Lubaakico N̰amaakeetee Iisa Masi 26

Pol eperraca kayaati unti Sultan Agirippa

1Gaa Agirippa beneyyiyyee oko Pol gaa: «Kii kulla gemmiya kancum maa ki ipiricca kayaacum.» Gaa Pol cipiliyya pitti, maa ga ipiricca kayaati gaa: 2«Kii sultan Agirippa, naa gi daanaw meente maa na ipiricca kayaatu uncum min oko loomanco Yawudigeyyo parattí, 3asan ga kii saa kulla ibiniy samaane aadaŋgeeco Yawudigeyyo paracco o meleewico. Oko keeke pa, ki ban̰n̰u ki giyyinno ma sabur.

4«Yawudigee paracco ibinca nuntitu min ɗibiluwtu o gu ibinca nuntitu baŋ gi maate min omma maa na nowoɗɗe ma gimtaw ku kiɗa ta Silisi o ku Zerizalem. 5Guta pa ibinno min tippa o gu gederra gu beneyyiyya maa gu elle o maa gu giyye guu aŋka, kadar ga naa nunte ma giimi ma bakammica ibaadatini ta raɗɗa ƴiila maa gu kolaa goo Pariziyen. 6Haŋka pa, ku caɗaanaw parlane asan na ocokke ma amanno oko beneyyiŋgee maa ga Mella beneyyiyoo oko kookuweetini. 7Balleeco kookuweetini ku orro o seera pa kulla ocokkaa wikinne maa ga beneyyi kaaka deeɗo, maa gu aabidiyya Mella paato o aandoŋ ma niyyane. Sultan kee Agirippa, naa kulla ocokke pe goŋŋa aɗe. Ay kaaka appe gu Yawudigee loomoyɗinoo! 8A ayme ga kuŋ Yawudigee beneyɗo kuu ku gederra ɗa ku amanniɗo kadar ga Mella naɗakkay giimi min muuti?

9«Naa kulla min omma kee na moyee naa ga ay tirta na bookiɗo ma gaari paracco ku semeetee Iisa ka Nazaret. 10Ay keeke appe maa na leelo gonek Zerizalem. Taattuweeco soƴoowee ku saɗikaŋgeyyo biryaw botol ku maa na bamaɗɗiy o na eseɗɗiy daŋayi gimtee Mellayi maani, o wikinne maa guu caaɗiyyo parlane ma ka diyaawi, ga naa oyee, 11o na tan̰aayo gerraco Yawudigeyyo ku giraaniti iŋee o iŋee na deegeyɗiy giimi ma dowwiy galbigeeco oko Iisa ku maa gu cappitti oko amannico. Bogortu paratti na zelekkiyooga ta tirta teete namma na jobbiɗiy oko gawaagargee ma ay ku Yawudigeyyo ɗa ku maa na deeɗiy diigiya.»

Pol jepekkay gaartee maa ga dowɗica galbanti oko Iisa

12Gaa Pol beneyɗo missa gaa: «Ay goŋŋa appe meene kaƴi, na waciɗe min geegar ka Zerizalem na katawɗo geegar ka Damas. Guta pa ay taattuweeco soƴoowee ku saɗikaŋgeyyo ma berewwiyaw botol ku maa na deeɗiy bamma giimi ma dowwiy galbigeeco oko Iisa. 13Sultan Agirippa, gii gaayile raɗɗa maa na katawɗo butuuli, na elliɗe bahaarane ma beeriyaw min samaani. Beerití taata pa ƴiilaca kulla ta paatti. Gii kadirinni ma gittaw ma ezekkino. 14Nii solliɗe parattini kiɗaati. Naa giyyiɗe ur̰e ma beneyyiyaw ma beneyco Ebireenigeyyo gee: “Sol, Sol, ayme ki deegeyɗino? Ayme ki asaɗɗo aleŋ koydane ma pocee tammo ta milti? Assicum kulla gayee ɗa maatiki.” 15Naa inniɗe naa: “Miltu, kii ay we?” Gaa gata pa tiiliyyaw gaa: “Naa ay Iisa maa ki deegeyye. 16Haŋka pa ki wacu, warru uwwa! Naa oomiyam ku maa na apirɗum ki deeɗo lubaakatu. Ki deewa suyuudintu ki deeɗiyo beneyyo oko giimo kadar ki ellinoo meente o ki akkiyoogu beneyya gaari maa na akkamgu gaara. 17Na tarakkam min oko gimcam ma ay Yawudigee o min oko giimi ma ay Yawudigee ɗa ku wereeriyee maa na asiɗum n̰aama. 18Na n̰akammam ku maa ki deeɗiyoogu iyya iɗiico, guu oomiɗo min namtuwwi, guu asiɗo bahaaranti. Na n̰akammam kulla ku maa guu uttitti oko gudiranti Seetanni, guu asiɗo oko ta Mellayi. Guu duwiy galbigeeco oko naata pa, guu gassiɗo saamiyo ta zunubgeeco o were aacco giimi ma duwenta oko Mellayi.”»

