Lubaakico N̰amaakeetee Iisa Masi 23

1Maa ga Pol asiɗe unco, gaa elelɗiy saa ƴoy taattuwee ku parlanti. Gaa beneyyiyyoo gaa: «Seneeta! Na lekka kabarre kadar gi nuntitu unti Mellayi ɗayaŋ namma ya meene teete. Oko keeke pa gi mooyitu lekka ɗa loomane.» 2Gaa tattuwco oko taattuweeco soƴoowee ku saɗikaŋgeyyo maa goo Ananiyas beneyyiyyoo oko giimi ma aaye saripti Pol kotti gaa: «Ɓaacineegu ƴa beneetee kotti.» 3Gaa Pol beneyyiyyee gaa: «Kii kulla ga Mella ɓacaam! Kii ma ay aleŋ durdurre ka oppenta guu tolsoyɗiya ga alɗo purta. Kii nowoɗɗe iŋee ki caɗawɗaw parlane ma hukumnigeetee Muusa o ga kii pa ma kayaacum kulla palee min oko hukumnigeyyo, kii berewɗo botol maa gu tamminno?» 4Guu giimi ma aaye saripti Pol kotti beneyyiyyee goo: «Ki n̰elekkaa tattuwco oko taattuweeco soƴoowee ku saɗikaŋgeyyo oko Mellayi?» 5Gaa Pol tiiliyyoo gaa: «Seneeta, naa ɗe lekka ɗa kabarre kadar ga ay tattuwco oko taattuweeco soƴoowee ku saɗikaŋgeyyo. Na ibina kadar gi Kitamniti Mellayi beneyye gee: “Ki n̰elekka ɗa tattuwco gimcam#23.5 Elloŋ Oomiti min Masir 22.27.!”»

6Pol pa lekka kabarre kadar gu taattuwee ku parlanti amasse. Daare ƴa ay Saduseyennigee o daare pa ay Pariziyennigee. Ay ɗakko appe ga beneyyiɗe ma raɗɗa unco gaa: «Seneeta, naa ay Pariziyennice o tattu kulla ay Pariziyennice. Na ocokke ma amanno kadar ga Mella akkiy naɗa giimi ku mattenta o ga ay ma keeke appe ku caɗawɗinaw parlane haŋka!» 7Gaa maa gu Saduseyennigee o Pariziyennigee giyyiyya beneyti kaaka, guu kaltiyɗe aacco, guu darɗe durgee seera. 8Ku ma ay Saduseyennigee ɗe goo gu giimi ku mattenta naɗakka ɗa payya o malaykatnigee o sawaataŋgee o ruuhaŋgee lekka ɗa. Pariziyennigee pa, guta amanne kadar gu giimi ma matakke akka naɗa o malaykatnigee o sawaataŋgee o ruuhaŋgee kulla lekka. 9Guu kaltiyɗe namma gu cipilɗe hawwane yaata. Gaa min aacco Pariziyennigeyyo gu daare ma ay min oko aalimnigee ku Kitamniti Muusa waciɗe gu makkiɗe goo: «Ni gassiyee ɗa ta kaw ka miɗɗa oko gimu keeke. Alaa gi ruuhane ma gaariyee e baŋ ga malaykat ma beneyyiyee.»

10Gii hawwanco kaawiɗe namma ga tattuwe ka tatta ka asaakargeyyo ɓayɗe gaa walaŋ gu erekkaa Pol. Ay ɗakko appe ga beneyyiyyoo oko asaakargeyyo gaa: «Beeroŋ, ku deeɗiya cimma Pol min aacco giimo. Kuu yookikkiki ger ka tatta ka asaakargeyyo.» 11Gaa ma aandoŋ kaaka aɗe ga Miltine kee Iisa asiyyee beneyya oko Pol gaa: «Asarrica galbancum! Aleŋ maa ki beneyyiɗiy gaartaw maa ki elle o maa ki giyye iŋee Zerizalem, ki aɗiy beneyya kulla gonek geegar ka Rooma.»

Halpiyo ta diyawti Pol

12Gaa ma ta sokkonta ma sossoko, gu Yawudigee daare timmiɗe ma ƴaapo ka, guu boodiɗe, guu halpiyɗe unti Mellayi goo gu teewa ɗa o gu ar̰aa ɗa ya maatiki guu deyya ɗa aɗe goŋŋa Pol. 13Giimi ma halpiye kotti pa goŋŋa, ƴiila orooruwee pooɗi. 14Guu kaatiɗe gu deeɗiy gassa taattuweeco soƴoowee ku saɗikaŋgeyyo o ajaawaŋgee. Guu beneyyiyyoo goo: «Ni icce niyyane ma haliipine unti Mellayi nii ni akaa ɗa ya maatiki illa nii deyya Pol. 15Haŋka pa ma oyyico oko taattuwee ku parlanti paracco, ku innaniiga tattuwe ka tatta ka asaakargeyyo ga birittoŋga payya Pol o ku leene kuu ku aŋka ku elliyyeegu payya gaartee samaane. Niita pa kulla esekke guba ni deeɗiya butuuli maa ga alɗitoŋ sara ɗa.»

