Lubaakico N̰amaakeetee Iisa Masi 28

Pol sarakka kiɗa ta Malte

1Maa ni sarɗe kiɗaati ma aapiya, nii leeɗe kabarre kadar ga were ma kadirenta ma ammi kaaka gu kolaa goo Malte. 2Guu giimi ku iŋaa kotti joobini parattini ma daana ta tirta. Mileŋ gu ammi n̰akaa ga ussu alɗo detta pa, gu zeegini okko ni kadiricca. 3Gaa Pol sokoɗɗo ettee ga kalawɗo okkati. Gaa ma gazaan̰i ka okkati kaaka, ga barwu oomiɗe ga oomiyya pitti Pol, gaa zawaɗɗe. 4Maa gu elliyya gaa barwu kokoŋiyyee pitti ga zawaɗɗe, guu beneyyiɗe aacco ka goo: «Gimu keeke ay diyaawa ka giimo. Ma paawiti taata aɗe min baharre ta yaata, gi parlane oyowwiyee ɗa nunto!»

5Gaa Pol soopa sekkiyya barwu min pitti ga galɗe okkati o ga aawe ɗa ya raɗɗo. 6Guta pa ocokke gu elliyya ga Pol osaa e baŋ ga galaa ga maatiɗo koɗokka ka. Gaa maa gu nambiɗe, gu elelɗiya appe ga ka miɗɗa asiyee ɗa. Guu yookiɗe payya gu beneyɗo goo: «Gimu keeke ay kaƴi min zorro!»

7Katta were kaaka pa, lekka gaan ma ay ka tattuwco oko giimi ku Malte semeetee pa goo Pibiliyus. Gata kaaka pa joobinii samaane o ga nuntinii meeni subba girti. 8Gaa tatti Pibiliyus kaaka oƴowɗe asan ga parayya, ziiti koɗosse o ga ɗerekka baara. Gaa Pol kaatiɗe ga deeɗiya ella, gaa inniyyee Mella, o ga gageegu pittee kayaati, gaa rayyidiyya. 9Maa gu giimi ku Malte giyyikki keeke, guu giimi daare ma parayya asiyyee oko Pol, gaa rayyidiɗiy. 10Guu issinnii karaamane maani o maa ni katawɗo gu birni lawwawwi paracco ku turguwwi ma koyowwini.

Pol sarakka geegar ka Rooma

11Nii pa nunte iŋaa Malte koyyee subba. Gii lekkiɗo iŋaakite markaba ta Alekzandiri ma nunte wikinne ka dettuwwi paratti. Unti markaba taata pa, lekka zorri maajibi#28.11 Zorri maajibi kotti pa, gu kolay goo Diyosikures o kulla goo Kastor o Polik, ma tarakkay lubaakee ku markabati. maa gu sacakke ma ettu. Ni kalpiɗe ni kaatiɗe. 12Nii sarɗe geegar ka Sirakis. Iŋaa pa ni dee nunta meeni subba. 13Gaa min iŋaa ni jepewɗe paaɗe ma biití baharre ta yaata namma ni sarɗe geegar ka Reziyo. Gaa ma ta sokkonta ga ussu diiliɗe ga azaɗɗini min ta watuuni, nii leeɗe pe meeni seera ka nii sarɗe geegar ka Puuzol. 14Iŋaa pa ni dee gassa seneeta ma dowwiy galbigeeco oko Iisa. Guu inninnii goo ni nuntu ma guta meeni paysara. Ay goŋŋa appe ni ƴiiliɗe namma ya Rooma ma asintini. 15Maa gu seneeta ma dowwiy galbigeeco oko Iisa ku Rooma giyyiɗe kadar ni asaa, gu daare ƴa joobini namma ya Sunne ta Apiyus o daare pa namma ya darre maa gu kolaa goo ‘Gerra ku turaayo ku Subba’. Maa ga Pol elliɗiy pa, gaa leeɗiyee barkinti oko Mellayi o gi galbanti ooliyee. 16Gaa maa ni sarɗe geegar ka Rooma, guu oyyiyyee oko Pol ga nuntiɗe ger kaƴi kayti ka ma askar kaƴi ma ellaa.

