Lubaakico N̰amaakeetee Iisa Masi 22

1«Gayyee o seneeta, giyyoŋga ƴa beneytu keeke maa na beneyyatoŋ haŋka ku maa na ipiricca kayaatu.»

2Maa gu giyyiyya Pol gaa beneyya ma beneyco Ebireenigeyyo, guu ƴaapiɗe yil. Gaa Pol beneyyiyyoo gaa: 3«Naa ay Yawudince maa gu weewe geegar ka Tarse ma aaye kiɗa ta Silisi, innasoopa na maɗee iŋee Zerizalem. Garaawatu pa ay Gamaliyel. Gata garkiynoo baŋ na ebennay naa me talta hukumnigeeco kookuweetine. Naata sokokkiya ziitu oko Mellayi kulla aleŋ tantoŋ oko kuŋ keeke aɗe meente. 4Na diigiyiy namma ya diyaawi giimi ma jobokka butulti Miltine kee Iisa. Na bammiy miɗi o daatti, naa issiɗiy daŋayi. 5Tattuwco oko taattuweeco soƴoowee ku saɗikaŋgeyyo o ajaawaŋgee paracco ku Yawudigeyyo gederra gu beneyyittoŋ kadar ga beneytu keeke ay seene. Guu guta saa biriyyaw makaatapgee oko seneeta ku Yawudigee ku geegar ka Damas. Makaatapgee kotti pa beraw botol ku maa na bammiɗiy giimi ma dowwiy galbigeeco oko Iisa, na asikkiko iŋee Zerizalem na asiɗiy issa daŋayi.

6«Maa na katawɗo na garribiɗe Damas, wikinne ka gaayilti, gaa kaytiŋ ka gi bahaarane yaata beeriɗe min samaani gi asinnoo kadira. 7Naa galɗe karap kiɗaati. Naa giyyiɗe ur̰e ma kolaano gee: “Sol, Sol ayme ki deegeyɗino?” 8Naa inniɗe naa: “Miltu kii ay we?” Gii ur̰e taata tiiliyyaw gee: “Na ay Iisa ka Nazaret maa ki deegeyye.” 9Guu gittaw maa ni marawɗe kulla ellicca bahaarane taata o ur̰e ma beneyyiyaw, innasoopa gu giyyica ɗa. 10Naa inniɗe naa: “Miltu, na lee pe naa me?” Gaa gata pa tiiliyyaw gaa: “Wacu, addo Damas, iŋaa pa, lekka gimu ma deeɗam beneyya ma gaari paracco maa ga Mella aŋka ki leeɗiy.” 11Gii ɓeelití bahaarane taata koor̰uwinnoo. Guu gittaw maa ni marawɗe bamminoo min pittaw gu ɗan̰n̰innoo namma ya Damas.

12«Gaa iŋaa pa aatti Damas, ga lekkiɗo miiɗi kaƴi aɗe maa gu semeetee goo Ananiyas. Gata kaaka pa, soporrica galbanti ma ka Mellayi o ga bakammiy samaane hukumnigeetee Muusa, o Yawudigee paracco ku Damas beneyya ma gaartee ku samaane. 13Gaa Ananiyas asinno gassa, gaa beneyyiyaw gaa: “Sol sintu, gu iɗiicam iyyu!” Gaa oko wikinne kaaka saa gu iyyiyyaw payya, na elliyya saa kar̰aŋ. 14Gaa beneyyiyyaw payya gaa: “Mella Milco kookuweetine apirum min omma ku maa ki ibiniyya latta ma daanee o ki elliyya gata ka kayti ka ma ɗayaŋ ta kaw o ki giyyicca ur̰uuti. 15A gata pa aŋka ki deeɗo suyuudinti unco giimi paracco oko maa ki elle o maa ki giyye. 16Haŋka pa, ki ocokka payya ini me? Wacu, addo gu deeɗum batisiya. Kii wakkiɗiy semeetee Iisa, gaa Mella saamiyamgu zunubgeecam.”»

