Luk 10
10
1Ebyo ku byahwaire, Mukama yaatoorana abandi batendekwa makumi mushanju na babiri, yaaboohereza babiri babiri kumubandiza omu birorero byona n'omu myanya yoona, ei yaabaire naaza kutaayaayira. 2Yaabagira ati: Eby'okugyesha ni bingi, kwonka abakozi ni bakye; n'ahabw'ekyo mushabe Mukama w'eigyesha ayohereze abakozi omu by'okugyesha bye. 3Mbwenu nimwirooko; reeba, nimbatuma muri nk'abaana b'entaama abari omu mishega. 4Mutatwara omufuko, nobu yaakuba efurebe nari enkaito; kandi omu muhanda mutagira ou mwaramutsya.
5Enju yoona ei muraataahemu, mubanze mugire muti: Obusigye bube ahari egi ka. 6Egyo nju ku eraabe erimu omuntu w'obusingye, endamutsyo yaanyu y'obusingye neija kumugumaho. Kwonka ku araabe atarimu, egyo ndamutsyo yaanyu y'obusingye mugigarukane. 7Mugume omuri egyo nju nimurya kandi nimunywa ebi baraabahe, ahabw'okuba omukozi ashemereire kuheebwa ebihembo bye. Mutariruga omu nju kuraara omu ndiijo.
8Ebirorero byona ebi murihikamu bakabaakiira gye, murye eki baabata omu maisho. 9Mukize abarwaire baamwo kandi mugire muti: Obukama bwa Ruhanga bwabahika haihi. 10Kwonka ku muraagume mwahika omuri ibara kirorero, baayanga kubaakiira, mushohore muze omu nguuto zaakyo, mugire muti: 11Twabatsigaho. Nangwa n'omucuucu gw'eki kirorero kyanyu, ogutukwaitse aha bigyere, ogu twayeragazaho, gubatuntumukire; kwonka mumanyire kimwe ku obukama bwa Ruhanga bwabahika haihi. 12Nimbagambira nti: Aha kiro ky'okucweraho orubanja, ekifubiro kya Sodoma kiryayemerwa okukira eky'ekyo kirorero.
Endembo ezitarikwegarukamu ziryakareeba
(Mat. 11:20-24)
13Iwe Koraziini 'we, oryakareeba! Naiwe Beetisaida, oryakareeba! Ahabw'okuba eby'okutangaaza ebyakoreirwe omuriimwe, kuri byakoreirwe omuri Tuuro na Sidoni, abaamwo bakaabaire baayegarukiremu kare bajwaire ebiguniya, bashutami omu iju. 14Kandi hoona aha kiro ky'okucweraho orubanja, ebifubiro bya Tuuro na Sidoni biryayemerwa okukira ebyanyu. 15Kandi naiwe Kafarinaumu, mbwenu noogira ngu oryatunguurwa ohikye ahaiguru? Ngaaha, oryabandikwa, ohikye okuzimu owa Nyamuteza.
16Weena obahurira, biri niinye ahuriire; n'oyanga kubahurira, biri niinye ayangiire; kandi abo abanga kumpurira, biri bangire kuhurira Ogwo owantumire.
Ekireetera entumwa kushemererwa
17Amakumi mushanju na babiri bakagaruka bashemereirwe munonga, baagira bati: Mukama, ku turikukoresa eiziina ryawe, nangwa n'ebyago nibitworobera. 18Yaabagarukamu ati: Ndeebire Sitaane naagwa, naahanantuka omu iguru nk'omurabyo. 19Reeba, mbahaire obushoboorozi bw'okusingyeera enjoka n'ebinyabushegu, n'okuribatiirira amaani g'omuzigu goona; tihariho kintu kyona ekiribakora kubi. 20Kwonka muteekiita ahabw'ebyago kuboorobera; kureka mushemererwe ahabw'okuba amaziina gaanyu gahandiikirwe omu iguru.
Amakuru Marungi okushuuruurirwa abataine bugobya
(Mat. 11:25-27; 13:16-17)
21Omuri ako kaanya Yesu ku yaaijuziibwe Mutima Orikwera okushemererwa, yaagira ati: Taata, Mukama w'eiguru n'ensi, ninkusiima ahabw'okuba ebintu ebyo okabishereka abanyabwengye n'abarikwetegyereza, waabishuuruurira abaana bato. Eego, Taata, ekyo nikyo waasiimire.
