Luk 9

1Yesu akeeta eikumi na babiri, yaabaha amaani n'obushoboorozi bw'okubinga ebyago byona n'okutamba endwara. 2Atyo yaaboohereza kuza kurangirira eby'obukama bwa Ruhanga n'okukiza abarwaire. 3Yaabagira ati: Mutagira eki mwagyendana, yaaba nkoni, eshaho, omugaati nari empiiha, kandi hatagira owaatwara ekanzu ibiri. 4Enju ei muraataahemu mugigumemu okuhitsya obu muraarugyeyo. 5Kandi abaraayangye kubaakiira, ku muraaze kuruga omu kirorero kyabo, mukunkumure omucuucu gw'aha bigyere, gubabeere mushinja. 6Batyo baimutsya orugyendo, baaruga omu kyaro baaza omu kindi nibagamba Amakuru Marungi, kandi nibakiza abantu ei baabaire nibaza yoona.

Herode na Yesu

(Mat. 14:1-12; Mar. 6:14-29)

7Omu biro ebyo, ow'eishaza Herode, ku yaahuriire byona ebyabaire nibikorwa, yaarimbagirirwa, ahabw'okuba abantu bamwe bakaba nibagira ngu Yohaana azookire omu bafiire. 8Abandi ngu, Eliya niwe agarukire kuboneka, n'abandi ngu, omwe aha barangi aba ira niwe ahimbuukire. 9Kwonka Herode yaagira ati: Yohaana? Ka naamutemireho omutwe. Mbwenu ogwo n'oha ou ndikuhuriraho ebyo? Nikyo yaayetengyeire munonga kumureeba.

Yesu obu ariisa abantu enkumi itaano

(Mat. 14:13-21; Mar. 6:30-44; Yoh. 6:1-14)

10Entumwa ku zaagarukire, zaateekyerereza Yesu byona ebi zaakozire. Bwanyima yaagyenda nabo, baaza omu rurembo orurikwetwa Beetisaida kwehereera. 11Kwonka ekimbuuro ky'abantu ku kyabimanyire, kyamukurata. Yaabaakiira gye, yaabagambira eby'obukama bwa Ruhanga; kandi abaabaire nibenda kutambirwa yaabakiza.

12Ku bwabaire bwaba omu mwabazyo munonga, eikumi na babiri baija ahu ari, baamugira bati: Ragiira abantu bagyende, baze omu byaro n'omu byanga ebiri haihi, kusherura oburaaro n'ebyokurya. Manya aha ahi turi n'eihamba. 13Yaabagarukamu ati: Mube niimwe mwabaha ebyokurya. Banu bati: Titwine kindi okwihaho emigaati etaano n'ebyenyanja bibiri. Kureka shana, waaba nooyenda ngu tuze kugurira abantu aba boona ebyokurya. 14Abo bantu bakaba bari nk'enkumi itaano.

Kwonka we yaaragiira abatendekwa be ati: Nimubashutamye omu miteeko y'abantu makumi ataano ataano. 15Baaba nikwo baagira, baabashutamya boona. 16Mpaho yaakwata egyo migaati etaano n'ebyo byenyanja bibiri, yaareeba ahaiguru, yaabisiimira, yaabicwamu, yaabikwatsa abatendekwa be kubigaburira abantu. 17Boona baarya, baahaaga. Ku baatorotoire oburagarika obwatsigaireho, bwaijuza ebitenga ikumi na bibiri.

Petero okwatura Yesu ku ari Kristo

(Mat. 16:13-19; Mar. 8:27-29)

18Eizooba rimwe Yesu wenka ku yaabaire naashaba, abatendekwa be bari aho, yaababuuza ati: Beitu abantu bagira ngu mba oha? 19Baamugarukamu bati: Ngu ori Yohaana Omubatizi, abandi ngu ori Eliya, kandi abandi ngu ori omwe aha barangi aba ira ozookire omu bafiire. 20Agaruka agira ati: Kwonka shi, imwe nimugira ngu ndi oha? Petero amugarukamu ati: Ori Kristo wa Ruhanga.

