Yohana 14

Enshera iya ukughya ku-Waryobha

1Yëësu akaghëndërrya ukwëghya abheegha abhaaye igha, “Motakaabhaabhayera mo-senkoro isyënyu, mukumi Waryobha, kora na öni wonswe munkumi. 2Umweya mu-nyumba iya Taata, m-moghare ghoomo, hano etakaabhaayë igho, nenkaabhatëëbhëri. Ko bhoora nkughya ndë okobhasëëmërya ahasë. 3Mbe, hano ndaaghi okobhasëëmërya ahasë, nendaamare nkyore ököbhööhya, okore ahasë hano ndaabhe, na bhëënyu mobhe-ho hamwë na öni. 4Bhëënyu mmomanyirë enshera iya ukuhika iyö nkughya.”

5Mbe, Toomasi akabhöörya Yëësu igha, “Omonene, bhëëtö tetomanyirë ahasë hano ukughya, bhoono iyakë toraamanye enshera?” 6Yëësu akamohonshora igha, “Öni nö-öni enshera, obhoheene, na öbhöhöru. Taaho ömöntö wowonswe igho ono akotora ukuusha ko-Taata, atahëtëëyë ku-öni. 7Hano mokaammanyirë, Taata wonswe mokaamomanyirë. Ndamanya kora bhoono momomanyirë, kora mwamomaaha.”

8Firipö akamötëëbhya igha, “Omonene, twöröki Taata, iyö yo engʼana eno tukutuna.” 9Yëësu akamohonshora igha, “Kerenga naabha hamwë na bhëënyu ribhagha ryangʼana hayö Firipö, tuwakaammanyirë hë? Ömöntö ono andööshë, uyö n-Taata arööshë, bhoono n-kwakë ököntëëbhya igha, ‘Utwöröki Taata?’ 10Kasi tukukumya igha öni m-mönsë iya Taata ndëngë hë? Amangʼana ghayö nkobhatëëbhya, teghakurwa mo-maitegherro aghaane hë, kasi nko-Taata ghakurwa ono arëngë mönsë iyaane, uyö we akokora emeremo ighyaye gheno. 11Mukumi igha öni neena öbhömwë na Taata, na Taata wonswe naana öbhömwë na öni! Nyoore motakwikërrya engʼana iyö, mwikërri mbe ko okoghera iya emeremo gheno nkokora. 12No-bhoheene nkobhatëëbhya igha, ömöntö ono akunkumya, naraakore emeremo gheno öni nkokora. Kora ghwiki naraakore emeremo okokera ghiyö nkokora, ko bhoora nko-Taata nkughya. 13Ëkëntö kyokyonse keno moraasabhe okohetera iriina iryane, nendaabhakorre, okore Taata atöönibhwi okohetera ko-Moona uwaaye. 14Ëkëntö kyokyonswe keno moraansabhe okohetera ku iriina iryane, kiyö nendaakekore.

Yëësu arashumaashera ukuusha ukwa Umwika Ömöhörëëru

15“Hano moraanhanshe, moraaghoote imighiro ighyane. 16Mbe, na öni nendaasabhe Taata, abhahaane Ömötöörrya uwöndë, ono araabhe hamwë na bhëënyu nkaagha syonswe igho. 17Uyö we Umwika uwa obhoheene. Abhantö bhano bhatakwighwera Waryobha, tebhatore ukumwikërrya hë, ko bhoora tebhakomomaaha hë, kora tebhamomanyirë hë. Kasi bhëënyu momomanyirë ko bhoora hamwë arë na bhëënyu, kora mö-bhëënyu araabhe.

18“Tembatighe bhëënyu abheene igho kya sentakaana hë, kasi nendaashe ghwiki kö-bhëënyu. 19Akabhagha n-haangʼë karë abhantö abha ko-kebhara kono bhaange okommaaha, kasi bhëënyu moraammaahe. Ko bhoora igha öni m-möhöru ndë, na bhëënyu bhonswe moreebha abhahöru. 20Urusikö roora hano rurihika, hayö ho moremanya igha, öni m-mönsë iya Taata ndë, na bhëënyu bhonswe m-mönsë iyaane mörë, na öni m-mönsë iyëënyu ndë. 21Ömöntö ono amanyirë na okoghoota imighiro ighyane, uyö we anhanshirë. Ömöntö ono anhanshirë, Taata naraamohanshe. Na öni nendaamohanshe na ukwihonyora ko-we.”

22Mbe, umwegha uwöndë ono yaabherekerwanga igha Yuuda, kasi ti-Yuuda Isikariyote oora hë, akabhöörya Yëësu igha, “Omonene, iyakë ekobha igha oratuna ukwihonyora kö-bhëëtö, te-ko abhantö abha ko-kebhara kyonswe igho hë?” 23Yëësu akamohonshora igha, “Ömöntö wowonswe ono araanhanshe, naraaghoote amangʼana aghaane, ömöntö uyö naraahanshwe na Taata. Na bhëëtö bhonswe igho öni na Taata, ntoraashe tomenye hamwë nawe. 24Ömöntö ono atanhanshirë, uyö taghoote amangʼana aghaane hë. Amangʼana aghaane ghano nkoraghërrya ta-ghaane hë, kasi na-agha Taata ono yaantoma kö-bhëënyu.

25“Amangʼana ghayö ngo nkobhatëëbhya enkaagha eno nkërëngë hamwë na bhëënyu. 26Kasi Ömötöörrya uyö, Umwika Ömöhörëëru uyö, ono Taata araatome kö-bhëënyu okohetera ku iriina iryane, naraabhëëghi ghonswe igho, kora abhahiitöki ghonswe igho ghano naabhatëëbhëri. 27Motame na omorembe, omorembe ughwane ghuyö nkobhahaana, teghonga kya omorembe ughwa ko-kebhara kono hë. Motakaabhaabhayera mo-senkoro isyënyu, kora motakoobhoha kyokyonswe keera. 28Mwaaighwa ghano naabhatëëbhëri igha, ‘Nkughya ndë, kasi nindiisha ghwiki kö-bhëënyu.’ Singa monhanshirë, mokaashömëëywë ko bhoora nko-Taata nkughya, na Taata uyö, m-Monene okonkera.

29“Bhoono mbatëëbhëri amangʼana ghayö ghataraabha, okore hano gharebha, mukumi. 30Öni tentore ukushumaasha na bhëënyu ku-ribhagha ritambë hë, ko bhoora Oghosambwa öghötöngi ughwa ekebhara keno ghoraasha. Kasi teghoona ubhwera bhwobhwonswe igho ku-öni hë. 31Ghano nkokora n-gano Taata yaantëëbhya igha nkore, okore abhantö bhonswe igho bhamanye igha nemohanshirë.

“Bhoono, mwemoke toghende.”

Currently Selected:

Yohana 14: ssc

Highlight

Copy