Kut 46
46
1Mpaho Isiraeli yaimutsya orugyendo n'esika ye yoona, yaahika Beerisheba, yaatambirirayo Ruhanga wa Isaaka ishe ebitambo. 2Reero Ruhanga yaayeterayo Isiraeli omu kworekwa kwa nyekiro ati: Yakobo, Yakobo! Onu amwetaba ati: Ndi aha, Mukama wangye! 3Onu amugira ati: Niinye Ruhanga, Ruhanga wa sho. Otatiina kushuuma Misiri, ahabw'okuba ndyakuhindurirayo eihanga rihango. 4Niinyija kuza naiwe Misiri, kandi ndyagaruka nkwiheyo; haza Yosefu niwe arikukwata ahamaisho nookaba. 5Yakobo atyo aimutsya aruga Beerisheba. Na beene Isiraeli batwara ishebo ogwo Yakobo n'abaana baabo abato n'abakazi baabo omu bigaari ebi Faraaho yaayohereize kumureetamu.
6Kandi batwara n'amasyo gaabo n'ebintu byabo ebi baatungiire omu nsi ya Kanaani; baza Misiri: Yakobo hamwe n'oruzaaro rwe rwona, 7abatabani na beene batabani be, bahara be na bahara ba batabani be; oruzaaro rwe rwona aija narwo Misiri.
Oruzaaro rwa Yakobo
8Mbwenu aga nigo maziina g'oruzaaro rw'abaana ba Isiraeli Yakobo n'abatabani abaizire Misiri. Reubeeni omujigaijo gwa Yakobo, 9na beene Reubeeni aba: Hanoki, Paalu, Hezironi na Karumi. 10Beene Simeoni ni Yemueli, Yamini, Ohadi, Yakini, Zohari na Shauli omutabani w'omunyakanaanikazi. 11Beene Leevi ni Gereshooni, Kohati na Meraari. 12Beene Yuda ni Eeri, Onani, Sheela, Pereezi na Zeera; kwonka Eeri na Onani bakagwa omu nsi ya Kanaani. Reero beene Pereezi ni Hezirooni na Hamuli. 13Beene Isakaari ni Toola, Puuva, Yobu na Shimirooni. 14Beene Zebuluuni ni Seredi, Eloni na Yahaleeli. 15Abo nibo batabani ba Leeya abu yaazairweho Yakobo omuri Padanarama hamwe na muhara we Dina. Boona hamwe abaana be aboojo n'abaishiki bakaba bari makumi ashatu na bashatu.
16Beene Gaadi ni Zifioni, Haagi, Shuuni, Ezibooni, Eeri, Aroodi na Areeli. 17Beene Asheri ni Imuna, Ishuva, Ishivi, Beriya hamwe na Seera munyaanyabo. Kandi beene Beriya ni Heberi na Malikieli. 18Abo ni batabani ba Zilipa ou Labaani yaashagariire Leeya muhara we, kandi nibo yaazairweho Yakobo; abantu ikumi na mukaaga.
19Reero batabani ba Rakeeli muka Yakobo, ni Yosefu na Benyamiini. 20Yosefu omu nsi ya Misiri akazaarirayo Manaase na Efuraimu, abu yaazaire ahari Asenata muhara wa Potifeera omuhongyerezi wa Oni. 21Kandi beene Benyamiini ni Beela, Beekeri, Ashibeeli, Geera, Naamani, Ehi, Roshi, Mupimu, Hupumu na Aridi. 22Abo nibo batabani ba Rakeeli abu yaazairweho Yakobo, boona hamwe abantu ikumi na bana.
23Mwene Daani ni Hushimu. 24Beene Nafutaali ni Yahazeeli, Guuni, Yezeri na Shileemu. 25Abo ni batabani ba Biliha ou Labaani yaashagariire Rakeeli muhara we, akabazaarwaho Yakobo boona abantu mushanju.
26Abantu boona ab'enda ya Yakobo abaizire omuri Misiri abu yaayezaariire, otabariiremu bakaamwana, boona hamwe bakaba bari abantu makumi mukaaga na mukaaga. 27Kandi batabani ba Yosefu abu yaazaariire Misiri, bakaba bari babiri. Batyo abantu boona ab'eka ya Yakobo abaizire Misiri bakaba bari makumi mushanju.
Yakobo okureebana na Yosefu
28Yakobo akatuma Yuda ahari Yosefu, ngu amushangye Gosheni. Reero ku baahikire omu kyanga kya Gosheni, 29Yosefu yaatebeekanisa ekigaari yaaza kubugana Isiraeli ishe omuri Gosheni. Atyo amwetondera, amugwa omu kifuba amara akaanya naamuririramu. 30Isiraeli agira Yosefu, ati: Nobu naakufa hati, niho naakureeba nkamanya ku obaho.
31Yosefu nawe agira beene ishe n'ab'eka ya ishe ati: Naaza kugyenda ngambire Faraaho, mmugire nti: Beene tata n'ab'eka ye ababaire batwire omu nsi ya Kanaani naatsiga baija; 32kandi abo bantu n'abariisa, ahabw'okuba batuura nibariisa amasyo. Na mbwenu bareetsire amasyo gaabo g'entaama n'ag'ente n'ebindi byona ebi batungire. 33Faraaho ku araabeete yaababuuza ati: Mukora murimo ki? 34Naimwe mumugire muti: Itwe abairu baawe turi abariisa b'amasyo, okwiha omu buto n'okuhitsya hati itwe na baatatenkuriitwe mubone kutuura omu kyanga kya Gosheni, ahabw'okuba omuriisa weena aba ekihagaro aha Banyamisiri.
Yosefu okworeka Faraaho beene ishe na ishebo
Currently Selected:
Kut 46: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