16Gaa lekkiɗo soopa runtí oko sutti Pol ma giyyiy maa gu beneyɗo goo gu aŋka diyawti Pol. Gaa gaɗɗiyyee oko Pol ger ka tatta ka asaakargeyyo ga deeɗeeca iyya diiti ma gaarco giimi ma aŋka diyawti. 17Gaa Pol jooriɗe tattuwe ka asaakargeyyo kaƴi, gaa beneyyiyee gaa: «Arki ɗibilu keeke oko tattuwtoŋ ka tatta asan ga lekka beneyyi maa ga aŋka ga beneyyiyyee.»

18Gaa tattuwco asaakargeyyo kaatikkiki ɗibilu gata wikirti tattuwco ka tatta, gaa beneyyiyee gaa: «Pol maa ke bakamme kollinoo. Gaa leeɗiyaw gaa na itiramga ɗibilu keeke, gaa ga lekka beneyyi maa ga aŋka ga beneyyiyyamga.» 19Gaa tattuwe ka tatta baamiyya ɗibilu min pitti. Gaa tirriyiyya jeres. Gaa inniyya gaa: «Ki lekka me beneyta maa ki aŋka ki beneyyiyyaw?» 20Gaa ɗibilu kaaka pa tiiliyyee gaa: «Yawudigee daare waaciy kayyeeco ku maa gu asiɗum inna ki biriyyooga Pol sokkoŋ, gu kaatikkiki unco taattuwee ku parlanti ku maa gu elliyyeegu payya gaartee samaane ƴiila. 21Kii soopa ayya icca ɗa beneyco kaaka. Ku ma esekke guba pa ƴiila orooruwee pooɗi, o gu halpayye goo guu deyya ɗa aɗe goŋŋa Pol gu teewa ɗa o gu ar̰aa ɗa ya maatiki. Guta pa yayyamme paaɗe ocokke pe oyyicum ka.» 22Maa ga tattuwe ka tatta ka asaakargeyyo giyyiyya beneyti ɗibilu kaaka, gaa leeɗiyee gaa: «Ayya beneyya ɗa oko giimi beneyyi keeke maa ki beneyyiyaw.» Gaa leeɗiyee gaa: «Addo paaɗe.»

Pol gu katawki wikirti guberner Pelis

23Gaa tattuwe ka tatta ka asaakargeyyo, kolliɗe taattuweeco asaakargeetee seera, gaa beneyyiyyoo gaa: «Timmoŋ miyaŋgee seera ku asaakargeyyo, o melleeco boor̰eyyo orooruwee paysara, o miyaŋgee seera miɗi ma jolleeco, kuu yayyimɗo koɗok ku kaatiɗo Sezaree ma saha parnakaƴi ta aandoŋŋi, 24o ku apiroŋ kulla boor̰ee maa ku kalpiyya Pol ku kaatikkiki ma aapiya wikirti guberner Pelis.» 25Gaa tattuwe ka tatta ka asaakargeyyo r̰an̰n̰iɗe kulla maktup ku maa gu itiriyyeeca oko guberner Pelis. Aattí pa ga ketepeyye gaa:

26«Naata Kilodiyus Lisiyas, na salammum ki guberner kee Pelis ka nabbisenta. 27Yawudigee baamiya gimu keeke maa na n̰akammamga o gu boode kulla ma ka diyawti. Gaa maa na giyyiɗe kadar ga ay Roomennice pa, na moogiɗe ma asaakargeetaw ni asiyya cawwa min picco. 28A mileŋ na aŋka na ibinɗiy gaari maa gu loomoyɗiya pa, na kaatiki unco taattuwee ku parlanti. 29Naa leeɗe kabarre kadar gi loomanco taata ay ma gaari ku hukumnigeeco. A gaa oko hukumnigeeco Roomennigeyyo pa, ni gassiyee ɗa er̰n̰e maa ni deeɗiya e baŋ pa ni issiyya daŋayi. 30Maa na giyyiɗe pa kadar gu Yawudigee aŋka diyawti gimu keeke ma isso ta gubaati, na itiramga saa koɗok. Naa beneyyiyyoo oko giimi ma loomoyyiya naa gu addo sakkiya wikircum.»

31Guu asaakargee leeɗiya aleŋ maa ga tattuwco ka tatta beneyyiyyoo. Guu kaatikkiki Pol min Zerizalem ma aandoŋ kaaka aɗe namma ya geegar ka Antipatiris. 32Gaa ma ta sokkonta gu asaakargee ma tan̰ee ka yookiɗe ger ka tatta ka asaakargeyyo, ma kalappe boor̰ee pa ƴiiliki Pol Sezaree wikirti guberner Pelis. 33Maa gu asaakargee ma kalappe boor̰ee sarɗe Sezaree, guu deeɗeeca bira maktup oko guberner Pelis o Pol kulla gu kappeega. 34Maa ga guberner Pelis garkiyicca maktup taata, gaa inniyya Pol gaa: «Kii ay min kiɗa ŋawwa?» Gaa Pol pa tiiliyyee gaa: «Naa ay min kiɗa ta Silisi.» 35Gaa guberner beneyyiyyee payya gaa: «A gaa ay goŋŋa pa, ke uceŋgu giimi ma bakammiyam gaari gu asiɗo. Guu ase pa, naa caaɗittoŋca ka pe parlane.» Gaa beneyyiyyoo oko asaakargeyyo gaa gu arki kaar̰e maa ga sultan Erod gekee.

Currently Selected:

Lubaakico N̰amaakeetee Iisa Masi 23: mmy

Highlight

Copy