Yohana 16

1“Mbatëëbhëri amangʼana ghonswe igho ghayö, okore motakaatigha umukumo ughwënyu. 2Abhantö mbaraabharughi murwe mu-sinyumba isya esango iya Abhayahudi. Kora enkaagha irihika-ho, eno kera ömöntö ono arebhaita, arekanyanga igha m-buuya akokora ku-Waryobha. 3Mbaraabhakorre ghayö, ko bhoora bhatamanyirë Taata, na kora öni wonswe tebhammanyirë hë. 4Mbatëëbhëri amangʼana ghayö, okore hano enkaagha iyö irihika, muhiite igha, naabhatëëbhëri.

Emeremo ighya Umwika Ömöhörëëru

“Tenaabhatëëbhëri amangʼana ghayö ekembere, ko bhoora hamwë naarekobhanga na bhëënyu. 5Mbe, bhoono öni nkughya ndë ko-Taata, uyö we yaantoma kö-bhëënyu. Taaho ömöntö uwa ökömböörya igha, ‘Kana, hai ukughya?’ 6Kasi ndamanya mobhaabhayëëyë bhököngʼu mo-senkoro isyënyu, ko bhono mbatëëbhëri igha, ndaghya ko-Taata.

7“Nkobhatëëbhya ndë obhoheene igha, m-buuya kö-bhëënyu hano öni ndaaghi ko-Taata, kasi hano ntaaghi-yo, Ömötöörrya oora naabhatëëbhëri taashe hë. Kasi hano ndaaghi, nendaamotome aashe kö-bhëënyu. 8Hano Ömötöörrya uyö ariisha kö-bhëënyu, naryörökërrya abhantö abha ko-kebhara kono, amangʼana atatö agha obhoghogho ubhwabho. Amangʼana ghayö na-agha ëbhëbhë ibhyabho, obhoheene ubhwabho, na okobhotorrwa ukwabho ikiina na Waryobha. 9Ko amangʼana agha ëbhëbhë ibhyabho, n-ko okoghera iya ukwanga ukunkumya. 10Ko amangʼana agha obhoheene ubhwabho, n-ko bhoora öni nkughya ko-Taata, ghwiki temoremaaha röndë hë. 11Ko amangʼana agha okobhotorrwa ukwabho ikiina, n-ko bhoora Oghosambwa ghono ghokotonga ko-kebhara kono, ghwamara okobhotorrwa ikiina.

12“Amangʼana m-maaru nkenagho agha okobhatëëbhya, kasi temotore okoghamanya ko bhoono igho hë. 13Kasi Umwika uwa heene oora hano ariisha, narebhahonyorra amangʼana agha obhoheene bhonswe igho. Narekora igho ko bhoora tareghambanga ko bhono umwene akutuna hë, kasi nareghambanga ghano urinyoranga araighwa, narebhatëëbhya kora na amangʼana ghano gharebha mbere iyö. 14Umwika uyö, narëbhööryökya ubhuhika ubhwane, ko bhoora arebhatëëbhya ghano arinyooranga ukurwa ku-öni. 15Ghonswe igho ghano Taata aanagho, na-ghaane. Kiyö nkyo këghërrë ngambirë igha, ghano arinyooranga ku-öni, ngo arebhatëëbhyanga.

