Yaaya 20

Naɗawti Iisa

(Elloŋ Matiye 28.1-8, Mark 16.1-8, Lik 24.1-12)

1Meene ta ahatti ma walawti wiri maa ga were alɗo missa namta, gi Mariyam ta Magdala kaate mooniti Iisa. Maa gi sarɗe, gii elliyya gur̰bu gaa saapenta maaƴi min biití mooniti. 2Gii gaɗɗiɗe gi deeɗiyo taasa oko Simo Piyer ma giiti jobooka ka kaƴi maa ga Iisa ƴekka maani gee: «Cimmiya ziiti Miltine min mooniti, nii#20.2 Lekka daati daare ma kaate mooniti Iisa ma Mariyam ta Magdala maa gu semeeco goo: Mariyam yaati Zak o Saloome. Elloŋ Mark 16.1. alɗo ibina ɗa were maa gu kaatikkiki.»

3Gaa Piyer ma giiti jobooka kaaka kaatiɗe mooniti. 4Gaa serco gu kaatiɗe ma gaɓira, gaa giiti Piyer teeɗeeca oko Piyer ga sarɗe omma. 5Gaa maa ga sarɗe ga deeɗe ƴugila, gaa ellicca kapanne gii dowwe kiɗaati. Gaa alɗe un̰n̰a ɗa soo. 6Gaa Simo Piyer asiɗe sulaayi, gaa asiɗe un̰n̰a. Gaa ellicca kapanne gii dowwe kiɗaati, 7o ku ma ay ta kayaati pa kulla arɗenta, gii dowɗe kayti, dowwe ɗa ma gittí. 8Gaa jobooka ma omme kee kulla un̰n̰iɗe ɗakko mooniti. Gaa maa ga elliɗe, gaa amanniɗe kadar ga Iisa naɗe min muuti. 9Oko wikinne kaaka kulla gu jobookeetee Iisa ebenniya ɗa missa beneyti Kitamniti Mellayi ma gee ga Iisa akka naɗa min aacco giimi ku mattenta. 10Gaa min iŋaa gu jobookee serco yookiɗe wikirco.

Iisa okommati oko Mariyam ta Magdala

(Elloŋ Mark 16.9-11)

11Gii Mariyam ta Magdala yookiɗe payya mooniti, gii nowoɗɗe biití gi erecɗo, gii ƴugilɗe gi elelɗo ɗakko. 12Gii elliɗe malaykatnigee ma esekke kaɗiŋgee purta tal, guu nowotte were maa gu eseɗɗiya ziiti Iisa, kaƴi ƴa oko were ka asintee, ka kaƴi pa oko were ka kayaati. 13Guu innicca goo: «Daate, ayme ka erecɗo?» Gita pa tiiliyyoo gee: «Asan gu giimi cimmiya Miltu naa alɗo ibina ɗa were maa gu deeɗiya gaga.»

14Gaa maa gi beneyɗo kaaka gi jigirɗe, gii elliyya Iisa gaa waraɗɗe, gii alɗiya ibina ɗa soopa. 15Gaa Iisa innicca gaa: «Daate, ayme ka erecɗo? Kaŋ deyekka we?» Gita pa leewiki milti jineeniti. Gii beneyyiyyee gee: «Miiɗi keeke, ga ay ki ma cimmiya, ki gaarawga were maa ki deeɗiya duwa, naa deeɗiki asa.» 16Gaa Iisa kollicca gaa: «Mariyam!» Gii ribiliyyee gi jooriyya gee: «Rabbuni!» (Ma beneyco Ebireenigeyyo pa, ga Rabbi goo ‘Garaawa’.) 17Gaa Iisa beneyyitti gaa: «Anno baama ɗa asan na kalappe ɗa missa wikirti Mella Baaba. Aɗaayo beneyya soo oko seneetaw ma gaartaw kaa na kalappa wikirti Tattu ma ay Tattoŋ kulla o kaa na kalappa wikirti Mella Miltu ma ay Mella Miltoŋ kulla.»

