Lubaakico N̰amaakeetee Iisa Masi 27

Pol gu n̰akamma geegar ka Rooma

1Gaa guberner kee Pestus icciɗe niyyane ga n̰aaminnii#27.1 Beneyyi ka n̰aaminnii keeke pa, garaa kadar ga Lik kulla aaye ma ini Pol. Ay Lik ma kitipiyca kitamne teete. ma markaba kiɗa ta Itali. Gaa kappiyyooga Pol o giimi daare maa gu bamakke daŋayi oko tattuwe kaƴi aɗe ka asaakargeetee tattuwe ka tatta ka Rooma maa gu semeetee goo Yuliyus. 2Nii kalpiɗe markaba ma ase min geegar ka Adiramitiyum ni katawɗo ta diyargee ku biití baharre ta yaata ta kiɗa ta Aazi. Nii kaatiɗe. Aristaarke pa, ma ay gimu ka geegar ka Tesalonik ma aaye kiɗa ta Maseduwan, torgowwe kulla ma niita. 3Gaa ma ta sokkonta ni sarɗe geegar ka Sidon. Gaa Yuliyus leeɗiyee samaane oko Pol ga duwiyyee ga deeɗiy ella lanjigeetee ku maa gu gassiyyee maatiki ma koyowwiyee. 4Gaa min iŋaa ni ƴiiliɗe. Nii baarayɗica Sipire ma kadirenta ma ammi asan ga ussu gaballinii. 5Nii tappicca baharre katta ta kiɗa ta Silisi o ta Pampili, nii sarɗe geegar ka Miira kiɗa ta Lisi. 6Gaa iŋaa pa, ga tattuwe ka asaakargeyyo gassiɗe markaba ma asaa min geegar ka Alekzandiri gii katawɗo kiɗa ta Itali, gaa kalpinnii markaba taata.

7Nii katawɗo ma halle ka. Nii leeɗe meeni maani, nii sarɗe geegar ka Keenid ma diigane. Mileŋ ga ussu gaballinii pa, ni gederre ɗa ni kaatiɗe cur. Nii kaatiɗe watuunití kiɗa ta Kiret ma kadirenta ma ammi ku maa ni gassiɗo were ma ocokkaniiga ussu. Nii ƴiiliɗe saripti dambu ka Salmoone. 8Nii sappaɗɗo ma gidaane ka sariptí kiɗa ta Kiret, nii sarɗe were kaƴi aɗe maa gu kolaa goo Bopoor#27.8 Bopoor pa ay were samaane maa gu markabanigee waraɗɗo.. Were kaaka pa aaye katta min geegar ka Lasee.

9Turguwtini keeke pa iccini wikinne maani. Meene ta samkiyco Yawudigeyyo ƴiile paaɗe, kaaka pa gi ƴiilo omma deeweene miɗɗa ta kaw asan ga ussu azakka ga gaabalɗinee. Ay ɗakko appe ga Pol waciɗe ga iyyiyyoogu deyco melleeti markabati gaa: 10«Lanjigeetaw, naa ella goŋŋa ga turguwtine deewa miɗɗa ta kaw. Markabatine o lawti masalla, o gu guta ɗa ka, kee kulla ma kayyeetine kee baame ɗa samaane ke matakka.»

11Tattuwco asaakargeyyo soopa icciya beneyco tattuwtí markabati o miltí. Beneyti Pol pa ga baamiki ɗa. 12Were ka biití baharre ta yaata kaaka pa maa goo Bopoor samaane ɗa nuntiti ma wikinne ka dettuwwi. Ay ɗakko appe gu giimi ma kalappe markabati oyyiɗe ma ka ƴiiliti min iŋaa. Aŋka gu sarɗo alka were kaƴi maa gu kolaa goo Penikse, ma aaye biití baharre ta Kiret. Were kaaka pa aaye gidaane ka karimni. Iŋaa pa, gu aŋka gu nuntiɗo namma ya gaamiti dettuwwi.