Yesu okuranga obw'okubanza eby'okubonabonesibwa kwe

(Mat. 16:20-28; Mar. 8:30—9:1)

21Yesu akabeehanangiriza munonga kutagira u baakigambira. 22Yaabagira ati: Omwana w'omuntu n'ow'okubonabonesibwa munonga; aryayangwa abakuru b'eihanga n'abahongyerezi abakuru n'abahangu b'eiteeka, aitwe, kwonka aha kiro kya kashatu azookye.

Emitwarize y'orikukuratira Kristo

23Kandi Yesu yaagambira boona ati: Omuntu weena orikwenda kunkuratira, ayeyogye, ayekorere omusharaba gwe buri izooba, haza ankuratire. 24Manya weena orikwenda kukiza amagara ge, aryagabuza; kwonka weena orikubuza amagara ge ahabwangye, aryagakiza. 25Mbwenu omuntu kiryamugasira ki okukubuura ensi yoona, haza akafeerwa nari akahwerekyereza amagara ge? 26Omuntu weena oriitwa enshoni ahabwangye n'ahabw'ebigambo byangye, nawe Omwana w'omuntu nikwo arimutwaza, ku ariizira omu kitiinwa kye n'ekya Ishe n'ekya baamaraika abarikwera. 27Buzimazima nimbagambira nti: Hariho abeemereire aha abatarihikwaho kufa batakareebire bukama bwa Ruhanga.

Yesu okuhinduka okundi

(Mat. 17:1-8; Mar. 9:2-8)

28Ku haahingwireho ebiro nka munaana Yesu aherize kugamba ekyo, yaatwara Petero na Yohaana na Yakobo, yaatemba orushozi kuza kushaba. 29Ku yaabaire naashaba, ahamaisho ge haahinduka, n'ebijwaro bye byayera nibimwamwatikana. 30Ago magingo baayecura abashaija babiri, Musa na Eliya, 31abaababonekyeire baine ekitiinwa, nibagaaniira nawe aha kufa kwe oku yaabaire arangariire kuhikiiririza Yerusalemu. 32Petero na bagyenzi be bakaba baitsirwe oturo nibagwagwana; kwonka ku baakangukireyo, baamureeba aijwire ekitiinwa, n'abo bashaija bombi beemereire nawe. 33Abo ku baabaire nibakimurugaho, Petero yaagira Yesu ati: Mwegyesa, ka ni kirungi itwe okushangwa turi aha! Mbwenu ka twombekye otuju tushatu, kamwe kabe akaawe, akandi aka Musa, n'akandi aka Eliya. Obwo akaba atarikumanya ki arikugamba.

34Ku yaabaire naakigamba, haija ekicu kyabasangira. Ku kyabashwekire, abatendekwa baatiina. 35Eiraka ryayema omuri ekyo kicu nirigira riti: Ogu n'Omwana wangye entoore, mumuhurire. 36Eryo iraka ku ryaherize kugamba, baashanga Yesu ari wenka. Abo batendekwa baahunama; omuri obwo bunaku tibaagira n'omwe ou baakigambira.

Yesu okukiza ekigwantsimbo

(Mat. 17:14-18; Mar. 9:14-27)

37Aha izooba eryakuratsireho, ku baabaire nibaruga aha rushozi, enyanja y'abantu yaija kubugana Yesu. 38Ku baamuhikire, omwe omuribo yaamuhoogyera n'eiraka rihango, ati: Mwegyesa, ninkweshengyereza, ndeebera mutabani wangye, niwe mwana wangye wenka. 39Ahonaaho ekyago ku kimubakura kiti, aborooga, kimusikankura, areeta eifuro; tikirahuka kumurugaho, kwonka ku kimurugaho, kimutsiga anoganogokire. 40Nyeshengyereize abatendekwa baawe kukibinga, tibaabaasa. 41Yesu yaamugarukamu naagira ati: Imwe bantu ab'obusingye obu abatarikwikiriza kandi abarikwehabagiza, ndyahitsya hi okuguma naimwe n'okubagumisiririza? Reeta aha mutabani waawe. 42Omwojo ku yaabaire naakiizira Yesu ekyago kyamutuura ahansi nikimusikankura. Yesu yaakabukira ekyo kyago, yaakiza ogwo mwojo kandi yaamugarurira ishe. 43Abantu boona baatangaarira obukuru bwa Ruhanga obutakareebwaga.