18Gii Mariyam ta Magdala deeɗiyo taasa oko jobookeetee gee: «Na elliyya Miltine.» Gii gemmiyyoogu gaari paracco maa ga beneyyiti.

Iisa okommayo oko jobookeetee

(Elloŋ Matiye 28.16-20, Mark 16.14-18, Lik 24.36-49)

19Gaa meene ta ahatti taata saa ma ooro, gu jobookeetee alɗo aatti ger kaƴi aɗe, o gu agassiy borroggi talta asan gu ɓayakka taattuweeco Yawudigeyyo. Gaa Iisa asiɗe warra ɗaɗɗakkico, gaa salammiɗiy gaa: «Gi aapiya dee ma kuŋ.» 20Maa ga beneyɗiyo kaaka pa, ga gaariyoogu kulla murundee ku pittee o ta saripti. Maa gu jobookeetee elliyya Milco gu parhinɗe ta tirta teete. 21Gaa ɗilliyyoo payya gaa: «Gi aapiya dee ma kuŋ. Aleŋ maa ga Mella Baaba n̰aaminno aattí dunuune teete, ga naa kulla n̰amakkatoŋ aattí dunuuniti ku deeɗiya lee lubbitu.» 22Gaa maa ga beneyyiɗe goŋŋa, gaa gubiriyyoo, gaa beneyyiyyoo gaa: «Gassoŋca Ruuhanti Mellayi.» 23Gaa beneyyiyyoo payya gaa: «Giimi maa ku saamayyayoogu zunubgeeco gasakkaca saamiyo min oko Mellayi. A maa ku saamayyayo ɗa pa kulla, gasakka ɗa saamiyo.»

Iisa o Toma

24Wikinne maa ga Iisa asiɗiy gassa jobookeetee aatti daŋayi kaaka pa, ga Toma maa gu kolaa kulla goo Maajibu, ma ay kaƴi min oko jobookee ku orro o seera, aayiyo ɗa. 25Maa ga Toma asiɗe, guu gittee beneyyiyyee goo: «Ni elliyya Miltine!» Gaa gata pa tiiliyyoo gaa: «Naa elliy ɗa murundee ku pittee maa gu paapiyya, o naa eesiy ɗa ma pittu, o naa eesica ɗa kulla saripti, na amanna ɗa kadar ga naɗe.»

26Maa gu leeɗe meeni poppoɗi, guu jobookee deeɗe tappa payya aatti giiri. Gaa Toma kulla alɗo saa pe. Beneeco borroggo pa gu agassiy talta. Gaa ma kaaka aɗe, ga Iisa asiɗe warra ɗaɗɗakkico, gaa salammiɗiy gaa: «Gi aapiya dee ma kuŋ.» 27Gaa ribiliyyee oko Toma, gaa beneyyiyee gaa: «Elliy pittaw o ki eesiy, kii eesicca kulla sariptu. Aɗica kalaa ɗa seera seera. Amannu kadar na naɗe!» 28Gaa Toma tiiliyyee gaa: «Ki ay Mella Miltu!» 29Gaa Iisa leeɗiyee gaa: «Ay asan ki ellinno pe ki amanniɗe e? Na beneyyam ƴa, baarikenta ay giimi ma amanna bala ellitu.»

Gaarti kitamne teete

30Gaa Iisa gaariyyoo payya oko jobookeetee garaawi ku ajjibiti maani ma kitipiyenta ɗa aattí kitamne teete. 31Ma kitipiyenta soopa ay ku maa ku amanniɗo kadar ga Iisa ay Masi, gata maa ga Mella aparre, o ga ay Runti Mellayi, o gi ay ma amanno oko gata ku gassicca hayaatane ma semeetee.

Currently Selected:

Yaaya 20: mmy

Highlight

Copy