Yohana 13

Yëësu araisaabhya amaghörö abheegha abhaaye

1Mbe, hano waanyöörrë inyangi iya Epasaka etaraabha, na ghwiki okanyoora Yëësu amarrë okomanya igha, enkaagha iyaaye iya ukurwa ko-kebhara kono aghi ko-Taata Waryobha ihikirë. Yëësu yaahanshirë abhantö abhaaye abha ko-kebhara kono, këmwëkëmwë. 2Yëësu na abheegha abhaaye, bhakaikara okorya ibhyakorya ibhya omoghoroobha. Enkaagha iyö, waanyöörrë Oghosambwa ghomarrë köngʼënërrya Yuuda, mura uwa Simööni Isikariyote, okore anyeere Yëësu inikö. 3Yëësu yaamanyirë igha, Taata yaamohaayë ubhwera ubhwa okotangata ëbhëntö bhyonswe igho. Ghwiki yaamanyirë igha nku-Waryobha yaarwa, kora ghwiki narikyora ku-Waryobha. 4Mbe, Yëësu akatigha okorya, akeemerra, akaruusya engansho iyaaye, akaghegha etauro akaibhoha mo-bhokende. 5Akahoma amanshë mwi-bhaköri, akasimya ukwisaabhya abheegha abhaaye amaghörö, na okobheeya na etauro eno yaarenga aibhöhirë.

6Hano Yëësu yaahikirë ku-Simööni Peetero, Peetero akamöbhöörya igha, “Omonene, nu-uwe ukutuna igha unyisaabhi amaghörö?” 7Yëësu akamohonshora igha, “Keno nkokora bhoono igho, uwe tokemanyirë hë, kasi noraashe okemanye nkaagha iyëndë.” 8Peetero akamötëëbhya igha, “Uwe tunyisaabhi amaghörö aghaane kora hake hë!” Yëësu akamohonshora igha, “Nyoore ntakwisaabhi amaghörö, omanye igha toona öbhömwë na öni hë.” 9Simööni Peetero akamötëëbhya igha, “Nyoore ni-igho ërë Omonene, otakanyisaabhya amaghörö agheene igho hë, kasi na amabhoko aghaane hamwë na omotwe ughwane ghwonswe.” 10Yëësu akamohonshora igha, “Ömöntö ono amarrë ukwisaabha ömöbhërë ghwonswe igho, uyö n-wa ukwisaabhya amaghörö agheene igho, ko bhoora taana riikwë kö-möbhërë hë. Bhëënyu m-buuya mörë, kasi te-bhonswe igho mu bhuuyabhuuya hë.” 11Yëësu yaarenga amanyirë ono akaamunyëërëëyë inikö, nkyo kyaaghërrë akaghamba igha, “Te-bhonswe igho mu bhuuyabhuuya hë.”

12Mbe, hano Yëësu yaamarrë ukwisaabhya abheegha abhaaye amaghörö, akatoora engansho iyaaye, akaikara ghwiki, akabhabhöörya igha, “Kasi momanyërrëëyi kiyö mbakörëëyë? 13Bhëënyu moramberekera igha, ‘Umwëghya,’ ghwiki moramberekera igha, ‘Omonene.’ M-buuya mokokora okomberekera igho, ko bhoora ni-igho ndë. 14Öni, nu-Mwëghya uwëënyu ndë, kora no-Monene uwëënyu ndë. Hano okomaaha mbaisaabhëri amaghörö, ku bhuyö na bhëënyu bhonswe, mobhenga moraisabhania amaghörö. 15Mbakörëëyë ëkërëngyö, ku bhuyö mokorenga kya bhuyö mbakörëëyë. 16No-bhoheene nkobhatëëbhya igha, omoghorwa, taatore okobha omonene kokera omonene uwaaye. Omotomwa, te-monene okokera ono amötömirë. 17Nyoore momanyërrëëyi bhuuya amangʼana ghayö ngambirë, mbe momanye igha, Waryobha naraabhangʼoore hano moraakore kya bhuyö ngambirë.

18“Tenkoghamba amangʼana ghayö kö-bhëënyu bhonswe igho hë, ko bhoora nemanyirë bhano naashaaghora bhabhe abheegha abhaane. Kasi bhoono ghano, n-ko okoghera iya okohekerania Amaandeko Amahörëëru ghano ghakoghamba igha, ‘Ömöntö ono yaaryanga ibhyakorya ibhyane, aigharanshööyë, abhaayë umubhisa uwaane.’#13:18 Maaha mo-ketabho ikya Zabhuri 41:9. 19Mbatëëbhëri amangʼana ghayö ghataraaikora, okore hano ghariikora, momanye igha, ‘Öni nö-Öni.’#13:19 Öni nö-Öni. Ni-igho Waryobha yaaitöbhööyë ko-Mosa igha riyö ndyo iriina iryaye, ensonga iyaamo igha Yehobha. Maaha mo-ketabho ikya Ukurishoka 3:14; Isaaya 43:10. 20No-bhoheene nkobhatëëbhya igha, ömöntö ono akwikërrya ono ntömirë, uyö nö-öni ukunyoora aikërëëyi. Na ono akunyikërrya, nkunyoora örë aikërëëyi Taata ono yaantoma.”

