Kut 45
45
1Bwanyima Yosefu ku yaaremirwe kwegumya omu maisho g'abaabaire bamushagatiire, yaagamba n'eiraka rihango ati: Abantu boona abari aha bampigize! Tihaagira muntu weena owaatsigaraho Yosefu naayegambira beene ishe. 2Atyo arira naaborooga; Abanyamisiri n'ab'eka ya Faraaho bamuhurira. 3Yosefu agira beene ishe, ati: Niinye Yosefu! Ebyo tata akibaho? Kwonka beene ishe babura eki baamugarukamu, ahabw'okuba obwoba bukabaitira omu maisho ge.
4Yosefu nikwo kugira beene ishe ati: Nyaabura 'mwe, naabeeshengyereza nimumpikye. Nabo baamwirira haihi. Reero abagira ati: Niinye Yosefu mwene shoimwe, ou mwagurize kutwarwa Misiri. 5Mbwenu murekye kugira obujune nari kwefuuza, ngu ahabw'okuba mukanguza naija kunu. Manya Ruhanga niwe yaanyohereize kubabandizayo, ngu mukize amagara. 6Mbwenu enjara emazire omuri egi nsi emyaka ebiri, kandi hakiriyo endiijo myaka etaano ei abantu batarihingiramu, nobu kwakuba okugyesha. 7Nikyo Ruhanga yaanyoherereize kubabandiza kunu kubakwatira eihembe omu nsi, ngu omuriimwe hagire abaahonokaho. 8N'ahabw'ekyo owaanyohereize kunu tiimwe, kureka ni Ruhanga. Niwe yampindwire enganzi ya Faraaho, kuba mukama w'eka ye, kandi omutegyeki w'ensi ya Misiri yoona.
9Mbwenu murahukye, mugyende muhikye tata. Haza mumugire muti: Mutabani waawe Yosefu akutumireho ati: Ruhanga akampindura omutegyeki wa Misiri. Shuuma onshangye kunu, haza oteeziringa. 10Noija kutuura omu kyanga kya Gosheni, ombe haihi, iwe n'abaana baawe na baijukuru baawe n'amasyo gaawe g'entaama n'ag'ente n'ebi otungire byona. 11Reero okwo niyo ndaakuheere eby'okukutunga, ngu iwe n'ab'eka yaawe na boona abu oine mutakaitwa obworo, ahabw'okuba hakiriyo endiijo myaka etaano y'enjara. 12Kandi mbwenu reeba, imwe na murumuna wangye Benyamiini nimwereebera ku ebyo naabibagambisisa akanwa. 13Mugambire tata eby'ekitiinwa kyangye kyona eki nyine omuri Misiri, na byona ebi mureebire. Nimurahukye mureete tata kunu.
14Mpaho Yosefu yaagwa Benyamiini omu kifuba, yaarira; amarira nigaitururukira aha ibega rya Yosefu. 15Bwanyima yaanywegyera beene ishe boona naarira. Ebyo ku byahwaire beene ishe baagaaniira nawe.
Faraaho okutuma ahari Yakobo kwija Misiri
16Enkuru ku yaahikire owa Faraaho, ngu beene ishe Yosefu baizire, kyagwisa gye munonga Faraaho n'abaheereza be. 17Faraaho yaagira Yosefu, ati: Gambira beene sho oti: Nimugire muti: mwekoreze enyamaishwa zaanyu, mugarukye omu nsi ya Kanaani. 18Haza mureete shoimwe n'ab'omu ka yaanyu, mwije kunu ahi ndi. Naanye niinyinja kubaha ekyanga ekirungi munonga omuri Misiri, murye aha bishaju by'egi nsi; 19kandi obaragiire oti: Nimugire muti: mutware ebigaari by'omuri Misiri, kubireeteramu abaana baanyu abato, n'abakazi baanyu, haza mureete shoimwe, mwije. 20Kandi oti: Murekye kusaasibwa okutsigaho ebyanyu, ahabw'okuba ebirungi byona eby'omu nsi ya Misiri, n'ebyanyu.
Beene Yakobo okugaruka Kanaani kwakiira ishebo.
21Beene Isiraeli nabo nikwo baatwarize. Yosefu yaabaha ebigaari, nk'oku Faraaho yaaragiire; yaabaha n'entanda z'okuriira omu muhanda. 22Boona oku baingana, buri omwe yaamuha ekijwaro ky'okujwara aha bugyenyi; kwonka Benyamiini we yaamuha ebijwaro bitaano n'ebicweka by'efeeza magana ashatu. 23Reero yaatwekyera ishe endogoya ikumi, zeekoreire ebintu birungi bya Misiri, n'ezindi ndogoya ebuguma zeekoreire ebyokurya by'omujuma n'emigaati, n'entanda ya ishe ey'okuriira omu muhanda. 24Bwanyima yaayohereza beene ishe abo, kandi ku baabaire nibaimutsya, yaabeehanangiriza ati: Mutatonganira omu muhanda.
25Batyo bainamuka baaruga Misiri, baahika omu nsi ya Kanaani, ahari Yakobo ishebo. 26Baamugira bati: Yosefu akibaho, kandi niwe mutegyeki w'ensi yoona eya Misiri. Atyo Yakobo omutima gumugwa omu kahuriko; ahabw'okuba taraikiriize ebi baamugambiire. 27Kwonka ku baamuteekyerereize byona ebi Yosefu yaabagambiire, kandi yaareeba ebigaari bi Yosefu amutwekyeire kumwakiira, ishebo Yakobo omutima gwamugaruka omunda. 28Isiraeli nikwo kugira ati: Ekyo nikimara; Yosefu omwana wangye obu akiriho, ka ngyende mmureebe ntakafiire.
Yakobo n'ab'eka ye okushuuhuukira Misiri
Currently Selected:
Kut 45: RKK2008
Highlight
Share
Copy
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