17Gaa Pol beneyɗo missa gaa: «Naa yookiɗe Zerizalem naa deeɗe un̰n̰a dooranti girti Mellayi, naa deeɗiya inna. Gaa iŋaa gi asiyyaw aleŋ waano. 18Naa elliyya Miltine kee Iisa, gaa beneyyiyyaw gaa: “Oomu koɗok min Zerizalem asan gu giimi kooko ecekkaa ɗa beneycum maa ki beneyya ma gaartaw.” 19Naa tiiliɗe naa: “Miltu, guta saa kulla lekka kabarre kadar na kataa gerraco Yawudigeyyo ku giraaniti bammico daŋayi o tammico giimi ma dowwiy galbigeeco oko kii. 20Maa gu deeɗiya suyuudincum kee Etiyen ga naa kulla aaye. Naa kulla ga beneytu kaƴi aɗe ma giimi ma deyya kotti, o ga naa appe ma ecekkiy kaɗiŋgeeco maa gu setekke.” 21Gaa Miltine soopa leeɗiyaw gaa: “Addo kancum, ay naa ma n̰akammam arro min iŋee, oko giimi ma ay Yawudigee ɗa.”»

Pol ma tattuwe ka tatta ka asaakargee ku Rooma

22Gaa maa gu giimi giyyiyya beneyti Pol kaaka, maa gaa ga kataa oko giimi ma ay Yawudigee ɗa, guu cayyikiɗe goo: «Gimu keeke ku misiloŋga maaƴi, ga addo nunta ɗa payya dunuuniti!» 23Guu cayyakɗo ka gu cayyakɗo ta ƴiila ma raɗɗa. Guu settiɗiy kaɗiŋgeeco gu soƴoɗɗiy ta uwwa o gu soƴokka kiɗa uwwa. 24Gaa tattuwe ka tatta ka asaakargeyyo beneyyiyyoo oko asaakargeetee gaa gu issiya Pol ger ka tatta ka asaakargeyyo, guu zondiriyya ga ziiti kuɗisiɗo ku maa ga cimmicca seeniti, o ku maa ga tattuwe ka tatta ibinɗo baŋ ga ayme gu giimi cayyakɗo goŋŋa ma gaartee. 25Gaa askar ka kaƴi diiliɗe ga onoɗɗiya ku maa gu zondiriyya. Gaa oko wikinne kaaka ga Pol beneyyiyyee oko tattuwco asaakargeyyo kaaka ma waraɗɗe saripti gaa: «Ku lekka aɗe botol maa ku tammiɗo Roomennice maa ku caɗawwiyee ɗa missa parlane?» 26Maa ga tattuwco asaakargeyyo giyyiyya beneyti Pol kaaka, gaa kaatiɗe ga deeɗiyee taasa oko tattuwe ka tatta ka asaakargeyyo gaa: «Kii leewa me keeke? Gata gimu keeke maa ga ay Roomennice.» 27Gaa tattuwe ka tatta ka asaakargeyyo asiyya gassa Pol, gaa inniyya gaa: «Beneyyaw ƴa! Ay ma seene aɗe ki ay Roomennice e?» Gaa Pol tiiliyyee gaa: «Haa! Na ay Roomennice.» 28Gaa tattuwe ka taata ka asaakargeyyo leeɗiyee gaa: «Naa bire ƴa omma gurus maani hatta na deeɗe Roomennice.» Gaa Pol pa tiiliyyee gaa: «A naa pa ay min wiyawtu saa.»

29Gaa koɗokka saa gu asaakargee ma aŋakke tammiti cappiyyee. Gaa tattuwe ka taata saa kulla ma kayaati ɓayɗe asan ga onniya paaɗe ma jinzirre, o ga ibine kulla kadar ga Pol ay Roomennice.

Pol aaye unco taattuwee ku parlanti

30Gaa ma ta sokkonta, ga tattuwe ka tatta ka asaakargeyyo aŋkiɗo ga ibinicca balco gaaro maa gu Yawudigee loomoyɗiya Pol. Ay ɗakko appe ga beneyyiyyoo oko taattuweeco soƴoowee ku saɗikaŋgeyyo o taattuwee paracco ku parlanti gu timmiɗo. Gaa ipiriyyee oko Pol, gaa kaatikkiki unco.

Currently Selected:

Lubaakico N̰amaakeetee Iisa Masi 22: mmy

Highlight

Copy