Yëësu arashumaashera ono araamunyeere inikö

(Mataayo 26:20-25; Maariko 14:17-21; Ruuka 22:21-23)

21Hano Yëësu yaaghambanga amangʼana ghayö, yaabhaabhayëëyë bhököngʼu mo-nkoro iyaaye, akaghamba harabhurabhu igho igha, “No-bhoheene nkobhatëëbhya igha, ömwë mö-bhëënyu mono, naraanyeere inikö.” 22Abheegha abhaaye bhakamaaherrana ko-maiso, bhakaroghoora ko bhoora bhataamanyirë nawë Yëësu yaashumaasheranga. 23Yaare-ho umwegha uwa Yëësu, ono Yëësu yaahanshirë bhököngʼu. Umwegha uyö yaarenga aikaayë haangʼë na Yëësu. 24Mbe, Simööni Peetero akasima umwegha uyö, akamötëëbhya igha, “Bhöörya Yëësu igha, n-nawë uyö mö-bhëëtö mono araakore ghayö?” 25Mbe, umwegha uyö, yaarenga aisëghëkirë ku-kikubha ikya Yëësu, akamöbhöörya igha, “Omonene, kana n-nawë uyö ukushumaashera?” 26Yëësu akamohonshora igha, “Ono nkushumaashera no-ono ndaatöngërri omokaate, mmöhërri.” Mbe, Yëësu akatöngërya omokaate, akahërrya Yuuda, mura uwa Simööni Isikariyote. 27Hano Yëësu yaamarrë okomohaana omokaate ghuyö, Oghosambwa ghokasoherra Yuuda. Yëësu akamötëëbhya igha, “Kora bhöngö ghano ukutuna okokora!” 28Kasi taaho ömöntö kora ömwë, ko bhano bhaaryanga hayö, ono yaamanyirë ikibhuno ikya Yëësu okoghamba amangʼana ghayö. 29Ko bhoora Yuuda we yaabheekanga ikighushi ikya seehera, ku bhuyö abhandë bhakakanya igha, Yëësu yaatëëbhyanga Yuuda igha, aghi okoghora ëbhëntö ibhya inyangi iya Epasaka. Kasi abhandë bhakakanya igha, Yëësu nkötëëbhya arë Yuuda igha, ahaane abhatöbhu seehera. 30Mbe, hano Yuuda yaamarrë okoghegha omokaate ghuyö, akeemokera-mo këmwë, akarishoka kebhara. Enkaagha iyö nu-bhutikö bhwaarë.

Yëësu arahaana abheegha abhaaye umughiro omohya

31Mbe, hano Yuuda yaarishökirë kebhara, Yëësu akatëëbhya abheegha abhaaye igha, “Bhoono ubhuhika ubhwane, öni Omoona uwa Ömöntö, haangʼë bhörë bhomaahwe harabhurabhu igho. Kora ubhuhika ubhwa Waryobha mboraamaahekane aharabhurabhu igho okohetera ko amangʼana aghaane. 32Kya bhono ubhuhika ubhwaye bhokomaahekana okohetera ko mangʼana aghaane, mbe na Waryobha wonswe nkwörökya arë abhantö ubhuhika ubhwane öni Omoona uwa Ömöntö, ghwiki n-hayö na hayö igho araabhööröki.

33“Bhëënyu abhaana abhaane, nendaabhe na bhëënyu ko-nkaagha enke igho. Murintuna, kasi kya bhono naatëëbhëri abhatangati abha Abhayahudi, ni-ighoigho nkobhatëëbhya na bhëënyu bhonswe igha, eno nkughya, temotore ukuhika-yo hë. 34Kasi bhoono ndabhahaana umughiro omohya, ndabharaghërrya igha, ‘Mohanshane. Kya bhono mbahanshirë, na bhëënyu bhonswe mohanshane ighoigho.’ 35Hano moraahanshane, hayö ho abhantö bhonswe igho bharaamanye igha, bhëënyu m-beegha abhaane mörë.”

Yëësu ararootera Peetero igha naraamwikaane

(Mataayo 26:31-35; Maariko 14:27-31; Ruuka 22:31-34)

36Mbe, Simööni Peetero akabhöörya Yëësu igha, “Kana Omonene, hai ukutuna ukughya?” Yëësu akamohonshora igha, “Ahasë hano nkutuna ukughya, uwe tootore ukughya-yo bhoono igho hë, kasi nurighya-yo nkaagha iyëndë.” 37Peetero akamöbhöörya igha, “N-kwakë Omonene ntaatore ukughya-yo bhoono igho? Öni ndatora ukukwa ko okoghera iya uwe!” 38Yëësu akamohonshora igha, “Uwe notora ukukwa ko okoghera iya öni? No-bhoheene nkökötëëbhya igha, teseeraghore, otaraanyikaana harë katatö.”

Currently Selected:

Yohana 13: ssc

Highlight

Copy