Lubaakico N̰amaakeetee Iisa Masi 24

Pol aaye unti guberner Pelis

1Maa gu meeni beeƴa ƴiiliɗe, gaa tattuwco oko taattuweeco soƴoowee ku saɗikaŋgeyyo maa gu kolaa goo Ananiyas sarɗe Sezaree. Guu ajaawaŋgee daare o gimu ma malay giimi unti parlanti maa gu semeetee goo Tertulus asiɗe kulla ma Ananiyas. Guu deeɗiya sakkiya Pol wikirti guberner Pelis. 2Gaa guberner n̰aamiɗe gu deeɗiki asa Pol. Gaa Tertulus diiliɗe ga loomoyɗiya gaa: «Guberner ka nabbisenta, ay ma gidaanuwcum appe ni parhanɗe asan ni nowotte ma aapiya ta kaw, o ga ma ibincum ta hakuumati ga were maginni, gu giimi ku kiɗaatini nowoɗɗe daana. 3Ni leewam barkincum maani ta kaw wikinne paratti o were paratti o oko gaari paracco ku samaane maa ki leeni. 4Innasoopa na aŋka ɗa na misiliyyam wikinne maani. Ma gidaanuwcum, ki giyyini ƴa paalta. 5Ni leelo kabarre kadar ga gimu keeke gidaani ɗa ta kaw. Gata ay tattuwco oko giimi daare aɗe maa gu kolaa goo Nazareyennigee o ga amassay Yawudigee ku dunuune parattí. 6Gaa cokkiɗe niŋgiti girti Mellayi, ay ɗakko appe ni baamiyya. 7Gaa tattuwe ka tatta ka asaakargeyyo kee Lisiyas soopa moogiɗe ga asinni torooriya, gaa cawwiniiga min pittini. 8Gaa Lisiyas beneyyiyyoo oko giimi ma sakayya gaa gu asiya sakkiya wikircum. Oko keeke pa tattuwe, kii inniya gimu keeke, ga kii saa kulla ebenna kadar gi loomantini parattí ay butulti appe.» 9Guu Yawudigee oyyikki beneyti Tertulus goo: «Haa! Beneyti keeke paratti maa ga beneyya ay tirta.»

Pol eperraca kayaati unti guberner Pelis

10Gaa guberner Pelis cipiliyyee pitti oko Pol gaa ga beneyyu. Gaa Pol waciɗe ga beneyyiɗe gaa: «Na lekka kabarre kadar ga ay kii ma caɗaani parlane oko nii Yawudigeyyo min ƴilaakeyyo ya haŋka. Na parhanne maa na ipiricca kayaatu uncum. 11Kii saa kulla aawiy ƴa gaari kooko! Maa na kaatiɗe Zerizalem aabiditi Mellayi, gu meenitaw ƴiila ɗa orro o seera. A gaa moomo pa ki addo inna. 12Lekka ɗa gimu ma gassinoo naa ecekke meela ma gimu e baŋ na esekkayooca oko giimo, baŋ ga dooranti girti Mellayi, e baŋ ga aɗicco gerraco Yawudigeyyo ka giraaniti e baŋ ga were ka timmico giimi ku geegarri. 13Giimi kooko gederra ɗa gu gassiyyaw er̰n̰e maa gu garaam haŋka. 14Haŋka pa na gederra na beneyyiyya keeke uncum: Na lobokkee oko Mella Milco kookuweetini, naa joboɗɗo butulti Iisa. Guta pa goo ga botol kaaka miɗɗa ka, naa soopa amanne oko Kitamniti Muusa o oko kutubgeeco nabiinigeyyo. 15Lekka latta kaƴi maa na ocokke ma amanno, o giimi ma loomoyyinoo kulla ocokke aleŋ tanni, kadar ga Mella akkiy naɗa min muuti giimi ku ɗayaŋ o ku ɗayaŋ ɗa. 16Ay ɗakko appe na asarɗe diiman ku maa gi mooyitu alɗo lekka ɗa loomane unti Mellayi o unco giimo.

17«A mileŋ na leelo ƴilaakee maani bala kaato Zerizalem pa, na asee na eterɗiyo gurus oko gimtaw ku maa na gaayiɗiy o na sooƴe saɗikane oko Mellayi. 18Ay kaaka appe ay lubbitu maa na leewa maa gu deeɗino gassa dooranti girti Mellayi: Naa gakammica ka apiltu maa na deeɗo samaane unti Mellayi. Lekka ɗa giimi maani ma naa, o ya hawwane kulla lekka ɗa. 19A ma gassinoo soopa aatti girti Mellayi ay Yawudigee daare ku diyargee ku kiɗa ta Aazi. Ay guta ampane kee ma asaa gu asinno luumiya uncum, guu lekka beneyyiŋgee ma gaartaw. 20Giimi kooko ma ase min Zerizalem ma aaye iŋee, gu gaariy ƴa gaari ku miɗɗa ta kaw maa gu gassiyaw wikinne maa na alɗo unco taattuwee ku parlanti. 21Na leelo latta kaƴi ka, maa na beneyyiɗe ma raɗɗa unco taattuwee kotti naa: Na ocokke ma amanno kadar ga Mella akkiy naɗa giimi ku mattenta o ga ay ma keeke appe ku caɗawɗinaw parlane haŋka!»

22A Pelis pa, mileŋ ga ibiniy gaari ku butulti Iisa, ga n̰aamica omma parlane gaa beneyyiyyoo oko giimi ma loomoyyiya Pol gaa: «Gaa tattuwco asaakargeyyo kee Lisiyas aseero, na akkitoŋgu caaɗa ka pe gaartoŋ kooko.» 23Gaa beneyyiyyee oko tattuwco asaakargeyyo gaa ga issiyya Pol daŋayi, innasoopa ga dowwe aɗe o gimtee kulla ga dowwayo gu asawɗee gu gayawɗiya.

Pol nowotta ƴilaakee seera daŋayi

24Maa gu leeɗe meeni, gaa Pelis asiɗe ma daatti tee Dursila. Gita pa ay Yawudiŋga. Gaa Pelis n̰aamiyyee oko Pol ga asiɗe, gaa gewɗiya beneyyi ta amanno oko Iisa Masi. 25Maa ga Pol soopa diiliɗe ga beneyɗo ma gaari ku nunto ta ɗayaŋ o ma ka gederro ta galbanti o ta zii, o ma ka parlane ta omma, ga Pelis gi kelemti oome, gaa beneyyiɗe gaa: «Haŋka ki addo appe ƴa, naa gasse wikinne pa, naa jooriɗum ka pe.» 26A oko kanti ka pa ga moyee gaa walaŋ pe ga Pol beree gurus. Ay ɗakko appe ga kolowɗiya diiman wikirti gu beneyɗo. 27Maa gu nuntiɗe ƴilaakee seera omma, gaa guberner Pelis gu magiyya ma Porsiyus Pestus. Gata kaaka pa duwiyee kanti oko Pol daŋayi, asan ga aŋka ga deeɗiyo daanayo oko Yawudigeyyo.

Currently Selected:

Lubaakico N̰amaakeetee Iisa Masi 24: mmy

Highlight

Copy