22Byona nkabikwatsibwa Tata, kandi tihariho omanya Mwana kureka Taata, nobu yaakuba omanya Taata kureka Mwana, n'ou Mwana asiima kumumushuuruurira.
23Bwanyima yaahindukira abatendekwa be, yaabagambira omu mubonano ati: Baine omugisha abu amaisho gaabo garikureeba ebi murikureeba! 24Manya nimbagambira nti: Abarangi baingi n'abagabe bakenda kureeba ebi murikureeba, kwonka tibarabireebire, n'okuhurira ebi murikuhurira, kwonka tibarabihuriire.
Ekiragiro ekikuru
25Hakaba hariho omwegyesa w'eiteeka, owaimukire akamubuuza naamutega, ati: Mwegyesa, nkaakora ki okutunga amagara agatahwaho? 26Nawe yaamugarukamu ati: Omu iteeka kikahandiikwa kita? Oshomamu ki? 27Ndi we ati: Kunda Mukama Ruhanga waawe n'omutima gwawe gwona, n'amagara gaawe goona, n'amaani gaawe goona, n'obwengye bwawe bwona, kandi na mutaahi waawe nk'oku oyekunda, 28Yesu yaamugira ati: Waagarukamu gye; kora otyo, nibwo oraatungye ago magara.
Enfumu y'Omusamariya omurungi.
29Kwonka omushaija ogwo ahabw'okwenda kweyeza, yaabuuza Yesu ati: Mutaahi wangye n'oha? 30Yesu yaamugarukamu ati: Eizooba rimwe omushaija akaba naaruga Yerusalemu naaza Yeriko, yaagwa omu bambuzi, baamucwijura byona ebi yaabaire aine, baamuteera baatsiga ari haihi n'okufa. 31Omuri ago magingo omuhongyerezi nawe yaareetwa ogwo muhanda naashuuma; ku yaareebire ogwo mushaija, yaamuraba hangahari. 32Kandi n'Omuleevi nikwo atyo, ku yaahikire omuri ogwo mwanya, nawe yaamureeba yaamuraba hangahari. 33Kwonka Omusamariya omugyenzi, ku yaamugwireho, yaamureeba ari atyo, yaamugirira esaasi. 34Yaamuhika, obuhuta bwe yaabwomooza amajuta na viino, yaabushemba. Atyo yaamukiriza yaamuta aha ndogoya ye ei yaabaire atembire, yaamutwara omu nju y'abagyenyi, yaamurwaza. 35Ku bwaseesire yaihayo shilingi ibiri, yaazikwatsa mukama w'egyo nju, yaamugira ati: Murwaze, ku ndaagarukye, eki oraayongyereho kyona, niinyija kukiihura. 36Noogira ngu ahari abo bonshatu, n'oha owaayorekire ku ari mutaahi w'ogwo mushaija owaagwire omu bambuzi? 37Onu ati: N'owaamugiriire esaasi. Yesu yaamugira ati: Irooko naiwe otwaze otyo.
Marita na Mariya
38Ku baabaire nibakigyenda, Yesu yaahika omu kyaro, omukazi orikwetwa Marita yaamutaasya omwe. 39Akaba aine omurumuna orikwetwa Mariya. Mariya ogwo yaashutama haihi n'ebigyere bya Mukama, yaaguma naahurira ebi arikugamba. 40Reero Marita, owaabaire naarabanisibwamu ebi yaabaire naakora, yaagira ati: Mukama, torikureeba ku murumuna wangye arikunnagiirira nkaheereza nyenka? Naakweshengyereza, mugambire ankwatse. 41Kwonka Mukama yaamugarukamu ati: Marita, Marita, oyemereize omutima noofa kubi n'ebintu bingi; 42haza ekirikwetengwa kiri kimwe kyonka. Mariya we yaatoorana omugabo ogurikukira oburungi ogutarimwakwa.
Oku Yesu yaayegyeise okushaba Ruhanga
(Mat. 6:9-13; 7:7-11)
Currently Selected:
Luk 10: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