Yesu okuranga obwa kabiri eby'okubonabonesibwa kwe

(Mat. 17:22-23; Mar. 9:30-32)

Boona ku baabaire nibakitangaarira ebi Yesu yaakora, Yesu yaagambira abatendekwa be ati: 44Imwe mushemereire kuguma nimwijuka ebigambo ebi: Omwana w'omuntu naija kurekurirwa abantu. 45Kwonka bo ekyo eki yaabagambiire tibarakyetegyereize. Kikaba kibasherekirwe, ngu batakaamanya amakuru gaakyo, kandi nabo baatiina kumubuuza eki yaaheza kugamba.

Omukuru omu bantu

(Mat. 18:1-5; Mar. 9:33-37)

46Abatendekwa bakatandika kuhakana bonka na bonka, ngu omuribo omukuru n'oha? 47Yesu yaamanya ebiri omu mitima yaabo, yaakwata omwana muto, yaamwehitsya aha rubaju, 48yaabagira ati: Weena orikwakiira ahabwangye omwana ogu omuto, biri niinye ayakiire. Kandi weena orikuunyakiira, biri ayakiire ogwo owantumire. Manya orikuhereerukayo omuriimwe niwe mukuru.

Otarikurwanisa bantu ba Yesu biri n'owe

(Mar. 9:38-40)

49Yohaana akagira ati: Mwegyesa, tureebire omuntu naabinga ebyago omu iziina ryawe, twamuzibira, ahabw'okuba ti mukuratizi hamwe naitwe. 50Yesu yaamugarukamu ati: Timwakumuzibiire. Manya otarikubarwanisa biri n'ow'orubaju rwanyu.

Abasamariya okwanga kwakiira Yesu

51Obunaku bwa Yesu bw'okutwarwa omu iguru ku bwairiire haihi, yaamariirira kuza Yerusalemu, 52yaayohereza entumwa kumwebembera. Batyo baimutsya orugyendo, baaza omu kyaro kya Samariya kumuteguurira, 53kwonka abaayo baayanga kumwakiira, ngu ahabw'okuba akaba naaza Yerusalemu. 54Abatendekwa be, Yakobo na Yohaana, ku baakireebire, baamugira bati: Mukama waitu, nooyenda ngu turagiire omuriro gurugye omu iguru gubacwekyereze? 55Atyo yaahinduka yaabateisa. 56Mpaho baaza omu kindi kyaro.

Orwekwatso rw'abaayetsirwe kuba abatendekwa

(Mat. 8:19-22)

57Ku baabaire nibagyenda, baabugana omushaija, yaagira Yesu ati: Niinyija kukukuratira ahu oraaze hoona. 58Yesu amugarukamu ati: Zaamuha zigira amaaya, n'enyonyi z'omu kaabunga zigira ebyashuri, kwonka Omwana w'omuntu tagira n'ah'okuta orubaju.

59Yesu yaagira ondiijo ati: Nkuratira! Onu yaamugarukamu ati: Ndeka mbanze nze kuziika tata. 60Yesu ati: Reka abafiire babe nibo baaziika abafu baabo; ekyawe n'okugyenda okabuzya amakuru g'obukama bwa Ruhanga.

61N'ondiijo yaamugira ati: Mukama wangye, niinyija kukukuratira, kwonka banza ondekye nze kuragana n'ab'owaitu. 62Yesu yaamugira ati: Tihariho n'omwe okwata ekyoma ky'okuhingisa, akahinga naareeba enyima, oshemereire obukama bwa Ruhanga.

Okutuma abatendekwa makumi mushanju na babiri

Currently Selected:

Luk 9: RKK2008

Highlight

Copy