Ussu azakka baharre ta yaata

13Gaa ussu diiliɗe ga azaɗɗo min ta watuuni ma halle ka. Guu lewɗe goo walaŋ gu gederra paaɗe gu kaatiɗo Penikse. Guu jootiyya sarnati ka suura ma wereɗɗaca, guu katawɗo paaɗe ta karimni paal paal o gu baarayye ma saripti Kiret ma kadirenta ma ammi. 14Gaa wikinne paalta omma, ga ussu maa gu kolaa goo ‘ussu ka jarilti o ka muŋsanni’, beerinnii ma raɗɗa min dambu ka Kiret. 15Gaa ussu kaatikkikiti markaba. Niita pa gederre ɗa ni kaatiɗo were maa ni aŋka. Nii duwitti, gaa ussu ƴiilikikkini. 16Nii ƴiiliɗe ma ta watuuniti were rootta ma kadirenta ma ammi maa gu kolaa goo Kooda. Were kaaka pa uciniiga ussu paalta. Gaa ma diigane ta tirta ni gederriɗe ni wirricca markaba ta moogati. 17Guu lubaakeeti markabati gagicca markaba ta moogati aattí markaba ta yaata. Guu arɗicca markaba ta yaata ma seppee ku maa gi markaba alɗo ɗimma ɗa. Mileŋ gu ɓayakke pe gi deeɗiko ɓaaca biití baharre ta kiɗa ta Libi, gu uwwiya kayaaco ammo ettu onnenta ma donni baltí markaba ta yaata, nii duwitti ga ussu ƴiilikkikini kanti.

18Gaa ma ta sokkonta ga ussu tooricca raɗɗa markaba. Guu lubaakeeti markabati soƴƴiɗiy lawwi asan gi markaba diile gi eceɗɗo ammi. 19Gaa ma ta sokkonta pa, gu lubaakeeti markabati saa pe bulɗiy lawti markabati maa gu loboɗɗica, guu soƴƴiɗiy aattí baharre ta yaata. 20Gaa meeni maani ni alɗica ella ɗa paato o kalli, o ussu azakka missa raɗɗa ta kaw namma nii walaŋ ni matakka paaɗe.

21Nii lekkiɗo meeni maani bala tiyaw. Gaa Pol waciɗe unco giimi paracco, gaa beneyyiɗe gaa: «Kuŋ gittaw keeke kuu alɗiya giyyo beneytu, ku alɗo wacaw ɗa min Kiret, gi samaane ƴiila oko kuŋ, ke wagaa ɗa ma ussu o ya lattaatoŋ kaƴi ma masalla lekka ɗa. 22Haŋka soopa na enaatoŋ ku asarriɗiy galbigeetoŋ, asan ga ya kaƴi min aattoŋ masalla ɗa illa ay markaba ka. 23A gata pa, Mella maa na ay kanti o maa na lobokkee n̰aamawga aandoŋ keeke malaykatti, 24ga asiyyaw beneyya gaa: “Pol, addo ɓaya ɗa, asan ga Mella aŋakke gu deeɗam caaɗa parlane unti tattuwe ka tatta ka Rooma o ma gidaanuwti Mellayi oko kii ga Mella najjiyɗiy giimi kooko paracco ma kalappe markaba teete ma kiita.” 25Oko keeke pa lanjigeetaw, ku asarroŋgu galbigeetoŋ asan na dowwica galbantu oko Mellayi o maa ga beneyyiyaw keeke asaa butulti. 26A kee soopa, gi markaba soƴaane biití baharre ta kiɗa ma kadirenta ma ammi.»

