaa Pilat tiiliyyee gaa: «A naa pa ay Yawudince e? Guta ay gimcam o taattuweeco soƴoowee ku saɗikaŋgeyyo ma birum oko naa. Kii leelo ini me?» 36Gaa Iisa tiiliyyee gaa: «Mulunnitu ay ta dunuune teete ɗa. Gii alɗo ta dunuune teete, na lekekka aɗe lubaakee ma bokaa asan gu alɗino baama ɗa gu kaatikkinoo oko taattuweeco Yawudigeyyo. Naa soopa, gi mulunnitu ay ta dunuune teete ɗa.» 37Gaa Pilat leeɗiyee gaa: «A gaa ay goŋŋa, ki ay sultan caŋ e?» Gaa Iisa leeɗiyee gaa: «Aleŋ maa ki beneyye keeke appe, naa ay sultan. Naa gu weenoo o na ase dunuune teete ku maa na asicca gaara seene. Gimu ma aaye seeniti pa geewaa beneytu.» 38Gaa Pilat inniyya Iisa gaa: «A seene pa ay ini me?»

Tattuwe kee Pilat beraa Iisa paapiti

(Elloŋ Matiye 27.15-31, Mark 15.6-20, Lik 23.13-25)

Gaa min iŋaa, ga Pilat oomiɗe min wikirti ka mulunniti, gaa deeɗiy gassa Yawudigee ma asaawiki guta Iisa, gaa inniɗiy gaa: «Na gassiyee ɗa er̰n̰e oko gimu keeke maa na n̰aamiyya muuti. 39Aleŋ ta aadantoŋ tee aɗe ma wikinne ka laalane ta Pakti, na capakkee oko gimu kaƴi ka baamenta daŋayi. A haŋka pa, ku aŋka na cappiyyee oko sultanco Yawudigeyyo e?» 40Guu waciɗe hawwanti goo: «Kaw ay gata ɗa, ni aŋka ki cappiyyee oko Barabas!» Barabas pa ay mariŋ tatta.

Currently Selected:

Yaaya 18: mmy

Highlight

Copy