Yohana 12

Omokari ono yaahakirë Yëësu amaghuta

(Maariko 14:3-9; Mataayo 26:6-13; Ruuka 7:36-50)

1Hano syaatighaayë sinsikö isansabha igho inyangi iya Epasaka etaraahika, Yëësu akahika Bhetania, mu-kishishi keno yaaryökëëyi-mo Raazaaro ukurwa mo-bhaku. 2Mbe, abhantö abha hayö bhakamösërëënia, bhakamohensherra ibhyakorya ibhya omoghoroobha. Maarita akamutighinkanera, na Raazaaro yaarë mo-bhano bhaikaayë okorya hamwë na Yëësu ko-meeza. 3Mbe, Maryamu akaghegha inshubha iya amaghuta agha öbhöghöri obhonene agha ikirumba ikiiya, akahaka Yëësu ko-maghörö, akamweya ko-maghörö na situukya isyaye. Inyumba yonswe igho, ekeeshora ikirumba ikiiya ikya amaghuta ghayö.

4Kasi ömwë uwa abheegha abha Yëësu ono yaabherekerwanga igha Yuuda Isikariyote, ono yaanyëërëëyë Yëësu inikö, akaghamba igha, 5“N-kwakë amaghuta ghayö ghataghöriibhwi sidinaari amaghana atatö#12:5 Sidinaari amaghana atatö yaarë ehoorohooro iya sinsikö amaghana atatö. bhahaane abhatöbhu?” 6Yuuda teyaaghambirë igho ko okoghera iya ukwabhera abhatöbhu, kasi n-ko bhoora m-mwibhi yaarë. We yaarë ömöghëghi uwa ikighushi ikya seehera. Yaaibhanga bheno bhyaatoorwanga mu-kighushi muyö. 7Mbe, Yëësu akahonshora Yuuda igha, “Motakaanyankya omokari ono, umutighe, anhakirë amaghuta ko ökösëëmya urusikö rono bharembeeka. 8Momanye igha abhatöbhu mmoonabho sinsikö syonswe igho. Kasi öni, tembe hamwë na bhëënyu nsikö sonswe igho hë.”

Abhatangati abha Abhayahudi bharasëëmya ukwita Raazaaro

9Mbe, rikomo irya Abhayahudi, rekaighwa igha Yëësu ni-iyö arë, rekaghya-yo. Tebhaghëëyë iyö ko okoghera iya Yëësu umwene igho hë, kasi mbaatunanga bhamaahe na Raazaaro ono Yëësu yaaryökëri ukurwa mo-bhaku. 10Mbe, abhanene abha abhasëngëri, bhakakora ikiina ikya ukwita Raazaaro wonswe, 11ko bhoora ko okoghera iya ukuryökibhwa Raazaaro, Abhayahudi abhaaru bhakumiri Yëësu, bhakatighana na abhatangati abhaabho.

Yëësu araturungʼanwa Yërusarëëmu kya omokama

(Mataayo 21:1-11; Maariko 11:1-11; Ruuka 19:28-40)

12Hano bhwaakëëyë, rikomo rinene irya abhantö bhano bhaaishirë okorya inyangi iya Epasaka, bhakaighwa igha, Yëësu nko-nshera arë araasha Yërusarëëmu. 13Mbe, bhakaghegha amasagharya agha emetende, bhakaghya ukumuturungʼana. Bhakasherra bharaghamba igha,

“Hosana!#12:13a Hosana ne-ngʼana iya Ikiyunaani. Kare hayö ensonga iyaaryo yaarenga Töörya handë Tötööri, kasi ko-nkaagha iya Yëësu, engʼana iyö yaamanyekaini igha n-kituri ikya ukwörökya igha ömöntö uyö angʼöörrwë, ku bhuyö bharamukumya.

Waryobha akongʼoore ono ukuusha ko okohetera iriina irya Omonene Waryobha!

Angʼoorwe Omokama uwa Abhaisiraëri.”#12:13b Maaha mo-ketabho ikya Zabhuri 118:25-26.

14Mbe, Yëësu akanyoora ëkëmööri ikya itikërë, akariina-ko ekabha kya bhono yandëkirwë mo-Maandeko Amahörëëru igha,

15“Bhëënyu abhantö abha Sayuuni#12:15a Sayuuni ni-riina iryëndë irya Yërusarëëmu. motakoobhoha!

Maaha, omokama uwëënyu araasha,

ariinirë kö-këmööri ikya itikërë!”#12:15b Maaha mo-ketabho ikya Zakaria 9:9.