Okobhaabhayera nkoraaisyöri okobha ukushomerwa

16“Ritighaayë ribhagha ike igho, temommaahe hë, ghwiki ribhagha riike riyö hano reraahete, mommaaha.” 17Mbe, abheegha abhaaye abhandë bhakabhoorania igha, “Në-ëëhë ensonga iya ghayö akoghamba igha, ‘Ritighaayë ribhagha ike igho, temommaahe hë, ghwiki nderaahete ribhagha ike igho, mommaahe,’ na iyö akoghamba igha ‘N-ko bhoora öni nkughya ko-Taata’?” 18Mbe, bhakaghëndërrya okobhoorania igha, “Ensonga iya amangʼana ghano igha, ‘Ribhagha ike igho,’ në-ëëhë? Bhëëtö tetomanyirë keno akoghamba hë.” 19Yëësu akamanya igha bhaatunanga bhamöbhööri, ku bhuyö akabhabhöörya igha, “Nkobhoorania mörë ko engʼana eno ngambirë igha, ‘Ritighaayë ribhagha ike igho, temommaahe hë, na ghwiki igha nderaahete ribhagha ike igho, mommaahe’? 20No-bhoheene nkobhatëëbhya igha, bhëënyu moraakuure kora mobhaabhayere, kasi abhantö abha ko-kebhara kono, mbaraashomerwe. Moraabhaabhayere, kasi okobhaabhayera ukwënyu nkuriisyörya kobhe ukushomerwa ukwënyu. 21Amangʼana ghayö, n-kya hano ebhesa bhyaroma omokari ono akutuna ukwebhora. Kasi hano yamara ukwebhora, takuhiita ghwiki inyanko iya ebhesa hë, iyö n-ko okoghera iya ukushomerwa igha, anyöörrë omoona. 22Ni-ighoigho kora na bhëënyu bhonswe mobhaabhayëëyë, kasi nendaashe mmaahane ghwiki na bhëënyu, mushomerwe mo-senkoro isyënyu. Taaho ömöntö araabharuusiri-ho ukushomerwa ukwënyu kuyö. 23Ghwiki enkaagha iyö hano irihika, temoresabha engʼana yoyonswe igho hë.

“No-bhoheene nkobhatëëbhya igha, kyokyonswe igho keno moresabhanga Taata okohetera ku iriina iryane, narebhahaana. 24Kasi nanyabhoono, temoraasabha kyokyonswe igho ku-Waryobha okohetera ku iriina iryane. Motasabha ku-Waryobha naraabhahaane, okore ukushomerwa ukwënyu, kohekerane.

Yëësu nabhaahirë obhoghogho ubhwa ko-kebhara

25“Mbarëngëëyi amangʼana ghayö kö-bhërëngyö, kasi enkaagha iriihika-ho eno ntarebharëngëryanga, ko bhoora nindishumaashanga na bhëënyu harabhurabhu igho amangʼana agha Taata. 26Ko-nkaagha iyö, moreesabhanga Waryobha okohetera ku iriina iryane. Tenkoghamba igha nembasabhera ko-Taata. 27Taata we nabhahanshirë, ko bhoora monhanshirë, kora nkukumya mörë igha nko-Taata Waryobha naarwa. 28Nko-Taata naarwërëëyë nkaasha ko-kebhara kono, bhoono hayö, nko-kebhara kono nkurwa, ndakyora ko-Taata.” 29Mbe abheegha abhaaye bhakaghamba igha, “Tamaaha mbe, bhoono nkoghamba örë bhuuyabhuuya igho, kora tökörëngya ëbhërëngyö hë. 30Bhoono tomarrë okomanya igha, nomanyirë ghonswe igho, tekeeho ikibhuno ikya ömöntö ököbhöörya engʼana yoyonswe eera hë. Ku bhuyö tomarrë ukukumya igha, nku-Waryobha waarwa.” 31Yëësu akabhabhöörya igha, “Bhoono mukumiri? 32Tamaaha, enkaagha iriihika, kora emarrë ukuhika, eno murinyaraghana, kera ömöntö aghende waaye, muntighe öni umwene. Kasi tëndëngë öni umwene igho hë, ko bhoora Taata hamwë arë na öni. 33Mbatëëbhëri amangʼana ghayö, okore mobhe na omorembe ko bhoora moona öbhömwë na öni. Moona inyanko ko-kebhara kono, kasi motakaakwa emetwe, ko bhoora öni nabhaaha ekebhara keno.”

Currently Selected:

Yohana 16: ssc

Highlight

Copy