Lubaakico N̰amaakeetee Iisa Masi 25

Pol aaye unti guberner Pestus

1Gaa Pestus sarɗe kiɗa ta Yudee. Gaa meeni subba omma ga waciɗe min geegar ka Sezaree ga kaatiɗe Zerizalem. 2Guu taattuweeco soƴoowee ku saɗikaŋgeyyo ma ajaawaŋgeeco Yawudigeyyo asiyya sakkiya Pol unti guberner Pestus o gu kuddiyyee goo 3ga oyyayo ga asikkiki Pol Zerizalem. Guta soopa inniya goŋŋa asan ga oko kanco ka gu aŋka gu issiyyee guba butuuli gu deeɗiya. 4Gaa Pestus soopa tiiliyyoo gaa: «Pol aaye daŋayi Sezaree, o naa kulla ma kayaatu yokaa katta. 5Guu taattuweetoŋ izinno Sezaree. Gaa gimu kaaka leewe ka miɗɗa pa, guu luumiyiyya ka pe.»

6Pestus pa nunte latta ka meeni poppoɗi e baŋ gu orro ka wikirco kaaka Zerizalem, gaa yookiɗe Sezaree. Gaa ma ta sokkonta kaƴi, ga deeɗe nunta wikirti ka caaɗiti parlanti, gaa beneyyiɗe gaa gu askiki Pol. 7Maa ga Pol asiɗe, guu Yawudigee ma ase min Zerizalem asiyya kadira guu loomoyɗiya ma gaari ku suura ta kaw maa gu gederra ɗa gu tabbitiyyeegu. 8Gaa Pol pa gemmiɗiy gaartee maa ga ipiricca kayaati gaa: «Naa niŋge ɗa kaytiŋ, bala ga oko hukumnigeeco Yawudigeyyo o bala ga girti Mellayi o bala ga oko tattuwe ka tatta ka Rooma.» 9Pestus pa aŋka ga deeɗiyo daanayo oko Yawudigeyyo. Gaa inniyya Pol gaa: «Ki aŋka aɗe na deeɗamgu caaɗa gaarcam kooko gonek Zerizalem untu?» 10Gaa Pol tiiliyyee gaa: «Kaw! Naa aaye paaɗe unti were ka caaɗiti parlanti ka tattuwe ka tatta ka Rooma. Ay iŋee ka gu caɗaw parlane. Naa ɗe leewiyo ɗa ya miɗɗa kaƴi oko Yawudigeyyo, o kii kulla lekka kabarre tam oko keeke. 11Naa negekka niŋgo ma arakke diyaw, na pocaa ɗa muutu. A guu gaari maa gu loomoyɗinoo kooko soopa ay bowwo ka, ga lekekka ɗa gimu ma lekekkaw botol ku maa ga baaminno ga birinno picco. Kaaka pa, na wakakkaa tattuwe ka tatta ka Rooma.» 12Gaa Pestus ma ajaawaŋgeetee deeɗiy waaca kayyeeco. Maa gu waaciɗiy guu asiɗe, gaa guberner kee Pestus asiyyee tiila oko Pol gaa: «Mileŋ ki wakkiya tattuwe ka tatta ka Rooma, ki kataa pe unti aɗe.»