16Enkaagha iyö, abheegha abha Yëësu tebhaamanyërrëëyi ghayö hë. Kasi hano Yëësu yaaryökirë, ho bhaahiitirë igha, ghayö ngaandëkirwë, na ni-igho bhaamökörëëyë.

17Abhantö bhano bhaarë na Yëësu enkaagha eno yaabhërëkëëyë Raazaaro ukurwa mo-mbeehera akamuryökya ukurwa mo-bhaku, mbaaromaini amangʼana ghayö ko-bhantö. 18Mbe, abhantö abhaaru mbaaighuurë rikono reno Yëësu yaakörrë, ku bhuyö bhakaghya ukumuturungʼana. 19Abhafarisaayo bhakatëëbhania igha, “Moramaaha! Tetootore okokora kyokyonswe igho hë! Maaha bhono abhantö bhonswe igho bhakomosoorana.”

Yëësu arashumaashera uruku urwaye

20Bhaarenga-ho abhantö bhano bhataarë Abhayahudi, mo-bhantö bhano bhaaghëëyë Yërusarëëmu okosaasaama Waryobha ku-nyangi iya Epasaka. 21Mbe, abhantö bhayö bhakaghya ku-Firipö ono yaaruurë Bhëtisaida, mo-mokowa ughwa Ghariraaya, bhakamötëëbhya igha, “Omosookwa, torasabha tomaahane na Yëësu.” 22Firipö akaghya akatëëbhya Anderea amangʼana ghayö, ho bhaamarrë bhakaghya bhonswe igho ökötëëbhya Yëësu amangʼana ghayö. 23Yëësu akabhahonshora igha, “Enkaagha ihikirë iya Omoona uwa Ömöntö okohaanwa ubhuhika. 24No-bhoheene nkobhatëëbhya igha, hano imbusiro iya engano etatubhiriibhwi mo-marobha ikwe tekomera hë. Kasi hano eraatubhiribhwi, emare ikwe, hayö ho ikwama sehagho sinsharu. 25Ömöntö wowonswe igho ono ahanshirë öbhöhöru ubhwaye, uyö nkubhusikya arë. Kasi ono atatöniibhwi na öbhöhöru ubhwaye ko-kebhara kono, uyö nkorenda arë öbhöhöru ubhwaye, ko okoghera iya öbhöhöru ubhwa amakora ghonswe igho. 26Ömöntö wowonswe igho ono akuntighinkanera, ni-igha ansoorane. Ahasë hohonswe igho hano ndaabhe, hayö ho ömököri uwa emeremo uwaane araabhe. Taata naraasooke ömöntö ono akuntighinkanera.”

27Mbe, ho bhoono Yëësu yaaghambirë igha, “Enkoro iyaane nkobhaabhayera ërë. Bhoono n-kë ndaaghambe? Ngambe igha, ‘Taata, ntöörya ko-nkaagha iya inyaanyi eno?’ A a, tentore okosabha igho hë, ko bhoora n-ko okoghera iya amangʼana ghayö, nkyo kyaaghera nkaasha ko-kebhara kono. 28Taata Waryobha, honyora ubhuhika ubhwa iriina iryaho.”

Mbe, engamba ekarwera mu-ryobha eraghamba igha, “Nhönyööyë ubhuhika ubhwane, kora ghwiki nendaaghëndërri okobhohonyora.” 29Hano rikomo irya abhantö reno ryaarenga rimërëëyë haangʼë hayö ryaaighuure engamba iyö, abhandë mu-rikomo muyö bhakaghamba igha, “Iyö ne-nkobha ebhaghatëri.” Na abhandë bhakaghamba igha, “Maraika we ashumaashirë nawe.” 30Mbe, Yëësu akatëëbhya abhantö bhayö igha, “Engʼana iyö mwighuurë, të-köntöörrya hë, kasi m-bëënyu ëkötöörrya. 31Bhoono enkaagha iya Waryobha iya okobhotorra ekebhara keno ikiina, ihikirë. Bhoono Oghosambwa ghono ghokotonga ko-kebhara kono, ngoraatabhutwe kebhara iyö. 32Hano öni ndaariinibhwi kighörö, nendaarute abhantö bhonswe igho bhaashe ku-öni.” 33Yëësu yaaghambirë amangʼana ghayö, ukwörökya uruku rono akaakuurë.

