Kut 47
47
1Yosefu akaza owa Faraaho, yaamugira ati: Tata na beene tata n'amasyo gaabo g'entaama n'ag'ente n'ebi batungire byona, baizire nibaruga omu nsi ya Kanaani. Mbwenu bari omu kyanga kya Gosheni. 2Kandi omuri beene ishe, akaihamu abashaija bataano, yaabooreka Faraaho. 3Faraaho nawe abuuza bakuru ba Yosefu, ati: Mukora murimo ki? Nabo bamugarukamu bati: Itwe abairu baawe turi abariisa nka baatatenkuriitwe. 4Bongyera bamugira bati: Mbwenu twizire kushuuhuukira omuri egi nsi, ahabw'okuba itwe abairu baawe titwine h'okuriisiza amasyo gaitu, ahabw'enjara kuba nyingi omu nsi ya Kanaani. Mbwenu nitukweshengyereza otwikirize itwe abairu baawe tutuure omu kyanga kya Gosheni. 5Mpaho Faraaho agira Yosefu ati: Shoimwe na beene sho niiwe baizireho. 6Ensi ya Misiri ngigi ekuri omu maisho. Ha sho na beene sho ah'okutuura, aharungi munonga omuri egi nsi. Barekye batuure omu kyanga kya Gosheni. Kandi omuribo ku oraabe noomanyamu abashaija abarikubaasa, obahe omurimo gw'okureeberera amasyo gangye. 7Bwanyima Yosefu yaareeta Yakobo ishe, yaamworeka Faraaho; na Yakobo yaashabira Faraaho omugisha. 8Faraaho agira Yakobo ati: Oine emyaka engahi y'obukuru? 9Onu amugarukamu ati: Emyaka ei mmazire omu nsi omu bushuuhuuki ni igana na makumi ashatu; haza embeereire mikye kandi mibi. Terikwingana n'ei baatatenkuru baamazire nibashuuhuuka. 10Yakobo atyo ashabira Faraaho omugisha; handi hakye ashohora, aruga ahi Faraaho yaabaire ari. 11Ebyo ku byahwaire Yosefu yaashoboorora ishe na beene ishe yaabaha ah'okutuura omu nsi ya Misiri omu kyanga ekirungi munonga ekya Raamuseesi nk'oku Faraaho yaaragiire.
12Kandi Yosefu yaatungira ishe na beene ishe n'ab'eka ya ishe ebyokurya nk'oku emiryango yaabo yaabaire eri.
Abanyamisiri okwetunda ahabw'enjara
13Mbwenu ahabw'ensi yoona kutabamu byokurya, enjara ekaba nyingi munonga; ekyo kyareetera ab'omu nsi ya Misiri n'eya Kanaani kukuuhuzibwa enjara. 14Yosefu reero yaarundaana empiiha ezi yaashanguriize omu nsi ya Misiri n'eya Kanaani, ezaarugire omu byokurya by'omujuma ebi abantu baaguzire. Haza ezo mpiiha Yosefu yaazitwara omu nju ya Faraaho.
15Empiiha ku zaahwereire kimwe omu nsi ya Misiri n'eya Kanaani, Abanyamisiri boona baayetuurira Yosefu, baamugira bati: Tuhe ebyokurya. Mbwenu ebyo tufe nootureeba? Manya empiiha zituhwaireho! 16Yosefu nawe abagarukamu ati: Empiiha ku ziraabe zibahwaireho, nimuheyo amatungo gaanyu, naanye mbahe ebyokurya omu mwanya gwago. 17Batyo baareetera Yosefu amatungo gaabo, nawe yaabaha ebyokurya, ebi bahingire nawe embaraasi, amasyo g'entaama n'ag'ente n'endogoya. Atyo abaha ebyokurya ebi baashakiise amatungo gaabo goona omuri ogwo mwaka.
18Omwaka ogwo ku gwahwaire, baagaruka baamwetuurira omu gundi ogwakuratsireho; baamugira bati: Mukama waitu, mbwenu nk'oku orikutureeba, mukama waitu, titwine ki tutsigaize, kureka emibiri yaitu n'ebibanja byaitu. 19Ebyo itwe hamwe n'ebibanja byaitu tufe nootureeba? Tugure n'ebibanja byaitu, haza otuhe ebyokurya; reero itwe n'ebibanja byaitu tube abahuuku ba Faraaho. Kandi otuhe embibo, tubone kugumaho tutafa, n'egi nsi erekye kuhinduka amatongo.
20Atyo Yosefu agurira Faraaho ensi ya Misiri yoona; ahabw'okuba Abanyamisiri boona ku baateirwe enjara nyingi, baatunda ebibanja byabo. Egyo nsi yaaba eya Faraaho, 21kandi n'abantu baamwo yaabahindura abahuuku, okwiha aha muheru gw'ensi ya Misiri okuta aha gundi. 22Kureka ekyanga ky'abahongyerezi nikyo ataraguzire, ahabw'okuba bo Faraaho akaba abateeraireho egabo yaabo ehamire, batungirwe egyo gabo ei abahaire; nikyo bataratundiire bibanja byabo. 23Bwanyima Yosefu yaagira abo bantu, ati: Reeba eri izooba, imwe n'ebibanja byanyu baabagurira Faraaho. Mbwenu naabaha embibo ngigi, mugyende mugibibe omu misiri. 24Reero omu igyesha muhe Faraaho kimwe kya kataano ky'ebi mushaarwire. Kandi ebicweka bina bya kataano bibe ebyanyu by'embibo, ebindi bibe ebyokurya byanyu n'ab'omu maka gaanyu n'abaana baanyu abato. 25Nabo bamugarukamu bati: Ebishi waatutambira titwafa! Mbwenu mukama waitu, turekye tugume turi abahuuku ba Faraaho. 26Yosefu atyo ataho ekiragiro ky'ebibanja bya Misiri, n'eri izooba kikiriho, ekirikugira kiti: Faraaho aryaguma atungye kimwe kya kataano; kureka ebibanja by'abahongyerezi nibyo bitarabaire bya Faraaho.
Yakobo okurahiza Yosefu
27Abaisiraeli bakatuura omu nsi ya Misiri, omu kyanga Gosheni; baatungirayo, baazaara kandi baakanya munonga. 28Yakobo yaatuura Misiri yaamarayo emyaka ikumi na mushanju. Yakobo atyo yaahitsya emyaka igana na makumi ana na mushanju y'obukuru.
29Obunaku bwa Isiraeli bw'okufa ku bwabaire buri haihi kuhika, yaayeta omutabani Yosefu, yaamugira ati: Ku oraabe nonkunda, ta omukono gwawe ahansi y'ekibero kyangye, haza ondaganise okutandeebya, kureka okunkorera eky'amazima. Otarinziika Misiri, 30kureka okundeka nkashanga baatatenkuru. Oryantwara, onyihe omuri Misiri, onziikye ahi baabaziikire. Yosefu amugarukamu ati: Ndyatwaza nk'oku waagamba. 31Onu amugira ati: Mbwenu nu ndahira. N'onu amurahira. Bwanyima Isiraeli ainama aha mutwe gw'ekitanda kye.
Yakobo okushabira Yosefu n'abatabani omugisha
Currently Selected:
Kut 47: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
