Yaaya 16

1Gaa Iisa beneyyiyyoo payya gaa: «Keeke pa paratti na beneyyitoŋga ku maa ku alɗiti cappa ɗa oko amannitoŋ oko naa. 2Wikinne akka asa maa gu giimi asittoŋ petekko min gerra ku giraaniti, o gu akkitoŋ deewo kulla. Gaa oko diyawco taata, gu lewɗe goo gu lobokka lubbi samaane oko Mellayi. 3Guta pa leewa keeke asan gu ibinya ɗa Mella Baaba o gu ibinno ɗa naa. 4A keeke soopa na beneyyitoŋ ga maa gaa wikinne maa gu lewɗitoŋgu gaari kooko ase asa kulla, ku mooyiɗo kadar na beneyyitoŋgu appe. Na beneyyitoŋ ɗa ma gaari kooko min diiliti, asan na aaye aɗe missa ma kuŋ.»

Lubbití Ruuhanti Mellayi

5Gaa Iisa beneyyiɗo missa gaa: «Haŋka pa, na kataa saripti oko ma n̰akamminoo, o ga lekka ɗa ya gimu kaƴi min aattoŋ ma enaano gaa na kataa ŋa. 6Mileŋ na beneyyitoŋ goŋŋa pa, ku zorontiye ta tirta. 7Naa soopa beneyyatoŋca seene, kaatitu teete samaanatoŋ ƴiila, asan ga naata naa kaate ɗa ga Gayaawa ma akkitoŋ gaaya asaatoŋ ɗa. Naa kaate soopa, na deeɗitoŋga n̰aama. 8Gaa Gayaawa ase asa pa, ga akkiyo gaara saa purta oko giimi ku dunuune teete gu ibinɗiy zunubgee, o gaari ku ɗayaŋ, o parlanti Mellayi. 9Gata akkiyo gaara saa purta kadar gu leewe zunubgee asan gu dowway ɗa galbigeeco oko naata, 10o ga akkiyooga gaara saa purta ka ɗayaŋ kadar na leelo ɗa miɗɗa. Ay ɗakko appe na katawɗo oko Mella Baaba, kuu alɗino ella ɗa payya ta kaw, 11o ga akkiyooca gaara saa kulla purta oko giimi ku dunuune teete parlanti Mellayi, asan ga Seetanne ma ay sultan ka dunuune teete gi parlanti ibinenta appe.

12«Na lekka missa gaari maani maa na aŋka na beneyyittoŋgu. Naa beneyyitoŋgu soopa haŋka, ku hamallay ɗa. 13Gii Ruuhane ta seeniti aseero asa soopa, gi akkitoŋca gaara seene parattí ma asaa min Mellayi. Gita pa beneyyatoŋ ɗa beneyyiŋgee ma asaa min oko gita ka, innasoopa, gi beneyyatoŋgu gaari maa gi geewe min oko Mellayi, o ma akka asa kulla ya omma. 14Gii gaaritoŋca darjantu, asan gi gasakka kanni, gii gaarittoŋga ku ibiniyya samaane. 15Latta paratti maa ga Mella Baaba lekka ay kanni kulla. Ay ɗakko appe na leeɗitoŋ naa gi Ruuhane gasakka kanni gii asittoŋga taasa.»

Zorontiytoŋ magakka gi deeɗo parhane

16Gaa Iisa beneyyiyyoo payya gaa: «Marakke pe wikinne paalta kaa, kuu alɗino ella ɗa payya. Gaa wikinne paalta omma payya ku asinno ella.» 17Maa ga beneyyiyyoo goŋŋa pa, guu jobookeetee daare beneyɗo aacco goo: «Beneyti keeke appe gaa me soo maa gaa ga marakke pe wikinne paalta ka, kee alɗiya ella ɗa? Gaa wikinne paalta omma payya ke asiyya ella, o maa gaa ga kataa kulla saripti Mella Baaba? 18A wikinne ka paalta keeke pa maa ga beneyya garaa pe ini me? Ke ibinya ɗa beneyti keeke, baŋ ga aŋka ga beneyyinne gaa me?»

19Gaa Iisa leeɗe kabarre kadar gu aŋka inniti ma gaari kooko. Gaa beneyyiyyoo gaa: «Na beneyyitoŋ naa ga marakke wikinne paalta kuu alɗino ella ɗa. Gaa wikinne paalta omma pa, ku asinno ella. Ay ma keeke appe ku enewɗo zeneetoŋ e? 20Giyyoŋ! Na beneyyatoŋca seene: Ku akka erca o ku akka laatiya oko wikinne maa gu giimi ku dunuune teete parhanɗe. Ku akka zorontiya, gi zorontiytoŋ taata soopa asiɗo maga ma parhane, 21aleŋ daate ma garrabbe wiyaawi, gita zorontiyenta asan ga wikinnití ka diiganti ase. A gii weero soopa gi rawattikiti diigantí parattí, gii parhinɗo oko maa gi gassiɗe miica. 22A kuŋ kulla aleŋ taata appe, oko haŋka ku zorontiyenta. A kuu asino ella payya soopa, gu galbigeetoŋ akka parhina, o ga lekka ɗa payya gimu ma gederra ga iccittoŋca parhane taata. 23Gii meene taata ase asa, ku enaano ɗa payya ya maatiki kaƴi. Giyyoŋ! Na beneyyatoŋca seene: Mella Baaba beraatoŋga latta paratti maa ku enaa ma semeetaw. 24Ya haŋka ku enee ɗa missa maatiki min Mellayi ma semeetaw. Enewwoŋ, kuu gasaɗɗo, goŋŋa ku gasakkaca parhane parattí.»

Iisa nosorrati oko dunuune teete

25Gaa Iisa beneyyiyyoo payya oko jobookeetee gaa: «Na beneyyitoŋgu gaari kooko paracco ma masalnigee. Wikinne akka asa maa na asittoŋgu beneyya saa pe gaartee Mella Baaba purta purta bala masalnigee. 26Gii meene taata ase asa pa, ku akkiya enewwo Mella Baaba ma semeetaw, o ga ay naa ɗa payya ma deeɗitoŋga enewwo. 27Gata saa kulla ƴekkatoŋ, asan ku ƴekkano o ku amanne kadar na asaa min oko gata. 28Na asaa min oko Mella Baaba, naa asiɗe dunuune teete. Haŋka pa, na otokkati oko dunuune teete naa kaatiɗo saripti.»

29Guu jobookeetee beneyyiyyee goo: «Ay haŋka pe ki beneyyani saa pe purta bala masal. 30Ay haŋka pe ni leelo kabarre kadar ki ibiniy gaari paracco o gaa gimu enewwum ɗa missa kulla ki ibinya appe kanti. Ay ɗakko appe ni amanɗe kadar ki asaa min Mellayi.» 31Gaa Iisa tiiliyyoo gaa: «Ku amanne haŋka e? 32Wikinne asaa, o ga ase paaɗe, o ku akka gaɗɗa ku tacilɗo kulla kaƴi aɗe kataa ta wikirti maa ga katawɗo. Kuu cappinnaw pe kaytu ka, naa soopa kaytu ɗa ka, asan ga Mella Baaba aaye diiman ma naa. 33Beneyyi keeke pa paratti na beneyyitoŋga ku maa ku gassiɗo aapiya ma naa. Ku akka diigiya aattí dunuune teete, kuŋ soopa asarroŋgu galbigeetoŋ, asan na nosorriti oko dunuune teete maa ga Seetanne hekemeyye.»

Currently Selected:

Yaaya 16: mmy

Highlight

Copy