34Mbe, rikomo irya abhantö rekahonshora Yëësu igha, “Twasoma mo-Maandeko Amahörëëru igha, Kiristo naraaghëndërri okobha-ho igho kughya iyö,#12:34 Maaha mo-ketabho ikya Zabhuri 110:4. bhoono ghwiki uwe oraghamba igha, ni-igha Omoona uwa Ömöntö ariinibhwi kighörö? Kana Omoona uwa Ömöntö n-nawë?” 35Yëësu akabhatëëbhya igha, “Obhorabhu mbökërëngë hamwë na bhëënyu ku-ribhagha ike igho. Möghëndërri okoghenda mo-merengaari ighya obhorabhu bhuyö, okore ikisuntë ketakaasha okobhakera, ko bhoora ömöntö ono akoghenda mu-kisuntë, tamanyirë ahasë akughya hë. 36Ko-nkaagha eno obhorabhu bhökërëngë ko-kebhara kono, mubhukumi, okore mobhe abhaana abha obhorabhu.”

Hano Yëësu yaamarrë okoghamba amangʼana ghayö, akaghya ukwibhisa.

Abhayahudi abhaaru bharanga ukukumya Yëësu

37Nokaanyoora Yëësu yaakörrë ebhemanyërryö ibhyaru ibhya amakono bharamaaha na amaiso aghaabho, kasi tebhaamukumiri hë. 38Yaabhaayë igho, okore ghahekerane amangʼana ghano ömörööti Isaaya yaaghambirë igha,

“Omonene Waryobha, taaho ömöntö ono yaaikërëëyi amangʼana aghëëtö hë.

Ghwiki n-nawë Omonene öörökëri singuru isyaye?”#12:38 Maaha mo-ketabho ikya Isaaya 53:1.

39Kiyö nkyo ikibhuno ikya ukwanga ukukumya, ko bhoora ghwiki Isaaya yaamarrë akaghamba igha,

40“Nabhahukurya amaiso,

nabhakora bhabhe na emetwe ëmëköngʼu,

okore bhatakaamaaha, bhatakaamanya,

bhatakaihonshora ukuusha ku-öni,

mbatööri.”#12:40 Maaha mo-ketabho ikya Isaaya 6:10.

41Isaaya yaaghambirë amangʼana ghayö, ko bhoora yaarööshë ubhuhika ubhwa Yëësu, ku bhuyö akaghamba amangʼana agha Yëësu.

42Nokaanyoora ni-igho yaarë, abhatangati abha Abhayahudi m-baaru bhaamukumiri, kasi ko bhoora bhoobhohanga Abhafarisaayo, tebhaghambanga harabhu igho igha bhamukumiri hë. Ko bhoora bhoobhohanga ukurughibhwa mu-nyumba iya esango iya Abhayahudi. 43Abhatangati bhayö, bhaahanshirë bhököngʼu ukukumibhwa na abhantö, okokera ukukumibhwa na Waryobha.

Abhantö bharebhotorrwa ibhiina ko mangʼana ghano Yëësu yaaghamba

44Mbe, Yëësu akakonga araghamba igha, “Ömöntö ono akunkumya, tö-öni akukumya hë, kasi nkukumya arë ono yaantoma. 45Ömöntö ono akommaaha, tö-öni akomaaha hë, no-ono yaantoma akomaaha. 46Öni naasha igha mbe obhorabhu ko-kebhara kono, okore kera ömöntö ono akunkumya atakaikara mu-kisuntë.

47“Ömöntö ono akwighwa amangʼana aghaane, aanga okoghaghoota, öni tenkomobhotorra ikiina hë, ko bhoora tenaasha ko-kebhara kono igha mbotorre abhantö ibhiina ibhyabho hë, kasi naasha igha ntööri ekebhara keno. 48Ömöntö ono akuunyanga, ono atakwikërrya amangʼana aghaane, aana ono arebhotorrwa ikiina. Amangʼana ghayö ngambirë, ngo gharemobhotorra ikiina ku-rusikö urwa umuhiko. 49Tengambirë amangʼana ghayö ku ubhwera ubhwane umwene hë, kasi Taata ono yaantoma, we yaandaghërrya amangʼana agha okoghamba, na kya bhono ndaaghaghambe. 50Ghwiki, nemanyirë igha amaraghërryö aghaaye, nkohaana gharë abhantö öbhöhöru ubhwa amakora ghonswe igho. Mbe, ghayö nkoghamba, nkoghaghamba ndë kya bhono Taata umwene yaantëëbhëri igha ngaghambe.”

Currently Selected:

Yohana 12: ssc

Highlight

Copy