Pol unti Sultan Agirippa

13Maa gu leeɗe meeni minnaw, gaa sultan Agirippa#25.13 Sultan Agirippa pa, gu semeetee goo Erod Agirippa. Ay Erod Agirippa ma daa ta seera. ma sutti tee Berenis kaatiɗe Sezaree salammiti guberner kee Pestus. 14A mileŋ gu leelo pa iŋaa meeni maani, ga Pestus gemmeegu pe gaartee Pol oko sultan Agirippa gaa: «Lekka iŋee gimu maa ga guberner Pelis capakkiyee aatti daŋayi. 15Gaa maa na kaatiɗe Zerizalem, gu taattuweeco soƴoowee ku saɗikaŋgeyyo ma gicco ajaawaŋgeeco Yawudigeyyo deeɗiya sakkiya wikirtu, guu inninnoo goo na caaɗee parlane o na diigiyya. 16Gaa naa pa tiiliyyoo naa gu Roomennigee oko ta aadanco gu beraa ɗa gimu maa gu giimi loomoyyee goŋŋa ka, bala waago ma gittee ma loomoyyiya o ga lekka kulla botol maa ga ipiricca kayaati min bowwiti. 17Guu taattuweeco soƴoowee ku saɗikaŋgeyyo ma gicco ajaawaŋgeeco Yawudigeyyo asiɗe iŋee ma naa. Gaa, bala dummo, ta sokkonta, na nuntiɗe wikirtu ka caaɗiti parlanti. Naa n̰aamiɗe naa gu aɗiki asa gimu keeke. 18Naa lewɗe pe naa walaŋ gu giimi ma loomoyyiya cemekke beneyyiŋgee ku suura ta kaw a caŋ guu lekka ɗa. 19Meele soo ma gaari ku ibaadaco o ma gaartee Iisa kaƴi aɗe maa goo ga maate, gaa Pol pa gaa ga geewa. 20Guu gaarco kotti appe na alɗe ibina ɗa payya dagganco. Ay ɗakko appe na inniyya Pol naa ga addo gonek Zerizalem ku maa gu deeɗe caaɗa parlane ma naa oko gaartee kotti. 21Gaa Pol soopa poociɗe kaato. Gaa wakkiɗe kaato wikirti tattuwe ka tatta ka Rooma ga deeɗe caaɗa parlane. Naa leeɗiyo oko asaakargeyyo naa gu yookiya daŋayi gu taraɗɗiya, kadar kee na n̰akamɗe ga oko Seezar, tattuwe ka tatta ka Rooma.»

22Gaa sultan kee Agirippa beneyyiyyee oko Pestus gaa: «Naa kulla aŋka ƴa giyyiti gimu keeke.» Gaa Pestus tiiliyyee gaa: «Sokkoŋ ki geewa ka.»

23Gaa ma ta sokkonta kaƴi, ga sultan kee Agirippa ma sutti tee Berenis issiɗiy kaɗiŋgeeco ku salaatiniyyiti, guu asiɗe un̰n̰a ger ka timmiti. Iŋaa pa, gu taattuweeco asaakargeyyo o ku geegarri aaye. Gaa Pestus n̰aamiɗe gu deeɗiki asa Pol unco. 24Gaa guberner Pestus beneyyiɗe gaa: «Kii sultan kee Agirippa o kuŋ keeke parattoŋ ma aaye iŋee ma nii, elloŋga gimu keeke. Yawudigee paracco asiya sakkiya wikirtu. Guu gassinnoo maa na alɗo Zerizalem o gu asiyaw kulla iŋee Sezaree. Guu cayyakɗo aɗe goŋŋa ma ka diyawti. 25Naa soopa elliyee ɗa kaytiŋ latta ka miɗɗa maa ga negekke ma arakke diyaw. Oko keeke pa, ga gata saa kulla ma kayaati wakakke tattuwe ka tatta ka Rooma ga deeɗe guu ella gaartee. Haŋka pa na icce niyyane ku maa na n̰aamiyyeega. 26Gaa ma kaaka aɗe na alɗe gassa ɗa beneyyi saa maa na kitipiyɗe oko tattuwe ka tatta ka Rooma ma gaartee. Ay ɗakko appe na itirittoŋga saa untoŋ, o uncum oko kii sultan kee Agirippa. Haŋka pa ku innoŋga maa na gassiɗo beneyyiŋgee naa r̰an̰n̰iyyee oko tattuwe ka tatta ka Rooma. 27A gita pa wagee ɗa ke n̰aamiyya Rooma gimu ka baamenta daŋayi bala kitipiyo samaane ta gaartee maa gu loomoyɗiya.»

Currently Selected:

Lubaakico N̰amaakeetee Iisa Masi 25: mmy

Highlight

Copy