Guta sarakka kiɗaati

27Keeke pa ay aandoŋtini ma daa ka orro o pooɗi maa ga ussu torooroyɗini missa aattí baharre ta yaata ta Adiriyatik#27.27 Baharre ta Adiriyatik okomma min oko baharre tee ta yaata maa ku kolaa goo Mediteranee.. Gaa ma ta ɗaɗɗakkiti aandoŋŋi, gu lubaakeeti markabati lewɗe goo walaŋ ni sarakka katta kiɗaati. 28Guu uwwiɗe maatiki suura ma onnenta ma sippu ga desewɗo ku maa gu elliyya siƴƴuwco ammo. Gaa siƴƴuwco deeɗe orooruwee seera miɗi. Gaa omma paalta gu uwwiɗe payya. Iŋaa pa, ga siƴƴuwco deero orro o beeƴa miɗi. 29Guu ɓayɗe goo walaŋ pe gi markaba ɓacaa dambeyyo. Ay ɗakko appe gu dawwiɗe sarnati ka suura pooɗi ma onokke taarti markabati ma baabassaca. Guu ocoɗɗe pe ga were walɗo ka koɗok. 30Guu lubaakeeti markabati beericca ammo markaba ta moogati. Guu leeɗe goo gu dawakka unti markabati sarnati ka suura kee ma wereɗɗaca. Beneyco kaaka pa ay seene ɗa, aŋka gu n̰oor̰iɗo ka. 31Gaa Pol beneyyiyyee oko tattuwe ka asaakargeyyo ma asaakargeetee gaa: «Guu giimi kooko nunte ɗa markabati ma kee, ga kuŋ kulla pakaa ɗa.»

32Ay ɗakko appe gu asaakargee reppiɗiy donni ma onokkica markaba ta moogati taata gi galɗe, guu duwwitti gi ƴiiliɗe.

33Gaa omma min maa gi paato alɗe ecekka ɗa missa, ga Pol beneyyiyoo gaa: «Meente ku lekka paaɗe meeni orro o pooɗi diiganti bala tiyaw o ku ocokke ka pe. Haŋka pa kadar gi paato eceɗɗo kee ku teyyoŋ. 34Naa ku teyyoŋ ku maa ku gassiɗo gudirane ku najjiyɗo. Min aattoŋ pa, lekka ɗa ya kaƴi kulla ma mesella laawu kaƴi ka kayaati.»

35Maa ga Pol beneyyiɗe goŋŋa, gaa icciɗe mappa, gaa leeɗiyee barkinti oko Mellayi unco giimi paracco, gaa erriyya, gaa aymiɗe. 36Guu guta paracco asarriɗiy galbigeeco gu aymiɗe kulla. 37Niita pa parattini appe ma kalappe aattí markaba taata deewa miyaŋgee seera o orooruwee paysara o bizgiƴi (276) gimu. 38Maa gu teeɗe gu ayyiɗe, guu soƴƴiyya ammo geme maa gu ecekke, ku maa gi markaba deeɗiyo acapta.

39Maa ga were walɗe, guu lubaakeeti markabati ellicca kiɗa unco guu alɗica ibina ɗa. Guu elliɗe were ma ay ƴiiro o ga ƴoŋgolle guu alɗo lekka ɗa lokkomco ammo. Guu aŋkiɗo ampane kee gu sarikkiti were kaaka ku maa gu deeɗica wirra markaba. 40Guu ipirɗiy donni ku sarnati ka suura ma baabassaca, gu suubiɗe ammo. Guu ipirɗiy seppe ku arsiti ku maa gi deeɗo kosokko payya, o gu onnica kaɗiyye ta yaata o gi dalamta unti markabati ga ussu sapaɗɗini, gii kaatikkini namma ya ƴirtí kiɗaati. 41Gaa untí markabati soopa atiɗe siwwe ta ƴirti ma aaye aacco ammo, gii warriɗe diŋ. Guu lokkomco ammo ɗimmicca min sulaayi.

42Guu asaakargee aŋkiɗo diyawco oko giimi ku bammenta ku maa gu alɗo wada ɗa gu paawiɗo. 43Mileŋ ga tattuwco asaakargeyyo pa aŋka najjiyti Pol, ga duwiyoo ɗa gu leeɗiya lattaaco kaaka. Gaa beneyyiɗe gaa gu giimi ma ibina wadaw ƴa omma gu suubu ammo, guu wadiɗo namma ya kiɗaati. 44Ku daare pa gaa gu bammu etteeti markabati e baŋ gu lawti daare ma desaa ɗa gu jobbiɗiy paaɗe gicco ma ibina wadaw. Ay goŋŋa appe gu sarɗe kiɗaati ma aapiya paracco.

Currently Selected:

Lubaakico N̰amaakeetee Iisa Masi 27: mmy

Highlight

Copy