Yaaya 17

Inniti Iisa oko Mella Tatti

1Maa ga Iisa beneyyiɗe goŋŋakite pa, gaa cukilɗe uwwa, gaa beneyyiɗe gaa: «Baaba, wikinne ase. Gaarayooca darjanti runcum oko giimo, maa ga naa runcum kulla gaaricca darjancum oko giimo. 2Ki berewwiyaw gudirane maa na hikimiyɗiy giimi paracco ku dunuune teete, ku maa na biriyyo hayaatane ma gakamma ɗa ta kaw oko giimi paracco maa ki berewwiyaw. 3Hayaatane ma gakamma ɗa ta kaw pa, ay gu ibinɗum kadar ga ay kii kaycum ka ay Mella ka tirta, o gu ibininno kulla naa Iisa Masi maa ki n̰aame. 4Na gaarica darjancum iŋee kiɗaati o na gaamiya lubbi maa ki berewwiyaw kii na leyya. 5Haŋka pa Baaba, ki birawca pe saripcum darjane tee maa na lekka saripcum min maa gi dunuune alɗo ɗa missa kilgiyenta.

6«Na gaarum oko giimi maa ki biryaw min aacco giimi ku dunuune teete. Guta pa ay kuncam. Ki birawgu, guu jobbiyya beneycum. 7Haŋka pa gu lekke paaɗe kabarre kadar ga latta keeke paratti maa ki biryaw asaa min oko kii, 8asan na gaariyoogu beneyyiŋgee maa ki beneyyiyaw, guu icciɗiy. Guu ibinɗe ma seene kadar na asaa min oko kii, guu amanniɗe kadar ga kii ma n̰akamminoo. 9Na enaam oko giimi maa ki biryaw ka. Na enaam ɗa oko giimi ku dunuune teete. Ay oko maa ki biryaw ka asan gu ay kuncam. 10Kanni paratti ay kancum o ma ay kancum paratti ay kanni. Guu giimi ku dunuune teete ellicca darjantu ma jobookeetaw. 11Na nowotta ɗa payya dunuune teete, na kataa ma kii, a guta soopa nowotta iŋee dunuune teete. Baaba, kii kaycum ka ay Mella. Tariy maa ki biryaw ma gudirane ta semeecam maa ki berewwiyaw ku maa gu deeɗo kaƴi ka, aleŋ maa ke alɗeŋ kaƴi ka. 12Maa na alɗo ma guta, na tariy ma gudirane ta semeecam maa ki berewwiyaw. Ay ɗakko appe ga ya kaƴi min aacco alɗe masila ɗa min butulcum, illa ay gata kee ka ma masalla ku maa ga beneyti Kitamnicum asiɗo butulti.

13«Haŋka pa Baaba, na kataa wikircum, o gi innitu teete maa na leewa wikinne maa na alɗo missa dunuune teete ay maa gu gassicca parhantu ta yaata. 14Na gaariyooga beneycum, ay ɗakko appe gu giimi ku dunuune teete ɗakaɗɗiy asan gu ay jobookeetaw, ay kunco ɗa oko giimi ku dunuune teete aleŋ naa ma ay ka dunuune teete ɗa. 15Na enaam ɗa naa ki cimmiy min aattí dunuune teete. Innasoopa, ki tariy min oko Seetanni, gata ma ay miltí miɗɗati. 16Guta pa ay giimi ku dunuune teete ɗa, aleŋ maa ga naata kulla alɗo ɗa ka dunuune teete. 17Duwiy gu deeɗo saa kuncam ka ma seenicum. Beneycum ay seene. 18Aleŋ maa ga kii n̰akamɗino kee aɗe dunuune teete, ga naa kulla n̰amakkay dunuune teete. 19Na beraaca hayaatantu oko kii saananco ku maa gu guta kulla deeɗo duwenta oko kiita ka ma seenicum.

20«Na enaam ɗa oko giimi ma dowwiy galbigeeco oko naa ka, na enaam kulla ya oko giimi ma akka duwa galbigeeco oko naa ma beneyyiŋgeeco maa gu akka taasa. 21Na enaam maa ga paracco gu deeɗo kaƴi ka, aleŋ maa ga kii Baaba alɗaw ɗakko oko naa, o naa kulla aayam ɗakko oko kii. Gu dee kaƴi ka ma keeta ku maa gu giimi ku dunuune teete amanniɗo kadar ga ay kii ma n̰akamminoo. 22Na biryooca kulla darjane maa ki berewwiyaw, ku maa gu deeɗo kaƴi ka aleŋ tanteŋ maa ke alɗeŋ kaƴi ka. 23Naa aayiyo ɗakko oko guta o kii kulla aayaw ɗakko oko naata, ku maa gu deeɗo saa kaƴi ka ma ka seene. Goŋŋa gu giimi ku dunuune teete ebenna kadar ga kii ma n̰akamminoo, o kadar ki ƴekkay aleŋ maa ki ƴekkinno.

24«Baaba, na aŋka gu giimi maa ki berewwiyaw koo nuntiɗo ma naata were maa na alɗo ku maa gu ellicca darjantu maa ki berewwiyaw asan ki ƴekkino omma min maa ki alɗica kelgeyya ɗa missa dunuune. 25Baaba, kii diiman ɗayaŋ. Giimi ku dunuune teete ibinum ɗa, naa soopa ibinum o giimi kooko maa ki biryaw soopa leelo kabarre kadar ga kii ma n̰akamminoo. 26Na gaarum oko guta gu ibinɗum o na garaam missa ya omma aɗe ku maa gi ƴekko maa ki lekkaw deeɗiyo kulla oko guta, gaa naa kulla alɗiyo ɗakko oko guta.»

Currently Selected:

Yaaya 17: mmy

Highlight

Copy