Pol o taattuweeco Yawudigeyyo

17Gaa meeni subba omma, ga Pol kolliɗiy taattuweeco Yawudigee ma aaye Rooma. Maa gu asiɗe, gaa beneyyiyyoo gaa: «Seneeta, oko gimtine na leyyo ɗa ka miɗɗa o oko aadaŋgeeco kookuweetine kulla. Gaa ma kaaka aɗe gu Yawudigee baaminnoo Zerizalem, guu birinnoo picco Roomennigeyyo. 18Maa gu Roomennigee inninnoo pa, gu aŋke gu cappiyyaw asan gu gassiyaw ɗa er̰n̰e ma arakke diyaw. 19Guu Yawudigee soopa alɗe aŋakka ɗa gu cappiyyaw. Ay kaaka appe ma asarrinoo na inniɗe botol ku maa na piricca kayaatu unti tattuwe ka tatta ka Rooma. Innasoopa, na aŋka ɗa na sakkiyɗiy gimtaw koo Yawudigee. 20Ay keeke appe na jorowɗitoŋ na asittoŋ ella o na asittoŋ beneyya. Naa pa gu onokkinoo ma jinzirre saananti gimu maa gu giimi ku Isirayel ocokke#28.20 Gimu maa gu giimi ku Isirayel ocokke pa ay Masi..» 21Guu taattuweeco Yawudigeyyo pa tiiliyyee goo: «Ni gasse ɗa ya maktup min Yudee ma beneyya ma gaarcam, o min seneeta ma aseero min Yudee, lekka ɗa ya kaƴi ma beneyyini ma gaarcam ku miɗɗa. 22Innasoopa ni aŋka ni gassiyya ƴa kancum, asan ni lekka kabarre kadar ga were paratti gu giimi beneyya miɗɗa ma gaarco giimi kotti maa ki tapakke ma guta.»

23Guu caaɗiɗe meene maa gu asiyya gassa Pol. Meene ta waagiti taata pa, gu asiyya gassa maani ƴiila were maa ga alɗo. Gaa min sossoko namma ya pootimooko, ga Pol passiyyoogu beneyyiŋgee. Gaa taasiyyooca mulunniti Mellayi, ma beneyyiŋgee ku Kitamniti Muusa o namma ya kutubgeeco nabiinigeyyo ku maa ga asikko gu amanniɗo ma gaartee Iisa. 24Guu daare min aacco amanniɗe oko beneyti Pol kaaka, daare soopa pooce amanno. 25Maa gu katawɗo pa, gu taace ɗa payya aacco. Gaa Pol beneyyiɗe beneyyi ma desekkaa beneyti gaa: «Ruuhanti Mellayi beneyye pe seene aɗe oko kookuweetoŋ ma biiti nabiinice Esaya gee:

26“Aɗaayo beneyya ƴa oko giimi koo ku Isirayel kii:

Ku akka giyya beneyyiŋgee ma deytoŋ,

innasoopa ku ebenna ɗa dagganco.

Ku akka ella ma iɗiitoŋ,

innasoopa ku passallaa ɗa,

27asan gu giimi kooko sidiliy galbigeeco

ku maa gu alɗo ibina ɗa gaari.

Guta sun̰iy deyco

ku maa gu alɗo geewa ɗa,

o gu timiniy iɗiico

ku maa gu alɗo ella ɗa.

Guta pa leyya keeke

ku maa gu alɗo rebella ɗa oko naa Mellayi, naa rayyidiɗiy#28.27 Elloŋ Esaya 6.9-10..”»

28Gaa Pol beneyyiyyoo payya gaa: «Ibinoŋga keeke kadar ga Mella n̰aamica kabarre ta daana ta najjiyti oko giimi ma ay Yawudigee ɗa. Guta kotti pa akkica giyya!»

29Maa ga Pol beneyyiyyoo goŋŋa, guu Yawudigee tacilɗe o gu kaltiye ta tirta aacco. 30Pol pa nunte iŋaa ƴilaakee seera ɗamal ger maa ga ajjarre, o ga jobay turi paracco ma asee elliti. 31Gaa beneyɗo ma gaari ku mulunniti Mellayi o ga garaayo gaartee Miltine kee Iisa Masi purta bala ɓayaw. Lekka ɗa gimu ma toɗokkee.

Currently Selected:

Lubaakico N̰amaakeetee Iisa Masi 28: mmy

Highlight

Copy