Pol beneyya ma gaari ku lubbiti

19Gaa Pol beneyyiɗe payya gaa: «Sultan Agirippa! Ay kaaka appe na alɗiy pooca ɗa gaari maa na elle min uwwa samaani aleŋ ma waano. 20Innasoopa na beneyyiyoo ƴa omma oko giimi ku Damas o koo ku Zerizalem o koo ku kiɗaayee paratti ku Yudee o oko giimi ma ay Yawudigee ɗa, naa gu meeliy gaarco ku miɗɗa, guu ribilɗo oko Mellayi, o naa gu leewu gaari ku samaane ma garaa kadar gi hayaatanco deero magenta ma seene. 21Ay oko keeke appe gu Yawudigee asinno baama maa na alɗo dooranti girti Mellayi, guu aŋkiɗe diyawtu. 22Ya meente aɗe soopa ga Mella tarnoo, na alɗo kanni missa suyuudinti unco giimi paracco ku rootta o ku taatta. Beneytu maa na beneyye pa jagenta ɗa min oko ka nabiinigeyyo o ka Muusa oko gaari ma akka asa, 23kadar ga Masi, gata maa ga Mella aparre, akka diigiya, gaa maatiɗo, o ga gata appe ma delaaca naɗaw min oko giimi ku mattenta, o ga akkiya taasa beneyyi ka bahaarane ta najjiyti oko Yawudigeyyo o oko giimi ma ay Yawudigee ɗa.»

Pol enaa sultan Agirippa gaa ga duwca galbanti oko Iisa

24Pol ƴa beneyya missa goŋŋa ku maa ga ipiricca kayaati, gaa guberner kee Pestus cayyikiyyee gaa: «Pol, kii awakka! Ki garkiye pile maani gi kayaacum masilɗe!» 25Gaa Pol tiiliyyee gaa: «Naa ay awaaka ɗa, tattuwtu. Beneyyiŋgee maa na beneyya kooko ay seene o gu dandal, 26o beneyyi keeke ga sultan Agirippa ibinya tam. Ay ɗakko appe na beneyɗo unti bala ɓayaw. Na ibina ma seene kadar ga ya kaƴi min gaari kooko lekka ɗa ma masalle min unti, asan gu gaari kooko deero unco giimi paracco, kiilenta ɗa. 27Sultan Agirippa, ki amanne aɗe oko beneyyiŋgeeco nabiinigeyyo maa gu beneyye tippa? Na ibina aɗe kadar ki amanne!» 28Gaa sultan Agirippa pa tiiliyyee oko Pol gaa: «Oko kancum ka, haŋka keeke aɗe saa ki aŋka ki ribilinno na deeɗo Kerettiyen e?» 29Gaa Pol beneyyiyee gaa: «Caŋ ga haŋka e baŋ ga ya omma, na enaa Mella maa ga kii o giimi kooko paracco ma geewano meente deeɗo aleŋ naa, soopa bala janaazargee kooko.»

30Maa ga Pol gaamiyya beneyti kaaka, gaa sultan Agirippa o guberner Pestus o Berenis o giimi ma aayiyo kotti paracco waciɗe. 31Gaa maa gu okomɗo kaaka, gu beneyɗo aacco goo: «Gimu keeke negekke ɗa niŋgo ma arakke diyaw e baŋ gi janziro.» 32Gaa Agirippa leeɗiyee oko Pestus gaa: «Ampane kee ga gimu keeke alɗe enaa ɗa caaɗo ta parlanti wikirti tattuwe ka tatta ka Rooma ki gederra aɗe ki cappiyyee.»

Currently Selected:

Lubaakico N̰amaakeetee Iisa Masi 26: mmy

Highlight

Copy