Yohana 15

Yëësu we omozabhibhu ughwa heene

1Yëësu akaghëndërrya ököbhëëghya igha, “Öni no-mozabhibhu ughwa heene ndë, na Taata we ömörëmi. 2Kera risagharya reno retakwama sehagho na mbe nku-öni rërë, Taata nkuriruusya arë ku-öni. Kasi kera risagharya reno rikwama sehagho, Taata nkoreharörrya arë, okore ryame bhököngʼu. 3Bhëënyu bhoono, m-buuya mörë, ko okoghera iya amëëghyö ghayö mbëëghëri. 4Mobhe na öbhömwë na öni, na öni wonswe nendaabhe na öbhömwë na bhëënyu. Kya bhono mokomaaha risagharya retakotora ukwama sehagho iryene igho, hano retaghotaini na omozabhibhu, ni-ighoigho na bhëënyu bhonswe, temotore ukwama sehagho hano motaabhe ëkëntö ëkëmwë na öni.

5“Öni no-mozabhibhu ndë, na bhëënyu na amasagharya aghaane mörë. Ono araabhe na öbhömwë na öni, na öni mbe ëkëntö ëkëmwë nawe, naraame bhököngʼu, ko bhoora hano motaabhe hamwë na öni, temokore engʼana hë. 6Ömöntö wowonswe ono ataana öbhömwë na öni, uyö natuubhaini na risagharya reno resabhööywë, retabhutirwë kora ryömirë. Mbe, ömöntö nkobhoosha arë risagharya kya riyö, aretabhuta mo-morro, rerongora. 7Bhëënyu hano moraabhe na öbhömwë na öni, na amangʼana aghaane ghonswe ghaikare mö-bhëënyu, kyokyonswe keno mukutuna, mosabhe Taata, naraabhahaane. 8Hano moraame sehagho sinsharu na okobha abheegha abhaane abha heene, hayö noraanyoore möröörökya ubhuhika ubhwa Taata aharabhurabhu igho. 9Kya bhono Taata anhanshirë, ni-igho na öni wonswe mbahanshirë, ku bhuyö mwikare mu-righonshe iryane. 10Hano moraaghoote imighiro ighyane, moraaikare mu-righonshe iryane. N-kya hano öni naaghöötirë imighiro ighya Taata, nkaikara mu-righonshe iryaye.

11“Mbatëëbhëri amangʼana ghayö, okore mushomerwe kya bhono öni nkushomerwa, kora ukushomerwa ukwënyu kohekerane.

12“Umughiro ughwane ghono nkobharaghërrya, n-goono hano igha, mohanshane, kya bhono öni mbahanshirë. 13Taaho ömöntö ono aana righonshe rinene, okokera righonshe irya ömöntö ukuruusya öbhöhöru ubhwaye, ko okoghera iya bhasaani abhaaye. 14Nyoore mokora ghano nkobharaghërrya, momanye igha bhoono hayö, mobhaayë bhasaani abhaane. 15Tembabherekere ghwiki igha m-baghorwa mörë hë, ko bhoora omoghorwa tamanyirë keno omonene uwaaye akokora hë. Kasi bhëënyu mobhaayë abhasaani abhaane, ko bhoora nembahönyörrëëyë ghonswe igho ghano naaighuurë ko-Taata. 16Të-bhëënyu mwaanshaaghora hë, kasi nö-öni naabhashaaghora. Mbatöörrë-ho igha, moghende mwame sehagho seno setakohwa, okore kyokyonswe igho keno moresabhanga Taata okohetera ku iriina iryane, narebhahaana. 17Mbe, nkobharaghërrya ndë igha, mohanshanenga.”

Abhantö abha ko-kebhara kono mbarëghirë bhano bhakukumya Yëësu

18Yëësu akaghëndërrya ököbhëëghya igha, “Nyoore abhantö abha ko-kebhara kono mbabharegha, momanye igha, nö-öni bhaatangata okoregha. 19Singa na-abha ko-kebhara kono mörë, abhantö abha ko-kebhara kono, mbakaabhahanshirë kya bhono bhahanshirë abhakebhara bharikyabho. Kasi ko bhono naabhashaaghora ukurwa ko-bhantö abha ko-kebhara kono, tëmörëngë abha ko-kebhara kono hë, kiyö nkyo kekoghera abhantö abha ko-kebhara kono bharabharegha. 20Motakeebha ghano naabhatëëbhëri igha, ‘Omoghorwa, taatore okobha omonene kokera omonene uwaaye hë.’#15:20 Maaha mo-ketabho ikya Yohana 13:16. Mbe, nyoore bhaannyankëri, na bhëënyu bhonswe mbaraabhanyanki. Nyoore bhaghöötirë amangʼana aghaane, aghëënyu ghonswe mbaraaghaghoote. 21Kasi bharebhakorra ghayö ghonswe igho, ko bhoora igha, m-basoorani abhaane mörë. Kora ghwiki n-ko okoghera iya bhoora bhatamanyirë ono yaantoma. 22Singa ntaasha nshumaashe nabho, tebhakaabhaayë na ëbhëbhë hë. Kasi bhoono, tebhaana ikitamërryö ikya ëbhëbhë ibhyabho hë. 23Ömöntö ono akondegha, nkoregha arë na Taata wonswe. 24Singa ntakora emeremo gheno ghetakokorwa na ömöntö wowonswe oora, tebhakaabhaayë na ëbhëbhë hë. Kasi bhoono, bharööshë emeremo gheno naakörrë, bhandëghirë öni hamwë na Taata wonswe. 25Amangʼana ghayö ghaabhaayë igho, okore ghahekerane Amaandeko Amahörëëru ghano ghakoghamba igha, ‘Bhaandëghirë bhosa igho.’#15:25 Maaha mo-ketabho ikya Zabhuri 35:19, 69:4.

26“Nentoma Ömötöörrya kö-bhëënyu, Ömötöörrya uyö we Umwika Ömöhörëëru ono akohonyorra abhantö bhonswe igho obhoheene. Nko-Taata akurwa, hano arihika, narimererra obhoheene ubhwa amangʼana aghaane. 27Kora na bhëënyu bhonswe muryemererra amangʼana aghaane, ko bhoora hamwë mwaarëkobhanga na öni, ukurwa okosemoka.

Currently Selected:

Yohana 15: ssc

Highlight

Copy